ཨུ་རྒྱན་ཡུལ་གྱི་ཡུལ་རབས་བཤད་པའི་ལེའུ།
འདི་ཡི་དུས་ན་ནུབ་ཕྱོགས་ཨུ་རྒྱན་ཡུལཿ ཨུ་རྒྱན་ཡུལ་ལ་འཛམ་གླིང་སུམ་གཉིས་ཡོདཿ ཡུལ་གྱི་ཆགས་ལུགས་ཆ་ལང་ཁ་སྤུབ་འདྲཿ ཡུལ་ཆེན་ལྔ་དང་ཡུལ་གླིང་ཉི་ཤུ་གཅིགཿ ཡུལ་གྲུ་ཆེན་པོ་བྱེ་བ་བཅོ་བརྒྱད་དགུཿ གྲོང་ཁྱེར་ཆེན་པོ་དགུ་བཅུ་རྩ་དྲུག་ཡོདཿ ཡུལ་ཆེན་དྷ་ན་ཀོ་ཤ་དབུས་ན་ཡོདཿ གྲོང་ཁྱེར་ཆེན་པོ་ཉི་ཤུ་རྩ་གཉིས་ཡོདཿ གྲོང་ཁྱེར་ཆེན་པོ་མཛེས་ལྡན་ཞེས་བྱ་བཿ དེ་ཡི་དབུས་ན་ཐོར་ཅོག་དགུ་ལྡན་ཡོདཿ བཻ་ཌཱུརྻ་ཡི་ཕོ་བྲང་རིན་པོ་ཆེཿ འོད་འབར་བྱིན་ཆེ་གྲུ་བཞིར་གསེར་གྱི་ལྕོགཿ གཡུ་ཡི་ཁ་བད་དྲ་བ་དྲ་ཕྱེད་ལྡནཿ དེ་ལ་ཁྱམས་དང་སྒོ་ཁྱུད་བཞི་དང་བཅསཿ ལྕགས་རི་དང་ནི་མངའ་ཡབ་མཛེས་པས་བསྐོརཿ ནང་ན་རྒྱལ་པོ་ཨིནྡྲ་བོ་དྷི་བཞུགསཿ ནང་བློན་བརྒྱ་དང་ཕྱི་བློན་སྟོང་གིས་བསྐོརཿ བཙུན་མོ་འོད་འཆང་མ་ནི་ཁབ་ཏུ་བཞེསཿ ཐོར་ཅོག་དགུ་ལྡན་དབུས་ན་རང་བྱུང་གོཿ མཆོད་རྟེན་ཧེ་རུ་ཀ་ཡི་ལྷ་ཁང་ཡོདཿ རྒྱུ་ནི་རིན་ཆེན་སྣ་ཚོགས་ལས་གྲུབ་པཿ འོད་ཟེར་དྲ་བ་མང་པོ་ཕྱོགས་བཅུར་འཕྲོཿ ཁ་དོག་དཀར་པོ་རྣམ་པ་གཟི་ལྟ་བུཿ རྒྱུ་ནི་རིན་ཆེན་ཤེལ་ལས་ལེགས་གྲུབ་པའིཿ རང་བྱུང་གཟི་འདྲའི་མཆོད་རྟེན་ཁྲ་ཁྱུག་ཁྱུགཿ དབྱིབས་ལེགས་བང་རིམ་དང་བཅས་ཟླུམ་པར་གནསཿ རྒྱང་གྲགས་གཅིག་ནི་གྱེན་དུ་འཕགས་པ་ལཿ དུས་ནི་
༼༣༩ན༽ནམ་ཡང་འཇིག་པ་མི་མངའ་བཿ ཚད་ནི་ཕྱོགས་རེར་ནངས་པའི་འདོམ་གང་ཚདཿ དཔག་ཚད་གསུམ་གསུམ་ཡོད་པ་མཚན་ལྔར་ལྡནཿ ཆོས་བཟང་སྤྲིན་གྱི་ཡང་རྫོང་ཞེས་ཀྱང་བྱཿ རྡོ་རྗེ་མི་ཤིགས་ཕུག་པ་ཞེས་ཀྱང་བྱང་ཿ སྤྲིན་ནག་འདུས་པའི་དུར་ཁྲོད་ཅེས་ཀྱང་བྱཿ བཀོད་པ་ལྷུན་གྲུབ་ཕོ་བྲང་ཞེས་ཀྱང་བྱཿ ཧེ་རུ་ཀ་ཡི་ལྷ་ཁང་ཞེས་ཀྱང་བྱཿ ཆོས་འབྱུང་རྣམ་པར་དག་པ་གྲུ་བཞི་པཿ སྒོ་ནི་གཅིག་བགྲངས་གཉིས་བགྲངས་བརྒྱ་རྩ་བརྒྱདཿ སྒོ་དང་རྟ་བབས་བཅས་པའི་ཕྱི་རོལ་ནཿ གནོད་སྦྱིན་བསྲུང་བའི་མཁར་ཆེན་སྟོང་ཡོད་པཿ སྒོ་བཞི་འཁོར་ས་བརྒྱ་དང་བརྒྱད་ཅུ་ཡོདཿ མེ་ཡི་འོབས་དང་གཅན་གཟན་འཕྲང་དང་ནིཿ དུག་གི་མཚོ་དང་ཀེང་རུས་རི་རབ་བསྐོརཿ དུར་ཁྲོད་ལྷ་མོའི་འཁོར་དང་ནད་གདོན་གདོལཿ ས་ལ་སུ་ལ་པགས་པའི་བྲང་ཆེན་བསྐོརཿ ཐ་མ་རྡོ་རྗེ་ཕ་ལམ་ལྕགས་རིས་བསྐོརཿ སྤྲིན་གྱི་རྒྱལ་པོ་གང་བ་འཁྲིགས་པ་དང་ཿ འཇིག་རྟེན་མཁའ་འགྲོ་ལས་ཀྱི་མཁའ་འགྲོ་མཿ སྒོ་བའི་ཌཱ་ཀི་ཡེ་ཤེས་ཌཱ་ཀི་མཿ བཀྲ་ཤིས་སྒོ་མང་ལྕགས་རི་བརྒྱད་ཀྱིས་བསྐོརཿ འོག་ན་འཇིག་རྟེན་མཁའ་འགྲོས་སྐོར་བ་བྱེདཿ དེ་ཡི་འོག་ནས་ཀླུ་རྣམས་མཆོད་པ་འབུལཿ བར་ན་ལས་ཀྱི་ཌཱ་ཀིས་སྐོར་བ་བྱེདཿ སྟེང་ན་ཡེ་ཤེས་ཌཱ་ཀིས་སྐོར་བ་བྱེདཿ བྲག་གི་ཐེམ་སྐས་བུམ་སྟེན་ལོགས་བཞི་ལཿ འཕྲིན་ལས་བཞི་ཡི་ཕྱག་རྒྱ་བཞིས་རྒྱས་གདབཿ
༼༣༩བ༽བུམ་པར་རྟེན་འབྲེལ་སྙིང་པོ་རང་བྱུང་ཤརཿ སྒོ་བཞིའི་སྟོད་ན་ཧཿརིཿནིཿསཿཤརཿ སྒོ་སྨད་མགོན་པོའི་སྲོག་སྙིང་ཡི་གེ་བཅུཿ མཚན་མོ་མེ་འབར་ཉིན་མོ་འཇའ་རུ་འཁྲིགསཿ ཉིན་མཚན་རྒྱུན་དུ་སྤྲིན་དང་ཁུ་རླངས་དགབཿ ཆུ་ཆེན་བསྐོར་ཞིང་ཤིང་སྣའི་ནགས་ཚོགས་འཐུགཿ བྱ་དང་གཅན་གཟན་མང་པོ་ངར་སྐད་འདོནཿ བུམ་པའི་ནང་ནི་གསང་སྔགས་ཆོས་ཟབ་གང་ཿ བྲེ་ནང་དེ་བཞིན་གཤེགས་པའི་རིང་བསྲེལ་བཞུགསཿ དེའི་ནང་ལུང་བསྟན་ལྷ་ཁང་ཞེས་བྱ་བཿ མདོག་ནི་མཐིང་ཁ་སྣང་བའི་གཟུགས་སུ་གྲུབཿ ལག་པས་རེག་པའི་གཟུགས་སུ་མ་གྲུབ་པཿ འཇའ་འོད་ལྟ་བུའི་རང་བཞིན་ལྷ་ཁང་ཡོདཿ དེ་ཡི་མཐའ་མར་མཁའ་འགྲོ་མ་ཡི་ཡུལཿ ཌཱ་ཀི་འབུམ་ཁྲི་བུད་མེད་གྲོང་ཁྱེར་བཞིཿ དེ་དག་གི་ནི་མཆོད་ཁང་རེ་རེ་ནཿ གསང་སྔགས་ཟབ་མོ་དཔག་ཏུ་མེད་པ་བཞུགསཿ ཐོར་ཅོག་དགུ་ལྡན་དབུས་སུ་བདག་པ་ཡིཿ ཤར་ན་ཛམྦཱུ་མཱ་ལེའི་ཡུལ་ཞེས་ཡོདཿ ལྷོ་ན་བརྦ་ཏ་ཡི་གླིང་ཞེས་ཡོདཿ ནུབ་ན་ནཱ་ག་སིདྡྷིའི་ཡུལ་ཞེས་ཡོདཿ བྱང་ན་ཀ་ཀ་ཤམྦྷ་ལ་ཞེས་ཡོདཿ ཤར་ལྷོ་མཚམས་ན་དྲང་སྲོང་མེ་ལྷའི་ཡུལཿ ལྷོ་ནུབ་མཚམས་ན་སྲིན་པོའི་ཡུལ་ཞེས་ཡོདཿ ནུབ་བྱང་མཚམས་ན་རླུང་ལྷའི་ཡུལ་ཞེས་ཡོདཿ བྱང་ཤར་མཚམས་ན་བགེགས་ཀྱི་ཡུལ་ཞེས་ཡོདཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་
༼༤༠ན༽པ་རྒྱས་པར་བཀོད་པ་ལསཿ ཨུ་རྒྱན་ཡུལ་གྱི་ཡུལ་རབས་བཤད་པའི་ལེའུ་སྟེ་བཅུ་གཉིས་པའོཿ ཿཐ་ཐ་ཉྲ་རྒྱ་རྒྱཿ ཿ