རྒྱལ་པོ་སྤྱན་མེད་འབྱོར་ལྡན་གྱིས་དཀོར་མཛོད་སྦྱིན་པར་བཏང་བའི་ལེའུ།
རིན་ཆེན་ཕོ་བྲང་ལྕོག་དགུ་ལྡན་པ་ཡིཿ བཻ་ཌཱུརྻ་ཡི་འོད་ཟེར་འབར་བ་ནཿ ཨུ་རྒྱན་ཡུལ་ཁམས་དག་ལ་དབང་སྒྱུར་བའིཿ རྒྱལ་པོ་སྤྱན་མེད་འབྱོར་ལྡན་ཞེས་ཀྱང་བྱཿ ཆོས་རྒྱལ་པྲ་ཛྙཱ་ཀཱིརྟི་ཞེས་ཀྱང་བྱཿ རྒྱལ་པོ་ཆེན་པོ་གའུ་ཤ་ཞེས་བྱཿ རྒྱལ་པོ་དྷ་ན་པཱ་ལ་ཞེས་ཀྱང་བྱཿ རྒྱལ་པོ་ཨིནྡྲ་བོ་དྷི་ཞེས་ཀྱང་བྱཿ དེ་ནས་རྒྱལ་པོ་སྤྱན་མེད་འབྱོར་ལྡན་དེཿ མངའ་ཐང་འབྱོར་པ་ཆེ་དེ་མིག་གཉིས་ལོང་ཿ སྲས་མེད་རྒྱལ་བློན་ཐམས་ཅད་ཡིད་ལ་བཅགསཿ བཙུན་མོ་ཞིག་ལ་རྒྱལ་བུ་སྐྱེས་པ་ལསཿ རྒྱལ་པོ་བཙུན་མོ་བློན་པོ་ཡིད་འདོར་གྱུརཿ བཅོས་སྟོན་བྱས་ནས་རྒྱལ་བུ་ཤི་བ་དང་ཿ རྒྱལ་པོ་བཙུན་མོ་ཐམས་ཅད་མྱ་ངན་ནོནཿ ཡུལ་དེར་མུ་གེ་ཆེན་པོ་ཞིག་ཀྱང་བྱུང་ཿ མི་ནི་མང་དུ་ཤི་བར་གྱུར་པའི་ཚེཿ རྒྱལ་པོ་སྤྱན་མེད་འབྱོར་ལྡན་ཡིད་སྐྱོ་སྨྲསཿ འཇིག་རྟེན་ཁམས་ན་ང་ལས་སྡུག་པ་མེདཿ དབང་པོའི་དྭངས་མ་མིག་ནི་ང་ལ་མེདཿ ཚེ་འདིར་དགོས་པའི་བུ་ནི་ང་ལ་མེདཿ ཕྱི་མར་དགོས་པའི་ཆོས་ནི་ང་ལ་མེདཿ རྒྱལ་པོ་འདེགས་པའི་དམངས་རྣམས་མུ་གེས་ཤིཿ ཞེས་པའི་སྨྲེ་སྔགས་སེམས་གཙང་གདུང་བ་ལཿ དེ་ནས་དྲང་སྲོང་ཨཱ་སེས་མྱ་ངན་བསངསཿ མི་ཡི་བདག་པོ་རྒྱལ་ཉིད་གསོན་མཛད་དང་ཿ བསགས་པའི་ནོར་འཛད་
༼༤༠བ༽སྐྱེས་པའི་ཐ་མ་འཆིཿ འཇིག་རྟེན་དག་ན་ཚེ་ཐར་ཡོད་མ་ཡིནཿ འཇིག་པའི་རྐྱེན་མང་འཚོ་བའི་རྐྱེན་ནི་ཉུང་ཿ གསོན་པར་འདོད་ཀྱང་རང་དབང་ཅུང་ཟད་མེདཿ མྱ་ངན་མཛད་དགེ་བའི་ཕན་ཡོན་སེམསཿ ཡིད་བརྟན་ཞུམ་མེད་སྟོབས་ཆེ་ཁ་དོག་བདེཿ དེ་སྐད་བརྗོད་པས་རྒྱལ་པོ་ཐུགས་ཚིམ་གྱུརཿ དབྱར་ཟླ་ར་བའི་ཚེས་ནི་བཅོ་ལྔ་པཿ དཀོན་མཆོག་དྲུང་དུ་མཆོད་པ་རྒྱ་ཆེན་ཕུལཿ དཀོན་མཆོག་སྤྲིན་དང་ཆོས་ཀྱི་སྤྲིན་ཞེས་པཿ ཐེག་པ་ཆེན་པོའི་མདོ་སྡེ་ཚར་གཅིག་བཏོནཿ འགྲོ་བ་རྣམས་ལ་མཆོད་སྦྱིན་རྒྱ་ཆེན་པོཿ ཅི་ཡོད་སྦྱིན་པར་གཏོང་བར་དམ་བཅས་ཏེཿ དེ་དུས་ཙ་ན་མི་ཀུན་མེ་ཏོག་ཟཿ གྲོང་ཁྱེར་ཀ་མ་རུ་ཡི་བྱང་ཤར་ནཿ རྒྱ་མཚོ་དྲི་མེད་མདངས་ལྡན་ཞེས་བྱ་བརཿ མེ་ཏོག་པདྨ་མང་པོ་སྐྱེས་པ་ལཿ མེ་ཏོག་ཨུ་དུམ་ཝ་རའི་ནགས་ཚལ་ནིཿ སྡོང་པོ་པང་གིས་མི་འཁྱུད་པ་ཞིག་འདུགཿ ལོ་སྐོར་རེ་ལ་གསར་རྙིང་བརྗེས་ནས་སྐྱེཿ ནམ་ཞིག་འབྲུག་ལོ་སྟོན་ཟླ་ར་བ་ཡིཿ ཁྲི་གདུགས་སྐར་མ་རྒྱལ་གྱི་ཉིན་པར་ནིཿ བློན་པོས་པདྨ་ལེན་དུ་ཕྱིན་པའི་ཚེཿ པདྨའི་ཟེའུ་འབྲུ་མཐོ་བརྒྱད་འདུག་པའི་སྟེང་ཿ ཁྱེའུ་ལྟ་མཛེས་ཟིལ་པ་ཕྲམ་མེར་འདུགཿ ཁྱེར་ནས་རྒྱལ་པོའི་ཕྱག་ཏུ་ཕུལ་བ་ནཿ བུ་སྐལ་ཡོད་སྲིད་འཁྱེར་སྙམ་བསམས་པ་དང་ཿ ལེགས་སམ་ལེགས་ན་བཟའ་སྨད་དགུ་ཡང་སྐྱིདཿ ཉེས་སམ་ཉེས་ན་གྲི་བོ་རང་ལ་འབབཿ དེ་བས་ཞུས་ནས་བཀའ་བཞིན་བྱ་བར་རིགསཿ རྒྱལ་པོའི་
༼༤༡ན༽སྒོར་འོངས་འཕྲིན་འདོན་དོན་ཆེན་མཇལཿ རྒྱལ་པོའི་དཀོར་མཛོད་ནོར་རྣམས་སྦྱིན་པར་བཏང་ཿ ལོ་མང་སོང་ནས་དཀོར་མཛོད་ནོར་རྣམས་སྟོངསཿ སྦྱིན་པའི་འཕྲོ་ཆད་སློང་བའི་འཕྲོ་མ་ཆདཿ ད་ནི་བང་མཛོད་ཐམས་ཅད་སྟོངས་སོ་བརྗོདཿ སློང་བས་ངེད་ཀྱི་སྐལ་པ་མེད་པ་ནཿ སྔོན་ཆད་སྦྱིན་པ་བཏང་བ་དོན་མེད་ཟེརཿ དེ་ནས་རྒྱལ་པོས་ཐུགས་དགོངས་བཏང་བ་ལསཿ ཕྱི་བློན་ནང་བློན་བློན་པོའི་ཚོགས་རྣམས་བསྡུསཿ སྦྱིན་པ་ལོ་མངས་ཟས་ནོར་ཐམས་ཅད་ཟདཿ སློང་མོ་བ་ཡིས་འཕྲོ་མ་ཆད་པར་འདོདཿ ད་ནི་ཟས་ནོར་འབྱུང་ཐབས་ཅི་བྱ་གསུངསཿ ལ་ལས་སོ་ནམ་བྱས་ན་འབྱུང་ངོ་ཟེརཿ ལ་ལས་ཚོང་ཁེ་བྱས་ན་འབྱུང་ངོ་ཟེརཿ ལ་ལས་དམག་ཇག་དགྲ་ཟླ་བཅོམ་ན་ཟེརཿ ལ་ལས་ཅི་ཟེར་ལ་ལས་ཅང་ཟེར་གྱུརཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ རྒྱལ་པོ་སྤྱན་མེད་འབྱོར་ལྡན་གྱིས་དཀོར་མཛོད་སྦྱིན་པར་བཏང་བའི་ལེའུ་སྟེ་བཅུ་གསུམ་པའོཿ ཿཐ་ཐ་ཉྲ་རྒྱ་རྒྱཿ ཿ