གཟིགས་སྟངས་དྲི་མེད་མདངས་ལྡན་ཡོན་ཏན་བརྒྱད་ལྡན་མཚོར་བབས་པའི་ལེའུ།
དེ་ནས་སངས་རྒྱས་སྣང་བ་མཐའ་ཡས་ཀྱིསཿ ཟག་མེད་རིན་པོ་ཆེ་ཡི་ཕོ་བྲང་ནསཿ སྐུ་གསུང་ཐུགས་ཡོན་འཕྲིན་ལས་སྤྲུལ་པ་བཀྱེཿ སྐུ་ལུས་བཀོད་པ་མཚན་བཟང་སུམ་ཅུ་གཉིསཿ འཁོར་ལོ་སྒྱུར་རྒྱལ་བཟང་པོ་མཆོག་ཏུ་སྤྲུལཿ གླིང་བཞི་དབང་མཛད་ཆོས་ཀྱི་འཁོར་ལོ་བསྐོརཿ
༼༤༡བ༽འགྲོ་འདུལ་གཟིགས་སྟངས་རྣམ་པ་གསུམ་ལ་གཟིགསཿ གཟིགས་སྟངས་དང་པོ་འགྲོ་བ་རིགས་དྲུག་ཏུཿ འགྲོ་བ་འདུལ་བའི་ཐུབ་དྲུག་གུ་རུ་དྲུགཿ མི་རྣམས་རྒྱུ་འབྲས་ཡིད་ཆེས་བསྐྱེད་པའི་ཕྱིརཿ ཨིནྡྲ་བོ་དྷིར་བུ་མེད་པ་ལ་གཟིགསཿ གཟིགས་སྟངས་གཉིས་པ་རྒྱ་བོད་རྩུབ་འགྱུར་ཅནཿ ལྷ་འདྲེ་ཤིན་ཏུ་ཐུ་བ་འདུལ་བར་དགོངསཿ རྫུས་སྐྱེས་མ་ཡིན་མངལ་སྐྱེས་མི་ཐུལ་བསཿ དྲི་མེད་མདངས་ལྡན་གཡུ་ཡི་མཚོ་ལ་གཟིགསཿ གཟིགས་སྟངས་གསུམ་པ་བོད་ཀྱི་རྒྱལ་ཁམས་སུཿ ལྷ་སྲིན་འཁྲུག་པ་གདུག་པ་ཅན་གྱི་ཡུལཿ མུན་པར་ཆོས་ཀྱི་སྒྲོན་མེ་གསལ་བྱེད་པཿ ཆོས་རྒྱལ་ཆེན་པོ་ཁྲི་སྲོང་སྡེའུ་བཙན་གཟིགསཿ གསལ་དབྱེ་ཞིབ་པར་བཤད་ན་འདི་ལྟར་རོཿ ཨུ་རྒྱན་དྷ་ན་ཀོ་ཤའི་མཚོ་གླིང་ནཿ རྒྱ་མཚོ་དྲི་མེད་མདངས་ལྡན་ཞེས་བྱ་འཁོརཿ ཆུ་ཞིང་དཔག་ཚད་བརྒྱ་ཕྲག་ཉི་ཤུ་ཡོདཿ དྲི་མེད་མདངས་ལྡན་དཔག་ཚད་འབུམ་ཕྲག་གཅིགཿ ཟླུམ་ལ་འཁྱིལ་བ་སྡོ་ལ་དྭངས་པའི་མཚོཿ དྲི་མེད་མདངས་ལྡན་ཡོན་ཏན་བརྒྱད་དང་ལྡནཿ དེ་གང་ཞེ་ན་རྣམ་གྲངས་འདི་ལྟ་སྟེཿ གཙང་དྭང་དངས་བ་བསིལ་དང་འཇམ་པ་དང་ཿ གསུང་དང་ངོམས་པ་བདེ་དང་ཞིམ་པའོཿ ཿགཙང་བ་དྲི་དང་ལྷན་ཅིག་མི་གནས་པཿ དྭངས་པ་འདམ་གྱི་རྙོག་པ་མེད་པའོཿ བསིལ་བ་ཞེས་ནི་ངར་དང་ལྡན་པའོཿ འཇམ་པ་འཐུངས་ན་ཟུག་རྔུ་མེད་པའོཿ གསུང་ནི་བཟང་པོའི་
༼༤༢ན༽ངད་དང་ལྡན་པའོཿ ཞིམ་པ་རོ་ནི་མཆོག་ཏུ་གྱུར་པའོཿ ངོམས་པ་གདུང་བ་སེལ་བར་བྱེད་པའོཿ བདེ་བ་གང་དེའི་ལུས་ལ་ཕན་པའོཿ ནད་གདོན་བགེགས་ཀྱི་རིགས་གྱུར་གང་ལའང་ཕནཿ ཆུ་དེ་ལོན་དཀའ་རྫུ་འཕྲུལ་སྤྱོད་ཡུལ་ལོཿ ལས་འཕྲོ་བཟང་པོ་ཡོད་པ་ཀུན་གྱིས་ལོནཿ འགྲོ་བ་སེམས་ཅན་ཀུན་གྱི་སྒྲིབ་པ་སྦྱོང་ཿ འཐུངས་དང་བཀྲུས་པ་མཐོང་བའི་མིཿ རྩོད་པ་ཅན་གྱི་སེམས་ཅན་ཡང་ཿ ཆུ་འཐུངས་མི་རྩོད་པ་རུ་འགྱུརཿ འཐབ་མོ་ཅན་གྱི་སེམས་ཅན་ཡང་ཿ ཆུ་འཐུངས་མི་འཐབ་པ་རུ་འགྱུརཿ ཁྲོ་གཏུམ་ཅན་གྱི་སེམས་ཅན་ཡང་ཿ ཆུ་འཐུངས་མི་ཁྲོ་པ་རུ་འགྱུརཿ ཚིག་པ་ཅན་གྱི་སེམས་ཅན་ཡང་ཿ ཆུ་འཐུངས་མི་ཚིག་པ་རུ་འགྱུརཿ རིགས་དྲུག་སེམས་ཅན་མང་པོ་ལསཿ ལྟ་བའི་མིག་རྣོ་ཀུན་གྱིས་ལྟོསཿ ལོག་ལྟ་ཀུན་གྱིས་ག་ལ་མཐོང་ཿ ས་ལེར་འོད་གསལ་མདངས་ལྡན་མཆོགཿ འདྲེན་པའི་སྐྱེས་བུ་ཀོ་ཤའི་མཚོ་ལས་འཁྲུངསཿ ཨུ་རྒྱན་ཡུལ་གྱི་ལྷོ་ནུབ་ཉེ་བ་ནཿ དགེ་བའི་རྟགས་བྱུང་མཚོ་ཆེན་ཞིག་གི་གླིང་ཿ རབ་ལེགས་མཛེས་ལྡན་ཅན་གྱི་ནུབ་བྱང་ངོསཿ གྲོང་ཁྱེར་ཀ་མ་རུ་པའི་བྱང་ཤར་མཚམསཿ པདྨའི་སྡོང་པོ་ཨུ་དུམ་ཝ་རའི་ཚལཿ ཉིན་མོ་ཉི་མས་མེ་ཏོག་ཆུ་གཏིང་བྱིང་ཿ རྒྱ་མཚོ་ཆེན་པོ་བྱིན་དང་ལྡན་པར་བྱེདཿ མཚན་མོ་ཁ་རུ་འཐོན་པས་འོད་དང་ལྡནཿ འདྲེན་པའི་སྐྱེས་བུ་ཀོ་ཤའི་མཚོ་ལས་
༼༤༢བ༽འཁྲུངསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ གཟིགས་སྟངས་དྲི་མེད་མདངས་ལྡན་ཡོན་ཏན་བརྒྱད་ལྡན་མཚོ་རབས་ཀྱི་ལེའུ་སྟེ་བཅུ་བཞི་པའོཿ ཿཐ་ཐ་ཉྲ་རྒྱ་རྒྱཿ ཿ