རྒྱལ་པོ་ཨིནྡྲ་བོ་དྷིའི་རྣམ་ཐར་གྱི་ལེའུ།
དེ་ནས་རྒྱལ་པོ་ལ་སྲས་མི་མངའ་བསཿ མོ་མས་མོ་བྱས་རྩིས་པས་རྩིས་བརྩིས་ཤིང་ཿ ཕྱྭ་ཕ་རྣམས་ཀྱིས་ཕྱྭ་གཡང་གླན་བྱས་པསཿ སྦྱིན་གཏོང་ཕངས་མེད་བགྱིས་ན་སྲས་འབྱུང་ཞེསཿ ཆོས་སྐྱོང་རྒྱལ་པོ་ཨིནྡྲ་བོ་དྷི་ཡིསཿ ནང་པའི་པཎ་ཆེན་ལྔ་བརྒྱ་རྩ་གཅིག་དང་ཿ དེ་བཞིན་ཕྱི་པ་ལྔ་བརྒྱ་རྩ་གཅིག་སྟེཿ བླ་མཆོད་བཟང་པོ་སྟོད་དང་རྩ་གཉིས་རྣམསཿ རང་རང་ལྷ་ལ་མཆོད་སྒྲུབ་བྱེད་དུ་བཅུགཿ རྒྱལ་པོས་སྲས་འབྱུང་གསོལ་བ་བཏབ་ནས་སུཿ སྤྲེལ་ལོ་ཆོ་འཕྲུལ་ཆེན་པོའི་ཉ་ལ་ནིཿ རིན་པོ་ཆེ་ཡི་མཛོད་མིག་སུམ་སྟོང་ཕྱེཿ དེ་ནས་རང་བྱུང་གཟི་འདྲའི་མཆོད་རྟེན་ལཿ ཕྱི་མཆོད་ནང་མཆོད་གསང་མཆོད་ཆེན་པོ་མཛོདཿ ཕྱོགས་བཞི་མཚམས་བརྒྱད་མཐའ་དག་སྐད་བསྒྲགས་ནསཿ གང་ལ་གང་མཁོ་བཏང་ཡང་སྲས་མ་བྱུང་ཿ བླ་མཆོད་དྲང་སྲོང་ཨཱ་སེ་ན་ཞེས་བྱཿ བདེན་པ་མཐོང་བ་གྲུབ་པ་ཐོབ་པ་ཞིགཿ དཔོན་གཡོག་བདུན་བྱུང་ངེད་ལ་སྦྱིན་ཐོང་ཟེརཿ སྦྱིན་པ་གཏོང་རྒྱུ་མེད་དོ་སྨྲས་པ་དང་ཿ ངེད་ཀྱི་སྦྱིན་པའི་སྐལ་བ་མེད་པ་ནཿ གཞན་སྦྱིན་བཏང་བ་དོན་མེད་ཆུ་ལ་ཕོཿ ངེད་ཀྱིས་བདེན་པའི་སྟོབས་བརྗོད་འགྲུབ་པོ་གསུང་ཿ རྒྱལ་པོའི་ཞལ་
༼༤༣ན༽ནས་འོ་ན་ཁྱེད་ཅག་རྣམསཿ ང་ཡི་ཕོ་བྲང་ནང་གཤེགས་བཞུགས་སུ་གསོལཿ དྲང་སྲོང་རྣམས་ཀྱིས་བདེན་པའི་ཚིག་བརྗོད་པཿ སྲས་འབྱུང་བ་རུ་སྨོན་ལམ་དགེ་བར་ཐོབཿ བཙུན་མོ་རྣམས་ཀྱིས་བཀུར་སྟི་གྱིས་ཤིག་གསུངསཿ རྒྱལ་པོ་དཔོན་གཡོག་ཕྱི་ཡི་རྒྱ་མཚོ་ལཿ ནོར་བུ་ལེན་དུ་ཕྱིན་པའི་ཤུལ་དུ་ནིཿ ཕྱི་ནང་བླ་མཆོད་པཎ་ཆེན་སྟོང་རྩ་གཉིསཿ རབ་ཏུ་ཤིན་ཏུ་ཐུགས་མུག་ཡིད་ཆད་ནསཿ ལྷ་འདྲེ་གདུག་པ་ཅན་རྣམས་སྒྲོལ་བ་ཡིཿ སྦྱིན་སྲེག་བྱེད་པའི་བཅའ་གཞི་བྱེད་པར་བཤམསཿ ལྷ་འདྲེ་ཐམས་ཅད་འདུས་ཤིང་འཁྲུགས་ནས་སུཿ ཐོག་སེར་གློག་འཁྱུག་སྒྲ་འོད་རླུང་ནག་འཁྲུགསཿ ས་གཡོས་རྡོ་སེར་དམག་འཁྲུག་མུག་ཡམས་ཀྱིསཿ ཨུ་རྒྱན་ཡུལ་རྣམས་བྲེད་ཅིང་རབ་ཏུ་སྐྲགཿ ས་ནས་འཕར་ཞིང་ཚོ་དེ་ཚོ་དགུ་འདེབསཿ ཉ་མོ་བྱེ་ཚ་ན་བཏོན་པ་བཞིན་གྱུར་ཏོཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ རྒྱལ་པོ་ཨིནྡྲ་བོ་དྷིའི་རྣམ་ཐར་གྱི་ལེའུ་སྟེ་བཅོ་ལྔ་པའོཿ ཿཐ་ཐ་ཉྲ་རྒྱ་རྒྱཿ ཿ