རྒྱལ་པོ་ཨིནྡྲ་བོ་དྷིས་ཡིད་བཞིན་གྱི་ནོར་བུ་ལོན་པའི་ལེའུ།
དེ་ནས་རྒྱལ་པོས་དེ་དག་བྱ་ལས་རྣམསཿ ཆོས་དང་མཐུན་པའི་བྱ་ལས་མ་ཡིན་བསམཿ རྒྱ་མཚོར་ཞུགས་ཏེ་ནོར་བུ་རིན་ཆེན་བླངསཿ དབུལ་ཕོངས་རྣམས་ལ་སྦྱིན་པ་ཡིད་བཞིན་བྱཿ རྒྱ་མཚོར་རིན་ཆེན་ལེན་དུ་ཕྱིན་མནོ་ཞིང་ཿ དེ་ཚེ་ཡུལ་ན་ཚོང་དཔོན་རྒས་པོ་ཞིགཿ སྔོན་
༼༤༣བ༽ཆད་རྒྱ་མཚོར་ལན་མང་ཕྱིན་པ་ཡོདཿ དེ་ཡི་གན་དུ་རྒྱལ་པོས་སོང་ནས་སུཿ ཁོ་བོ་རྒྱ་མཚོར་འཇུག་པའི་ས་མཁན་དུཿ ཁྱོད་ཉིད་འགྲོ་དགོས་ད་ལྟ་ཆོས་ཤིག་སྨྲསཿ དེད་དཔོན་རྒྱ་མཚོར་འགྲོ་ནི་མི་རུང་སྟེཿ དབུལ་ཕོངས་ལུས་སྲོག་བསྔོས་ནས་བགོ་བ་ཡིནཿ རྒྱ་མཚོའི་ནང་ན་ཆུ་རླངས་རྦ་ཀློང་འཁྱིལཿ ཆུ་སྲིན་དང་ནི་ཀླུ་ཡང་གདུག་པ་ཅནཿ སྲིན་མོ་རི་ཆུའི་མདོག་ཅན་ལ་སོགས་པཿ ཤིན་ཏུ་ཡ་ངའི་བགེགས་ཀྱང་མང་དུ་ཡོདཿ རྒྱལ་པོའི་སྤྱན་གྱིས་མི་གཟིགས་འགྲོ་མི་ནུསཿ ཞེས་སྨྲས་དེ་ནས་རྒྱལ་པོས་བསྒོ་བ་ནིཿ བསམ་པ་འདི་ཉིད་མ་འགྲུབ་ཤི་ནས་སྡོདཿ རྒྱ་མཚོར་འགྲོ་བའི་ས་མཁན་གྱིས་ཤིག་དང་ཿ ཅི་དགོས་བཀའ་སྩོལ་བདག་གིས་བསྒྲུབ་བོ་ཟེརཿ དེད་དཔོན་ས་མཁན་འདི་སྐད་ཅེས་པ་སྨྲསཿ ཆུ་སྲིན་བརྟག་པའི་ཕུག་རོན་གསོན་མ་དགོསཿ ཕུག་རོན་གསོ་བའི་བ་གཞོན་དམར་མོ་དགོསཿ བ་ཉིད་གསོ་བའི་རྩ་ཕོན་མང་དུ་དགོསཿ ཆུ་སྲིན་གསོད་པའི་དུང་ནི་གསོན་མ་དགོསཿ གཟིངས་དང་གཟིངས་ཀྱི་སྡོམ་ཐག་སུམ་ཐོག་དགོསཿ ཕྱོགས་བཞིར་ཞ་ཉེའི་གཏིང་རྡོ་ཆེན་པོ་བཞིཿ སྲོ་མ་ར་ཙ་རྔ་མའི་ཐག་པ་དགོསཿ རླུང་ཕྱོགས་འབབ་ལ་གཡེར་ཤིང་རྒྱལ་མཚན་དགོསཿ དེ་ནས་རྒྱལ་པོས་དེ་རྣམས་ལེགས་པར་བསྒྲུབསཿ དེད་དཔོན་གྲུ་བཅོས་གཟིངས་ཆས་ལེགས་པར་བྱསཿ རྒྱལ་པོའི་འཁོར་གྱིས་མི་བཞུད་བཤོལ་བཏབ་ཀྱང་ཿ མ་གནང་
༼༤༤ན༽གཟིངས་ཀྱི་ནང་དུ་ཞུགས་པར་གྱུརཿ ཚོང་པ་ལྔ་བརྒྱ་ཙམ་ཡང་གཟིངས་ལ་ཞུགསཿ དེ་ནས་དེད་དཔོན་རྒྱ་མཚོའི་ནང་ལ་ཕྱིནཿ གྲུ་ནང་ཞུགས་ནས་ཐག་པ་བདུན་གྱིས་རྟོདཿ རླུང་ཕྱོགས་སྦྱར་ཏེ་འགྲོས་ནི་གྱིས་པ་ལཿ རྒྱ་མཚོའི་ནང་ན་བགེགས་རིགས་སྣ་ཚོགས་ཡོདཿ བདེ་བར་ཕྱིར་འཁོར་བ་ནི་ཤིན་ཏུ་ཉུང་ཿ དེ་ལ་ཐེ་ཚོམ་ཟ་རྣམས་ཕྱིར་དེངས་ཤིགཿ གལ་ཏེ་ལུས་དང་སྲོག་ལ་མི་བལྟ་ཞིང་ཿ ཕ་དང་བུ་དང་ཆུང་མ་གཉེན་བཤེས་ལཿ མ་ཆགས་མ་ཞེན་རིན་ཆེན་སེམས་པ་རྣམསཿ རིན་ཆེན་གླིང་དུ་ཕྱིན་ཀྱང་བདེ་བར་འཁོརཿ བུ་དང་ཚ་རབས་ཡང་ཚ་བདུན་ཚུན་ཆོདཿ རིན་ཆེན་ནོར་དང་མི་འབྲལ་འཆིངས་པར་འགྱུརཿ ཞེས་བསྒྲགས་དེ་ནས་ཐག་པ་གཅིག་བཅད་དོཿ དེ་བཞིན་ཉི་མ་བདུན་བར་དེ་སྐད་བསྒོཿ ཐག་པ་རེ་རེ་བཅད་ནས་རླུང་ཕྱོགས་སུཿ དར་པོ་ཆེ་དང་གཡེར་ཤིང་རྒྱལ་མཚན་བསྒྲེངསཿ མགྱོགས་པའི་ཁྱད་ཀྱང་དཔག་ཆེན་མདའ་བཞིན་སོང་ཿ དེ་ནས་རིན་པོ་ཆེ་ཡི་གླིང་ཕྱིན་ནསཿ འཁོར་རྣམས་རིན་པོ་ཆེ་ཡི་གླིང་དུ་བཞགཿ རྒྱལ་པོ་དེད་དཔོན་གྲུ་ཆུང་ཞིག་ནང་ཞུགསཿ རིམ་གྱིས་བགྲོད་པས་རིན་ཆེན་གླིང་ཉེར་སླེབཿ སྨོན་ལམ་སྟོབས་ཀྱིས་རྒྱལ་པོའི་མཐོང་ཡུལ་དུཿ རིགས་པའི་ཡུལ་སྣང་ཅུང་ཞིག་གསལ་བར་གྱུརཿ བལྟས་པས་རི་ནི་དཀར་པོ་ཞིག་སྣང་སྟེཿ རྒྱལ་པོས་ཕ་ཀི་ཅི་ཡི་རི་ཡིན་དྲིསཿ དེད་དཔོན་ཕ་གི་དངུལ་གྱི་རི་ཡིན་ཟེརཿ དེ་ནས་སོང་
༼༤༤བ༽བས་རི་ནི་སྔོན་པོ་མཐོང་ཿ ཕ་གི་ཅི་ཡི་རི་ཡིན་དྲིས་པ་དང་ཿ རིན་ཆེན་བཻཌཱུ་རྻ་ཡི་རི་ཡིན་ཟེརཿ དེ་ནས་ཡང་སོང་སེར་པོ་ཞིག་སྣང་སྟེཿ དེ་ནི་རིན་ཆེན་གསེར་གྱི་རི་ཡིན་ཟེརཿ གསེར་གྱི་རི་དེའི་རྩ་རུ་ཕྱིན་པ་དང་ཿ ས་གཞི་ཐམས་ཅད་གསེར་གྱི་བྱེ་མར་སྣང་ཿ གསེར་གྱི་བྱེ་མའི་སྟེང་དུ་ཡུན་ཞིག་འདུགཿ རྒྱལ་པོའི་སྙན་དུ་དེད་དཔོན་འདི་སྐད་སྨྲསཿ བདག་ནི་རྒས་པས་ད་ནི་འགྲོ་མི་ཕོདཿ ཁྱོད་ཀྱིས་འདི་ནས་དཔག་ཚད་གཅིག་སོང་དང་ཿ མདུན་ན་རིན་ཆེན་སྣ་ཚོགས་མཁར་བརྒྱ་ཡོདཿ ཐེ་ཚོམ་མེད་པར་མཁར་ནང་བཙངས་ཀྱིས་སོང་ཿ གལ་ཏེ་མཁར་སྒོ་བཅད་ནས་འདུག་པ་ནཿ མཁར་གྱི་ཡ་ཐེམ་གསེར་གྱི་གཡུང་དྲུང་བྲིསཿ མཐེམ་རྡོ་རྗེ་རྒྱ་གྲམ་བྲིས་པ་ཡོདཿ སྒོ་དྲུང་རྡོ་རྗེའི་གཏུན་བུ་ཞིག་ཡོད་དེཿ རྡོ་རྗེའི་གཏུན་གྱིས་མཁར་གྱི་སྒོ་རྡུངས་ཤིགཿ དེ་ཡིན་ནང་ནས་ཀླུ་ཡི་བུ་མོ་ནིཿ མཛེས་ལྡན་མ་ཞེས་ཁ་དོག་མཐིང་ཁ་ཞིགཿ མགོ་ལུས་མེད་པ་རིན་ཆེན་སྣ་བདུན་བརྒྱནཿ ལག་ན་སྔོ་ཧྲིལ་ཁ་དོག་འོད་ལྔ་འབརཿ ཡིད་བཞིན་ནོར་བུའི་མཆོག་དེ་འབུལ་དུ་འོང་ཿ ཐོབ་མ་ཐག་ཏུ་མ་ཤོར་དམ་དུ་གཟུང་ཿ དེ་ལོན་པས་ན་ནོར་བུས་བསམ་དགུ་འབྱུང་ཿ དབང་པོ་རབ་ཏུ་བསྡོམས་ལ་མ་སྨྲ་ཞིགཿ མཇུག་ལ་ལྷ་མོ་ལྔ་ཞིག་ཡོངས་ནས་ཀྱང་ཿ རིན་ཆེན་མང་པོ་ཐོགས་ནས་འབུལ་དུ་འོང་ཿ མྱུར་དུ་ལོང་ལས་གོས་ཀྱི་འཐུར་ཐུམས་ཤིགཿ ཅེས་པ་དེད་དཔོན་རྒྱལ་པོར་བསླབས་པ་དང་ཿ རྒྱལ་པོས་བསྒོ་བ་བཞིན་དུ་བྱས་ཏེ་ཕྱིནཿ
༼༤༥ན༽རིན་ཆེན་མཁར་ནི་མང་པོའི་ནང་ནས་སུཿ རིན་ཆེན་སྣ་བདུན་མཁར་གྱི་ནང་དུ་ཕྱིནཿ སྒོ་ཡང་དམ་བཅད་རྡོ་རྗེའི་གཏུན་བུས་བརྡུངསཿ སྒོ་ནི་རང་བྱེ་ལྷ་མོས་རིན་ཆེན་ཐོགསཿ ལྷ་མོ་མཐིང་ཁས་ནོར་བུ་སྔོན་པོ་བྱིནཿ ཀླུ་མོ་རྣམས་ཀྱིས་རིན་ཆེན་མང་པོ་བྱིནཿ དེད་དཔོན་སྨྲས་པ་བཞིན་དུ་ནོར་བུ་བླངསཿ རིང་པོར་མ་ལོན་དེ་མ་ཐག་ཕྱིར་ལོགཿ དེད་དཔོན་གནས་སར་ཕྱིན་ཏེ་དྲིན་ཆེ་སྨྲསཿ ནོར་བུ་གོས་ཀྱིས་གཏུམ་ཏེ་གསོལ་བཏབ་པསཿ རྒྱལ་པོའི་སྤྱན་ལོང་གཡོན་པ་ཕྱེད་པར་གྱུརཿ ཨིནྡྲ་བོ་དྷི་ཞེས་ནི་སྒྲ་བྱུང་ངོ་ཿ དེ་ནས་ཚོང་པ་ཕལ་པ་ཡོད་སར་ཕྱིནཿ དེད་དཔོན་ནོར་བུ་བརྟག་ལ་མཁས་པ་དེསཿ རིན་ཆེན་མང་ཉུང་བཟང་ངན་ཚད་བསྟན་ནསཿ ནོར་བུའི་ནང་ནས་རིན་ཆེན་མང་པོ་ཚོལཿ ནོར་བུ་མཆིང་བུ་ལ་སོགས་བགོས་ནས་བྱིནཿ མངས་ན་གཟིངས་ཆུར་བྱིང་ནས་སྲོག་དང་འབྲལཿ ཆོག་ཤེས་གྱིས་ཤིག་གཟིངས་ལ་འཇུག་གོ་ཟེརཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ རྒྱལ་པོ་ཨིནྡྲ་བོ་དྷིས་ཡིད་བཞིན་གྱི་ནོར་བུ་ལོན་པའི་ལེའུ་སྟེ་བཅུ་དྲུག་པའོཿ ཿཐ་ཐ་ཉྲ་རྒྱ་རྒྱཿ ཿ