རྒྱལ་པོ་ཨིནྡྲ་བོ་དྷི་དང་ཞལ་མཇལ་ཞིང་རྟེན་འབྲེལ་བརྟགས་པའི་ལེའུ།
དེ་ནས་གཟིངས་ཀྱི་ཁ་ལོ་སྒྱུར་ནས་སུཿ རྒྱལ་པོ་འཁོར་བཅས་ཡུལ་ཕྱོགས་འོངས་པ་དང་ཿ གོང་གི་པདྨ་ལེན་པའི་བློན་པོ་དེཿ ཆོས་ཀྱི་བློན་པོ་ཏྲིག་ན་འཛིན་ཞེས་ཏེཿ གྲུ་ཆུང་ཞིག་ཏུ་ཞུགས་ནས་སྡུན་བསུར་བྱུང་ཿ
༼༤༥བ༽རྒྱ་གར་རྡོ་རྗེ་གདན་གྱི་ལྷོ་ནུབ་མཚམསཿ ནུབ་ཕྱོགས་ཨུ་རྒྱན་ཡུལ་གྱི་བྱང་ཤར་ངོསཿ དྷ་ན་ཀོ་ཤའི་ནུབ་བྱང་པདྨོའི་ཚལཿ དྲི་མེད་མདངས་ལྡན་རྒྱ་མཚོའི་གླིང་ཞིག་ནཿ དུར་པ་ཁྲུང་ཁྲུང་ལ་སོགས་ཆུ་བྱའི་རིགསཿ དཔག་ཏུ་མེད་པ་ཁྲ་ཅེམ་སོང་བའི་དབུསཿ འཇའ་ཚོན་སྣ་ལྔའི་འོད་ཀོར་གུར་ཕུབ་འདུགཿ རྒྱལ་པོས་ཏྲིག་ན་འཛིན་ལ་བཀའ་སྩལ་པཿ ཕ་གིར་ཅི་འདུག་ལྟོས་ལ་ཤོག་དང་གསུང་ཿ རྒྱལ་པོར་སྤྱན་མེད་གཟིགས་པ་ཇི་ལྟར་ཡིནཿ ངས་ནི་ཡིད་བཞིན་ནོར་བུ་ལོན་པ་ལསཿ གསོལ་བ་བཏབ་པས་མིག་གཡོན་ཕྱེད་དོ་གསུང་ཿ བློན་པོས་སྨྲས་པ་པདྨའི་ཚལ་དབུས་ནཿ ཁྱེའུ་ཆུང་ཡ་མཚན་ཅན་ཞིག་བཞུགས་ནས་འདུགཿ རྒྱལ་པོའི་བུ་སྐལ་ཁྱེར་སྙམ་སོམ་ཉི་ཞུགསཿ རྒྱལ་པོ་ཉིད་རང་གཟིགས་སུ་ཆས་པར་ཞུཿ རྒྱལ་པོ་ཨིནྡྲ་བོ་དྷིའི་ཞལ་ན་རེཿ ཉེ་བར་འགྲོ་དགོས་མདང་གི་རྨི་ལམ་ནཿ གསེར་གྱི་རྡོ་རྗེ་རྩེ་དགུ་འོད་འཕྲོ་ཞིགཿ ནམ་མཁའ་ནས་བྱུང་ལག་ཏུ་ལོན་པ་རྨིསཿ ཉི་མ་བདག་གི་སྙིང་ནས་ཤར་བ་རྨིསཿ དེ་སྐད་གསུང་ནས་རྒྱལ་པོ་བློན་པོ་གཉིསཿ གྲུ་ཆུང་ཞིག་ཏུ་ཞུགས་ནས་ཕྱིན་པ་དང་ཿ དུར་པའི་ཚོགས་རྣམས་སྒྲ་ངར་འགྲོགས་པར་འགྱུརཿ པདྨའི་སྟེང་ན་ཁྱེའུ་ལོ་བརྒྱད་ཙམཿ བལྟ་ན་སྡུག་བ་བྱད་བཞིན་ལེགས་པ་ཞིགཿ སྐུ་མདོག་དུང་ལ་ཕོ་ཚོས་བསྐུས་པ་འདྲཿ རྒྱལ་པོ་ངོ་མཚར་སྐྱེས་ནས་གསོལ་བ་ནིཿ ཨེ་མ་ཧོཿ ཡ་མཚན་ཅན་གྱི་ཁྱེའུ་
༼༤༦ན༽ཆུང་ཁྱད་འཕགས་ཁྱོདཿ ཡབ་ནི་གང་ཡིན་ཡུམ་ནི་གང་ཡིན་པཿ ཡུལ་ནི་གང་ཡིན་རིགས་ནི་གང་དུ་གཏོགསཿ ཟས་སུ་ཅི་གསོལ་འདི་རུ་ཅི་མཛད་གསུངསཿ དེ་ནས་ཁྱེའུ་ཆུང་གིས་བཀའ་སྩལ་པཿ བདག་གི་ཕ་ནི་རིག་པའི་ཡེ་ཤེས་ཡིནཿ མ་ནི་བདེ་སྟོང་ཀུན་བཟང་མོ་ཡིནཿ ཡུལ་ནི་ཆོས་དབྱིངས་སྐྱེ་བ་མེད་པ་ཡིནཿ རིགས་ནི་དབྱིངས་རིག་གཉིས་སུ་མེད་པར་གཏོགསཿ ཟས་སུ་གཉིས་སྣང་རྟོག་པ་ཟ་བ་ཡིནཿ འདིར་ནི་ཉོན་མོངས་གསོད་པའི་སྤྱོད་པ་སྐྱོང་ཿ དེ་སྐད་གསུངས་པས་རྒྱལ་པོ་སྤྱན་ཆབ་ཤོརཿ མིག་ལོང་གཡས་པ་དེ་ཡང་ཕྱེད་པར་གྱུརཿ ཆོས་བློན་ཏྲིག་ན་འཛིན་གྱིས་ངུ་འབོད་བཏོནཿ རྒྱལ་པོའི་མཚན་ནི་མཚོ་སྐྱེས་རྡོ་རྗེར་བཏགསཿ འདི་ནི་སྤྲུལ་པའི་སྐུ་ཞིག་ཡིན་སྙམ་ནསཿ ང་ཡི་བུ་སྐལ་མཆོད་གནས་བྱའོ་སྙམཿ པདྨའི་སྡོང་པོ་ཁྱེའུར་བཅས་པར་ཁྱེརཿ རྒྱལ་པོ་ཉིད་ཀྱི་ཡུལ་ཕྱོགས་ཕྱིན་པར་གྱུརཿ དུར་པ་ཁྲུང་ཁྲུང་ལ་སོགས་ཆུ་བྱའི་རིགསཿ ལ་ལ་ཕྱིར་འབྲང་ལ་ལ་སྐད་ངན་སྒྲོགསཿ ལ་ལ་ཁྱེའུའི་སྟེང་དུ་ལྷུང་ཐབས་འབབཿ ལ་ལ་མཚོ་མཐར་ཕྱོགས་བཞི་མཚམས་བརྒྱད་བསྐོརཿ ལ་ལ་མཆུ་ནི་ས་ལ་བཙུགས་ནས་བསྒྲེཿ དེ་ནས་ཕྱིན་ཕྱིན་གྱུར་པའི་མཚོ་འགྲམ་ནཿ མི་རྒན་མགོ་དཀར་ཞིག་གིས་ཉ་རྒྱ་བཙུགསཿ ལྕགས་ཀྱུ་རེ་ཡིས་ཉ་རེ་བཟུང་ནས་སུཿ སྐམ་ལ་ཕྱུང་ནས་ལིང་ལིང་འཕར་གྱེན་འདུགཿ གྷུ་
༼༤༦བ༽རུ་མཚོ་སྐྱེས་རྡོ་རྗེའི་ཐུགས་དགོངས་ལཿ བདག་གིས་རྒྱལ་པོའི་རྒྱལ་སྲིད་གཟུང་བ་ནཿ ཉ་མོ་ལྕགས་ཀྱུས་ཟོན་འདྲའི་སྡུག་བསྔལ་ཡོདཿ ཅེས་པའི་བརྡ་ཆོས་ལ་ཉེ་རྟེན་འབྲེལ་གོཿ དེ་ནས་ཡང་ཕྱིན་གྱུར་པའི་་་་ཞིག་ནཿ ཁྭ་ཏ་ཞིག་གིས་སྲེག་པ་བདས་སོང་བསཿ ཚེར་ཕུང་ཞིག་ལ་སྲེག་པ་འཁྲིས་ནས་སོང་ཿ ཁྭ་ཏ་དེ་ཡང་ཚེར་ཕུང་རྩར་སོང་ནསཿ ཁྭ་ཏས་གཡས་ཕྱིན་སྲེག་པས་གཡོན་ལ་བྲོསཿ ཁྭ་ཏས་གཡོན་ཕྱིན་སྲེག་པས་གཡས་ལ་བྲོསཿ དེ་ཉིད་འབྲོས་འདེད་ཡུན་རིང་བྱས་ནས་སུཿ བར་སྐབས་ཞིག་ལ་སྲེག་པས་བྲོས་པས་ཐརཿ ཚེར་ཕུང་དེ་ཉིད་རྒྱལ་པོའི་རྒྱལ་སྲིད་དང་ཿ ཁྭ་ཏ་དེ་ཉིད་ཨིནྡྲ་བོ་དྷི་འདྲཿ སྲེག་པ་དེ་ཉིད་མཚོ་སྐྱེས་རྡོ་རྗེ་སྟེཿ རྒྱལ་སྲིད་ཐབས་ཀྱིས་སྤང་བའི་བརྡ་རུ་གོཿ དེ་ནས་ཕྱིན་པས་འཇག་ཁྱིམ་གྲོང་ཞིག་ནཿ དགེ་བསྙེན་ཕོ་མོ་གཉིས་ཀྱི་བུ་ཤར་ཅིགཿ བྱི་བ་བསད་པས་ཁྱིམ་དུ་མི་གཏོང་མཐོང་ཿ རྒྱལ་པོའི་ཁྲིམས་ལ་གནོད་པར་སྐྱལ་བ་ནཿ བདག་ཉིད་སྤྱུག་པའི་བརྡ་ཆོས་རྟེན་འབྲེལ་གོཿ དེ་ནས་རྒྱལ་པོའི་ཕོ་བྲང་མཐོང་བར་གྱུརཿ ཐམས་ཅད་རབ་ཏུ་དགའ་ནས་ལྟད་མོས་བསུསཿ སྟག་ཤོན་སེང་ཤོན་ཁྱུང་ཤོན་བརྒྱ་ཕྲག་གསུམཿ སྔགས་འཆམ་སྔགས་གར་སྔགས་གིར་བརྒྱ་གསུམ་དང་ཿ ནི་གུ་རྒྱན་ལྡན་བརྒྱ་གསུམ་ཞེས་འབུལཿ ཁྱེའུ་སུམ་བརྒྱས་གར་གྱི་ཕྱག་རྒྱ་བསྒྱུརཿ རྔ་བོ་ཆེ་སོགས་རོལ་མོའི་རིགས་བྱེད་སྦིརཿ གདུགས་དང་རྒྱལ་
༼༤༧ན༽མཚན་དར་གྱི་རིགས་བྱེད་ཕྱརཿ འཇིག་རྟེན་ཁམས་ཀྱི་ལྟད་མོའི་རིགས་བྱེད་རྣམསཿ འདྲ་འབག་མང་པོ་གྱོན་ནས་རྩེ་བར་གྱུརཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ རྒྱལ་པོ་ཨིནྡྲ་བོ་དྷི་དང་ཞལ་མཇལ་ཞིང་རྟེན་འབྲེལ་བརྟགས་པའི་ལེའུ་སྟེ་བཅུ་བདུན་པའོཿ ཿཐ་ཐ་ཉྲ་རྒྱ་རྒྱཿ ཿ