རྒྱལ་སྲིད་སྤངས་པའི་ལེའུ།
དེ་ནས་རེ་ཞིག་དུས་ན་སྒྲ་འོད་བྱུང་ཿ རྡོ་རྗེ་སེམས་དཔའ་མདུན་གྱི་ནམ་མཁར་བྱོནཿ ལྷ་འཁོར་སྟོང་ཕྲག་བདུན་ཅུ་རྩ་གཉིས་བསྐོརཿ འཇའ་འོད་དཀྱིལ་ན་ཚིགས་སུ་བཅད་པ་སྨྲསཿ ཨེ་མ་ཧོཿ རྒྱལ་པོའི་ཕོ་བྲང་དབུས་ན་ནིཿ ཆོས་ཀྱི་རྒྱལ་པོ་གནས་གྱུར་པཿ བཙུན་མོ་སྡུག་དགུའི་ཚོགས་ཀྱིས་བསྐོརཿ ཕན་ཚུན་གནས་ཀྱང་འདུ་བ་དགཿ དེ་དག་ཐམས་ཅད་མི་དགའ་ཞིང་ཿ འཇིགས་པའི་ཡིད་ཀྱིས་མྱ་ངན་བྱེདཿ དེ་ཡི་དུས་ལ་དབབ་པོཿ རྒྱལ་སྲིད་རུལ་བ་བཞིན་དུ་དོརཿ ཞེས་གསུངས་མི་སྣང་མཁའ་ལ་ཡལ་བར་གྱུརཿ དེ་ནས་ཨིནྡྲ་བོ་དྷིའི་རྨི་ལྟས་ལོགཿ ཉི་ཟླ་གཉིས་ཀ་དུས་གཅིག་རྒས་པ་རྨིསཿ ཕོ་བྲང་ནང་དུ་བཤུམ་མོ་བྱེད་པ་རྨིསཿ མྱ་ངན་རབ་ཏུ་གདུངས་ཤིང་སྨྲེ་སྔགས་འདོནཿ རྒྱལ་པོ་བློན་པོ་སྙིང་རྗེའི་སྐད་ཀྱིས་དུཿ དེ་སྐད་བརྗོད་ཅིང་ཡིད་ནི་རབ་ཏུ་ཞུམཿ དེ་ནས་རྒྱལ་སྲས་པདྨ་རྒྱལ་པོ་ཡིསཿ སྔར་གྱི་སྐྱེད་མོས་ཚལ་གྱི་ས་རུ་ཕྱིནཿ བློན་པོའི་ཚོགས་ཀྱིས་ཡོངས་སུ་བསྐོར་བ་ལཿ ཤར་གྱི་ཕྱོགས་ནས་འཁོར་ལོ་རྩིབས་སྟོང་པཿ ལྟེ་བ་མུ་ཁྱུད་དང་བཅས་ཡོངས་སུ་རྫོགསཿ བཟོ་མཁན་མ་བྱས་ལྷ་རྫེས་གསེར་རང་བཞིནཿ འགྲན་གྱི་ཟླ་མེད་ལས་ལས་གྲུབ་པའི་ཕྱིརཿ འཁོར་ལོ་སྒྱུར་བའི་རྒྱལ་པོར་གྱུར་པ་ལཿ རྒྱལ་སྲིད་སྣ་བདུན་རིན་ཆེན་སྣ་བདུན་དང་ཿ ཡོ་བྱད་སྣ་བདུན་ལམ་རྫས་སྣ་བདུན་བྱུང་ཿ
༼༥༦ན༽ཁམས་ཀྱི་རྒྱལ་ཕྲན་རྣམས་ཀྱིས་བསུ་བ་བྱེདཿ དེ་ནས་མི་མཆོག་རྒྱལ་སྲས་དགོངས་པ་ལཿ རྒྱལ་ས་བཟུང་བས་འགྲོ་བའི་དོན་མ་འགྲུབཿ སེམས་ཅན་མང་པོ་ངན་འགྲོའི་གཡང་ལ་འཚོརཿ རྒྱལ་སྲིད་སྤང་བའི་ཐབས་ཤིག་བྱ་དགོས་བསམཿ པདྨའི་རྩ་ལག་སྨད་འཚོང་བཟང་མོ་གཉིསཿ ངན་སོང་གསུམ་འཁོར་གཅིག་ནི་སྦྲང་མར་སྐྱེསཿ གཅིག་ནི་བུ་ཆུང་མཚན་མ་བཟང་པོར་སྐྱེསཿ ད་སྟེ་ཞག་བདུན་ཤི་ནས་དམྱལ་བར་འགྲོཿ འཕགས་ཞལ་ཉི་ཞུར་ཙམ་ཡང་མི་མཐོང་སྟེཿ ཐུགས་རྗེས་གཟིགས་ནས་ལས་ངན་མཛད་པ་དང་ཿ རྒྱལ་པོ་དང་ནི་བློན་པོས་སུན་འདོན་ཕྱིརཿ རྒྱལ་ཕྲན་ཞིག་གི་བུ་ཆུང་བསིལ་གྲིབ་བསྙལཿ དེ་ཡི་མགོ་ལ་སྦྲང་མ་ཞིག་འདུག་ནསཿ རྒྱལ་སྲས་པདྨས་སོར་རྡེའུ་ཞིག་འཕངས་པསཿ སྦྲང་མ་བུ་ཆུང་ཀླད་པའི་དཀྱིལ་དི་མ་ཤིཿ ཐམས་ཅད་མི་རིགས་མི་འཚལ་ཧ་ལས་ནསཿ འཁོར་ལོ་སྒྱུར་བའི་རྒྱལ་པོས་ཡུལ་གནོད་མེདཿ མཚོན་ཆས་གཡུལ་རྒྱལ་གསོད་དུ་མི་འཇུག་ལཿ མི་ཐོད་རྒྱལ་པོ་འདི་ནི་གནོད་འཚེ་བྱེདཿ ཅེས་པ་ལ་སོགས་ཁས་བརྒྱ་བྱེད་པར་གྱུརཿ རྒྱལ་ཕྲན་བུ་རོ་ཡབ་ཀྱི་མདུན་དུ་བོརཿ དེ་ནས་ཡབ་ཀྱིས་སྲས་ལ་འདི་སྐད་སྨྲསཿ སེམས་ཅན་བདེ་བར་བྱེད་པ་རྒྱལ་པོའི་ཁྲིམསཿ གཞོན་ནུས་རྒྱལ་ཁྲིམས་བཤིག་པ་མིན་ནམ་ཅིཿ འཁོར་ལོ་སྒྱུར་རྒྱལ་ལོ་ཀར་བྱོན་པའི་ཚེཿ ཡུལ་དེའི་མི་རྣམས་ཐམས་ཅད་བདེ་བ་ལཿ ཁམས་ཀྱི་
༼༥༦བ༽རྒྱལ་ཕྲན་བུ་བསད་ཁྲིམས་ལ་མཆོངསཿ ཞེས་གསུངས་རྒྱལ་སྲས་མཆོག་གིས་ལན་གསོལ་པཿ ཡབ་མཆོག་བདག་ལ་དགྱེས་པར་གསོན་མཛོད་དང་ཿ བདག་ནི་འདི་ཡི་སྐྱེ་བ་ཡང་སྔ་ལཿ ཉི་འོག་རྒྱལ་པོ་རྣ་བ་ཅན་གྱི་བུཿ གའུ་ཏ་མ་ཞེས་བྱར་སྐྱེ་བ་བླངསཿ དྲང་སྲོང་མདོག་ནག་ཅེས་བྱར་རབ་ཏུ་བྱུང་ཿ ཡུལ་གྲུ་འཛིན་དུ་ལོ་མའི་སྤྱིལ་པོར་འདུགཿ དེ་ན་སྨད་འཚོང་བཟང་མོ་བྱ་བ་དང་ཿ གཡོན་ཅན་པདྨའི་རྩ་ལག་བྱ་བ་ཡོདཿ དེ་གཉིས་དགའ་མགུར་སྤྱོད་ཕྱིར་ཆས་པ་ལཿ ལམ་དུ་ཨ་རི་ཞེས་བྱའི་ཚོང་པ་ཡིསཿ བཟང་མོར་ཀརྴ་པ་ནི་ལྔ་བརྒྱ་བྱིནཿ དེ་དང་ལྷན་ཅིག་བརྩེས་པས་བུ་མོས་བསྙདཿ པདྨའི་རྩ་ལག་ཁྲོས་ནས་བཟང་མོ་བསདཿ རལ་གྲི་གོའུ་ཏ་མའི་མདུན་དུ་བོརཿ རྒྱལ་པོར་བཅིངས་པས་གོའུ་ཏ་མ་ཤིཿ པདྨའི་རྩ་ལག་སྦྲང་མའི་སྐྱེ་བ་བླངསཿ སྨད་འཚོང་བཟང་མོ་བློན་པོའི་བུ་རུ་སྐྱེསཿ གོའུ་ཏ་མ་དེ་ནི་ད་ལྟ་ང་ཿ ལས་ཀྱི་སྲོག་ལན་དེ་ལྟར་ཆགས་པ་ཡིནཿ རྒྱབ་ཚོད་མི་འཕོག་ཕོག་ཚད་མི་འཆི་ནཿ རྒྱལ་པོས་མཁྱེན་མཛོད་ཁྲིམས་ནི་མ་བཤིག་གསུངསཿ དེ་ནས་རྒྱལ་པོས་བུ་ཆུང་ཤི་སྟོང་བྱིནཿ རྒྱལ་སྲས་ཕོ་བྲང་ནང་དུ་སྤྱན་དྲངས་ནསཿ ཕྱི་སྒོ་ནང་སྒོ་བར་སྒོ་གནམ་སྒོ་ལཿ གྱད་ཀྱི་བློན་པོ་སྒོ་སྲུང་བརྒྱ་བརྒྱ་བཞགཿ རྒྱལ་སྲས་ཕྱི་རུ་སྐྱོ་བསང་མ་གཏོང་བསྒོསཿ ཕྱི་ལ་འོབས་བརྐོས་སྒོ་གཏན་གཞུག་ཏུ་བཅུགཿ གྲོང་ཁྱེར་སྒོ་བཞིར་དམག་གི་དཔུང་ཆེན་བཞགཿ འོད་འཆང་མ་
༼༥༧ན༽དང་རྒྱལ་སྲས་ལྷན་ཅིག་ཏུཿ མནལ་བའི་ཚེ་ན་རི་འགུལ་ས་ནི་གཡོསཿ ལྗོན་ཤིང་རླུང་གིས་བསྐྱོད་པས་རྩ་ནས་དོནཿ གནམ་ས་གཉིས་ནི་འགྲེ་ལོག་བསྒྱུར་བ་དང་ཿ མགོ་ཡི་སྐྲ་བཅད་སོ་གཅིག་ཕྱུང་བ་རྨིསཿ དེ་ནས་གཉིད་སད་སྙིང་མ་དགའ་ཞིང་བཤུམཿ རྨི་ལམ་དེ་འདྲ་རྨི་བ་ཅིར་འགྱུར་སྨྲསཿ རྒྱལ་སྲས་མཆོག་གིས་བཙུན་མོ་ལ་སྨྲས་པཿ འོད་འཆང་ཁྱོད་ནི་སྡིག་མེད་དགེ་སེམས་ལྡནཿ རྨི་ལྟས་བཟང་གིས་ཁ་རོག་ཉོལ་ཅེས་གསུངསཿ དེ་ནས་རྒྱལ་སྲས་རྒྱལ་པོའི་ཁང་བཟང་སོང་ཿ ཁང་བཟང་ཐམས་ཅད་འོད་ཟེར་གང་བར་གྱུརཿ རྒྱལ་པོའི་མནལ་སད་ཉི་མ་ཤར་བྱུང་ཟེརཿ བལྟས་པས་རྒྱལ་སྲས་དམ་པ་དེ་མཐོང་ནསཿ མཚན་མོ་རྒྱུ་བ་ཅིས་ཉེས་མི་གཟིམས་པརཿ པདྨ་འདྲ་བའི་མིག་རིང་ཅི་མཛད་གསུང་ཿ རྒྱལ་སྲས་ཡབ་ལ་ཐལ་སྦྱར་པུས་བཙུགས་ནསཿ ཡབ་གསན་ང་ནི་ཚེ་གཅིག་སངས་རྒྱས་བསྒྲུབཿ གཏི་མུག་རོ་ཉལ་བྱེད་ལ་སྐྱིད་པ་མེདཿ ལེ་ལོ་དང་ནི་གཡེང་བ་རབ་སྤངས་ནསཿ ཆོས་ཀྱི་གཏམ་མང་སྣ་ཚོགས་ཉེ་བར་སྟོནཿ དེ་ལ་སྐྱོ་བའི་སེམས་ནི་མ་མཛད་ཅིགཿ ཅེས་སྨྲས་རྒྱལ་པོ་མཆི་མས་བརྣངས་འདི་བརྗོདཿ ཁྱོད་ནི་སེམས་ཅན་ལེགས་བྱེད་དགོངས་པ་སྟེཿ ཤིན་ཏུ་ཉམ་ཆུང་རང་གི་བུ་ལ་ཡང་ཿ བདག་ནི་ལས་ཀྱི་འཕྲོ་དང་སྐལ་བར་ལྡནཿ ངེས་པར་མི་ལུས་ཐོབ་ནས་རྒྱལ་པོར་གྱུརཿ སྲས་ཀྱིས་ཕོངས་ནས་དཀོར་མཛོད་སྦྱིན་པར་བཏང་ཿ
༼༥༧བ༽ལམ་ལ་བགྲོད་དཀའ་རྒྱ་མཚོའི་ནོར་བུ་བླངསཿ ཡབ་དང་ཡུམ་མེད་པདྨའི་སྡོང་པོ་ལསཿ རྒྱུ་དང་རྐྱེན་མེད་སྤྲུལ་པའི་སྐུ་དང་མཇལཿ རྒྱལ་སྲིད་ཕུལ་ནས་གཙུག་གི་ནོར་བུ་ཞུསཿ འཁོར་བའི་ཆོས་ལ་སྐྱོ་བ་མ་མཛད་པརཿ བདག་དང་ཡུལ་འཁོར་བྱམས་པས་སྐྱོང་མཛོད་གསུང་ཿ དེ་ནས་རྒྱལ་སྲས་མཆོག་གིས་འདི་སྐད་གསོལཿ འདོད་ཆགས་ཞེ་སྡང་གཏི་མུག་མ་གྲོལ་བའིཿ འགྲོ་བ་གསུམ་པོ་འདི་མིན་གཞན་ན་མེདཿ ལུས་འདིའི་སྡུག་བསྔལ་ཕྲ་མོ་མི་བཟོད་པརཿ ངན་སོང་གསུམ་གྱི་སྡུག་བསྔལ་བཟོད་དུ་རེཿ སྡུག་བསྔལ་ཆེན་པོ་ནམ་ཡང་ཆ་མེད་པརཿ ཚེ་འདི་རྟག་པར་བཟུང་ནས་གཉེར་ག་བྱེདཿ བློ་ནོར་སྙིང་མེད་དབུས་སུ་ང་མི་སྡདཿ འཁོར་བ་སྒྱུ་མར་མི་ཆགས་རབ་ཏུ་འབྱུང་ཿ གཡེང་བ་འདུ་འཛི་སྤངས་ནས་སྤྱོད་པ་སྐྱོང་ཿ ཞེས་གསུངས་རྒྱལ་པོ་མཆི་མས་མིག་གང་ནསཿ ཀྱེ་མ་ཁྱོད་དང་མ་ཕྲད་སྔོན་རོལ་དུཿ བདག་ཉིད་མི་འཆི་གསོན་པ་ཇི་ལྟ་བུཿ འཆི་བདག་ཅི་ཕྱིར་ང་ལ་སྔར་མ་ཡོངསཿ སྡུག་བསྔལ་འདི་ལས་གཞན་མི་འབྱུང་ཞེས་གསུང་ཿ དེ་ནས་རྒྱལ་སྲས་མཆོག་གིས་ཐུགས་བསྲོས་ཏེཿ སྔོན་གྱི་རྒྱལ་སྲས་རྣམས་ཀྱིས་ཆོས་བཤད་པཿ བདག་གིས་ཀུན་རྫོབ་བདེན་པ་ལ་བརྟེན་ནསཿ ཡབ་མཆོག་རྒྱལ་པོའི་ཐུགས་ཀྱི་གཅོད་འབྱིན་ཕྱིརཿ ཚིག་སུ་བཅད་དེ་སྨྲས་པར་བགྱིའོ་གསོནཿ སྔར་འདུས་བསྡད་པ་མང་བས་འབྲལ་བར་ངེསཿ གནས་སྐབས་ཡུད་ཙམ་ཡིན་པས་འབྲལ་བར་
༼༥༨ན༽ངེསཿ རྒྱལ་བློན་ཚོང་དུས་འདྲ་བས་སོ་སོར་འགྱེསཿ འཇིག་རྟེན་དག་ན་རྟག་པའི་ཆོས་མེད་དེཿ སྔར་ལུས་མེད་པས་ཐམས་ཅད་འཆི་བར་ངེསཿ ཕུང་པོ་འདུས་བྱས་ཡིན་པས་འཇིག་པར་ངེསཿ མི་ཆོ་སྐད་ཅིག་མི་སྡོད་འགྲོ་བར་ངེསཿ བྱས་པ་ཐམས་ཅད་མི་རྟག་འཇིག་པར་ངེསཿ བརྩིགས་པའི་གནས་ཀྱིས་འཆི་བ་ལ་མི་བསྟོངསཿ འབྲེལ་བའི་གཉེན་གྱིས་འཆི་བ་ལ་མི་བསྟོངསཿ བསགས་པའི་ནོར་གྱིས་འཆི་བ་ལ་མི་བསྟོངསཿ རང་ལུས་དཔའ་བགོས་འཆི་བ་ལ་མི་བསྟོངསཿ རྒྱུས་མེད་ས་རུ་གཅིག་པུར་འཁྱམ་དགོས་ནཿ དེ་ཀུན་བདེན་ནམ་གུས་པའི་སེམས་ཀྱིས་གཞིགསཿ བདག་གིས་ཐེག་པ་ཆེན་པོའི་ཆོས་བཙལ་ནསཿ ཡབ་ཡུམ་མྱུར་དུ་བླ་མེད་སངས་རྒྱས་སྟོནཿ དེ་ལྟར་ལེགས་སྨྲས་སོམ་ལས་ཐུགས་བདེར་མཛོདཿ དེ་སྐད་གསུངས་པས་རྒྱལ་པོའི་ཐུགས་ཆད་ནསཿ དེ་ཀ་ཡིན་ཟེར་བློ་ནི་ནང་དུ་བྲོསཿ བུ་ལ་ཆགས་པའི་སྲེད་པ་ཡོངས་སུ་བཅདཿ ཁྱོད་ཀྱིས་བསམ་པ་ཡོངས་སུ་རྫོགས་གྱུར་ཅིགཿ དབུ་ཐུམ་གཏུམས་ནས་ཀྱི་ཧུད་ཟེར་ཞིང་དུསཿ དེ་ནས་རྒྱལ་སྲས་དམ་པས་རང་ཁྱིམ་ཕྱིནཿ ནམ་ལངས་བློན་པོའི་ཚོགས་རྣམས་ཐམས་ཅད་བསགསཿ རྒྱལ་སྲིད་སྤང་ཕྱིར་བརྟུལ་ཞུགས་སྤྱོད་པ་མཛདཿ སྐུ་ནི་གཅེར་བུ་རུས་པའི་རྒྱན་དྲུག་གསལཿ ཕྱག་ཏུ་རྡོར་དྲིལ་ཁ་ཊྭཱཾ་རྩེ་གསུམ་ཐོགསཿ ཕོ་བྲང་རྩེ་མོར་གར་སྟབས་མཛད་པ་ལསཿ ལྟད་མོ་བལྟ་བའི་དམངས་ཕལ་མང་
༼༥༨བ༽པོ་ཚོགསཿ རྡོ་རྗེ་ཁ་ཊྭཱཾ་ཤོར་བའི་རྫུ་བག་མཛདཿ བདུད་ཀྱི་བློན་པོ་དབང་ཆེ་ཁ་བཙན་པཿ ཀ་ཏ་མ་ཞེས་ཨུ་པ་ཏ་ཡི་བུཿ པྲེ་ཏ་ཀ་ར་མ་བུའི་མགོ་དཀྱིལ་ཕོགཿ རྡོ་རྗེ་ཀླད་པའི་དཀྱིལ་དུ་སོང་ནས་གུམཿ ཁ་ཊྭཱཾ་མ་ཡི་སྙིང་ལ་ཕོག་ནས་ཤིཿ དེ་ནས་བློན་པོ་རྣམས་ཀྱིས་རྒྱལ་པོར་ཞུསཿ རྒྱལ་བུར་མངའ་གསོལ་ཚུལ་མིན་སྤྱོད་པ་བྱསཿ སྔ་དུས་རྒྱལ་ཕྲན་བུ་བསད་ལན་ཆགས་ཟེརཿ ད་ཡང་བློན་པོའི་བུ་སྨད་བསད་གདའ་བསཿ རྒྱལ་ཁྲིམས་གང་ཉེས་ཆད་པས་མ་བཅད་ནཿ ད་དུང་རྒྱལ་པོས་འདི་འདྲ་འགའ་བྱེད་དོཿ གསལ་ཤིང་རྩེ་ལ་བསྐྱོན་པའི་ཆད་པ་འཚལཿ ཞེས་ཞུས་རྒྱལ་པོ་ཐུགས་འཁྲུགས་སེམས་མ་དགའཿ ཁྲིམས་བཙུན་བློན་པོ་ངོ་སོ་འདོད་པའི་ཕྱིརཿ རྒྱལ་པོས་འཇིག་རྟེན་མཐུན་པར་གཏམ་སྨྲས་པཿ འདི་ནི་མི་མ་ཡིན་གྱི་བུའམ་ཅིཿ སྤྲུལ་པའི་སྐུ་ཞིག་ཡིན་ནམ་མི་ཤེས་པསཿ བསད་པས་མི་འོང་མཐའ་ལ་སྤྱུགས་ཀྱི་གསུངསཿ རྒྱལ་བུར་ཐུགས་ཡིད་ཆགས་པས་མ་དགའ་ཡང་ཿ རྒྱལ་ཁྲིམས་བཙན་པས་མི་སྤྱུག་དབང་མེད་ནསཿ རྒྱལ་བློན་ཐམས་ཅད་ཚོགས་པའི་མདུན་སྨྲས་པཿ རིན་ཆེན་མཚོ་དཀྱིལ་པདྨའི་སྡོང་པོ་ལསཿ ཕ་མེད་མ་མེད་ཁྱེའུ་སྤྲུལ་པའི་སྐུཿ སྐུ་མཆོག་དྲི་མེད་ཡོན་ཏན་རབ་བརྒྱན་པཿ སྲས་ཀྱིས་ཕོངས་ནས་རྒྱལ་སར་དབང་བསྐུར་བྱསཿ རྒྱལ་པོའི་སྤྱོད་རྩུབ་བློན་པོའི་ཕྲུག་གུ་བཀུམསཿ བློན་པོ་རྣམས་ཀྱིས་རྒྱལ་ཁྲིམས་ཆད་པ་གཅོདཿ གསལ་ཤིང་རྩེར་བསྐྱོན་
༼༥༩ན༽ཟེར་ཡང་སྤྱུག་ཁས་བླངསཿ ད་ནི་རྒྱལ་བུ་གང་དགར་བཞུད་ཅེས་གསུང་ཿ དེ་ནས་རྒྱལ་བུས་ཡབ་ལ་འདི་སྐད་གསོལཿ འཇིག་རྟེན་འདི་ན་ཕ་དང་མ་དཀོན་ཡང་ཿ ཡབ་དང་ཡུམ་དུ་བགྱིས་ནས་རྒྱལ་སྲིད་བྱིནཿ ང་ནི་གོའུ་ཏ་མར་ཡོད་པའི་དུསཿ པྲ་ཏ་ཀ་ར་མངག་གཞུག་བུ་མོ་ཡིནཿ མ་འདི་ཚོང་པ་ཨ་རིའི་སྐྱེ་བ་ཡིནཿ ལས་ཀྱི་ལན་ཆགས་བློན་པོའི་བུ་སྨད་བཀུམསཿ རྒྱལ་ཁྲིམས་བཙན་པས་བདག་ནི་སྤྱུགས་ན་ལེགསཿ རྒྱལ་པོའི་གསུང་བཞིན་རྗེས་སུ་འཇུག་པར་ཞུཿ དེ་སྐད་གསུངས་པས་རྒྱལ་པོ་མ་དགྱེས་སོཿ བློན་རྣམས་རྒྱལ་སྲས་སྤྱུག་པའི་གྲོས་བདུན་བྱེདཿ ལ་ལ་བྲུ་ཤའི་ཡུལ་དུ་སྤྱུག་གོ་ཟེརཿ ལ་ལ་བཻདྡྷའི་ཡུལ་དུ་སྤྱུག་གོ་ཟེརཿ ལ་ལ་བྷངྒ་ལའི་ཡུལ་སྦྱུག་གོ་ཟེརཿ ཁ་ཅིག་མུ་སྟེགས་ཟངས་གླིང་སྤྱུག་གོ་ཟེརཿ ཁ་ཅིག་ཁང་བུའི་གླིང་དུ་སྤྱུག་གོ་ཟེརཿ ཁ་ཅིག་ལི་ཡི་ཡུལ་དུ་སྤྱུག་གོ་ཟེརཿ ཁ་ཅིག་རྒྱ་ནག་ཡུལ་དུ་སྤྱུག་གོ་ཟེརཿ ལ་ལ་ནཱ་ལནྡྲ་རུ་སྤྱུག་གོ་ཟེརཿ ལ་ལ་ཐོ་གར་ཡུལ་དུ་སྤྱུག་གོ་ཟེརཿ ལ་ལ་ཟ་ཧོར་ཡུལ་དུ་སྤྱུག་གོ་ཟེརཿ ལ་ལ་འ་ཤའི་ཡུལ་དུ་སྤྱུག་གོ་ཟེརཿ ཁ་ཅིག་ཏ་ཟིག་ཡུལ་དུ་སྤྱུག་གོ་ཟེརཿ ཁ་ཅིག་མ་རུ་ཙིའི་ཡུལ་སྤྱུག་གོ་ཟེརཿ ཁ་ཅིག་བྱང་ཕྱོགས་ཤམྦྷ་ལར་སྤྱུག་ཟེརཿ བློན་རྣམས་སྤྱུག་པའི་ཡུལ་ལ་ཁ་མ་འཆམསཿ རྒྱལ་པོས་འགྲོ་བའི་ཡུལ་ཕྱོགས་གང་ལ་མཉེསཿ མཉེས་པའི་ཡུལ་ཕྱོགས་དེ་ལ་སྤྱུག་གི་གསུང་ཿ རྒྱལ་བུ་སངས་རྒྱས་གཉིས་པས་
༼༥༩བ༽འདི་སྐད་གསོལཿ གནས་ལ་ངེས་པ་མེད་པས་གར་སྤྱུགས་གཞལ་ཡས་ཁང་ཿ བྱ་རྒྱུ་ཆོས་ལས་མེད་པས་རྒྱལ་པོའི་གདན་ས་རུཿ ཡོ་ག་རྣམ་གསུམ་སྤྱོད་པའི་མི་དེ་སྐྱིད་དང་འཕྲདཿ སེམས་ལ་སྐྱེ་ཤི་མེད་པས་བསད་པས་ང་མི་འཇིགསཿ ཡུལ་ལ་ཞེན་པ་མེད་པས་སྤྱུགས་ཀྱང་ང་མི་འཇིགསཿ ཡབ་ཡུམ་གཉིས་པོ་ཡུན་ཅིག་བདེ་བར་རབ་བཞུགས་མཛོདཿ དེ་སྐད་གསུངས་ནས་ཡབ་ཡུམ་ཕྱག་བཙལ་ལོཿ བཙུན་མོས་རྒྱལ་བུའི་མགུར་ལ་འཁྱུད་ནས་སུཿ ཀྱི་ཧུད་བུ་སྡུག་ཡིད་འོང་མཐོང་དགའ་བཿ གྲོས་ངན་སྤྱུག་པའི་དབང་དུ་ཅི་ཕྱིར་སོང་ཿ བུ་ཚབ་ང་སྤྱུགས་ཅི་ཕྱིར་གོ་མི་ཆོདཿ ཅེས་བརྗོད་རྒྱལ་བ་ཉིད་ལ་ཁ་ནི་གཏུགསཿ རྒྱལ་པོ་ཨིནྡྲ་བོ་དྷིའི་ཞལ་ནས་ནིཿ བློན་པོས་མ་མཐོང་ནོར་བུ་ཁྱེར་ཅིག་གསུང་ཿ དབུལ་བཀྲེས་སྐམ་འཁྱགས་སྡུག་བསྔལ་འདི་ཡིས་སེལཿ གསོལ་བ་གང་བཏབ་དགོས་འདོད་འདི་ལས་འབྱུང་ཿ འདི་ལ་རྒྱལ་བུའི་མཐུན་རྐྱེན་མཛོད་ཅིག་གསུང་ཿ རྒྱལ་བུའི་ཞལ་ནས་ཡབ་ལ་འདི་སྐད་གསོལཿ བདག་གི་སྣང་བ་ཡིད་བཞིན་ནོར་བུ་སྟེཿ ཡབ་ཀྱི་ནོར་བུས་བདག་ལ་ཅི་ཞིག་བྱཿ འདི་ལ་ནོར་བུའི་ཟླ་བོ་མཛོད་ཅིག་གསུངསཿ ལྗགས་ཀྱི་མཆིལ་མ་རྒྱལ་པོའི་ཕྱག་ཏུ་བསྐྱུརཿ དེ་ཉིད་ཡིད་བཞིན་ནོར་བུ་བསམ་འཕེལ་གྱུརཿ དེ་ནས་བློན་པོའི་ཚོགས་གསེབ་རྒྱལ་པོ་བྱོནཿ དུར་ཁྲོད་བསིལ་བའི་ཚལ་ཞེས་འཇིགས་སུ་རུང་ཿ སྐྱི་ཕུད་བྱེད་པ་དེ་རུ་སྤྱུག་གོ་ཟེརཿ
༼༦༠ན༽བློན་པོ་ཐམས་ཅད་ཁ་འཆམས་ཐབས་ཅིག་འདུགཿ རྒྱལ་པོས་བློན་པོ་རྣམས་ལ་བཀའ་སྩལ་པཿ འཇིག་རྟེན་ཁམས་ན་འགྲན་གྱི་ཟླ་བྲལ་བཿ འཁོར་ལོ་སྒྱུར་བའི་རྒྱལ་པོ་རིན་པོ་ཆེཿ མཚན་བཟང་སུམ་ཅུ་རྩ་གཉིས་མཚན་འཆང་བའིཿ སྐུ་མཆོག་དམ་པ་དཔེ་མེད་འདི་འདྲ་བཿ སྔར་ཡང་མ་བྱོན་ད་ཡང་མི་འབྱོན་ནཿ ཁྲིམས་ལ་ཆོངས་ཀྱང་འདི་ཉིད་སྤྱུག་པར་ཕངསཿ སྔོན་ཆད་རབ་ཏུ་བྱུང་དོགས་མེལ་ཚེ་བཞགཿ ད་ནི་སྤྱུག་པ་སུ་ཡི་སྙིང་ལ་ཕོདཿ བཀྲ་མི་ཤིས་པ་འཁྲུག་དང་ནད་མུག་ཡོང་ཿ ཞེས་གསུངས་བློན་པོ་ཨུ་པ་ཏ་ཁྲོས་ནསཿ ཁྲིམས་བསྲུང་རྒྱལ་པོ་སྨྲ་བ་ལན་ཅིག་ཡིནཿ དེ་ལས་མངས་ན་རྒྱལ་སྲིད་ཟིན་མི་འགྱུརཿ ཐམས་ཅད་ཁ་འཆམ་བསིལ་བའི་ཚལ་དུ་སྤྱུགཿ ཅེས་སྨྲས་རྒྱལ་སྲས་སྤྱུག་པ་ཀུན་ཐོས་ནསཿ ཡུལ་མི་ཐམས་ཅད་ལྟད་མོ་བལྟ་བར་འདུསཿ དེ་དག་དཔག་ཚད་བརྒྱ་དང་སུམ་བརྒྱ་དང་ཿ དཔག་ཚད་སྟོང་གི་ལམ་ནས་འོངས་བ་དང་ཿ དཔག་ཚད་འབུམ་དང་ཁྲི་ནས་ལྷགས་པ་དང་ཿ བྱེ་བ་ས་ཡ་དག་ནས་སྤྲིན་བཞིན་འདུསཿ མི་རྣམས་གཟུགས་བཟང་ཡན་ལག་རགས་པ་དང་ཿ ཤིན་ཏུ་མཛེས་ཤིང་ཉམས་དགའ་མདངས་དང་ལྡནཿ ཐམས་ཅད་སྤྱི་བོར་རལ་པ་ཐོར་ཅོག་བྱསཿ གསེར་དངུལ་མུ་མེན་བྱུ་རུ་ལ་སོགས་བརྒྱནཿ རས་གོས་
༼༦༠བ༽དཀར་དམར་སྣ་ཚོགས་གྱོན་པས་གང་ཿ བུད་མེད་སྐྲ་ཡི་མདུད་པ་རྒྱ་མདུད་བཅིངསཿ དུང་དང་རུས་པ་གཡུ་ཡི་རྒྱན་གྱིས་བརྒྱནཿ དགེ་སྦྱོང་བྲམ་ཟེ་དབུལ་ཕོངས་མགོན་མེད་དང་ཿ ནད་པ་ལ་སོགས་ཐམས་ཅད་དུ་དེར་འདུསཿ གྲོང་ཁྱེར་ཕྱི་རོལ་ལམ་ལ་ཐག་ཐོག་གང་ཿ དེ་ནས་རྒྱལ་བུ་ཕོ་བྲང་ནང་སྒོར་འཐོནཿ རྔ་བོ་ཆེ་དང་དུང་དང་རྫ་རྔ་དང་ཿ རྔ་ཕྲན་པི་ཝང་གླིང་བུ་མ་དཀྲོལ་འཁྲོལཿ བཙུན་མོ་འོད་འཆང་མས་ནི་ཕྱི་ལ་འབྲང་ཿ དྲི་མེད་དྲི་བྲལ་ཁྱོད་ནི་གར་བཞུད་པཿ བདག་ཀྱང་ཁྱོད་དང་ལྷན་ཅིག་འགྲོ་བར་བགྱིཿ འོན་ཏེ་ཕོ་བྲང་འདི་ལ་གཟིགས་ནས་སུཿ སྐྱེ་འཆི་མཐར་ཕྱིན་མ་ཐོབ་པར་དུ་བཞུགསཿ ཞེས་དུས་མཆི་མ་འཁོར་ཞིང་སྨྲས་པ་དང་ཿ རྒྱལ་བུ་དམ་པ་ནང་དུ་ཐེན་མཛད་ནསཿ སྤྱོད་པ་བསྐྱངས་པས་ཡབ་ཀྱི་ཁྲིམས་དང་འགལཿ རྒྱལ་ཁྲིམས་གཉན་པས་འདི་ནས་སྤྱུག་པར་མཆིཿ ལྷ་མོའི་གཟུགས་ཁྱད་གང་དུ་ཅི་བྱེད་འགྲོཿ རྒྱལ་པོ་བློན་འབངས་བར་དུ་བདེ་ཞིང་སྐྱིདཿ བརྩེ་བར་མ་བྱེད་ཕྱིས་ཞིག་མཇལ་དུ་འོང་ཿ དེ་སྐད་གསུངས་པས་འོད་འཆང་བསམ་པ་ལཿ འདི་ལྟར་སྤྱུག་པ་ཡབ་ཀྱི་བག་ཡོད་འོང་ཿ དེ་མིན་ཁྲིམས་དང་འགལ་བར་བྱས་གྱུར་ཀྱང་ཿ མི་མཆོག་འདི་འདྲ་སྤྱུག་པ་ཕངས་སྙམ་ནསཿ ཐེན་དང་ཡབ་ལ་ཞུ་བ་ཡོང་ཅི་ཟེརཿ བཙུན་མོ་འོད་འཆང་མ་རྒྱལ་པོའི་དྲུང་དུ་ཕྱིནཿ པུས་བཙུགས་འདུག་སྟེ་བཤུམ་མོའི་ཡུས་འདི་བརྗོདཿ ཅི་ནས་འདྲངས་པའི་
༼༦༡ན༽ཁྲིམས་ཀྱིས་ཡུལ་སྲིད་བདེཿ 
འབངས་མང་སྟབས་ལ་མ་གཏོང་གྲོས་གདབ་གསོལཿ རྒྱལ་པོའི་ཐུགས་ནི་སྨྱོ་བ་ཡིན་ནམ་ཅིཿ མི 
་མཆོག་འདི་དང་ཕྱིན་ཆད་ཕྲད་པར་དགའཿ རྒྱལ་པོའི་སྲས་གཅིག་པུ་འདི་མཐར་སྤྱུག་ནསཿ སྲས་ནི་གཞན་མེད་ཁྲིམས་ཀྱིས་ཅི་ཞིག་བྱཿ ཁོལ་མོ་ཕོ་བྲང་འདིར་ནི་ཅི་ལ་སྡོདཿ ཅེས་པ་ལ་སོགས་མང་དུ་སྨྲས་པ་དང་ཿ རྒྱལ་པོས་ཁྱོད་བདེན་འོད་འཆང་ཁྱོད་རེ་བདེནཿ ཅི་ཕྱིར་ཁྱོད་ཟེར་བཞིན་དུ་མི་ཉན་སྨྲསཿ རྒྱལ་པོས་བློན་པོ་ཚོགས་པའི་དབུས་སུ་ཕྱིནཿ རྒྱལ་བའི་སྲས་དེ་ཕོ་བྲང་ཕྱིར་འཐེན་ནསཿ ལྗོན་ཤིང་མྱ་ངན་ཚང་གི་དྲུང་ན་འདུགཿ འདུས་པ་རྣམས་ལ་སྤྲོ་བའི་ཚིག་སྨྲས་པཿ ལུས་ནི་མི་རྟག་གཡང་ཁའི་སྡོང་པོ་འདྲཿ དབུགས་ནི་མི་རྟག་ལ་གའི་ན་བུན་འདྲཿ ཡིད་ནི་མི་རྟག་ནམ་མཁའི་གློག་དང་འདྲཿ ཚེ་འདི་མི་རྟག་རྩ་ཁའི་ཟིལ་པ་འདྲཿ ཞེས་གསུངས་ཕྱོགས་ནས་འདུས་པའི་འགྲོན་པོ་རྣམསཿ ཆེ་ཆུང་མེད་པ་ཐམས་ཅད་མཆི་མས་བརྣངསཿ དེ་ནས་འཇིག་རྟེན་སྐྱོང་བ་ཆེན་པོ་བཞིཿ རྣམ་ཐོས་སྲས་དང་ཡུལ་འཁོར་སྲུང་དང་ནིཿ སྤྱན་མི་བཟང་དང་དེ་བཞིན་འཕགས་སྐྱེས་པོཿ བུ་དང་བློན་པོ་འཁོར་དང་མངག་པ་དང་ཿ ཕོ་ཉ་གཡོག་འཁོར་ཁ་དོག་འཕགས་པ་དགཿ གནས་དེར་ལྷགས་ནས་རྒྱལ་སྲིད་སྣ་བདུན་བསུཿ རྒྱལ་སྲས་མདུན་དུ་བུས་བཙུགས་ཐར་སྦྱར་ནསཿ སྙན་ངག་ཚིག་སུ་བཅད་པས་བསྐུལ་བ་ནིཿ
༼༦༡བ༽ཨེ་མ་ཧོཿ རྒྱལ་པོའི་རྒྱལ་ས་ཐུན་མོང་སྐྱབས་གནས་མིནཿ སྐྱེ་གནས་སོ་སོར་སྔ་ཕྱིར་སྤྲུལ་པའི་སྐུཿ པད་འབྱུང་མ་ཡིན་ངེས་དོན་སྟོན་པ་མེདཿ ཐ་དད་དྲང་ཕྱིར་ཐེག་པ་སོ་སོ་ཀུནཿ ལྟ་སྤྱོད་སྦྱོར་སྒྲོལ་པད་འབྱུང་སངས་རྒྱས་ལམཿ འབྲས་བུ་བདག་གཞན་མཆོག་ཐུན་སངས་རྒྱས་འགྲུབཿ ཅེས་བསྐུལ་མཁའ་འགྲོ་སྡེ་བཞི་མདུན་དུ་བྱུང་ཿ གླུ་གར་རྟ་མཆོག་རིན་ཆེན་ཁྲིད་བྱུང་ནསཿ རྒྱལ་བའི་སྲས་ཁྱོད་རྟ་མཆོག་འདི་ལ་ཆིབསཿ མཁའ་འགྲོ་སྡེ་བཞིས་ཆིབས་ཀྱི་རྐང་ལག་བཏེགཿ ཡངས་ཆེན་ནམ་མཁའ་དྭངས་བའི་དབྱིངས་ལ་བཞུདཿ རྒྱལ་སྲིད་སྣ་བདུན་སྔོན་མཇུག་ན་རེ་བྱསཿ ཐོ་ཕྱི་ཐམས་ཅད་འཇའ་འོད་བསྒོར་རེ་བཞུདཿ སྐྱེ་བོ་མང་པོའི་ཚོགས་རྣམས་ཕྱི་ལ་ལྟཿ མྱ་ངན་དུ་ཞིང་གདོང་ལས་མཆི་མ་གཟགསཿ བུད་མེད་ཚོགས་རྣམས་ཉམ་ཐག་ས་ལ་འདྲེཿ རྒྱ་པོ་ཀྱི་ཧུད་བུ་སྡུག་བརྗོད་ཅིང་དུཿ འོད་འཆང་འགྱེལ་ནས་དྲན་པ་ཉམས་པར་གྱུརཿ རྐན་དང་མཆུ་དང་ཁ་དང་སོ་བསྐམས་ནསཿ ཅང་མི་ཟེར་ཞིང་དབུགས་ཀྱི་རྒྱུ་བ་ཆདཿ འཁོར་གཡོག་བུད་མེད་ལྔ་བརྒྱ་མིག་ཆུ་གཟགསཿ ཉམ་ཐག་ལག་པ་གཉིས་ཀྱིས་བྲང་བརྡུང་ཞིང་ཿ ཉ་ཐང་ཕྱུང་བཞིན་ས་སྟེང་འགྲོ་ལྡོག་བྱེདཿ བདུད་བློན་རྣམས་ཀྱི་དབུགས་ནི་ཧད་ཧད་བྱསཿ རྒྱལ་བུ་ང་ཉིད་གར་བཞུད་ལྟ་བར་བྱེདཿ ཡུམ་གྱིས་ཇི་ལྟར་སྡུག་པའི་བུ་འདི་ནིཿ ཕྱིན་ཆད་མི་མཐོང་འདི་འདྲའི་ལྟས་ངན་པཿ བདག་ལུས་མྱ་
༼༦༢ན༽ངན་མེ་ཡིས་ཚིག་ཅེས་བརྗོདཿ ཆོས་བློན་རྣམས་ཀྱིས་ཕྱི་ལ་ཕྱག་ཙལ་ནསཿ བདག་ཅག་ཐམས་ཅད་ཁྱོད་ཀྱིས་འདུལ་བར་ཤོགཿ ཅེས་པའི་སྨོན་ལམ་མང་པོ་འདེབས་པར་བྱེདཿ ཨུ་རྒྱན་ཡུལ་ནས་ལྷོ་ཕྱོགས་ངོས་ལ་གཤེགསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ རྒྱལ་སྲིད་སྤངས་པའི་ལེའུ་སྟེ་ཉེར་གཅིག་པའོཿ ཿཐ་ཐ་ཉྲ་རྒྱ་རྒྱཿ ཿ