སྨན་ལ་སྦྱངས་པའི་ལེའུ།
དེ་ནས་པདྨ་ཅན་གྱི་ཡུལ་དུ་ཕྱིནཿ སྨན་པ་འཚོ་བྱེད་གཞོན་ནུའི་བུ་དང་ཕྲདཿ ཁྱོད་ཀྱིས་ཅི་ཤེས་བྱས་པས་སྨན་ཤེས་ཟེརཿ ང་ལ་སྨན་ཞིག་སློབས་དང་བྱས་པ་ཡིསཿ ང་ནི་རྒས་པས་ལུས་འདར་མཁས་རྒྱུ་མེདཿ སློབ་དཔོན་མི་ཡོང་ཡོང་ན་བསླབས་ཀྱི་ཟེརཿ ཟླ་གསུམ་དབྱར་ཏེ་ཟླ་གསུམ་སྟོན་དུ་ཤེསཿ གསུམ་ནི་དགུན་ཏེ་གསུམ་ནི་དཔྱིད་ཡིན་ནོཿ དེ་ལྟར་ཟླ་བའི་གོ་རིམ་དུས་ནི་དྲུགཿ ལོ་གཅིག་ལ་ནི་ཟླ་བ་བཅུ་གཉིས་འདོདཿ གསུམ་གསུམ་དུ་ནི་ཚིག་རྣམས་འདུས་པར་ཤེསཿ ཟླ་བ་གཉིས་གཉིས་ཤིང་གི་དུས་སུ་བསྟནཿ ཟས་དང་སྐོམ་ནི་དེ་ལྟར་འཇུ་བར་འགྱུརཿ སྨན་པ་དང་ནི་ཁམས་དང་དུས་ཀྱང་བསྟནཿ དབང་པོ་དང་ནི་ཁམས་རྣམས་དེ་དག་ཀྱང་ཿ ལོ་གཅིག་ལ་ནི་ཚིགས་
༼༦༥ན༽རྣམས་ཡོངས་སུ་འགྱུརཿ དབང་པོ་དག་ནི་ཡོངས་སུ་འགྱུར་བས་ནཿ ལུས་ཅན་རྣམས་ལ་སྣ་ཚོགས་ནད་ཀྱང་འབྱུང་ཿ འདི་ཉིད་ལ་ནི་སྨན་པས་ཟླ་གསུམ་བཞིཿ ཚིགས་ཀྱི་བར་དང་དུས་དྲུག་རྣམས་དང་ནིཿ ཁམས་དྲུག་མཁས་པར་བྱ་བ་ཤེས་པར་བྱཿ ཟས་སྐམ་སྨན་རྣམས་གོ་རིམ་ཇི་བཞིན་ཏེཿ རླུང་ནི་ཤེས་ཆེའི་ནད་ནི་དབྱར་ན་ལྡང་ཿ སྟོན་དུ་གྱུར་པ་ན་ནི་མཁྲིས་པ་གཡོཿ དགུན་གྱི་དུས་ན་དེ་བཞིན་འདུས་པ་སྟེཿ བད་ཀན་ཤས་ཆེའི་ནད་ནི་དཔྱིད་ལྡོང་ངོ་ཿ དབྱར་ནི་སྣམ་དྲོ་ལན་ཚྭ་སྐྱུར་བའི་རོཿ སྟོན་ནི་མངར་དང་སྣམ་དང་བསིལ་བའོཿ ཿདགུན་ནི་མངར་དང་སྐྱུར་དང་སྣུམ་པ་སྟེཿ དཔྱིད་ཀྱི་དུས་ན་རྩུབ་དྲོ་ཚ་བའོཿ བད་ཀན་ཆེ་བ་ཟོས་མ་ཐག་ཏུ་ལྡང་ཿ མཁྲིས་པ་ཆེ་བ་འཇུ་བའི་འདུས་ན་ལྡང་ཿ རླུང་ཤས་ཆེ་བ་ཞུ་མ་ཐག་ཏུ་ལྡང་ཿ ཁམས་གསུམ་གཡོ་བ་དེ་ནི་དེ་ལྟར་རོཿ རླུང་གི་བདག་ཉིད་ལ་ནི་བཅུད་ཀྱི་གསོཿ བཀྲུ་སྨན་གྱིས་ནི་མཁྲིས་པ་གསོ་བར་བྱཿ འདུས་པ་ལ་ནི་གསུམ་དུ་མཐུན་ལྡན་པཿ བད་ཀན་ཚིག་སུ་བབས་ན་སྐྱུགས་སྨན་བཏང་ཿ རླུང་ཤས་ཆེ་དང་མཁྲིས་དང་འདུས་པ་དང་ཿ བད་ཀན་ཤས་ཆེའི་ཚིགས་རྣམས་ཤེས་པར་བྱཿ དུས་གང་ཁམས་གང་ལུས་ནི་གང་ཡིན་པཿ དེ་ཡི་སྨན་དང་བཟའ་བཏུང་བསྟེན་པར་བྱཿ ཁོ་བོ་སྨན་པའི་བདག་ཉིད་མཁས་པ་ཆེཿ རིག་བྱེད་ཡན་ལག་བརྒྱད་དང་ལྡན་པ་དང་ཿ སྨན་གྱི་ཕུང་པོ་བསམ་མི་ཁྱབ་
༼༦༥བ༽པ་བསླབསཿ ཡང་དག་པར་ནི་མཁས་པར་ཁོང་དུ་ཆུདཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ སྨན་ལ་སྦྱངས་པའི་ལེའུ་སྟེ་ཉེར་བཞི་པའོཿ ཿཐ་ཐ་ཉྲ་རྒྱ་རྒྱཿ