རིག་པའི་གནས་ལྔ་ལ་མཁས་པར་སྦྱངས་པའི་ལེའུ།
དེ་ནས་རཱ་ག་ལ་ཡི་ཡུལ་དུ་ཕྱིནཿ ཨཱ་ཙར་ཀུན་གྱི་བཤེས་གཉེན་ཞེས་བྱ་བཿ རྒད་པོ་མགོ་དཀར་སྨ་ར་དཀར་དང་ཕྲདཿ རྒད་པོ་ཁྱོད་ཀྱིས་ཅི་ཤེས་སྨྲས་པ་ཡིསཿ སྒྲ་དང་ཡི་གེའི་བསྟན་པ་ཅི་འདྲ་བཿ ཉི་འོག་ས་སྟེང་འགྲན་ཟླ་མེད་ཅེས་ཟེརཿ བདག་ལ་སྒྲ་དང་ཡི་གེ་བསླབ་ཏུ་གསོལཿ དེ་སྐད་གསོལ་པས་དང་པོར་སྒྲ་ཉིད་བསླབསཿ ལེགས་སྦྱར་སཾ་སྐྲྀ་ཏ་ནི་ལྷ་ཡི་སྐདཿ ཨ་ཝ་བྷྲཾ་ཤ་གསང་བ་བརྡ་ཡི་སྐདཿ པྲ་ཀྲི་ཏ་ནི་བརྡ་སྦྱོར་འཕྲལ་གྱི་སྐདཿ བི་ཤཱ་ཙ་ནི་ཤ་ཟ་འདྲེ་ཡི་སྐདཿ སྒྲ་ནི་ཐད་སོར་བསྒྱུར་དང་ཐད་ལོག་བསྒྱུརཿ བརྒྱུད་དེ་བསྒྱུར་དང་བསྒྲུབས་ཏེ་བསྒྱུར་བ་དང་ཿ སྒྲ་གཅིག་དོན་མང་དོན་གཅིག་སྒྲ་མང་བསླབསཿ དེ་ནས་ཡི་གེའི་རིགས་ལ་སྦྱངས་པ་ནིཿ ལཉྩ་ན་དང་ན་གར་ཝརྟུ་ལཿ ཀསྨིར་སིནྡྷུ་དྷ་རི་ཀ་སོགས་དང་ཿ ཚངས་པ་ཁ་རོ་ཏ་ཡི་ཡི་གེ་སོགསཿ ཡིད་རིགས་མི་འདྲ་དྲུག་ཅུ་རྩ་བཞི་དང་ཿ སྐད་རིགས་མི་གཅིག་སུམ་བརྒྱ་དྲུག་ཅུ་བསླབསཿ དེ་ནས་བཟོ་བོ་བི་ཤྭ་ཀརྨ་ཞེསཿ ལོ་ནི་བརྒྱད་ཅུ་འགྲོ་བ་ཞིག་རྩར་ཕྱིནཿ གསེར་འགྱུར་རྩི་དང་རིན་པོ་ཆེ་ཡི་བཟོཿ ལྷ་བཟོ་གོས་བཟོ་ཤིང་བཟོ་རྩི་བཟོ་དང་ཿ དངུལ་བཟོ་ཟངས་བཟོ་ལྕགས་
༼༦༦ན༽བཟོ་རྡོ་བཟོ་དང་ཿ ཐགས་དང་ལྷ་མ་དང་ཞྭ་དང་ལུགས་དང་ལསཿ ཤེས་བྱའི་རིགས་སུ་གྱུར་པ་ཐམས་ཅད་བསླབསཿ དེ་ནས་གྲོང་ཁྱེར་ཞིག་ཏུ་ཕྱིན་པ་དང་ཿ སྨྱུག་མ་འཇག་མའི་ལྷགས་སྐྱོབས་ནང་ཞིག་ནཿ དུད་པ་ཕྱུར་ཕྱུར་འདུག་པས་དེ་རུ་ཕྱིནཿ སྤྲང་མོ་ཞིག་གིས་རྫ་རྩི་བྱེད་ཀྱེན་འདུགཿ འདི་ཡི་བྱ་ཐབས་ང་ལ་སློབས་དང་བྱསཿ ཁྱོད་ནི་ཕུན་སུམ་ཚོགས་པར་འདུག་པ་ལཿ རྗེ་རྩི་བསླབས་ནས་ཅི་ཞིག་བྱའམ་ཟེརཿ རབ་ནི་རྡོ་སྦྱོར་འབྲིང་ནི་ས་སྦྱོར་ཡིནཿ ཐ་མ་ལུགས་སྦྱོར་ཡང་ཐ་མར་ཚིལ་སྦྱོརཿ ཤེས་བྱ་དེ་ལྟ་བུ་ཡང་བསླབ་པར་བྱཿ རྗེས་སུ་མྱོང་བ་དེ་ནི་རབ་ཏུ་བརྟནཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ རིག་པའི་གནས་ལྔ་ལ་མཁས་པར་སྦྱངས་པའི་ལེའུ་སྟེ་ཉེར་ལྔ་པའོཿ ཿཐ་ཐ་ཉྲ་རྒྱ་རྒྱཿ ཿ