སྐུ་རབ་ཏུ་བྱུང་བའི་ལེའུ།
དེ་ནས་དགེ་སློང་ཤཱཀྱ་མི་ཏྲཱི་དང་ཿ ཤཱཀྱ་བཤེས་གཉེན་བྱ་བ་གཉིས་དང་ཕྲདཿ ཁྱོད་གཉིས་ཐད་ཀ་གར་འགྲོ་དྲིས་པ་ཡིསཿ བྲག་དམར་བྱ་སྐྱིབས་ཅན་ཞེས་བྱ་བ་ནཿ སློབ་དཔོན་པྲ་བྷ་ཧ་སྟི་བྱ་བ་བཞུགསཿ དེ་ལ་ཆོས་ཞུར་འགྲོ་བ་ཡིན་ཞེས་ཟེརཿ འོ་ན་ང་ཡང་འགྲོ་བྱས་བསྡོངས་ནས་ཕྱིནཿ སློབ་དཔོན་པྲ་བྷ་ཧསྟི་དང་མཇལ་ནསཿ ཁྱོད་ལ་བདག་ནི་ཚངས་སྤྱོད་རབ་ཏུ་འབྱུང་ཿ ཆོ་ག་དེ་ནི་རབ་ཏུ་བསྟན་དུ་གསོལཿ དེ་སྐད་གསོལ་བས་སློབ་དཔོན་ཞལ་ན་རེཿ བདག་གིས་རྣལ་འབྱོར་ཡོ་གའི་རྒྱུད་རྣམས་ཤེསཿ དེ་ལྟ་བུ་ནི་
༼༦༦བ༽སྤྱོད་ན་སྦྱིན་པར་བྱཿ རབ་ཏུ་བྱུང་བའི་མཁན་པོ་ངས་མི་ཡོང་ཿ བཅོམ་ལྡན་འདས་ཀྱི་ཉེ་གནས་ཀུན་དགའ་བོཿ ཨ་སུ་རཱ་ཡི་བྲག་ཕུག་བཞུགས་ནས་ཡོདཿ ཚངས་སྤྱོད་རབ་ཏུ་ཕྱུང་ན་དེར་ཕྱུང་གསུང་ཿ དབང་མ་བསྐུར་བར་གསང་སྔགས་འཆད་སྣོད་མིནཿ བྱིས་པ་འཇུག་པ་ཐུན་མོང་དབང་ལྔ་བསྐུརཿ ཏ་ཐཱ་སཾ་གྲ་ངན་སོང་སྦྱོང་རྒྱུད་དང་ཿ ཁྲོ་བོ་ཁམས་གསུམ་རྣམ་རྒྱལ་ཏནྡྲ་དང་ཿ མཧཱ་ཛ་ཡ་ཡོ་ག་ཙཱརྻ་དང་ཿ པཱ་ར་མི་ཏ་ལས་ཀྱི་རྟོག་པའི་རྒྱུདཿ དེ་སོགས་ཡོ་གའི་རྒྱུད་སྡེ་མ་ལུས་གསུངསཿ ཇི་ལྟར་གསུངས་པ་དེ་བཞིན་ཁོང་དུ་ཆུདཿ ཡོ་ག་སུམ་ཅུ་རྩ་གཉིས་ལྷ་ཞལ་མཐོང་ཿ དེ་ནས་ཤིང་ཕོ་རྟ་ལོ་སྤྲེལ་ཟླ་ཡིཿ ཚེས་བརྒྱད་ཨ་སུ་ར་ཡི་བྲག་ཕུག་ཕྱིནཿ དགེ་སློང་ཁྲི་ཕྲག་མང་པོ་བཞུགས་པ་ཡིསཿ རྨི་ལམ་ཉི་མ་གཅིག་ཤུལ་གཅིག་ཤར་རྨིསཿ ནམ་མཁའ་ཐམས་ཅད་སྒྲ་དང་འོད་ཀྱིས་གང་ཿ རེས་འགའ་སངས་རྒྱས་གཟུགས་སུ་སྟོན་པར་བྱེདཿ རེས་འགའ་འོད་ནི་འབའ་ཞིག་སྣང་བར་བྱེདཿ དེ་བཞིན་ཆོ་འཕྲུལ་མང་པོ་རྨིས་པར་གྱུརཿ དེ་ནས་ཚེས་བཅུ་སྐར་མ་ལག་སོར་ཉིནཿ དྲང་སྲོང་ཉི་མའི་དགུང་དང་ལྷན་ཅིག་ཏུཿ གཉིས་ཀ་རབ་ཏུ་བྱུང་ནས་བསྟན་པ་གཏདཿ ས་ཡི་ལྷ་མོས་ཆོས་གོས་ངུར་སྨྲིག་ཕུལཿ ཕྱོགས་བཅུའི་སངས་རྒྱས་མདུན་གྱི་མཁའ་ལ་བྱོནཿ བསྟན་པའི་མངའ་བདག་ཤཱཀྱ་སེངྒར་གསོལཿ འོད་སྲུངས་ཆེན་པོས་ལྕང་ལོ་གསིལ་པ་ལཿ སྤུ་གྲིའི་ཁ་ནེལ་ཕོད་པར་མ་
༼༦༧ན༽གྱུར་ཏེཿ སྤུ་གྲི་བརྡར་བས་མཁའ་འགྲོ་མ་བཞིས་བཟུང་ཿ ཌཱ་ཀི་སྒྲ་ཡི་རྣ་བ་ཅན་བྱུང་ནསཿ སྤུ་གྲི་ཕྲོགས་ཏེ་མདུན་གྱི་ནམ་མཁར་པོརཿ དེར་ནི་སྤུ་གྲིས་གཏམས་པའི་མཆོད་རྟེན་བྱུང་ཿ འདུལ་ཁྲིམས་ལྡན་པའི་དགེ་སློང་ཆ་ལུགས་འཛིནཿ བདུད་བཞི་བཅོམ་པས་སངས་རྒྱས་ཀུན་དང་མཉམཿ བྱང་ཆུབ་སེམས་དཔའ་འབུམ་ཕྲག་མང་པོ་རྣམསཿ དཀའ་ཡི་འགྲོ་བ་བྱེད་པའི་ནང་ན་འདུགཿ བྱང་ཆུབ་སེམས་དཔའ་སུ་མི་ཏྲ་ཞེས་བཏགསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ སྐུ་རབ་ཏུ་བྱུང་བའི་ལེའུ་སྟེ་ཉེར་དྲུག་པའོཿ ཿཐ་ཐ་ཉྲ་རྒྱ་རྒྱཿ ཿ