དུར་ཁྲོད་སྐུ་ལ་རྫོགས་སུ་བཞུགས་པའི་ལེའུ།
དེ་ནས་དགེ་སློང་ཤཱཀྱ་སེང་གེ་ཡིསཿ ཡུལ་གྱི་མིང་ནི་བཻ་དྡྷའི་ཡུལ་དུ་ཕྱིནཿ དུར་ཁྲོད་ཆེན་པོ་སྐུ་ལ་རྫོགས་ཞེས་པཿ མཐའ་སྐོར་དཔག་ཚད་ཕྱེད་དང་བཞི་ཡོད་པའིཿ དབུས་ན་མཆོད་རྟེན་རི་བོ་ཏ་ལ་ཞེསཿ རྒྱུ་ནི་རིན་ཆེན་ཤེལ་ལས་གྲུབ་པ་ཡིཿ ལོགས་ལ་མ་མོ་ཆེན་མོ་ཙོ་རཱི་མཿ ཤར་ན་ལྗོན་ཤིང་མཐུ་འབྱིན་ཞེས་བྱ་བཿ དུར་ཤིང་དེ་ལ་དུར་བྱ་མང་པོ་གནསཿ སྨད་ན་མི་མ་ཡིན་གྱི་སྒྱུ་མ་མཁནཿ བུད་མེད་མཛེས་མ་ཁྱི་རུ་བསྒྱུར་བ་དང་ཿ རྡེའུ་ཤིང་བུ་སེམས་ཅན་ཀེང་རུས་བསྒྱུརཿ བཟའ་སྐར་ཉི་ཟླ་རོ་ནི་སྐམ་རློན་བསྒྱུརཿ དེ་བཞིན་སྣ་ཚོགས་
༼༧༣ན༽སྒྱུ་མ་བྱེད་པའི་གནསཿ དུར་ཁྲོད་ལྷོ་ན་དུར་ཆུ་འགྲོ་མ་མཚོ་ཞེསཿ རྫིང་དབུས་ཀེང་རུས་པདྨ་ལྔ་བརྩེགས་སྐྱེསཿ དེ་ཡི་མཐའ་སྐོར་དུར་མེ་རང་བཞིན་འབརཿ མེ་འབར་གསེབ་ན་མི་ལུས་ཕྱེད་ཚལ་དང་ཿ རྐང་དང་མགོ་དང་ལག་པ་པགས་པ་དང་ཿ གསར་རྙིང་ཚིག་དང་མ་ཚིག་ཚིག་ལ་ཁདཿ དུར་ཁྲོད་ནུབ་ནང་དུར་ཆུ་འགྲོ་མ་མཚོ་ཞེསཿ རྫིང་དབུས་ཀེང་རུས་པདྨ་ལྔ་བརྩེགས་སྐྱེསཿ དེ་ཡི་མཐའ་སྐོར་དུར་མེ་རང་བཞིན་འབརཿ མེ་འབར་གསེབ་ན་མི་ལུས་ཕྱིད་ཚལ་དང་ཿ རྐང་དང་མགོ་དང་ལག་པ་པགས་པ་དང་ཿ གསར་རྙིང་ཚིག་དང་མ་ཚིག་ཚིག་ལ་ཁདཿ དུར་ཁྲོད་ནུབ་ན་དུར་རླུང་ཚུབ་མ་འཚུབཿ རླུང་གི་གསེབ་ན་འབྱུང་པོ་ཡི་དྭགས་ཁྱུཿ བུ་ཆུང་རེའུ་ལུག་བ་ལང་ཀེང་རུས་ཞོནཿ ལ་ལ་ནད་པ་ལ་ལ་མི་རོ་ཐོགསཿ ལ་ལ་སྣབས་ལུད་ལ་ལ་མེ་ཆུ་ཐོགསཿ ལ་ལ་ཞོ་མར་ལ་ལ་ཤ་ཆང་ཐོགསཿ བྱང་ན་དུར་རིས་ཆེན་རབ་གཡོ་ཞེསཿ དུར་རིའི་རྒྱལ་པོ་འདུ་འཛིན་དེ་ལ་ནིཿ དུར་གྱི་སེམས་ཅན་ཐམས་ཅད་གནས་བཅས་སྡོདཿ རྐེད་བར་ཡིད་བཞིན་ནོར་བུ་གཏེར་ཡོད་པཿ དེ་ཡི་ཤར་ན་འཇིག་རྟེན་སྐྱོང་བའི་ལྷཿ དབང་ཕྱུག་མཧཱ་པཱ་ལ་ཡ་ཞེས་པཿ ལུས་པོ་གཡག་ལ་མགོ་བོ་སེང་གེའི་གདོང་ཿ ལུས་སྨད་སྦྲུལ་ལ་སྲིན་པོའི་སྟེང་དུ་ཞོནཿ ལག་པར་ཁ་ཊྭཱཾ་མི་རོའི་རྒྱལ་མཚན་ཕྱརཿ དེ་ཡི་འཁོར་ན་གཟུགས་མང་མཐའ་ཡས་པཿ འདོད་དགུར་བསྒྱུར་བའི་གཟུགས་ཅན་སྣ་ཚོགས་རྩེཿ ལྷོ་ཕྱོགས་བློ་འཕེལ་དམར་པོ་བསམ་གཏན་བསྒོམཿ དུར་ཁྲོད་དེར་ནི་མཆོད་རྟེན་རྒྱབ་བརྟེན་ནསཿ མཁའ་འགྲོ་མ་ཆོས་གསུངས་ལོ་ལྔ་བཞུགསཿ མཚན་ཉིད་ཉི་མ་འོད་ཟེར་ཞེས་སུ་གྲགསཿ གཞན་དོན་འཕྲིན་ལས་འབྲས་བུ་ལོ་འདབ་རྒྱསཿ
༼༧༣བ༽ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ དུར་ཁྲོད་སྐུ་ལ་རྫོགས་སུ་བཞུགས་པའི་ལེའུ་སྟེ་ཉེར་དགུ་པའོཿ ཿཐ་ཐ་ཉྲ་རྒྱ་རྒྱཿ ཿ