དུར་ཁྲོད་ལངྐ་བརྩེགས་སུ་བཞུགས་པའི་ལེའུ།
དེ་ནས་བཀོད་པ་ལྷུན་གྲུབ་ཕོ་བྲང་ཞེསཿ མདོག་ནི་མཐིང་ཁ་དཔག་ཚད་ལས་འདས་པཿ དབྱིབས་ནི་ཟླུམ་པོ་འཇའ་འོད་ཟེར་གསུམ་འཕྲོཿ དེ་ནང་སྐུ་བཞིའི་སྟོན་པ་ཀུན་ཏུ་འཆང་ཿ སྐུ་མདོག་མཐིང་ནག་སེང་གེའི་སྟེང་ན་བཞུགསཿ དུར་ཁྲོད་ཆས་བརྒྱད་རུས་པའི་རྒྱན་དྲུག་དང་ཿ དཔལ་གྱི་ཆས་བརྒྱད་རཏྣའི་རྒྱན་དྲུག་གསོལཿ རྡོ་རྗེ་དྲིལ་འཛིན་ཡུམ་དང་འཁྲིལ་ནས་བཞུགསཿ ཐེག་པ་ཐུན་མོང་དགུ་དང་ཁྱད་པར་དགུཿ ཆོས་རྣམས་ཐམས་ཅད་དབྱེར་མེད་གཅིག་ཏུ་སྟོནཿ སྤྱི་ཏི་ཡོ་གར་མཁས་པའི་དྲུང་དུ་ཕྱིནཿ སྤྱི་ཏིའི་རྒྱུད་སྡེ་བྱེ་བ་ཕྲག་བཅུ་དང་ཿ སྟོང་ཕྲག་བདུན་ཅུ་རྩ་གཉིས་ལེགས་པར་གསུངསཿ བཀའ་འདུས་རྒྱལ་པོ་ཟུག་པ་རྩ་བའི་རྒྱུདཿ འགྲིལ་བ་སྡོང་པོ་གྱེས་པ་ཡལ་གའི་རྒྱུདཿ རྒྱས་པ་ལོ་འདབ་སྨིན་པ་འབྲས་བུའི་རྒྱུདཿ བསྡུས་པའི་རྒྱུད་དང་ལུང་གི་རྒྱུད་དང་ནིཿ མན་ངག་རྒྱུད་དང་རྒྱ་ཆེར་བཤད་པའི་རྒྱུདཿ སྐུ་ཡོངས་རྫོགས་པ་མི་ཕྱེད་པ་ཡི་མདོཿ གསུང་ཡོངས་རྫོགས་པ་མ་འདྲེས་པ་ཡི་མདོཿ ཐུགས་ཡོངས་རྫོགས་པ་ཡེ་ཤེས་སྒོ་ལྔའི་མདོཿ ཡོན་ཏན་ཡོངས་རྫོགས་གོལ་ས་བཅད་པའི་མདོཿ འཕྲིན་ལས་ཡོངས་རྫོགས་རྣམ་གྲངས་ངེས་པའི་མདོཿ ཁྲིམས་གསུམ་ཡོངས་རྫོགས་
༼༧༨བ༽རྩ་བ་བརྟན་པའི་མདོཿ ལས་ཀྱི་ཁོལ་པོ་རྒྱུད་དུ་བཀོད་པའི་མདོཿ ཁྱད་པར་སྤྱི་མདོ་ཉི་ཤུ་རྩ་གཅིག་གསུངསཿ ལྟ་བ་དངོས་མེད་ཡེ་སྟོང་ཐེར་ཟུག་སྟོནཿ སྒོམ་པ་གང་ཤར་ཏིང་འཛིན་བཞི་ལྔ་སྒོམཿ སྤྱོད་པ་སྣ་ཚོགས་ལམ་ཁྱེར་ལས་སུ་རུང་ཿ འབྲས་བུ་བཅོ་བརྒྱད་དེ་བཞིན་གཤེགས་པའི་སཿ གསང་མཚན་ཀུན་ཏུ་འཆང་ཞེས་ཡོངས་སུ་གྲགསཿ དེ་ནས་ཡུལ་གྱི་མིང་ནི་ཟ་ཧོར་ཡུལཿ དུར་ཁྲོད་ཆེན་པོ་ལངྐ་བརྩེགས་པ་ཞེསཿ དཔག་ཚད་ཕྱེད་དང་བདུན་གྱིས་བསྐོར་བ་ཡིཿ དབུས་ན་མཆོད་རྟེན་བདེ་བྱེད་གཞོན་ནུ་གྲུབཿ མ་མོ་ཆེན་མོ་ཙཎྜི་ལི་གནས་པཿ ནུབ་ན་ལྗོན་པ་དུར་ཤིང་བ་ལེ་ཝཿ དུར་བྱ་མང་པོའི་ཚང་བཅས་ཤིང་ཏོག་ཟཿ སྤྲ་དང་སྤྲེའུ་མང་པོས་ཀེང་རུས་བཀྲམཿ བྱང་ན་དུར་མཚོ་སྐྱོན་བྲལ་མཚོ་ཞེས་པརཿ ཆུ་སྲིད་ཆུ་རྟ་ཆུ་གླང་ཆུ་ལུག་དང་ཿ ཆུ་མི་རུ་སྦལ་ཉ་ཆེན་དུང་སོགས་རྒྱུཿ ཤར་ན་དུར་མེ་གཟི་བརྗིད་འཕྲོག་ཅེས་པཿ མེ་དཔུང་དུམ་བུ་མང་པོར་ཆད་འགྲོ་བའིཿ མེ་གསེབ་དོ་མ་དྲེད་རྒོད་དང་སྤྱང་ཀིའི་ཚོགསཿ ཁ་ནས་སེམས་ཅན་རིགས་བྱེད་ཀེང་རུས་སྐྱུགཿ ལྷོ་ན་དུར་རླུང་ཁོར་ཁོར་ཡུག་ཅེསཿ རླུང་གསེབ་སྦྲ་དང་ཕྱུགས་ལུག་བཅས་པ་ཀུནཿ ཐམས་ཅད་ནམ་མཁའི་དབྱིངས་ལ་ཁྱེར་འགྲོ་བཿ ཤར་ལྷོར་དུར་རིའི་རྒྱལ་པོ་དབང་པོ་བྲགཿ དུར་གྱི་སེམས་ཅན་མང་ཤིའི་ཀེང་རུས་དང་ཿ དགོས་འདོད་འབྱུང་བ་ཡིད་བཞིན་ནོར་བུའི་གཏེརཿ བྱང་
༼༧༩ན༽ཤར་མཁའ་འགྲོ་རྡོ་རྗེ་བདུད་འདུལ་མཿ སྐུ་མདོག་དམར་མོ་རས་སྔོན་ཨང་རག་གྱོནཿ མཆུ་ནི་རྨ་བྱ་མིག་ནི་འུག་པར་འདུགཿ སྐུ་སྟོད་དག་ལ་རུས་པའི་རྒྱན་དྲུག་གསོལཿ དཔྲལ་བའི་དཀྱིལ་ན་མེ་ལོང་གཅིག་ཡོད་པཿ རལ་པ་ཐོར་ཚུགས་རྡོ་རྗེ་དཀྱིལ་དུ་བཅིངསཿ ལག་པ་གཉིས་ཀྱིས་རྡོ་རྗེ་སེར་པོ་ཐོགསཿ མཚན་མ་དཀྲག་ཅིང་ཁ་ནས་བུ་ཆུང་སྐྱུགཿ ལྷོ་ནུབ་མཚམས་ན་དུས་མཚན་ཀོ་ཤ་ཞེསཿ སེད་མགོ་གཡས་གསུམ་གཡོན་གསུམ་དགུ་ཡོད་པཿ ལུས་ལ་སྟག་གི་པགས་པའི་ཐུལ་པ་གྱོནཿ མི་རོ་སྐམ་རློན་སྙིང་པའི་ས་ལེར་ཁུརཿ ལག་ན་མདུང་རིང་རྔ་ནག་བཏགས་པ་འཕྱརཿ རྟ་ནག་མི་རོའི་སྒ་ཆ་བྱས་པ་ཞོནཿ ཤིན་ཏུ་འཇིགས་པའི་དུར་ཁྲོད་ཆེན་པོ་དེརཿ ལོ་ལྔ་བཞུགས་ནས་མཁའ་འགྲོར་ཆོས་འཁོར་བསྐོརཿ མཚན་ནི་པདྨ་སམྦྷ་ཞེས་བྱར་གྲགསཿ དེ་ནས་དགའ་རབ་རྡོ་རྗེ་ཞེས་བྱ་བཿ ལྷའི་བུ་ཀུན་དགའ་སྙིང་པོ་ཚེ་འཕོས་པཿ རྒྱ་གར་རྩེ་ཕྲུག་རིན་ཆེན་སྒང་བྱ་ནཿ ཡབ་ནི་རྒྱལ་པོ་དྷརྨཱ་ཨ་ཤྭ་ཀཿ ཡུམ་ནི་བདེ་གཤེགས་རིགས་ལྡན་མ་གཉིས་ལཿ སྲས་པོ་མེད་ཅིང་སྲས་མོ་གཉིས་ཡོད་དེཿ གཡུང་དྲུང་སྐྱིད་དང་མཚོ་སྐྱེས་ས་ལེ་མཿ བཀྲ་ཤིས་གཡུང་དྲུང་སྐྱིད་ནི་ཁབ་ཏུ་གཤེགསཿ མཚོ་སྐྱེས་ས་ལེ་མ་ནི་ཆོས་བྱར་དགོངསཿ མཛོ་མོ་དཀར་མོ་ཞིག་ལ་ཆས་རྐྱེན་བཀལཿ གཡོག་མོ་དགེ་ལྡན་མ་ནི་ཁྲིད་ནས་སུཿ འབྲས་གསུམ་ཚལ་གྱི་ཁུ་བྱག་
༼༧༩བ༽སྡིངས་སུ་བསྒོམསཿ ནམ་དེའི་དགུང་ལ་རྨི་ལམ་རིན་ཆེན་གྱིཿ བུམ་པར་བདུད་རྩི་བླུགས་ནས་འཐུངས་པ་རྨིསཿ དེ་ཡིས་ནངས་པར་གཡུ་ཡི་ནེ་ཙོ་ཞིགཿ སྲས་མོའི་ཕྲག་པ་གཡས་སུ་བབས་ནས་ནིཿ ལྷ་ཅིག་ཁྱོད་ལ་སྲས་ཤིག་བཙས་ནས་སུཿ དེ་ནི་ལྷ་དང་མི་ཡི་སྟོན་པ་སྟེཿ དགའ་རབ་རྡོ་རྗེ་ཞེས་བྱར་འགྱུར་རོ་ཟེརཿ ནེ་ཙོ་ཕུར་སོང་བུ་མོའི་མཆིད་ན་རེཿ ང་ནི་བུ་ཚ་མི་འདོད་ཆོས་བྱས་ཡིནཿ སྡུག་བྱ་ཕུང་བྱ་འདི་ནི་ཅི་སྐད་ཟེརཿ དེ་ནས་སོང་ཕོད་སྲས་ཤིག་འཁྲུངས་པ་ལསཿ ཕ་མེད་བུ་འདིས་དགོས་པ་མེད་ཟེར་ནསཿ གཡོག་མོར་ཐལ་དོད་ནང་དུ་བསྐྱུར་དུ་བཅུགཿ ཞག་བདུན་ལོན་ནས་སྔར་གྱི་རྨི་ལམ་དྲནཿ སྤྲུལ་པའི་སྐུ་ཞིག་ཡིན་སྲིད་ལྟོས་དང་བྱསཿ བལྟས་པས་བུ་དེ་མ་ཤི་ཐལ་གསིབ་ནཿ འཕྲ་ཤད་ལིང་ལིང་རྩེ་ཡིན་འདུག་པ་ལསཿ དེ་ལ་དགྱེས་ནས་རོ་ལངས་བདེ་བར་བཏགསཿ དེ་ནས་བུ་དེ་གཞན་གྱི་ཟླ་སྐྱེད་པསཿ དེ་ཡིས་ཞག་སྐྱེད་ཤིན་ཏུ་ཆེ་བར་གྱུརཿ དེ་བཞིན་ལོ་སྐྱེད་བས་ཀྱང་ཟླ་སྐྱེད་ཆེཿ ལོ་བརྒྱད་ལོན་ནས་ཡུམ་ལ་འདི་སྐད་བརྗོདཿ རྡོ་རྗེ་སེམས་དཔའ་གར་བཞུགས་ཆོས་ཉན་འགྲོཿ ཆོས་ཀྱི་ཆར་པ་སེམས་ཅན་ཀུན་ལ་འབེབསཿ ཡུམ་གྱིས་རྡོར་སེམས་མི་མངོན་དབྱིངས་ན་བཞུགསཿ ཁྱོད་ཀྱིས་མི་མཐོང་འདུག་པར་འཚལ་ཞེས་སྨྲསཿ ལན་ཅིག་དུས་ན་བྱིས་པ་དེ་སྟོར་ནསཿ ཡུན་རིང་མེད་དེ་དེ་ནས་བྱུང་ཙ་ནཿ ངས་དཔལ་རྡོ་རྗེ་སེམས་དཔར་ཆོས་ཉན་ཕྱིནཿ
༼༨༠ན༽རྡོ་རྗེ་སེམས་དཔས་ཅི་ཤེས་ངས་ཤེས་ཟེརཿ དེ་ནས་ཡུམ་ཡང་ངོ་མཚར་སྐྱེས་པ་ལསཿ པཎ་ཆེན་ལྔ་བརྒྱར་འགྲོ་གླིང་བྱེད་འགྲོ་ཟེརཿ ཡུམ་གྱིས་པཎ་ཆེན་ལྔ་བརྒྱ་ཤིན་ཏུ་མཁསཿ ཚོགས་པ་ཆོས་གྲའི་སྟོན་པ་ཡིན་པས་ནཿ ཁྱོད་ཀྱིས་མི་ཐུབ་བྱས་པས་ཐུབ་ཡོང་ཟེརཿ འོ་ན་ངའི་ཡབ་དྷརྨཱ་ཨ་ཤྭ་ཀའིཿ མཆོད་གནས་ཡིན་པས་ཡབ་ལ་ཞུས་ཤིག་གསུངསཿ ཁྱེའུས་རྩེ་ཕྲུག་རིན་ཆེན་སྒང་དུ་ཕྱིནཿ པཎ་ཆེན་ལྔ་བརྒྱར་བགྲོ་གླིང་བྱེད་པ་ཡིནཿ ཕྱག་ནི་རྩེ་སྤྲོད་བཞེས་པར་ཞུ་བྱས་པསཿ རྒྱལ་པོས་མི་ཐུབ་ཟེར་ཀྱང་ཐུབ་ཁས་བླངསཿ དེ་ནས་རྒྱལ་པོ་ས་པཎྜི་ཏ་རྣམས་ལཿ དེ་སྐད་ཟེར་བའི་དྲི་ལན་ཅིག་གདའ་བསཿ ཕྱག་ནི་རྩེ་སྤྲོད་གནང་བར་ཞུ་ཞེས་གསུངསཿ པཎྜི་ཏ་རྣམས་བགློ་གླིང་བྱེད་པ་ནཿ མ་ཐུབ་རྒྱལ་པོས་ཆད་པས་ཆོད་ཅིག་གསུང་ཿ དེ་ནས་ཁྱེའུས་ཕྱག་རྩེ་སྤྲོད་དུ་བྱསཿ བགྲོ་གླིང་བྱས་པས་པཎྜི་ཏ་རྣམས་ཕམཿ ཐེག་པ་གང་ནས་གླེངས་ཀྱང་མ་ཐུབ་སྟེཿ ངོ་མཚར་སྐྱེས་ཏེ་སངས་རྒྱས་བྱོན་ནོ་ཟེརཿ ཨ་ལ་ལ་སྟེ་ཆོས་བྱོན་དགེ་འདུན་བྱོནཿ བདེ་བ་ཆེན་པོ་ཎྜི་ཡཱ་ཞེས་བྱར་བཏགསཿ རྒྱལ་པོ་དགྱེས་པས་དགྱེས་པ་རྡོ་རྗེ་ར་བཏགསཿ ཡུམ་གྱིས་བཞད་པ་རྡོ་རྗེར་བཏགསཿ ཡུལ་མི་དགའ་བས་དགའ་རབ་རྡོ་རྗེར་བཏགསཿ དེ་ཚེ་སིངྒ་ལ་ཡི་རྒྱལ་པོ་ནིཿ རྒྱལ་པོ་གཞོན་ནུ་དཔལ་ཞེས་བྱ་བའི་བུཿ མཁས་པ་འཇམ་དཔལ་བཤེས་གཉེན་ཞེས་བྱ་བཿ རྒྱ་
༼༨༠བ༽མཚོའི་གླིང་ལ་སྐུ་སྐྱོ་འཆག་ཏུ་བཞུདཿ མི་བཞུགས་པ་ལས་སླར་ལོག་ཙ་ན་ནིཿ ཐེག་པ་བརྒྱད་ལས་མཐོ་བའི་དགུ་པ་ནིཿ ཨ་ཏི་ཡོ་ག་བྱ་བ་ཁས་ལེན་པའིཿ བྱིས་དཀར་རས་སྔོན་ཨང་རག་གྱོན་པ་ཞིགཿ པཎྜི་ཏ་རྣམས་ཀུན་གྱིས་མ་ཐུབ་གྲགསཿ སོ་མཚམས་འབྱེད་པས་ཚར་གཅོད་འདོད་དོ་གསུང་ཿ འཇམ་དཔལ་བཤེས་གཉེན་དཔོན་གཡོག་རྣམས་ཀྱིས་བྱོནཿ སངས་རྒྱས་སྤྲུལ་པ་དགའ་རབ་རྡོ་རྗེ་དེཿ ཨུ་རྒྱན་ཡུལ་གྱི་དྷ་ན་ཀོ་ཤའི་གླིང་ཿ དྷ་ཧ་ན་ཡི་འདུ་ཁང་ཆེན་པོ་ནཿ ཆོས་གསུང་བཞུགས་པའི་དྲུང་དུ་བཤེས་གཉེན་བྱོནཿ རྩོད་པ་བྱས་པས་འཇམ་དཔལ་བཤེས་གཉེན་གྱིསཿ ལུང་རིག་མན་ངག་གང་ཡང་མ་ཐུབ་ནསཿ སྔར་དུ་གཤེ་སྐུར་བཏབ་པས་འགྱོད་པ་སྐྱེསཿ སྡིག་པ་སྦྱང་དོན་རང་གི་ལྕེ་བཅད་སྙམཿ གཡོག་པོའི་མེད་པས་སྤུ་གྲི་ལོངས་ཤོག་ཟེརཿ དགའ་རབ་རྡོ་རྗེས་སྤུ་གྲིའི་ཅི་བྱེད་གསུངསཿ ཁྱེད་ལ་སྡིག་བསགས་ད་ནི་ལྕེ་གཅོད་ཟེརཿ ལྕེ་བས་སྙིང་བཏོན་པ་དེ་ཡི་སྡིག་མི་འདགཿ མན་ངག་ཆོས་རྣམས་མ་རྨོངས་མཁས་པར་སློབསཿ རང་གི་ཉམས་དང་སྦྱོར་བའི་ཆོས་ཤིག་རྩོམསཿ དེ་སྐད་གསུང་པས་ཆོས་རྣམས་མ་ལུས་ཞུསཿ བྱང་སེམས་སྡེ་ལ་འགྲེལ་པ་གསེར་ཞུན་བརྩམསཿ དེ་སྐད་ཡོངས་སུ་གྲགས་པས་ས་སྟེང་ཁྱབཿ པདྨ་སམྦྷས་དགའ་རབ་དྲུང་དུ་ཕྱིནཿ རྫོགས་ཆེན་སྙིང་ཐིག་རྒྱུད་ནི་བཅུ་བདུན་དང་ཿ སྔགས་སྲུང་ནག་མོའི་རྒྱུད་དང་བཅོ་
༼༨༡ན༽བརྒྱད་གསནཿ གོལ་ས་གཅོད་པ་གླང་པོ་སུན་འབྱིན་རྒྱུདཿ རྒྱལ་པོ་ལྟ་བ་ལ་ཟོའི་རྒྱུད་དང་ནིཿ བྲམ་ཟེ་ཐེག་པ་ཤན་འབྱེད་རྒྱུད་ཅེས་དང་ཿ ཀློང་དགུ་བམ་པོ་ཉི་ཁྲི་ཆིག་སྟོང་བསྟནཿ སེམས་ཉིད་ཆོས་སྐུར་ངོ་སྤྲོད་བླ་མ་ཡིནཿ རང་རིག་སྐྱེ་མེད་ས་གསུམ་དུས་གཅིག་ནོནཿ སེམས་ཉིད་འགག་མེད་སངས་རྒྱས་འཕོ་འགྱུར་མེདཿ དགའ་རབ་རྡོ་རྗེ་ཆོས་ཀྱི་བྱུང་ཁུངས་བཟང་ཿ ཐམས་ཅད་མཁྱེན་ཅིང་ཁོང་དུ་ཆུད་པར་གྱུརཿ ལྟ་བ་ཀ་དག་ཆོས་དབྱིངས་མ་བུར་ཐིམཿ སྒོམ་པ་མ་བཅོས་རང་བཞིན་ལྷུན་གྱིས་གྲུབཿ སྤྱོད་པ་ཉོན་མོངས་བྱང་ཆུབ་བླང་དོར་མེདཿ འབྲས་བུ་སྤང་ཐོབ་མེད་པར་རང་སར་གྲོལཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ དུར་ཁྲོད་ལངྐ་བརྩེགས་སུ་བཞུགས་པའི་ལེའུ་སྟེ་སོ་གཉིས་པའོཿ ཿཐ་ཐ་ཉྲ་རྒྱ་རྒྱཿ ཿ