དུར་ཁྲོད་ཆེན་པོ་གསང་ཆེན་རོལ་པར་བཞུགས་པའི་ལེའུ།
དེ་ནས་མཁའ་སྤྱོད་རིག་འཛིན་གནས་སུ་ཕྱིནཿ བདེ་ཆེན་གསང་ལམ་མནོལ་མའི་དུར་ཁྲོད་ནཿ མཁའ་འགྲོ་ཉི་ཟླ་དངོས་གྲུབ་ཅེས་ཀྱང་བྱཿ མཁའ་འགྲོའི་གཙོ་མོ་གསང་བ་ཡེ་ཤེས་ཞེསཿ དགེ་སློང་ཀུན་དགའ་སྨོན་ལམ་ཞེས་ཀྱང་བྱཿ མཁའ་
༼༨༣ན༽འགྲོ་ལས་ཀྱི་དབང་མོ་ཆེའི་དྲུང་ཕྱིནཿ ཐོད་མཁར་སྒོ་བཅད་ནང་དུ་མཐར་ནསཿ གཡོག་མོ་ཀུ་མཱ་ར་ལ་འཕྲིན་བརྒྱུད་པསཿ ལན་ནི་མ་བྱུང་བརྗེད་དམ་སྨྲས་པ་ཡིསཿ ཤེལ་གྱི་བུམ་པ་ཁུར་ནས་ཆུ་ལན་འདུགཿ ངས་བསྐུར་བྱས་པས་བུམ་སྟེགས་ཁ་རུ་བཞགཿ རྒྱལ་བས་བུམ་སྟེགས་བུམ་པ་འབྱར་དུ་བཅུགཿ ལོངས་པར་མ་གྱུར་ཁུག་ཁུག་ལན་འགའ་བྱསཿ བུམ་ཐག་ཕུད་ནས་རྒྱལ་བའི་མདུན་དུ་འོངསཿ ཤེལ་གྱི་གྲི་གུས་བྲང་བཤགས་ཁ་ཕྱེ་ནསཿ ཞི་བ་རྡོ་རྗེ་དབྱིངས་ཀྱི་ལྷ་ཚོགས་རྣམསཿ བཀྲ་ལམ་བསྟན་ནས་ངག་ནས་འདི་སྐད་གསུངསཿ ཁྱོད་ཀྱང་སྔགས་པ་ནུས་མཐུ་ཅན་འདུག་སྟེཿ དེ་བས་ངའི་འདི་ཡ་མཚན་མི་ཆེའམཿ དེ་སྐད་ཟེར་བས་ཕྱག་བཙལ་བསྐོར་བ་བྱསཿ མཆོག་དབང་གོང་མ་བདག་ལ་བསྐུར་དུ་གསོལཿ ང་ནི་གཡོག་ཡིན་ནང་དུ་འདེངས་ཟེར་ཕྱིནཿ ཉི་ཟླའི་ཁྲི་བརྩེགས་ཉི་ཟླའི་གདུགས་ཕུབ་པཿ ཉི་མ་ཟླའི་རྒྱན་དྲུག་སྐུ་ལ་གསོལཿ དགེ་སློང་མ་བཞུགས་ཕྱག་བཙལ་བསྐོར་བ་བྱསཿ གསེར་གྱི་འཁོར་ལོ་རྩིབས་སྟོང་ཕུལ་ནས་ནིཿ ཕྱི་ནང་གསང་བའི་དབང་བསྐུར་ཞུ་གསོལ་བསཿ ལྷ་ཚོགས་མདུན་གྱི་ནམ་མཁར་ཁྲ་ཆེམ་བྱུང་ཿ སྐལ་ལྡན་རིགས་ལྡན་ད་ལྟ་དབང་ཞུས་གསུང་ཿ བླ་མ་མེད་པའི་གོང་རོལ་ནཿ སངས་རྒྱས་བྱ་བའི་མིང་ཡང་མེདཿ བསྐལ་པ་སྟོང་གི་སངས་རྒྱས་ཀྱང་ཿ བླ་མ་དག་ལ་བརྟེན་ནས་བྱུང་ཿ དཔལ་ལྡན་བླ་མ་ཡོན་ཏན་མཚོཿ
༼༨༣བ༽བཞིན་གྱི་དཀྱིལ་འཁོར་ལེགས་བསྟན་ནསཿ ཐུགས་རྗེས་སློབ་མ་ལ་གཟིགས་ཞུཿ དབང་ནི་ལྷ་ལ་མི་ཞུ་བླ་མར་ཞུཿ དེ་སྐད་སྨྲས་པས་དགེ་སློང་མའི་ཞལ་ནསཿ དབང་ཞུ་ཤེས་གསུང་ལྷ་ཚོགས་ཐུགས་ཀར་བསྡུསཿ རྡོ་རྗེ་གྲོ་ལོད་ཡི་གེ་ཧཱུཾ་དུ་བསྒྱུརཿ ཞལ་དུ་མིང་ནས་བྱིན་གྱིས་བརླབས་པ་ཡིསཿ ཕྱི་ལྟར་སངས་རྒྱས་སྣོང་བ་མཐའ་ཡས་སྐུཿ ཚེ་ཡི་རིག་འཛིན་འགྲུབ་པའི་དབང་རྣམས་ཐོབཿ ཁོང་པའི་ནང་སླེབ་བྱིན་གྱིས་བརླབས་པ་ཡིསཿ ནང་ལྟར་འཕགས་པ་སྤྱན་རས་གཟིགས་ཀྱི་སྐུཿ ཕྱག་རྒྱ་ཆེན་པོ་བསྒོམ་པའི་དབང་རྣམས་ཐོབཿ གསང་བའི་པདྨོར་བཏོན་ནས་བྱིན་བརླབས་པསཿ ལུས་ངག་ཡིད་གསུམ་ཤེས་སྒྲིབ་དག་པར་སྦྱངསཿ གསང་བ་ལྟར་ན་རྟ་མགྲིན་དབང་གི་སྐུཿ དྲེགས་པའི་ལྷ་འདྲེ་དམ་ལ་འདོགས་དབང་ཐོབཿ དེ་ནས་འོག་མིན་ཆོས་དབྱིངས་ཕོ་བྲང་དུཿ སྟུག་པོ་བཀོད་པ་བཀོད་པ་ལྷུན་གྲུབ་ནཿ རྒྱལ་བ་རྒྱ་མཚོ་རྣམས་ཀྱི་བཀའ་སྡོད་པཿ རིག་འཛིན་རྡོ་རྗེ་ཆོས་ནི་ཞེས་ཀྱང་བྱཿ རྡོ་རྗེ་སྙིང་པོ་འཛིན་པ་ཞེས་ཀྱང་བྱཿ རིག་འཛིན་རྒྱལ་པོ་ཀུན་ཇོ་ར་ཞེས་པཿ དུང་ལ་ཕོ་ཚོས་བསྐུས་པའི་ཞལ་བསྟན་ནསཿ ལྷ་ཡི་བུ་དང་བུ་མོ་མང་པོས་བསྐོརཿ འཇའ་དང་འོད་དང་རོལ་མོའི་སྒྲ་དང་བཅསཿ གནས་དེ་ཉིད་དུ་བཀའ་གཏད་དབང་རྣམས་བསྐུརཿ ཡོངས་པ་འཛིན་པ་དགེ་བའི་བཤེས་གཉེན་དབང་ཿ ཕྱི་ཡིས་ཆད་བརྒྱད་སྤྲུལ་པའི་སྐུ་རུ་བསྐུརཿ ཆོས་བཀའ་གཏད་པ་པོ་ཏི་གླེགས་བམ་དབང་ཿ
༼༨༤ན༽ནང་གི་ཆོས་བརྒྱད་ལོངས་སྤྱོད་རྫོགས་སྐུར་བསྐུརཿ རིག་པའི་རྩལ་དབང་ཡི་དམ་ལྷ་ཡི་དབང་ཿ གསང་བའི་ཆས་བརྒྱད་ཆོས་ཀྱི་སྐུ་རུ་བསྐུརཿ ཡོངས་རྫོགས་ཕྱག་རྒྱ་ཆེན་པོ་མཆོག་གི་དབང་ཿ དབང་གི་ཆས་བཅུ་མི་འགྱུར་རྡོ་རྗེར་བསྐུརཿ སྐུ་ལྔའི་བདག་ཉིད་བླ་མ་རྡོ་རྗེ་འཆང་ཿ ཡུལ་འཁྲིལ་ལྟ་བ་སྤྱི་འབྱམས་མངོན་བྱང་བསྐུརཿ དེ་ནས་སྦས་པའི་དབང་ལྔ་བསྐུར་བ་ནིཿ རཏྣའི་སྲིད་དབང་ཛམ་ལའི་ནོར་དབང་དང་ཿ བྲམ་ཟེའི་གཏེར་དབང་དྲེགས་པའི་སྲོག་དབང་དང་ཿ སྡུད་པའི་ཁྲོམ་དབང་བཅས་པ་བསྐུར་བར་གྱུརཿ དེ་ནས་རྡོ་རྗེ་གྲོ་ལོད་ལུང་བསྟན་ཏེཿ རྒྱ་གར་གསེར་གླིང་དབེན་སྐྱོང་བྲག་ཕུག་ནཿ རྒྱལ་པོ་སྐར་རྒྱལ་ཞེས་བྱའི་སྲས་པོ་ནིཿ ཤྲཱི་སིངྒ་ཞེས་བྱ་བཞུགས་ནས་ཡོདཿ ཆོས་རྣམས་ཐམས་ཅད་དབྱེར་མེད་གཅིག་སྒོམ་པཿ ངོ་སྤྲོད་གནད་དུ་བསྣུན་གཅིག་ས་མ་ཡཿ དེ་ནས་ཤྲཱི་སིངྷའི་དྲུང་དུ་བྱོནཿ ཆོས་ཀུན་དབྱེར་མེད་དོན་དམ་གནད་ཅིག་ཞུཿ ཤྲཱི་སིངྷས་མཁའ་ལ་སྡིགས་མཛུབ་གཏདཿ གང་ཤར་མ་ཞེན་གང་ཤར་མ་ཞེན་ཅིགཿ མ་ཤར་མ་ཤར་ཤར་ཤར་ཤར་མ་ཞེནཿ ཤར་གྲོལ་དུས་མཉམ་ཤར་གྲོལ་དུས་མཉམ་མོཿ སྟོང་སྟོང་མི་སྟོང་མི་སྟོང་རྣམ་པར་སྟོང་ཿ མ་འགགས་མ་འགགས་འགགས་འགགས་འགག་པ་མེདཿ ཡེ་སྟོང་ཡེ་སྟོང་རྣམ་སྟོང་རྣམ་པར་སྟོང་ཿ
༼༨༤བ༽སྟེང་འོག་བར་མཚམས་ཕྱོགས་མེད་ཀུན་ཤར་འདིཿ ཤྲཱི་སིངྷའི་དོན་དམ་གནད་དེ་མཛོདཿ ལྟ་སྤྱོད་སྣོད་རུང་དབྱེར་མེད་ངང་གིས་འཆརཿ ཞེས་གསུངས་རྡོ་རྗེ་ལྟ་བུའི་ཀློང་དུ་ཐིམཿ ཡུལ་གྱི་མིང་ནི་སཱ་ལའི་ཡུལ་དུ་བྱོནཿ དུར་ཁྲོད་ཆེན་པོ་གསང་ཆེན་རོལ་པ་ཞེསཿ མཐའ་སྐོར་དཔག་ཚད་ཕྱེད་དང་བཞི་ཡོད་པའིཿ དབུས་ན་རང་བྱུང་མཆོད་རྟེན་ཀ་པ་ཏཿ མ་མོ་ཆེན་མོ་བཻ་ཏྟཱ་ལཱི་གནས་པཿ ལྷོ་ནུབ་ལྗོན་པའི་དུར་ཤིང་གསེར་ལྡན་ལཿ དུར་གྱི་སེམས་ཅན་མང་པོ་ཤིང་ཏོག་ལེནཿ ནུབ་བྱང་དུར་ཆུ་མཆོག་མཚོ་ཞེས་བྱ་བཿ དུར་གྱི་སེམས་ཅན་མང་པོ་གནས་པ་ཡོདཿ ཀླུ་དབང་གི་ནོད་སྦྱིན་བུ་མོ་རོ་ལ་ན་མཿ བྱང་ཤར་དུར་མེ་དུད་སྤྲིན་ཞེས་བྱ་བཿ མེ་རླུང་འཚུབ་གསེབ་འདྲེ་སྲིན་ཕོ་མོ་རྣམསཿ ལ་ལ་མི་རོ་རྟ་རོ་བ་ལང་དང་ཿ སེམས་ཅན་རིགས་བྱེད་ཟ་བ་དཔག་མེད་རྩེཿ ཤར་ལྷོར་དུར་རླུང་ལངས་འབྱིན་ཞེས་བྱ་བཿ ཁམ་ནག་གསེབ་ན་སེམས་ཅན་མི་འདྲ་བཿ དཔག་ཏུ་མེད་པ་ལ་ལ་ཤི་བར་གྱུརཿ ལ་ལ་སྐྱེ་ཞིང་ལ་ལ་རྒས་པ་ཡོདཿ ནུབ་ན་དུར་རི་ལྷ་མིན་འབབ་ཅེས་པརཿ དུར་གྱི་སེམས་ཅན་མང་པོ་མི་འདྲ་གནསཿ དབུས་བྲལ་ཡིད་བཞིན་ནོར་བུའི་གཏེར་ཡོད་པཿ བྱང་ན་འདུ་འཆད་མ་ཞེས་ལྷ་མོའི་གཟུགསཿ སེར་མོ་ལུས་ལ་རྒོད་ཀྱི་ཐུལ་པ་གྱོནཿ ལག་པས་བམ་གྱི་ཁོག་སྟོད་ཁོག་སྨད་འདྲ་ལཿ རྒྱབ་ན་མི་མགོ་རློན་པའི་སེ་
༼༨༥ན༽ལེ་ཁུརཿ ལུག་ནག་ཀེང་རུས་སྒ་ཆ་བྱས་པ་ཞོནཿ ཤར་ན་ཀ་ཅིའི་བདག་མོ་ཞེས་བྱ་བཿ དམར་མོ་མི་རོ་ཞོན་ནས་ཞིང་དབྱུག་འཕྱརཿ ཤིན་ཏུ་འཇིགས་པའི་དུར་ཁྲོད་ཆེན་པོ་དེརཿ མཆོད་རྟེན་རྒྱབ་བརྟེན་ལོ་ལྔའི་བར་དུ་ནིཿ མཁའ་འགྲོ་རྣམས་ལ་ཆོས་ཀྱི་འཁོར་ལོ་བསྐོརཿ གསང་བའི་མཚན་ནི་ཐོད་འཕྲེང་རྩལ་དུ་གྲགསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ དུར་ཁྲོད་ཆེན་པོ་གསང་ཆེན་རོལ་པར་བཞུགས་པའི་ལེའུ་སྟེ་སོ་བཞི་པའོཿ ཿཐ་ཐ་ཉྲ་རྒྱ་རྒྱཿ ཿ