གདུལ་བྱའི་ཞིང་ཁམས་གཟིགས་པའི་ལེའུ།
དེ་ནས་བྱ་རྒོད་ཕུང་པོའི་རི་ལ་
༼༩༠ན༽བཞུགསཿ བདག་གིས་གདུལ་ཞིང་གང་ན་འདུག་གཟིགས་པསཿ མེ་ལོང་གཅིག་ནང་ཉི་མ་གཅིག་ཤར་ལྟརཿ ནུབ་པ་མེད་པ་ཡིད་བཞིན་ནོར་བུའི་ཚུལཿ ཐོས་པ་ལས་བྱུང་ཤེས་རབ་རྒྱུད་ལ་འབྱོངསཿ འགྲོ་བ་འདྲེན་པའི་ཆོས་འཆད་ཉམ་མི་ང་ཿ བསམ་པ་ལས་བྱུང་ཤེས་རབ་རྒྱུད་ལ་འབྱོངསཿ ཕྱི་རོལ་རྩོད་པའི་གྲུབ་མཐའ་ཉམ་མི་ང་ཿ སྒོམ་པ་ལས་བྱུང་ཤེས་རབ་བརྒྱུད་ལ་འབྱོངསཿ སེམས་ཀྱི་མཐར་ཐུག་ལྟ་བ་ཉ་མ་མི་ང་ཿ ང་ནི་མིང་གི་སངས་རྒྱས་མ་ཡིན་ཏེཿ དགེ་སྦྱོང་འབྲས་བུ་བཞི་ཐོབ་སངས་རྒྱས་ཡིནཿ ཆོས་སྨྲས་གོ་འདྲེད་ཁྱེར་བའི་འཁོར་མི་བསྟེནཿ གདམས་ངག་སྣོད་བརྙིངས་ཁྱེར་ལ་ཆོས་མི་འཆདཿ དད་པ་སྣུམ་དྲེད་ཁྱེར་བའི་ཁྱུར་མི་བསྡདཿ དམ་ཚིག་ཆོད་ཡོད་བྱེད་པའི་གྲོགས་མི་འགྲོགསཿ དེ་ལྟར་དགོངས་ནས་ཡེ་ཤེས་སྤྱན་གྱིས་གཟིགསཿ སེམས་ཅན་ཐམས་ཅད་མ་རིག་ལས་ཀྱིས་བསྒྲིབསཿ ཉེ་ཡང་མ་མཐོང་རང་སེམས་ངོ་མ་ཤེསཿ བཤད་ཀྱང་མ་ཐོས་མུན་ཕྲག་རྒྱང་ཐག་རིང་ཿ བདེ་བ་བསྒྲུབས་པས་སྡུག་བསྔལ་འཁོར་བ་འགྲུབཿ གཅིག་ཀྱང་གདུལ་བྱའི་ཞིང་དུ་མི་འདུག་ནསཿ ཨུ་རྒྱན་ཡུལ་གྱི་དྲི་མེད་མདངས་ལྡན་དུཿ མཁའ་འགྲོ་མ་ལ་ཆོས་བཤད་དོན་འགྱུར་དགོངསཿ ཆར་ཆད་ཉི་སྤྲིན་འཇའ་ཚོན་ཤར་བ་ལྟརཿ སྐད་ཅིག་ཉིད་ལ་དྷ་ན་ཀོ་ཤར་བྱོནཿ གསང་སྔགས་མཁའ་འགྲོ་མ་ཡི་བརྡ་སྐད་གསུངསཿ རྒྱ་མཚོའི་གླིང་གི་མཁའ་
༼༩༠བ༽འགྲོ་མ་བཞི་འདུསཿ རྡོ་རྗེ་ཕག་མོ་ལུས་དང་གྲིབ་བཞིན་འཁོརཿ རྒྱ་མཚོའི་ཀླུ་དང་བར་སྣང་གཟའ་སྐར་འདུསཿ ཆོས་བཤད་དམ་བསྲེས་བྲན་དུ་ཁས་བླངས་བྱུང་ཿ བྱ་བྱེད་སྤྱོད་པ་འཇིག་རྟེན་པ་ལས་ལོགཿ ཡེ་ཤེས་སྤྱན་གྱིས་གདུལ་བྱ་གང་འདུག་གཟིགསཿ ཟ་ཧོར་རྒྱལ་ཁམས་ཐམས་ཅད་གདུལ་བྱར་མཁྱེནཿ དེ་ཡང་ཨུ་རྒྱན་ཡུལ་གྱི་བྱང་ཤར་མཚམསཿ ཟ་ཧོར་ཡུལ་གྱི་གྲོང་ཁྱེར་ཆེན་པོའི་དབུསཿ ཕོ་བྲང་རཏྣ་པུ་རི་བྱ་བ་ནཿ ཟ་ཧོར་རྒྱལ་པོ་གཙུག་ལག་འཛིན་ཞེས་པཿ བཙུན་མོ་སུམ་བརྒྱ་དང་ནི་དྲུག་ཅུས་བསྐོརཿ ཕྱི་བློན་ནང་བློན་བདུན་བརྒྱ་ཉི་ཤུར་བཅསཿ ཟ་ཧོར་རྒྱལ་ཁམས་ཡོངས་ལ་དབང་བསྒྱུར་བའིཿ རྒྱལ་པོ་དེ་ཉིད་གདུལ་བྱའི་ཞིང་དུ་གཟིགསཿ རེ་ཞིག་དུས་ན་བཙུན་མོ་ཧའུ་ཀིསཿ ཉི་མ་བརྒྱད་ནི་དུས་གཅིག་ཤར་བ་ཡིསཿ ཟ་ཧོར་ཡུལ་ཁམས་བཞོབ་ཏུ་སོང་བ་དང་ཿ མགོ་ལ་གཡུ་ཡི་མཆོད་རྟེན་སྐྱེས་པ་རྨིསཿ རྨི་ལམ་རྒྱལ་པོའི་སྙན་དུ་གསོལ་བ་ཡིསཿ རྟོག་བཟོས་ནས་རིམ་གྲོ་ཆེན་པོ་བྱསཿ རྨི་ལམ་རྨིས་པའི་བཙུན་མོ་རྒན་པ་ལཿ ལུས་པོ་མ་བདེ་བུ་སྐྱེའི་ལྟས་ལེགས་བྱུང་ཿ ལུས་ནི་ཡང་ཞིང་གོམ་པ་འདེགས་འཇོག་མགྱོགསཿ ལྷ་ཡི་བུ་དང་བུ་མོ་མང་པོ་ཡིསཿ སྐོར་བ་བྱེད་ཅིང་བཀུར་སྟི་མཆོད་པ་བྱེདཿ རང་བཞིན་ཉམས་དགའ་ཤེས་པ་མི་འཚུབ་ཅིང་ཿ མདངས་ནི་ཡལ་ལས་བྱིན་ནི་ཐིབས་ཐིབས་བྱེདཿ བག་དྲོ་འུར་འུར་ལུས་བདེ་ཆམ་ཆམ་བྱེདཿ
༼༩༡ན༽རྒྱལ་པོའི་སྙན་དུ་དེ་ལྟའི་ལྟས་བྱུང་སྨྲསཿ རྒྱལ་པོ་དགྱེས་ཏེ་རྒྱལ་བུ་ཡོད་པའི་རྟགསཿ བཙུན་མོར་བཀུར་སྟི་རིམ་གྲོ་ཆེ་བར་བྱེདཿ རྒྱལ་བུ་སྐྱེ་རེ་བུ་མོ་སྐྱེས་པར་འགྱུརཿ རྒྱལ་པོ་ཐུགས་གཙིས་ཆུང་སྟེ་ཁྲམ་མ་གསུང་ཿ བཙུན་མོ་ཡི་མུག་རྨི་ལྟས་དེ་འདྲ་བརཿ བུ་ནི་ཅི་ཕྱིར་མི་སྐྱེ་སྙམ་ནས་སུཿ བྲམ་ཟེ་མཚན་མཁན་བོས་ནས་ནི་གུ་བསྟནཿ འདི་དེ་ལུས་ལ་ཡོད་པའི་རྨི་ལྟས་སྨྲསཿ བྲམ་ཟེས་བུ་མོ་དྲི་བཟང་ཆུ་ཡིས་བཀྲུསཿ ཉི་གྲིབ་མཚམས་སུ་ཕྱིང་དཀར་བཏིང་བའི་སྟེང་ཿ བུ་མོ་བཞག་ནས་མཚན་བརྟག་བྱས་པ་ཡིསཿ བྲམ་ཟེ་རང་དབང་མེད་པར་མཆི་མ་ཟགསཿ བཙུན་མོ་ནི་གུ་གཉིས་ལ་ཕྱག་འཚལ་ཏེཿ བཙུན་མོ་ཧད་ནས་བྲམ་ཟེར་འདི་སྐད་གསུངསཿ བུ་མོའི་མཚན་རྟགས་ངན་པ་མ་ཡིན་ནམཿ གང་ལྟར་འདུག་པ་བརྫུན་མེད་དྲང་པོར་སྨྲོསཿ བྲམ་ཟེས་མཚན་རྟགས་མི་ངན་ཤིན་ཏུ་བཟང་ཿ མཚན་བཟང་སུམ་ཅུ་རྩ་གཉིས་དཔེ་བྱད་བརྒྱནཿ མཛེས་ཤིང་ལྟ་བས་ཆོག་མི་ཤེས་པ་འདིཿ མི་ཡི་བུ་མིན་ལྷ་ཡི་སྲས་མོ་སྟེཿ ཡེ་ཤེས་མཁའ་འགྲོ་མ་ནི་མི་ཡུལ་བྱོནཿ འདི་ལ་ཁྱིམ་པའི་བདག་དེ་སུ་ཡིན་པཿ འཁོར་ལོ་བསྒྱུར་བའི་རྒྱལ་པོ་སྨོས་ཅི་དགོསཿ འདི་ནི་ཁྱིམ་མེད་རབ་ཏུ་བྱུང་བ་ནཿ ཚེ་ལུས་གཅིག་གིས་ཟ་ཧོར་ཡུལ་ཁམས་འདྲནཿ འདི་འདྲའི་མཚན་མཆོག་སུ་ལའང་ཡོད་མིན་གསུང་ཿ མིང་ཡང་ལྷ་ལྕམ་མནྡཱ་ར་བར་
༼༩༡བ༽བཏགསཿ གཞན་མའི་ལོ་སྐྱེད་ལས་ཀྱང་ཟླ་སྐྱེད་ཆེཿ དེ་བཞིན་ཟླ་སྐྱེད་བས་ཀྱང་ཞག་སྐྱེད་ཆེཿ ལྷ་ལྕམ་དགུང་ལོ་བཅུ་གསུམ་ལོན་པའི་དུསཿ ཕྱོགས་བཞི་མཚམས་བརྒྱད་ཡེ་ཤེས་མཁའ་འགྲོར་གྲགསཿ ལྷ་ལྕམ་ཉིད་ལ་ལྟ་མི་མང་དུ་འདུསཿ དགའ་མཐུན་འཁོར་བའི་སྣང་ཅན་སེམས་ཡིད་ཕྲོགསཿ ལེགས་པའི་གཟུགས་ནི་ཤིན་ཏུ་རྙེད་དཀའ་བའིཿ བུ་མོའི་དངོས་པོ་དེ་ལ་ཐོབ་ཤ་བྱེདཿ རྒྱ་གར་རྒྱལ་པོས་བུ་མོའི་རིན་དུ་ནིཿ རྟ་མཆོག་རིན་ཆེན་གསེར་གྱི་དང་རྩེ་བྱིནཿ རྒྱ་ནག་རྒྱལ་པོས་རྫ་རྟ་དར་ཟབ་བཀལཿ གྱད་ཀྱི་མི་བརྒྱ་རྟ་བརྒྱ་རིན་ལ་བྱིནཿ བྷངྒ་ལ་ཡི་རྒྱལ་པོས་གླང་པོ་ཆེཿ ནོར་གྱི་རིགས་བྱེད་བཀལ་བ་སུམ་བརྒྱ་བྱིནཿ བཻདྡྷའི་རྒྱལ་པོས་སེང་གེ་དཀར་མོ་ཞིགཿ ཡིད་བཞིན་ནོར་བུས་བརྒྱན་ནས་རིན་ལ་བྱིནཿ ཨུ་རྒྱན་རྒྱལ་པོས་རཏྣ་མང་དུ་བསྐྱལཿ ཁ་ཆེའི་རྒྱལ་པོས་སྨན་དོས་མང་དུ་བསྐྱལཿ ལི་ཡི་རྒྱལ་པོས་དོང་རྩེ་མང་དུ་བསྐྱལཿ ཏ་ཟིག་རྒྱལ་པོས་ཤམ་ར་མང་དུ་བསྐྱལཿ གེ་སར་རྒྱལ་པོས་གོ་མཚོན་མང་པོ་བསྐྱལཿ ཞང་ཞུང་རྒྱལ་པོས་རྐང་འགྲོས་མང་དུ་བསྐྱལཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ གདུལ་བྱའི་ཞིང་ཁམས་གཟིགས་པའི་ལེའུ་སྟེ་སོ་བདུན་པའོཿ ཿཐ་ཐ་ཉྲ་རྒྱ་རྒྱཿ ཿ