ལྷ་ལྕམ་མནྡ་ར་བས་བྲམ་ཟེའི་སྐུ་ཤ་རྙེད་པའི་ལེའུ།
དེ་ནས་ཟ་ཧོར་རྒྱལ་པོ་གཙུག་ལག་འཛིནཿ ཐུགས་ནི་ཤིན་ཏུ་མ་བདེ་གཉིད་ཡར་ཏེཿ
༼༩༢ན༽བུ་མོ་འདི་ཡི་དགྲ་མང་ཚོལ་བར་འདུགཿ རྒྱལ་པོ་གཅིག་ལ་བྱིན་ན་གཞན་མི་དགའཿ ཡང་ན་བུ་མོ་འདི་འདྲ་བཅུ་ཡོད་ནཿ རེ་རེ་བྱིན་པས་དེ་ཡིས་ཁྱབ་མོད་སྟམཿ ཡང་ན་འདི་ཡང་མེད་ན་དེས་ཆོག་པསཿ ད་ནི་ཇི་ལྟར་བྱ་སྙམ་ནང་བློན་བཅུརཿ བཀའ་བགྲོས་ཞིབ་ཏུ་བྱས་པའི་གྲོས་འཆམ་ལཿ བུ་མོ་རང་ལ་དྲིས་ནས་གང་མོས་གཏོདཿ གྲོས་ཐག་ཆད་ནས་ལྷ་ལྕམ་མདུན་དུ་བོསཿ རྒྱལ་པོས་ཁྱོད་རང་གར་འགྲོ་འདོམས་ཤིག་གསུངསཿ གང་ལ་དགའ་བ་དེ་ལ་སྟེར་བ་ཡིནཿ ལྷ་ལྕམ་དེ་མ་ཐག་ཏུ་མཆི་མས་བརྣངསཿ མང་དུ་ངུ་ཞིང་གང་ལའང་མི་འགྲོ་གསུང་ཿ ཡབ་ཀྱིས་མི་འགྲོ་བྱས་པས་ག་ལ་ཕནཿ འདོད་མིས་སྒོ་ཕྱི་ཐམས་ཅད་འགགས་འདུག་པཿ ཞག་གསུམ་བར་དུ་ཁྱོད་རང་བསམ་མནོ་ཐོངསཿ དེ་ནས་ང་ལ་ལན་དེ་ཁྱེར་ཤོག་གསུངསཿ ལྷ་ལྕམ་འགོལ་བའི་ཕོ་བྲང་རྩེ་མོར་ཕྱིནཿ གཡོག་མོ་གསུམ་དང་ལྷན་ཅིག་འདུག་པར་བྱསཿ ཉིན་དང་མཚན་དུ་གཞིགས་ཤིང་བསམས་པ་ཡིསཿ རྟེན་ཉམས་ངན་སོང་གསུམ་དུ་མ་སྐྱེས་ཤིང་ཿ རྟེན་མ་ཉམས་ཀྱང་སྐྱེ་བ་བུད་མེད་ལུསཿ ཕྱེད་མི་ཡིན་ཀྱང་བྱང་ཆུབ་བསྒྲུབ་དུ་ཡོདཿ གླིང་ཉམས་གླིང་ཆེན་གླིང་ཆུང་མ་སྐྱེས་ཤིང་ཿ གླིང་ནི་མ་ཉམས་འཛམ་བུའི་གླིང་དུ་སྐྱེསཿ གནས་ཉམས་མོན་དང་ཀླ་ཀློར་མ་སྐྱེས་ཤིང་ཿ གནས་ནི་མ་ཉམས་ཟ་ཧོར་ཡུལ་དུ་སྐྱེསཿ དབང་པོ་ཉམས་པ་སྐྱོན་ཅན་མ་
༼༩༢བ༽སྐྱེས་ཤིང་ཿ དབང་པོ་མ་ཉམས་སྐྱོན་མེད་བཀྲ་བར་སྐྱེསཿ སེམས་ཉམས་གདོན་དབང་སོང་དུ་མ་སྐྱེས་ཤིང་ཿ ཤེས་པ་མ་ཉམས་རང་དབང་ཐོབ་པར་སྐྱེསཿ ལས་ཉམས་སྡིག་སྤྱོད་ལས་སུ་མ་སྐྱེས་ཤིང་ཿ ལས་མ་ཉམས་པ་ཆོས་ལ་མོས་པར་སྐྱེསཿ རིགས་ཉམས་རིགས་ངན་བུ་མོར་མ་སྐྱེས་ཤིང་ཿ རིགས་མ་ཉམས་པར་རྒྱལ་པོའི་བུ་མོར་སྐྱེསཿ ད་ལྟ་ང་ཉིད་བུད་མེད་ལུས་གྱུར་ཀྱང་ཿ རིགས་བཟང་འབྲས་ལེགས་ལོངས་སྤྱོད་ཆེ་བ་དང་ཿ རྒྱལ་པོ་རྣམས་ཀྱིས་ཧབ་ཤ་བྱེད་པ་ཀུནཿ ཚེ་རབས་སྔ་མ་དམ་ཆོས་བྱས་ལས་བྱུང་ཿ ད་རེས་འདི་ལ་ཆོས་ཤིག་མ་བྱས་ནཿ ཕྱི་མ་ཅི་འདྲའི་ལུས་ལེན་མི་ཤེས་ཤིང་ཿ ཚེས་དང་ཕྲད་པའང་ཤིན་ཏུ་དཀར་འོ་སྙམཿ ལས་མཐའ་ལོག་པར་འཇུག་པའི་བྱ་བ་སྤངསཿ ལས་མཐའ་མ་ལོག་དམ་ཆོས་མཐར་ཕྱིན་བྱཿ མ་བྱུང་ལྷ་ལྕམ་འདུན་མཉེས་སོ་སྙམཿ སྡུག་བསྔལ་ཕུན་སུམ་ཚོགས་པའི་དབུས་ཉིད་དུཿ སྡིག་པ་སྒོས་ཁུར་བྱས་ནས་སྡོད་དགོས་ཏེཿ བཞག་པར་འདོད་ཀྱང་དབང་མེད་འདུན་མ་ཐལཿ བདག་པོ་ཇི་ལྟར་ཡོན་ཏན་ལྡན་གྱུར་ཀྱང་ཿ ཚེ་གཅིག་སྡུག་རོགས་བ་ལང་གསེར་རྒྱན་ཅནཿ ང་ནི་ཇི་ལྟར་ཡོན་ཏན་ལྡན་གྱུར་ཀྱང་ཿ འགག་གི་ཁྱི་མོ་ཚང་མ་རྒྱན་བཟང་མཿ ཁ་དང་ལག་པ་སྐད་ཅིག་དལ་དུ་མེདཿ དོན་མེད་འཁྲུལ་པའི་ལས་ལ་ཡེངས་ཤིང་འཁྱོགཿ རང་དབང་ཡོད་དུས་ཆོས་ཤིག་
༼༩༣ན༽བྱ་དགོས་སྙམཿ ལྷ་ལྕམ་ཡབ་ཀྱི་དྲུང་དུ་ཕྱིན་ནས་སུཿ འདི་ཕྱི་གཉིས་སྡུག་ཁྱིམ་ཐབ་ང་མི་བྱེདཿ བྱེད་དབང་བྱུང་ན་དམ་པའི་ཆོས་ཤིག་བྱེདཿ བྱེད་དབང་མ་བྱུང་ལུས་འདི་སྤངས་ནས་སུཿ ཆོས་བྱར་ཡོང་བའི་ལུས་ཤིག་སྨོན་ལམ་འདེབསཿ དེ་སྐད་གསུངས་པས་རྒྱལ་པོ་མ་དགྱེས་ནསཿ ལྷ་ལྕམ་གཡོག་མོ་ལྔ་བརྒྱའི་དཀྱིལ་དུ་བཅུགཿ ཕོ་བྲང་ནང་ནས་ཕྱི་རུ་མ་བཏང་བྱསཿ གལ་ཏེ་འདི་ཉིད་ལྕེབས་སམ་བྲོས་པ་ནཿ གཡོག་མོ་ལྔ་བརྒྱ་གསོན་པོར་ཁྱིས་ཟར་འཇུགཿ ཅེས་པ་གཡོག་མོ་རྣམས་ལ་ངག་བཅུག་གོཿ རྒྱལ་པོའི་ཡུལ་ལུགས་བཙུན་མོ་རེ་རེ་ཡིཿ ཕོ་བྲང་ཞག་རེ་མལ་རེ་སྡོད་པ་ལཿ བཞེས་པ་འདྲེན་པ་གཟོབ་པའི་རེས་མོས་བྱེདཿ བཙུན་མོ་རྒན་པ་ཧའུ་ཀི་འི་རེས་ལཿ ཕྱོགས་ཀྱི་གཉེ་པོ་མངས་ནས་རྒྱ་རི་ཟདཿ བཞེས་པ་འདྲེན་པའི་ལྤགས་ནི་མེད་པར་གྱུརཿ རྒྱ་རི་ཉོ་བར་གཞན་གཏོར་བློ་མ་ཁེལཿ ལྷ་ལྕམ་ཚོང་དུས་རྒྱ་རི་ཉོ་རུ་བཏང་ཿ ཆར་པ་ཆེས་ནས་ཚོང་དུས་མ་འཛོམ་པརཿ ལོག་ནས་འོངས་པའི་ལམ་ག་ཞིག་ཏུ་ནིཿ ཁྱེའུ་ལོ་བརྒྱད་པ་ཞིག་ཤི་ནས་འདུགཿ ཆར་པས་དག་ནས་སྐྱ་སྒང་འདུག་པ་དེཿ ལྷ་ལྕམ་ཉཱ་བཞི་ཐམས་ཅད་ལེགས་པར་ཐེགསཿ སྣོད་དུ་བཅུག་ནས་ཕོ་བྲང་ནང་དུ་འོངསཿ བཙུན་མོའི་ངག་ནས་རྒྱ་རེ་རྙེད་དམ་ཟེརཿ ལྷ་ལྕམ་རྙེད་སྨྲས་ཁྱོད་ཀྱིས་ཚོས་ཤིག་ཟེརཿ ལྷ་ལྕམ་བཙོས་ཤིང་ཁུ་བ་ཡང་ཡང་ཕོཿ
༼༩༣བ༽སྤོད་ཀྱི་རིགས་བྱེད་མང་པོ་བཏབ་ནས་སུཿ ཨ་མ་ཤ་ཚོས་བཞེས་པ་དྲངས་ཤིག་གསོལཿ རྒྱལ་པོར་བཙུན་མོས་བཞེས་པ་དྲངས་པ་ཡིསཿ བཞེས་པ་འཇུ་བར་གྱུར་པའི་དུས་སྐབས་ནཿ རྒྱལ་པོའི་ལུས་ལ་བདེ་བ་མེ་རུ་འབརཿ སྟན་གྱི་ཁ་ནས་འདོམ་གང་འཕགས་ནས་སུཿ ནམ་མཁའི་དབྱིངས་ལ་བྱ་བཞིན་འཕུར་ལ་ཁདཿ དེ་ལྟར་བྱུང་བས་སྐྱེ་བདུན་ཤ་རུ་རིགཿ རྒྱལ་པོ་ལྐུགས་པ་ས་མི་ལ་འདོད་པ་བཞིནཿ ང་རོའི་སྒྲ་ཡིས་ཧའུ་ཀི་ཞེས་པོསཿ རྒྱལ་པོའི་མདུན་དུ་བཙུན་མོ་ཤོག་ཟེར་ཕྱིནཿ ལག་པ་གཡོན་པས་བཙུན་མོའི་མཐོང་རྩ་བཟུང་ཿ གཡས་པས་གྲི་བཟུང་རྩེ་ཆུང་བ་ལ་བཙུགསཿ མ་མགལ་ཁར་བརྫངས་སྣ་གོང་བཞིན་བསྙེར་ནསཿ ཁྱོད་ཀྱིས་ད་ནང་ང་ལ་དྲངས་པ་ཡིསཿ ཤ་དེ་གང་བྱུང་འཆད་དམ་མི་འཆད་ཟེརཿ མི་འཆད་གྱུར་ན་ཁྱོད་ཉིད་གསོད་དོ་ཟེརཿ བཙུན་མོ་བྲེད་ཅིང་སྡངས་ནས་མ་བཟོད་དེཿ ང་ལ་རྒྱུས་མེད་མནྡཱར་བར་བྲིསཿ འབྲས་བསྐུར་ཚོང་དུས་ཉོ་རུ་བཏང་བ་ཡིནཿ དེ་སྐད་སྨྲས་པས་རྒྱལ་པོས་ཕྱག་བཏང་ནསཿ འོ་ན་མནྡཱ་ར་བ་ཁྲིད་ཤོག་གསུང་ཿ བཙུན་མོས་ལྷ་ལྕམ་ཁྲིད་ནས་ཡོངས་བ་ཡིསཿ རྒྱལ་པོས་ཕྱག་གཡོན་ལྷ་ལྕམ་མཐོང་རྩ་བཟུང་ཿ གཡས་པས་གྲི་བཟུང་རྩེའུ་ཆུང་ལ་བཙུགསཿ བདག་ལ་དྲངས་པའི་ཤ་དེ་གང་ནས་ཉོསཿ འཆད་དམ་མི་འཆད་མི་འཆད་གསོད་དོ་ཟེརཿ ལྷ་ལྕམ་བྲེད་སྡངས་བརྫུན་སྨྲ་མ་ཤེས་པརཿ ང་ལ་ཨ་
༼༩༤ན༽མས་མཱ་ས་ཉོར་སོང་ཟེརཿ ཆར་པ་ཆེས་བས་ཚོང་དུས་མི་འདུག་ནསཿ ལོག་ནས་འོངས་པའི་ལམ་གཞིག་ན་ནིཿ ཁྱེའུའི་རོ་ཞིག་ཆར་པས་དག་ནས་འདུགཿ ངས་སྐྱེའི་འབྲས་སོ་ཉྭ་ཤ་བྲེགས་ནས་བཅུགཿ ཚོས་པར་བཙོས་ནས་ཆུ་ཕོ་སྦོད་བཏབ་དྲངསཿ ཤ་དུག་བྱུང་ངམ་ཅི་བྱུང་གསོལ་པ་དང་ཿ འོ་ན་རོ་དེ་དགངས་པོ་ཁྱེར་ཤོག་གསུངསཿ ལྷ་ལྕམ་རོ་དེ་ཡོད་དམ་མེད་ན་སྙམཿ བྱ་དང་གཅན་གཟན་ཟོས་སམ་མ་ཟོས་སམཿ མགྱོགས་པར་མྱུར་དུ་ལུས་བཀོལ་ཕྱིན་པ་དང་ཿ རོ་དེ་འདུག་པས་ལྷ་ལྕམ་ཁུར་ནས་འོངསཿ ཡབ་ཀྱི་དྲུང་དུ་བསྐྱལ་བས་ཡབ་ཉིད་མཉེསཿ རྐང་ལག་མགོ་ལུས་ཤ་ལྤགས་མ་ལུས་ཀུནཿ རྡོ་ཡིས་བཏགས་ནས་རིལ་བུ་དཔག་མེད་བྱསཿ རིན་ཆེན་སྣ་བདུན་སྒོམ་གྱི་ནང་དུ་བཅུགཿ ཁ་ལ་རིན་ཆེན་སྣ་བདུན་རྒྱས་བཏབ་ནསཿ དུར་ཁྲོད་དགའ་བའི་ཚལ་དུ་གཏེར་དུ་སྦསཿ མ་མོ་མཁའ་འགྲོ་རྣམས་ལ་གཉེར་བྱད་གཏདཿ མཁའ་འགྲོ་བདུད་འདུལ་མ་ལ་བྱ་ར་བཅོལཿ དུས་མཚན་ཀོ་ཤ་དེ་ཡི་བཙས་སུ་བཞགཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ ལྷ་ལྕམ་མནྡ་ར་བས་བྲམ་ཟེའི་སྐུ་ཤ་རྙེད་པའི་ལེའུ་སྟེ་སོ་བརྒྱད་པའོཿ ཿཐ་ཐ་ཉྲ་རྒྱ་རྒྱཿ ཿ