ལྷ་ལྕམ་མནྡཱ་ར་བས་ཁྱིམ་ཐབ་སྤངས་ནས་ཆོས་མཛད་པའི་ལེའུ།
དེ་ནས་ལྷ་ལྕམ་མནྡཱ་ར་བ་ཡིསཿ ཕོ་བྲང་ནང་ནས་གསང་སྒོ་ཞིག་ལ་འཐོནཿ ཤར་ཕྱོགས་རྒྱང་གྲགས་གཅིག་སར་སླེབས་པ་དང་ཿ གོས་
༼༩༤བ༽ཕུད་ལུས་རྒྱན་ཐམས་ཅད་བཀྲོལ་ནས་ནིཿ སེམས་ཤོང་མ་ཁྱོད་འདི་ཁྱེར་ཕར་ལོག་གསུངསཿ བདག་གིས་ཁྱེད་བཞག་ལོག་པ་ག་ནས་ཕོདཿ ཅི་མཛད་བདག་ལ་སྨོས་ལ་ནང་དུ་གཤེགསཿ ནི་གུ་ས་ལས་བཞེངས་ཏེ་ཐལ་མོ་སྦྱརཿ ཕྱོགས་བཞི་མཚམས་བརྒྱད་ལྷ་ལ་ཕྱག་མང་བཙལཿ སངས་རྒྱས་ཆོས་ལས་ཤེས་མི་ཆགས་སོ་གསུང་ཿ ལུས་ཀྱི་རྒྱན་ཆ་རིན་ཆེན་མང་པོ་ཀུནཿ རྡོ་ཡིས་བརྡུངས་ནས་མདུན་གྱི་ནམ་མཁར་གཏོརཿ བདག་གི་བསམ་པ་ཆོས་བཞིན་སྒྲུབ་ཏུ་གསོལཿ བག་མའི་བར་དུ་གཅོད་པ་མ་གཏོང་ཞིགཿ དེ་སྐད་བརྗོད་ནས་དར་ཟབ་ན་བཟའ་ཀུནཿ དུམ་བུར་གཏུབས་ཏེ་ཕྱོགས་བཞི་མཚམས་བརྒྱད་གཏོརཿ འདི་འདྲ་གྱོན་པའི་ལུས་སུ་མ་གྱུར་ཅིགཿ འཇིག་རྟེན་ཆོས་བརྒྱད་ཀུན་དང་བྲལ་བར་ཤོགཿ རང་གི་སྐྲ་ལོ་གཡས་འབྱིད་གཡོན་འབྱིད་བྱསཿ རྫ་མ་ཟངས་བཞིན་སྐྲ་ནི་ཅི་ཡང་མེདཿ གདོང་ལ་སྦར་ཤད་བྱས་ནས་ཉམས་སུ་བཅུགཿ སེམས་ཤོང་མ་ཡིས་དུ་འབོད་དྲག་ཏུ་བཏོནཿ མི་ཡིས་རྒྱལ་མོ་ཡུལ་སྲིད་འཛིན་པ་ཐོནཿ ཇི་ལྟ་བུ་བྱེད་འདི་འདྲའི་ལས་སྤྱོད་པཿ བརྩེ་བ་ཀུན་གྱིས་གཟུང་བར་མཛོད་ཅིག་ནཿ འཛིན་འཆང་གྲོགས་འབོད་སྨྲེ་སྔགས་སྐད་ཆེན་བཏོནཿ ཡབ་ཡུམ་གཉིས་ལ་རུང་ངམ་ལྷ་ལྕམ་སོམསཿ ཞེས་སྨྲས་ལྷ་ལྕམ་སེམས་ཤོང་མར་སྨྲས་པཿ ཕོ་སེམས་འགུལ་བའི་ལུས་འདི་མེད་ཀྱང་རུང་ཿ ཆོས་ལ་བར་ཆད་མེད་པར་
༼༩༥ན༽འགྲུབ་པར་ཤོགཿ ཅེས་སྨྲས་སློག་ཧྲུལ་དོར་བ་གོས་སུ་གྱོནཿ ཁྱིམ་གྱི་འཁྲི་བཅད་མི་གཙང་རྫས་བཞིན་དོརཿ ལུས་ངག་ཡིད་བསྡོམས་སྨ་བ་བཅད་ནས་སོཿ ཕོ་ཚོས་ཚལ་དུ་མཉམ་གཞག་སེམས་དབེན་བཅུགཿ སྐོམ་བྱུང་ཆུ་འཐུང་ལྟོགས་ནས་ཟོས་སྡོདཿ དེ་སྐད་གསུངས་ནས་ལོག་ཏུ་མ་འདོད་དེཿ སེམས་ཤོང་རབ་ཏུ་ངུ་ཤིང་ཁྱིམ་དུ་སོང་ཿ ཕ་མ་གཉིས་ལ་སྐྱོ་ཤས་ཚིག་སུ་བཅདཿ ཀྱེ་མཿ ལྷ་ལྕམ་སྐུ་མདོག་མ་ཧེའི་མདོག་འདྲ་སྟེཿ བཟང་པོའི་མཚན་གྱིས་སྐུ་ལུས་རབ་བརྒྱན་པཿ དཔེ་བྱད་སྣ་ཚོགས་ལྡན་པའི་ཁྱུ་མཆོག་མཿ བཻཌཱུ་རྻ་ཡི་མདོག་ལྟར་རྣམ་པར་མཛེསཿ གསུང་དབྱངས་དང་བའི་སྐད་ལྟར་དལ་ཞིང་སྙནཿ ཞེ་སྡང་རྩུབ་པའི་ཚིག་མེད་འཛུམ་དང་ལྡནཿ ཁོང་མི་ཁྲོ་ཞིང་སྲོག་ཆགས་སྙིང་རྗེས་སྐྱོང་ཿ ཁོ་ལ་པ་ཁོལ་མོ་སུ་འཁོར་མ་ལྟར་བྱམསཿ ཨུ་དུམ་ཝཱ་རའི་མེ་ཏོག་དེ་འདྲ་བཿ ཕྱོགས་ཀྱི་རྒྱལ་པོས་ཐོབ་ཤ་བྱས་པ་ཡིསཿ ཕོ་བྲང་ནང་དུ་མི་བཞུགས་ཆོས་ལ་བྲོསཿ ལྷ་ལྕམ་དེ་ཡི་རྣམ་ཐར་དེ་འདྲའོཿ ང་ཡིས་ཇི་ལྟར་བྱས་ཀྱང་གྲོས་མ་ཐེབསཿ ཞེས་སྨྲས་མཆི་མ་མང་དུ་གཟིགས་པར་གྱུརཿ དེ་ནས་རྒྱལ་པོ་ཕོ་བྲང་ནང་ནས་འཐོནཿ རྒྱལ་པོ་བཙུན་མོ་ལྷ་ལྕམ་འཚོལ་ཞིང་འདྲིཿ སེམས་ཤོང་མ་ནི་དབུགས་བརྣངས་མཆི་མ་ཕྱིསཿ རྗེ་གཅིག་མི་དབང་རྒྱལ་པོ་གསན་མཛོད་དང་ཿ བུ་མོ་ཀུན་གྱི་ཁྱུ་མཆོག་ལྷ་མོ་དེཿ ཕོ་བྲང་ནང་དུ་མ་
༼༩༥བ༽འཁྱིལ་ཕྱི་རོལ་གཤེགསཿ ཕོ་ཚོས་ཚལ་དུ་རང་གི་ལུས་སྨ་ཕབཿ རྒྱན་རྣམས་དར་བྱིན་སེམས་ཤོང་ལོག་ཅིག་གསུང་ཿ ང་ཡིས་བརྒྱུགས་དང་བྱས་ཀྱང་ཡོད་མཁན་མེདཿ ལྷ་གཅིག་དམ་པ་མནྡཱ་ར་བ་དེཿ ལུས་ལ་གོས་མེད་དམན་པའི་ཆས་སུ་ཞུགསཿ སྐོམ་དུ་ཆུ་འཐུང་ཟས་སུ་ས་ཟ་ཞིང་ཿ བསྒུལ་བསྐྱོད་མི་བྱེད་ཕྱེད་སྐྱིལ་ས་ལ་འབྱརཿ ཞུས་ཀྱང་ལན་མེད་བེམ་པོའི་མདུན་ཕྱིན་འདྲཿ དེ་སྐད་གསོལ་པས་རྒྱལ་པོ་གཏུམ་ཞིང་ཁྲོསཿ ཆོས་མགོ་མི་ཐོན་དཔེ་ནི་མང་དུ་བགྲངསཿ བུ་མོ་འདོད་ལ་ཁ་ཟས་ནོར་ཚིམ་བྱིནཿ རྒྱལ་པོ་རྣམས་ལ་གོ་བརྡའི་ཤོག་འཕྲིན་བསྐུརཿ གཉེ་པོ་རྣམས་ཀྱིས་ཆོས་བྱེད་བྱར་ཡོད་པཿ ཁྱིམ་ཐབ་བྱར་དབང་མེད་པའི་གཅིགས་ཀ་བསྡམསཿ རང་རང་ཡུལ་ལ་ནོར་ཁྱེར་ལོག་པར་གྱུརཿ དེ་ནས་རྒྱལ་པོ་གཙུག་ལག་འཛིན་གྱིས་ནིཿ རྒྱལ་པོ་གོ་མ་དེ་བྱེ་བྱ་བའི་སྲསཿ མཁན་པོ་ཞི་བ་འཚོ་ཞེས་བྱ་བ་ལཿ ལྷ་ལྕམ་སྡོམ་པ་ལེན་བཅུག་བཀུར་སྟི་བྱསཿ བུ་མོ་ཆོས་མགོ་ཐོན་པར་བྱ་བའི་ཕྱིརཿ ཁོལ་མོ་ལྔ་བརྒྱ་པོ་ཡང་ཆོས་སྒོར་བཅུགཿ ལྷ་ལྕམ་དཔོན་གཡོག་ཕོ་བྲང་ལོགས་ཞིག་བཞགཿ རྒྱལ་བློན་དམངས་དང་བཅས་པས་བཀུར་སྟེ་བྱེདཿ སྔ་དྲོའི་དུས་སུ་སེམས་ཞི་བསམ་གཏན་བསྒོམཿ ཕྱི་དྲོའི་དུས་སུ་ལྷོ་ཕྱོགས་སྔོ་ཞིང་འཇམཿ མཐིང་ཁར་འདུག་པ་སྤང་གི་ངོས་ལོགས་ལཿ མེ་ཏོག་དྲི་ཞིམ་སྣ་ཚོགས་རབ་བརྒྱན་པའིཿ ཕྱོགས་ལྗངས་རྒྱུ་
༼༩༦ན༽ཞིང་ཕྱི་ལ་སྐུ་འཆག་འགྲོཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ ལྷ་ལྕམ་མནྡཱ་ར་བས་ཁྱིམ་ཐབ་སྤངས་ནས་ཆོས་མཛོད་པའི་ལེའུ་སྟེ་སོ་དགུ་པའོཿ ཿཐ་ཐ་ཉྲ་རྒྱ་རྒྱཿ ཿ