ལྷ་ལྕམ་མནྡཱ་ར་བ་དང་མཇལ་འཕྲད་མཛད་པའི་ལེའུ།
དེ་ནས་ཨུ་རྒྱན་གུ་རུ་པདྨ་འབྱུང་གནས་ཀྱིསཿ མནྡཱ་ར་བ་དཔོན་གཡོག་གདུལ་བྱར་གཟིགསཿ ཉི་མ་སྤྲིན་ཚར་འདྲེས་པའི་འཇའ་འགྱུས་བཞིནཿ ཨུ་རྒྱན་དྷ་ན་ཀོ་ཤའི་མཚོ་གླིང་ནསཿ ཟ་ཧོར་ཡུལ་དུ་ནམ་མཁའི་དབྱིངས་ལ་བྱོནཿ སྤྲེའུ་ལོ་ཕག་གི་ཟླ་བའི་ཚེས་བཅུའི་ཉིནཿ ལྷ་ལྕམ་དཔོན་གཡོག་སྐྱོ་བསང་བྱེད་པའི་གནསཿ སྐྱེད་མོས་ཚལ་གྱི་བར་སྣང་སྐྱིལ་ཀྲུང་བཅསཿ འཇའ་འོད་ཟེར་ཁྱིམ་གཟི་མདངས་འོད་རུ་འབརཿ ཞི་བའི་གཟུགས་མཐོང་ལོ་བརྒྱད་རྣམ་པ་ཅནཿ ཤིན་ཏུ་འཛུམ་ཞིང་བརྡ་ཆོས་མང་དུ་མཛདཿ ལྷ་ལྕམ་སྐུ་དེ་མཐོང་བ་ཙམ་གྱིས་ནིཿ དད་པའི་ཡུས་ཀྱིས་དྲན་མེད་ས་ལ་འགྱིལཿ པདྨའི་ཐུགས་རྗེ་ལྷ་ལྕམ་ཉིད་ལ་ཤརཿ དགུག་པའི་ཕོ་ཉས་སྒོ་གསུམ་དབང་དུ་བསྡུསཿ རབ་ཏུ་དགའ་བས་ལྷ་ལྕམ་དྲན་པ་རྙེདཿ ཁོལ་མོ་ལ་ལ་གདན་ཁྲི་བཤོམ་དུ་བཅུགཿ ཁོལ་མོ་ལ་ལ་བྱ་ར་བ་ལ་བསྐོསཿ ཁོལ་མོ་ལ་ལ་སྲང་ཀ་མྱུལ་དུ་བཅུགཿ རྒྱལ་བའི་སྲས་དེ་ས་ལ་ཕེབས་པར་གྱུརཿ བདེ་བར་གྱུར་ཅིང་ཚིམ་པའི་མནྡཱ་རསཿ ཕོ་བྲང་ནང་དུ་གཤེགས་པར་ཚིག་སུ་བཅདཿ ཨེ་མ་ཧོཿ
༼༩༦བ༽རྒྱལ་བ་སངས་རྒྱས་ཐུགས་སྲས་གཙུག་གི་ནོརཿ རང་དོན་རྫོགས་སངས་རྒྱས་ནས་གཞན་དོན་དུཿ སྙིང་རྗེའི་ལྕགས་ཀྱུས་འགྲོ་བ་ཡོངས་ལ་འཛིནཿ བྱམས་པའི་གསོ་དཔྱད་སེམས་ཅན་ཡོངས་ལ་མཛོདཿ དགའ་བའི་གཟི་མདངས་ཀྱིས་ནི་བདག་ལ་བསྟནཿ བཏང་སྙོམས་གྲུ་ལ་དགྲ་གཉེན་མེད་པར་སྒྲོལཿ དམུས་ལོང་སེམས་ཅན་ཀུན་གྱི་སྐྱབས་གཅིག་པུཿ ཕོ་བྲང་ནང་དུ་ཆོས་གསུང་བཞུགས་པར་ཞུཿ དེ་ནས་ཕོ་བྲང་ནང་དུ་སྤྱན་དྲངས་ཏེཿ མཛེས་མཐོ་རཏྣའི་ཁྲི་བཤམས་བཞུགས་སུ་གསོལཿ སྒོ་བ་བཙུགས་ནས་ནང་དུ་མི་མི་གཏོང་ཿ འདོད་ཡོན་བཟའ་བཏུང་མང་པོའི་ཚོགས་འཁོར་བཤམསཿ གསེར་དངུལ་མུ་ཏིག་རིན་ཆེན་རིགས་བྱེད་དང་ཿ དར་ཟབ་རས་དང་ཐགས་སུ་བཏགས་པའི་རིགསཿ སྐུ་ལ་མཛེས་པ་ཞལ་དུ་བདའ་བ་ཕུལཿ ལྷ་ལྕམ་དམའ་བའི་ས་ལ་འདུག་ནས་སུཿ ཞེ་སར་བཅས་པའི་ཡིད་འཇུག་རྣམ་འགྱུར་བསྟནཿ གུས་པའི་ཕྱག་བཙལ་སྙན་པའི་ངག་གིས་ཞུསཿ དུས་གསུམ་སངས་རྒྱས་ཞལ་སྐྱིད་མཆོག་དངོས་ཀྱིཿ འཁྲུངས་ཡུལ་གང་ལགས་མཚན་ནི་ཇི་ལྟ་བུཿ རིགས་ནི་གང་ལགས་ཡབ་ཡུམ་ཇི་ལྟ་བུཿ བཀའ་མཆིད་དམ་པ་བདུད་རྩི་གསུང་དུ་གསོལཿ རྒྱལ་བས་དགེ་སློང་མ་ལ་བཀའ་སྩལ་པཿ སྐྱེད་པའི་ཡབ་མེད་ཆོས་དབྱིངས་སྟོང་པ་ཉིདཿ བལྟམས་པའི་ཡུམ་མེད་ཤེས་རབ་སྟོང་པའི་ངང་ཿ མི་ལ་མཆོག་སྩོལ་སྲིད་བཅིངས་གྲོལ་བའི་
༼༩༧ན༽རིགསཿ ང་ནི་བདེ་བའི་དངོས་གྲུབ་ཅེས་བྱའོཿ སངས་རྒྱས་འདུལ་ཞིང་ཁྱད་པར་འཕགས་པ་རུཿ འགྲོ་རེའི་མདུན་དུ་སྤྲུལ་སྐུའི་སྟོན་པ་འབྱོནཿ སྔོན་ཚེ་སྣང་བ་མཐའ་ཡས་འོད་དཔག་མེདཿ རི་བོ་ཏ་ལར་མགོན་པོ་སྤྱན་རས་གཟིགསཿ དྷ་ན་ཀོ་ཤར་པདྨ་འབྱུང་གནས་སྐུཿ མཚོན་ཚུལ་ཙམ་ལ་གསུམ་དུ་སྣང་གྱུར་ཀྱང་ཿ དོན་ལ་དབྱེར་མེད་སོ་སོ་ཐ་མི་དདཿ ཆོས་དབྱིངས་གནས་སུ་ཀུན་ཏུ་བཟང་པོ་དང་ཿ སྟུག་པོ་བཀོད་པར་རྡོ་རྗེ་འཆང་ཆེན་པོཿ རྡོ་རྗེ་གདན་དུ་ཐུབ་པ་ཆེན་པོ་ཉིདཿ གཉིས་མེད་པདྨ་ང་རུ་ལྷུན་གྱིས་གྲུབཿ འགྲོ་དོན་ཀུན་ལས་བྱིན་རླབས་རྨད་པོ་ཆེཿ སྐྱེད་པའི་ཡབ་བརྒྱད་བལྟམས་པའི་ཡུམ་བརྒྱད་དང་ཿ བྱོན་པའི་ཡུལ་བརྒྱད་བཞུགས་པའི་གནས་བརྒྱད་དང་ཿ དེ་བཞིན་སྒྲུབ་པ་མཛད་པའི་དུར་ཁྲོད་བརྒྱདཿ གུ་རུ་མཚན་བརྒྱད་རྣམ་ཤེས་ཚོགས་བརྒྱད་དགཿ བླ་མ་རྡོ་རྗེ་སློབ་དཔོན་ཆས་བརྒྱད་དང་ཿ སྒྱུ་འཕྲུལ་སྡེ་བརྒྱད་དཔལ་གྱི་ཆས་བརྒྱད་དང་ཿ སྒྲུབ་པ་བཀའ་བརྒྱད་དུར་ཁྲོད་ཆས་བརྒྱད་དང་ཿ སྦྱོར་བ་སྒྲོལ་བ་མཐར་ཕྱིན་གྲུབ་ཆེན་བརྒྱདཿ བསྟེན་པའི་རུ་བརྒྱད་མཛད་པའི་འཕྲིན་ལས་བརྒྱདཿ འདས་པའི་མཚན་བརྒྱད་མ་འོངས་མཚན་བརྒྱད་དེཿ མ་ངེས་མཚན་བརྒྱད་ད་ལྟའི་མཚན་བརྒྱད་ལསཿ ཚོགས་གཉིས་མཐར་ཕྱིན་ཡོན་ཏན་རབ་རྫོགས་པཿ སྲས་ཀྱི་མཆོག་གྱུར་སྤྲུལ་པ་བསམ་མི་ཁྱབཿ འདས་དང་མ་འོངས་
༼༩༧བ༽ད་ལྟ་ཐམས་ཅད་དུཿ བསྟན་པའི་རྒྱལ་མཚན་ཕྱོགས་བཅུར་རབ་ཏུ་བཙུགསཿ ཞེས་གསུངས་ལྷ་ལྕམ་རབ་ཏུ་དགྱེས་པར་གྱུརཿ ཡོ་ག་རྣམ་གསུམ་ཆོས་ཀྱི་འཁོར་ལོ་བསྐོརཿ ཆོས་ཀྱི་ཆར་ཕབ་བདེ་ཞིང་སྐྱིད་པ་ལཿ འཇིག་རྟེན་ཁྱིམ་པོ་ཆེ་ཡི་ནང་ཞིག་ནཿ ལས་མ་དག་པའི་བ་ལང་རྫི་བོ་ཞིགཿ བ་ལང་ཚོལ་ཕྱིན་མ་རྙེད་ལོག་པ་དང་ཿ རྒྱལ་བ་དང་པོ་ས་ལ་ཕེབས་པ་མཐོང་ཿ བར་དུ་ལྷ་ལྕམ་ཕོ་བྲང་སྤྱན་དྲངས་མཐོང་ཿ ཐ་མ་ཉན་བུ་བྱས་པས་ཕོ་སྐད་ཐོསཿ དེ་དུས་ཟ་ཧོར་རྒྱལ་ཁམས་ཐམས་ཅད་ནིཿ ལྷ་ལྕམ་མནྡཱར་བ་ར་མངོན་པར་བསྟོདཿ ཕོ་མོ་ཐམས་ཅད་ཡིད་སྨོན་བྱེད་པ་ལཿ རྫི་བོས་ཁྱིམ་པོ་ཆེ་ཡི་གོ་རུ་གླེངསཿ ཆོས་དང་ཅིའི་ཆོས་དགེ་སྦྱོང་འཁྱམས་པོ་བསྡེབསཿ ཆོས་མ་ཡིན་པའི་སྤྱོད་པ་བྱེད་དོ་ཟེརཿ ནང་པར་བྱིས་པས་ཉི་རའི་ཁྲོད་དུ་གླེངསཿ གཅིག་གླེངས་གཉིས་གླེངས་ཡུལ་གྱི་གཙོ་བོས་གླེངསཿ ཕྱི་བློན་ནང་བློན་བཙུན་མོས་རིམ་པར་གླེངསཿ བཙུན་མོ་གཞོན་པས་རྒྱལ་པོའི་སྙན་དུ་སྨྲསཿ རྒྱལ་པོས་འདི་ནི་ཅི་ཟེར་སྨྱོའམ་གསུང་ཿ བུད་མེད་ཁ་ནི་མི་དགེའི་བང་མཛོད་ཡིནཿ ཤབ་ཤུབ་མང་པོ་བུད་མེད་འདྲེ་དང་མཚུངསཿ དང་པོ་གཏམ་དེ་སུས་ཟེར་ཁྲིད་ཤོག་གསུང་ཿ བཙུན་མོས་ནང་བློན་རྒྱལ་པོའི་དྲུང་དུ་ཁྲིདཿ ནང་བློན་ཕྱི་བློན་རིམ་པར་གཙོ་བོ་དང་ཿ གཙོ་བོ་རྣམས་ཀྱིས་དམངས་རྣམས་བསགས་ནས་སུཿ ལྷ་ལྕམ་
༼༩༨ན༽མེ་ཏོག་མནྡཱ་ར་བ་ལཿ ཟླ་བོ་དགེ་སྦྱོང་ཞིག་འདུག་ཟེར་བ་དེཿ ཕོ་ཡིས་མཐོང་ན་བློན་པོའི་དྲག་ཤོས་འཚོལཿ མོ་ཡིས་མཐོང་ན་བཙུན་མོའི་དྲག་ཤོས་འཆོལཿ མིག་མཐོང་ལག་ཟིན་སུ་ཡོད་སྨོས་ཤིག་ཟེརཿ སྐད་པོ་ཆེ་ཡི་སྐད་ཀྱི་ང་རོ་བསྒྲགསཿ ཉི་མ་དུ་ཤར་བྱས་ཀྱང་མཐོང་མ་བྱུང་ཿ གྲགས་པ་ངན་པས་ས་སྟེང་ཁྱབ་པར་གྱུརཿ དེ་དུས་བློན་པོ་རྣམས་ཀྱིས་གཙོ་བོ་བཟུང་ཿ རྒྱལ་པོའི་མདུན་དུ་དེ་དག་གཏུགས་པར་གྱུརཿ རྒྱལ་པོའི་ཞལ་ནས་དྲན་ཚད་སྨྲ་རྒྱུ་མིནཿ གཏམ་འདི་ཁམ་ཆེས་བུ་མོ་འདོད་མཁན་མང་ཿ རྒྱལ་པོ་རྣམས་དང་ལབ་དགོས་སོ་མི་གསོདཿ དམ་པར་ཆིངས་ལ་ཁྲི་མུན་ནང་ཆུག་གསུང་ཿ རྒྱལ་པོས་ལྷ་ལྕམ་ཡོད་པའི་ཕོ་བྲང་ཕྱིནཿ ནང་ཀུན་ལེགས་པར་མྱུལ་བས་མ་མཐོང་སྟེཿ དེ་ནས་རྒྱལ་པོས་ཕོ་བྲང་ཕྱི་རུ་བྱོནཿ བློན་རྣམས་དུས་གཅིག་ཁྲིམས་བརྡ་བརྡུངས་ཤིག་གསུངསཿ ཟ་ཧོར་མི་ནི་ཆེ་ཆུང་མེད་པར་བསྡུསཿ ནོར་གྱི་བང་མཛོད་ཅིག་བཏིབ་ཁྲོམ་དཀྱིལ་སྤུངསཿ སྐད་པོ་ཆེ་ཡི་སྐད་ཀྱིས་ང་རོ་བསྒྲགསཿ ལྷ་ལྕམ་ཁྱིམ་སྤངས་ལྷ་ཆོས་བྱས་པ་ལཿ གྲོགས་པོ་དགེ་སྦྱོང་འདུག་ཟེར་སུ་ཡིས་མཐོང་ཿ ངས་མཐོང་སྨྲོས་ཤིག་སྤུངས་པའི་ནོར་འདི་སྟེརཿ ཉི་མ་དུ་ཤར་བྱས་ཀྱང་མ་བྱུང་སྟེཿ མཐའ་ཡི་རྒྱལ་པོ་རྣམས་ཀྱིས་གཏམ་རྩོད་པཿ རྒྱ་གར་རྒྱལ་པོའི་བྲམ་ཟེ་མི་བདུན་བྱུང་ཿ རྒྱ་ནག་རྒྱལ་པོའི་གཙུག་ལག་མི་ལྔ་བྱུང་ཿ བྷངྒའི་རྒྱལ་པོའི་ཨཱ་
༼༩༨བ༽ཙར་མི་བཅུ་བྱུང་ཿ བཻདྡྷའི་རྒྱལ་པོའི་བློན་པོ་མི་གསུམ་བྱུང་ཿ ཨུ་རྒྱན་རྒྱལ་པོའི་གར་མཁན་མི་བརྒྱད་བྱུང་ཿ ཁ་ཆེ་རྒྱལ་པོའི་ཚང་པ་བརྡལ་ཅིག་བྱུང་ཿ ལི་ཡི་རྒྱལ་པོའི་མུ་རྟོ་ཁྱུ་ཞིག་བྱུང་ཿ ཏ་ཟིག་རྒྱལ་པོའི་རོ་ལ་མཁན་གྲ་ཞིག་བྱུང་ཿ གེ་སར་རྒྱལ་པོའི་རྣལ་འབྱོར་མི་གསུམ་བྱུང་ཿ ཞང་ཞུང་རྒྱལ་པོའི་བོན་པོ་མི་གཉིས་བྱུང་ཿ རྒན་དང་གཞོན་དང་བྱིས་པ་ཡན་ཆོད་ལཿ ཐམས་ཅད་ལྷ་ལྕམ་མནྡཱ་ར་བ་འདིཿ དེ་ནས་གཙོ་བོ་ཞིག་གི་ཆུང་མ་ཡིསཿ བ་ལང་རྫི་བོ་དེ་ཡི་མགོ་བསྐོར་ནསཿ ཁྱོད་ཀྱི་བ་ལང་འཚོ་བའི་ཚབ་མ་གཏོང་ཿ ཚོགས་པའི་གསེབ་ཏུ་ཁྱོད་ཀྱིས་མཐོང་ཟེར་དགོསཿ གཙོ་བོའི་ཆུང་མ་ཐམས་ཅད་ལྷན་ཅིག་འདུསཿ རྫི་བོ་དེ་ལ་ཀ་ཅས་ཚིམ་པར་བྱསཿ བ་ལང་རྫི་བོས་དམར་ནག་ཁྲོམ་དཀྱིལ་ཕྱིནཿ སྐད་པོ་ཆེ་ཡི་སྐད་བཏོན་ཕྱི་མ་ལཿ ཚོགས་པའི་དཀྱིལ་ནས་མི་ཞིག་ལངས་བྱུང་སྟེཿ དེ་ཡང་མཚན་མ་སྡུག་པ་དགུ་ཡིས་བརྒྱནཿ མགོ་ཆེ་རྐུབ་འབུར་ཤ་རྩུབ་ཝ་རི་འདྲཿ ཁ་ཆེ་སྣ་ཉག་མིག་ཕུགས་ཤིན་ཏུ་རིང་ཿ མདོག་ནག་མདུན་གྱི་ཡ་སོ་གཅིག་དོན་པཿ དེས་ནི་ངས་མཐོང་ནང་དུ་ལྟོས་དང་ཟེརཿ མི་དེ་ཟས་ནོར་མདུན་དུ་བཟུང་ནས་སུཿ རྒྱལ་པོས་བློན་པོ་སོང་ལ་ལྟོས་ཤོག་གསུང་ཿ བཙུན་མོས་ངས་ལྟའི་ཟེར་ནས་སྔོན་ལ་སོང་ཿ གཡོག་མོས་སྒོ་བསྒོམས་ནང་དུ་མ་བཏང་ནསཿ བཙུན་མོ་བདེན་ངེས་བསམ་ནས་བརྒྱལ་བར་གྱུརཿ བློན་པོས་རྒྱལ་པོའི་སྙན་དུ་དེ་སྐད་
༼༩༩ན༽སྨྲསཿ རྒྱལ་པོའི་ཞལ་ནས་བཙུན་མོར་ཆུ་རྒྱོབ་ལསཿ ཕོ་བྲང་ནང་སྐྱོལ་སྒོ་དེ་སྟ་རེས་གསེསཿ དགེ་སྦྱོང་གཟུང་ལ་འདི་རུ་ཁྲིད་ཤོག་གསུང་ཿ དེ་ནས་བློན་པོས་སྒོ་གསེས་ནང་དུ་ཕྱིནཿ ཆོས་སྟོན་མཐོ་བ་རཏྣའི་ཁྲི་ཐོག་ནཿ སྐུ་ཟིལ་མེ་ལོང་ཉི་མ་ཕོག་པ་ལྟརཿ ལྟ་བས་མི་བཟོད་གཟི་མདངས་འོད་དུ་འབརཿ ཚངས་པའི་གསུངས་ནི་ཆོས་སུ་ལྷང་ལྷང་སྒྲོགཿ ལྷ་ལྕམ་དཔོན་གཡོག་ཐལ་སྦྱར་མཆི་མ་ཕྱུང་ཿ བློན་པོ་རྣམས་ཀྱིས་འཇུ་བར་མ་ཕོད་ནསཿ སླར་ཡང་རྒྱལ་པོའི་སྙན་དུ་ཞུས་པ་ཡིསཿ མཐའ་མི་དགེ་སྦྱོང་དེ་ནི་ཡ་མཚན་ཏེཿ རྣམ་ཐོས་བུའམ་ཚངས་པའི་བུ་ཞིག་ཡིནཿ ལྷ་ལྕམ་བླ་མ་ཡིན་འདྲ་འཇུ་མ་སྤོབསཿ དེ་སྐད་གསོལ་པས་རྒྱལ་པོ་སྦར་གྱིས་འཕརཿ མཐའ་མིས་ང་ཡི་བུ་མོའི་སྨྲ་འབེབས་པཿ རིགས་ཉམས་དགེ་སྦྱོང་དེ་ནི་ལེགས་པར་ཆིངསཿ ཧ་ལ་ཧིལ་མར་ཁྲལ་བསྡུས་གསོན་སྲེག་གྱིསཿ ལྷ་ལྕམ་ཁྱིམ་ལ་བཏང་དུས་མི་འགྲོ་བརཿ ད་ནི་མཐའ་མི་འཁྱམ་པོ་ཞིག་དང་བསྡེབསཿ ས་ལ་དོང་བྲུས་ཚེར་མའི་སྟན་གོས་བརཿ མི་ལོ་ཉི་ཤུ་ཤུ་རྩ་ལྔའི་བར་དུ་ཞོགཿ ཐོག་ཕུབ་ནམ་མཁའ་སྔོ་ཙམ་མི་མཐོང་གྱིསཿ གཡོག་གཉིས་ཉི་མའི་མདངས་མི་མཐོང་བར་ཆུགཿ ཁོལ་མོ་ལྔ་བརྒྱ་ཐེམ་པའི་ཕྱིར་མ་བཏང་ཿ སྐྱེས་པའི་སྐད་མི་ཐོས་པའི་ཕུགས་སུ་ཆུགཿ དེ་སྐད་གསུངས་ནས་རྒྱལ་པོ་ཕོ་བྲང་གཤེགསཿ གཙོ་བོ་ཁྲི་མུན་ནང་ནས་ཕྱི་ལ་བཏོནཿ
༼༩༩བ༽ཤིག་གསོ་གྲ་རྒྱས་ཤ་ལྤགས་རུས་མེག་ཐིམཿ ཆུང་མ་རྣམས་དང་ལྷན་ཅིག་འདུས་པར་གྱུརཿ ཟས་ཆང་སྣ་ལེན་དགའ་བའི་སེམས་གཏིང་སྟོནཿ དེ་ནས་གཙོ་བོས་ཕྱོགས་ཀྱི་དམག་དཔོན་ལཿ ཕོ་ཉ་བཏང་ནས་དགེ་སྦྱོང་སྟེང་དུ་ཕོབཿ ཕྱི་ནང་བློན་པོ་གཙོ་བོར་བཅས་པ་ཡིསཿ ལ་ལས་དོང་བྲུས་ལ་ལས་ཚེར་མ་བཅདཿ ལྷ་ལྕམ་ཡོད་པའི་ཕོ་བྲང་ཕྱིན་པར་གྱུརཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ ལྷ་ལྕམ་མནྡཱ་ར་བ་དང་མཇལ་འཕྲད་མཛད་པའི་ལེའུ་སྟེ་བཞི་བཅུ་པའོཿ ཿཐ་ཐ་ཉྲ་རྒྱ་རྒྱཿ ཿ