ཟ་ཧོར་རྒྱལ་པོས་གསོན་བསྲེགས་མཛད་པའི་ལེའུ།
དེ་ནས་གཙོ་བོ་རྣམས་ཀྱིས་ཁྲིམས་བསྲངས་པཿ དགེ་སྦྱོང་ཁྱོད་ཀྱིས་ལྷ་ལྕམ་ལུས་སླད་པསཿ ཉེས་མེད་གཙོ་བོ་རྒྱལ་པོའི་ཆད་པས་མནརཿ ལྷ་ལྕམ་ཁྱིམ་དུ་མ་ཕྱིན་བྱ་བ་འདིསཿ རྒྱལ་རིགས་ཉམས་བཅུག་ཉེས་མེད་ཁྲིམས་ལ་གཏུགསཿ དེ་སྐད་སྨྲས་པས་ལྷ་ལྕམ་ཞལ་ན་རེཿ རྒྱལ་བའི་སྲས་འདི་ང་ཡི་བླ་མ་ཡིནཿ ལྷ་ལྕམ་འཇིག་རྟེན་སྐྱོན་གྱིས་གོས་པ་མེདཿ སྨྲས་ཀྱང་མ་ཕན་སློབ་དཔོན་སྟེང་དུ་ཤོརཿ ལ་ལས་གོས་ཕུད་ལ་ལས་ཕྱག་ཞབས་བཟུང་ཿ ལྷ་ལྕམ་ཁོ་མོའི་སྙིང་འདི་གས་ལ་ཐུགཿ ལུས་འདི་མི་བཟད་རབ་ཏུ་གཟིར་གྱུར་ཏེཿ མྱ་ངན་ཉམས་ཐག་མཆི་མས་མིག་གཉིས་གཟིརཿ ཕན་གྲོགས་ནས་བཅུང་ཟད་ཙམ་ཡང་མེདཿ སློབ་དཔོན་ཕྱག་གཉིས་རྒྱབ་ཏུ་དམ་པར་བཅིངསཿ མགུར་ལ་གསེ་མ་ར་ཙའི་ཐག་པ་
༼༡༠༠ན༽བཏགསཿ ཀྱེ་མ་ཀྱི་ཧུད་མི་ཡིས་ཕོད་པ་ནཿ སྔོན་ཁྲིད་བརྡེག་འཕུལ་རྟ་པའི་འཕྲད་ལ་བཅུགཿ ལུང་པའི་སུམ་མདོ་ཐང་སྟོང་ཞིག་ཏུ་བཞགཿ ཤིང་གི་ནང་ནས་རབ་ཏུ་ཚ་བའི་ཤིང་ཿ ཏ་ལའི་ལོ་མ་དེའུ་ཙམ་ཞིག་བརྩིགསཿ དེ་ལ་ཏིལ་གྱི་མར་ཁུའི་ངར་བཏགས་ནསཿ ཙནྡན་ཁུར་རེ་ཏིལ་མར་བྲེ་རེ་བསྡུསཿ དེ་ཉིད་རྒྱལ་བའི་སྐུ་ལ་དམ་དུ་བཅིངསཿ དེ་ཡི་དཀྱིལ་བཅུག་ཕྱོགས་བཞིར་མེ་བཏང་ནསཿ གཡབ་མོ་བརྡུལ་བས་ལུང་པར་དུད་སྤྲིན་འཚུབཿ བློན་པོ་རྣམས་ནི་གནས་ལ་ལོག་པ་དང་ཿ དེ་དུས་སྒྲ་དང་ས་གཡོས་ཆེན་པོ་བྱུང་ཿ ནམ་མཁའ་ལྷ་རྣམས་སེམས་ཀྱིས་མ་བཟོད་དེཿ ཆོས་བརྒྱངས་བཏན་པས་འདོད་ལྷ་ཀུན་གྱིས་ཐོསཿ རྒྱལ་ཆེན་རིགས་བཞི་སུམ་ཅུ་རྩ་གསུམ་ནསཿ འཐབ་བྲལ་མན་ཆོད་ཐོས་ནས་ར་མདར་འོངསཿ འོག་མིན་གནས་དང་བཀོད་པ་ལྷུན་གྲུབ་ནསཿ བདེ་བར་གཤེགས་པ་སྐར་ཚོགས་བཞིན་དུ་འཁྲིགསཿ མཁའ་འགྲོ་མ་རྣམས་ཀུ་ཅོ་ཅལ་ཅོལ་སྨྲེདཿ ལ་ལས་ཆུ་སྐྱེལ་ལ་ལས་ཆུ་བརྒྱག་ཅིང་ཿ ལ་ལས་ཤིང་སྡུད་ལ་ལས་བཅིངས་པ་འགྲོལཿ ལ་ལས་ཆར་འབེབས་ལ་ལས་རྫིང་བུ་བསྐྱིལཿ ཞག་བདུན་བར་དུ་དུད་པ་མ་ཆད་པསཿ སྔར་བསྲེགས་ཞག་གསུམ་དུད་པ་འཆད་པ་ལཿ ད་རེས་ཞག་བདུན་དུད་པ་མ་ཆད་སྙམཿ རྟ་དང་གླང་པོ་འགྲོ་བའི་ཆས་གྱིས་གསུང་ཿ རྒྱལ་པོས་ཡིད་མ་ཆེས་པར་ལྟ་རུ་ཕྱིནཿ ས་ཕྱོགས་དེ་ཉིད་
༼༡༠༠བ༽ཆུ་ཡི་རྒྱ་མཚོར་གྱུརཿ རྒྱ་མཚོའི་མཐའ་མ་མེ་འོབས་ཆེན་པོས་བསྐོརཿ མེ་ལྕེ་ཐམས་ཅད་ཕྱི་ལ་འབར་བར་བྱསཿ རྒྱ་མཚོའི་དཀྱིལ་ན་པདྨའི་སྡོང་པོ་སྐྱེསཿ པད་སྡོང་སྟེང་ན་ཁྱེའུ་ལོ་བརྒྱད་པཿ སྐུ་མདོག་དུང་ལ་ཕོ་ཚོས་བསྐུས་པ་རཿ སྐུ་ནི་གྲང་གྲང་བསིལ་བསིལ་ལྟར་དུ་འདུགཿ ཐོ་ཕྱི་ཐམས་ཅད་འཇའ་དང་འོད་ཀྱིས་བསྐོརཿ ལྷ་ལྕམ་འདྲ་བའི་བུ་མོ་བརྒྱ་ཡིས་བསྟོདཿ མདངས་ནི་ཡལ་ཡལ་བྱིན་ནི་ཐིབས་ཐིབས་འདུགཿ ཡིད་མ་ཆེས་པར་ཕྱོགས་བཞིར་ཕྱིན་ནས་བལྟསཿ གང་ནས་བལྟས་ཀྱང་དེ་ལྟར་འདུག་པ་དང་ཿ རྒྱལ་པོ་མིག་ནི་འཁྲུལ་པ་ཡིན་ནམ་སྙམཿ མིག་ནི་ཕྱིས་ཤིང་ཡང་ཡང་བལྟས་པ་ཡིསཿ ཁྱེའུ་ཞལ་ནས་རྒྱལ་པོར་འདི་སྐད་གསུང་ཿ དུས་གསུམ་སངས་རྒྱས་ངོ་བོ་བླ་མ་ལཿ གསོན་སྲེག་བྱད་པའི་སྡིག་རྒྱལ་བྱོན་ལགས་སམཿ འཇིག་རྟེན་སླུ་བྱེད་ཆོས་ལ་རབ་ཆགས་ནསཿ དོན་མེད་ཁྲིམས་འཇུག་སྡིག་རྒྱལ་བྱོན་ལགས་སམཿ མ་རིག་རྩ་བ་ཉོན་མོངས་དུག་ལྔ་ལཿ འཕྲལ་ཕུགས་གནས་པའི་སྡིག་རྒྱལ་བྱོན་ལགས་སམཿ འདུན་མའི་རྩབ་སེམས་ཅན་མགུ་བྱེད་ལཿ མི་དགེ་རྒྱགས་པའི་རྒྱལ་བློན་བྱོན་ལགས་སམཿ དེ་སྐད་གསུངས་པས་རྒྱལ་པོ་ས་ལ་འགྱེལཿ ཕ་ངས་འདི་འདྲ་བྱེད་པ་དྲན་པ་ཟེརཿ ལག་གཉིས་བྲང་ལ་དྲག་ཏུ་སྣུན་བྱེད་ཅིང་ཿ བྱེ་ཚན་ཐང་ལ་བཏོན་པའི་ཉ་བཞིན་དུཿ མགོ་ལུས་ས་ལ་རྡེབ་ཅིང་འགྲེ་ལྡོག་བྱེདཿ
༼༡༠༡ན༽འདྲ་ཡོང་བ་ཟེར་ཞིང་ཆོ་ངེ་འདེབསཿ བློན་པོས་རྒྱལ་འཛིན་ཁྱེའུ་ལྟ་ཞིང་དུཿ མི་རྣམས་གཅིག་སླེབས་གཉིས་སླེབས་ས་དེར་འོངསཿ མཐའ་མི་དགེ་སྦྱོང་མ་ཤི་འདུག་པར་གྲགསཿ བྱ་བའི་འཕྲོ་བསྐྱུར་ཕོ་མོ་ཐམས་ཅད་རྒྱུགཿ ཟ་ཧོར་ཡུལ་ན་འདུག་ཚད་ཐམས་ཅད་ཚོགསཿ རྒས་པ་འཁོགས་པ་ཁུར་དང་འཁར་བ་བཙུགསཿ དེ་ནས་དཔག་ཚད་བརྒྱ་སྟོང་མང་པོའི་ཡུལཿ ས་གཞི་མི་མངོན་དམར་ནག་ཁྲོམ་དུ་འཁྲིགསཿ དེ་ནས་རྒྱལ་པོ་འགྱེལ་ནས་བུ་བཅིང་དུསཿ ལུས་པོ་སར་རྡབ་ཕྱག་ནི་གྲངས་མེད་བཙལཿ མི་འཚམ་ལས་བྱས་འགྱོད་པ་རྟས་མི་སླེབཿ རབ་ཏུ་ཚ་བའི་མེ་ཡིས་མ་ཚུགས་པརཿ མེ་འབོས་དཀྱིལ་ན་ཏིལ་མར་རྒྱ་མཚོར་འཁྱིལཿ རྒྱ་མཚོའི་དཀྱིལ་ན་པདྨའི་སྡོང་པོ་སྐྱེསཿ པད་སྡོང་དཀྱིལ་ན་དུས་གསུམ་སངས་རྒྱས་བཞུགསཿ སྐྱོན་གྱིས་མ་གོས་འགྱུར་བ་མི་མངའ་བཿ བདེ་བ་པདྨའི་འབྱུང་གནས་ཁྱོད་ལ་བསྟོདཿ བདག་གི་བློ་ངན་སྐུ་ལ་བརྙས་བགྱིས་པཿ མི་འཆབ་མི་སྦེད་མཐོལ་ཞིང་བཤགས་པར་བགྱིཿ རྒྱལ་པོའི་རྒྱལ་སྲིད་འབུལ་བས་བཞེས་སུ་གསོལཿ རྒྱལ་པོའི་དབང་པོ་གཙུག་ལག་འཛིན་པ་ནིཿ ཁྱོད་ཀྱི་རྗེས་སུ་འཇུག་པའི་རྒྱལ་པོར་གྱུརཿ སེམས་ཅན་མ་རིག་ཁ་མཆེན་དགོངས་མཛོད་ལཿ རྗེ་ཉིད་ཕོ་བྲང་ནང་དུ་བཞུགས་པར་ཞུཿ དེ་ནས་ཆོས་བཟད་ལྷ་ཡི་འདུན་ས་ནསཿ ལྷ་དབང་བརྒྱ་བྱིན་འཁོར་
༼༡༠༡བ༽དང་བཅས་འོངས་ནསཿ པི་ཝང་སྒྲ་ལ་བཅུག་ནས་བསྟོད་པར་བྱེདཿ པདྨ་སྲིད་ཐུབ་འཛིན་ནི་འཁོར་བཅས་པསཿ རྔ་སྒྲའི་སྐད་ལ་བཅུག་ནས་བསྟོད་པར་བྱེདཿ ཧྲཱིཿ མ་བཅོས་སྤྲོས་བྲལ་བླ་མ་ཆོས་ཀྱི་སྐུཿ བདེ་ཆེན་ལོངས་སྤྱོད་བླ་མ་ཆོས་ཀྱི་རྗེཿ པད་སྡོང་ལས་བྱུང་བླ་མ་སྤྲུལ་པའི་སྐུཿ སྐུ་གསུམ་རྡོ་རྗེ་འཆང་ལ་ཕྱག་འཚལ་བསྟོདཿ སྐུ་ནི་མི་འགྱུར་ཀུན་ཏུ་བཟང་པོའི་སྐུཿ གསུང་ནི་མི་འགག་མཉམ་ཉིད་རིག་པའི་གསུང་ཿ ཐུགས་ནི་མི་གཡོ་སྨྲ་བསམ་བརྗོད་ལས་འདསཿ སྐུ་གསུང་ཐུགས་ལྡན་པདྨ་རྒྱལ་ལ་བསྟོདཿ འགྲོ་བའི་དོན་དུ་རང་བྱུང་འོད་དཔག་མེདཿ བཀྲ་ཤིས་ཡོན་ཏན་དུ་མས་བརྒྱན་པའི་སྐུཿ འཇིག་རྟེན་མངའ་སྒྱུར་པདྨ་རྒྱལ་བའི་སྲསཿ རྡོ་རྗེ་ཐོད་འཕྲེང་རྩལ་ལ་ཕྱག་འཚལ་བསྟོདཿ ཞི་བའི་ལས་མཛད་རྡོ་རྗེ་ཐོད་འཕྲེང་རྩལཿ རྒྱས་པའི་ལས་མཛད་རཏྣ་ཐོད་འཕྲེང་རྩལཿ དབང་གི་ལས་མཛད་པདྨ་ཐོད་འཕྲེང་རྩལཿ མངོན་སྤྱོད་ལས་མཛད་ཀརྨ་ཐོད་འཕྲེང་རྩལཿ ཐམས་ཅད་ལྷུན་གྲུབ་བུད་དྷ་ཐོད་འཕྲེང་རྩལཿ འཕྲིན་ལས་རྫོགས་པའི་རྗེ་ལ་ཕྱག་འཚལ་བསྟོདཿ ཧྲཱིཿ མ་ཆགས་སྐྱོན་གྱིས་མ་གོས་པའིཿ པདྨ་འབྱུང་གནས་སྐུ་ལ་བསྟོདཿ ཡོན་ཏན་ཐམས་ཅད་རབ་རྫོགས་པའིཿ པདྨ་སམྦའི་སྐུ་ལ་བསྟོདཿ རྨོངས་པའི་མུན་པ་སེལ་མཛད་པའིཿ ཉི་མ་འོད་ཟེར་སྐུ་ལ་བསྟོདཿ ལོག་འདྲེན་བདུད་བཞི་འདུལ་མཛད་
༼༡༠༢ན༽པའིཿ ཤཱཀྱ་སེང་གེའི་སྐུ་ལ་བསྟོདཿ མུ་སྟེགས་དམ་སྲི་འདུལ་མཛད་པའིཿ སེང་གེ་སྒྲ་སྒྲོག་སྐུ་ལ་བསྟོདཿ ཤེས་བྱ་ཀུན་ལ་མ་རྨོངས་པའིཿ བློ་ལྡན་མཆོག་སྲེད་སྐུ་ལ་བསྟོདཿ ཁམས་གསུམ་སྲིད་གསུམ་དབང་དུ་སྡུདཿ པདྨ་རྒྱལ་པོའི་སྐུ་ལ་བསྟོདཿ བདུད་དང་ལོག་འདྲེན་ཚར་གཅོད་པའིཿ རྡོ་རྗེ་གྲོ་ལོད་སྐུ་ལ་བསྟོདཿ བདེ་བ་ཐམས་ཅད་སྐུ་ལ་རྫོགསཿ ཡེ་ཤེས་མཁའ་འགྲོའི་སྐུ་ལ་བསྟོདཿ ཅེས་བསྟོད་དེ་ནས་གུ་རུའི་ཞལ་ནས་སུཿ རྒྱལ་པོ་གཙུག་ལག་འཛིན་པ་ཉོན་ཅིག་གསུང་ཿ ང་ཡི་བཀོད་པ་ནམ་མཁའི་རང་བཞིན་ལཿ དགའ་དང་མི་དགེའི་ཟུག་རྔུ་ག་ལ་མཆིཿ ཟག་མེད་སྐུ་ལ་འབྱུང་བ་མེས་མི་ཚུགསཿ མི་དགེའི་འདུ་ཤེས་ཅུང་ཟད་ཙམ་ཡང་མེདཿ སེམས་ཅན་ཡིན་པས་ནོར་འཁྲུལ་འོང་བར་མཆིཿ རྒྱལ་པོ་ཡོན་ཏན་ཀུན་ལྡན་རི་རབ་འདྲཿ སངས་རྒྱས་ལམ་ལ་སྐྱེ་རྒུ་འཛུད་པའི་ཕྱིརཿ རྒྱལ་པོའི་ཞལ་མཆིད་མི་བསྐྱུད་བདག་མཆིའོཿ ཿདེ་སྐད་གསུངས་པས་རྒྱལ་པོས་ཕྱག་མང་བཙལཿ བློན་པོ་རྣམས་ལ་མགྱོགས་པར་ཕོ་བྲང་སོང་ཿ ཟ་འོག་བེར་མཛོད་གསར་པའི་སྒོ་ཕྱེ་ལཿ ང་ཡི་ཞྭ་གོས་ཐམས་ཅད་ཁྱེར་ལ་ཤོགཿ ཤིང་རྟ་གདུགས་དང་རྒྱལ་མཚན་ལོངས་ཤོག་གསུངསཿ དེ་ནས་བློན་པོས་མྱུར་ཕྱིན་ལོན་པ་དང་ཿ ཤིང་རྟའི་སྟེང་དུ་དར་ཟབ་འབོལ་བརྩེགས་བཏིང་ཿ ཤིང་རྟའི་ཟུར་བཞིར་གེར་ཤིང་དར་བཞི་ཕྱརཿ སྐུ་ལ་རྒྱལ་པོའི་
༼༡༠༢བ༽ཟབ་བེར་སྔོ་བཀྲ་གསོལཿ དེ་ནས་ལེ་བརྒན་དམར་དང་ཟ་འོག་དང་ཿ དེ་ནས་བེར་ཆེན་སྣ་ལྔ་ལྔ་བརྩེགས་གསོལཿ དབུ་ལ་རྒྱལ་པོའི་དབུ་ཞྭ་པད་འདབ་ཅནཿ ནོར་བུ་ཁ་དོག་མི་གཅིག་ལྔ་བརྩེགས་ལཿ གསེར་གྱི་རྡོ་རྗེ་རྩེ་དགུ་བཙུགས་པ་ཡིཿ རྩེ་མོར་རྒོད་ཀྱི་རྩེ་རྒྱས་མཛེས་པ་དང་ཿ དར་སྣ་མང་པོའི་ཅད་པན་བཏགས་པས་བརྒྱནཿ རིན་ཆེན་གསེར་གྱི་ཉི་ཟླ་གསལ་བའི་ཞྭཿ དབུ་ཞྭ་ཁྱད་འཕགས་ཡིད་བཞིན་ནོར་བུ་གྱོནཿ ཛམ་གླིང་བྱེ་ཕྲག་ས་ཡ་གདུལ་ཞིང་ཿ པད་འབྱུང་བྱེ་ཕྲག་ས་ཡ་ཆོ་འཕྲུལ་སྟོནཿ ཤིང་རྟའི་སྟེང་དུ་སྤྱན་དྲངས་བཞུགས་པར་གྱུརཿ ཤིང་རྟའི་ཐག་པ་སུས་ཀྱང་འདྲུད་དབང་མེདཿ རྒྱལ་པོ་ཉིད་ཀྱིས་ལུས་ཀྱི་གོས་ཕུད་ནསཿ ཤིང་རྟའི་ཐག་པ་མགུལ་ལ་དཀྲིས་ནས་འདྲུདཿ གྱད་བརྒྱས་འདུས་པའི་ཁྲོམ་རྣམས་སྔོན་ལ་བཤགསཿ ལ་ལ་ཕྱག་འཚལ་ལ་ལ་གསོལ་བ་འདེབསཿ ལ་ལ་དུབ་ཤུགས་ལ་ལ་སེམས་ཉམས་བརྒྱལཿ ལ་ལ་སྔོན་ཕྱིན་པད་འབྱུང་ཞལ་ལ་ལྟཿ དེ་ནས་ཕོ་བྲང་ནང་དུ་སྤྱན་དྲངས་ནསཿ རིན་ཆེན་སྣ་བདུན་ཕོ་བྲང་ནང་དུ་ནིཿ རིན་ཆེན་བརྒྱན་པའི་ཁྲི་ལ་བཞུགས་སུ་གསོལཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ ཟ་ཧོར་རྒྱལ་པོས་གསོན་བསྲེགས་མཛད་པའི་ལེའུ་སྟེ་ཞེ་གཅིག་པའོཿ ཿཐ་ཐ་ཉྲ་རྒྱ་རྒྱཿ ཿ