ཟ་ཧོར་ཡུལ་དུ་མཐའ་དམག་སློག་པའི་ལེའུ།
དེ་ནས་རྒྱལ་པོའི་ཞལ་ནས་བློན་པོ་ལཿ ལྷ་ལྕམ་མནྡཱ་ར་བ་ཁྲིད་ཤོག་
༼༡༠༣ན༽གསུང་ཿ བློན་པོས་མྱུར་ཕྱིན་དོང་གི་ཁ་བཤུས་ནསཿ ཚེར་མ་ཐམས་ཅད་གཡས་གཡོན་དོར་ནས་སུཿ ཡབ་ཀྱི་ཞལ་ནས་ཕོ་བྲང་བྱོན་གྱིས་གསུང་ཿ ལྷ་ལྕམ་ད་གཤེགས་ཕོ་བྲང་ནང་དུ་གཤེགསཿ ལན་མང་སྨྲས་ཀྱང་མ་ཐོས་བཞིན་དུ་མཛདཿ བློན་པོས་ནང་ཕྱིན་རྒྱལ་པོའི་སྙན་དུ་གསོལཿ ལྷ་ལྕམ་ཁྲོས་ནས་ལན་མི་སྟེར་བར་འདུགཿ རྒྱལ་པོ་དེ་མ་ཐག་ཏུ་སྤྱན་ཆབ་ཤོརཿ བུ་མོ་བདེན་གྱིས་ཨ་མ་སོང་ཤོག་གསུང་ཿ བཙུན་མོས་གོས་ཁྱེར་ལྷ་ལྕམ་མདུན་དུ་ཕྱིནཿ ལྷ་ལྕམ་ཚེར་མ་ཐམས་ཅད་ཤ་ལྤགས་དིམཿ ལྟ་མི་བཟོད་པ་སྙིང་རྗེའི་གནས་སུ་འདུགཿ བུ་མོ་གོས་གྱོན་ཕོ་བྲང་ནང་དུ་འདོདཿ དེ་སྐད་སྨྲས་པས་ལྷ་ལྕམ་ཞལ་ན་རེཿ ཨ་མ་བུ་མོ་ཡབ་ཀྱི་བཀའ་མི་གཅོགཿ མི་ལོ་ཉི་ཤུ་རྩ་ལྔ་མ་སོང་བརཿ སྡུག་ཀྱང་འདུག་ས་འདི་གར་སྡོད་དོ་ཟེརཿ བཙུན་མོ་ས་ལག་ནས་ཐེན་ཀྱང་འགྲེལ་མ་བཏུབཿ བུ་མོས་ཕོད་པ་ཟེར་ཞིང་ཁ་སྙིང་གཏུགསཿ བཙུན་མོ་གཡོག་མོར་མང་དུ་བཤུམ་པ་ཡིསཿ བུད་མེད་གཅིག་བྱུང་གཉིས་བྱུང་མང་པོ་འདུསཿ དེ་ནས་ཟ་ཧོར་མོ་ལུས་ཐོབ་ཚད་ཚོགསཿ ཐམས་ཅད་དུ་ཞིང་ལུང་པ་འབའ་དིར་སོང་ཿ རྒྱལ་པོའི་ཐུགས་ལ་བུ་མོ་ཤིའམ་སྙམཿ རྒྱལ་པོ་ཉིད་ཀྱིས་ལྷ་ལྕམ་དུན་དུ་ཕྱིནཿ བུ་མོའི་ཆོས་རེགས་བྱས་པ་ང་ཡིན་མོདཿ འགྱོད་པ་ཅན་གྱི་ཕ་ལ་བུ་མོས་སོམསཿ ང་ཡིས་མཐོ་མཐོ་བྱས་པས་དམའ་དམའ་བྱུང་ཿ དོན་མ་
༼༡༠༣བ༽ཤེས་པས་སྙིང་རླུང་གཅོང་གིས་ཟིནཿ ཅེས་གསུངས་ཁ་དང་སྙིང་གཏུགས་དུད་མོ་འབྱིནཿ དེ་ནས་ལྷ་ལྕམ་ཕོ་བྲང་ནང་དུ་ཕྱིནཿ སློབ་དཔོན་ཞལ་མཐོང་སྐྱབས་སུ་སྙིང་ནས་མཆིཿ ལྷ་ལྕམ་དམའ་བའི་ས་ལ་པུས་བཙུགས་ནསཿ ཞེ་སར་བཅས་པའི་སྙན་ངག་ཚིག་བསྟོད་པཿ ཨེ་མ་ཧོཿ དགེ་མེད་གླིང་དུ་སངས་རྒྱས་སྤྲུལ་པ་བྱོནཿ མི་འཇིགས་སྟོབས་ལྡན་རེ་དོགས་མེད་པར་འཕྱོཿ ཕྱག་ཞབས་རྫུ་འཕྲུལ་ཉམ་ང་མེད་པའི་སྐུཿ རྫུ་འཕྲུལ་ཅིར་ཡང་གསལ་བ་བཀྲ་ཤིས་ཤིང་ཿ པད་སྡོང་ལས་འཁྲུངས་དཀར་ལ་དམར་མདངས་ཅནཿ བཟང་པོའི་མཚན་གྱིས་སྐུ་ལ་བརྒྱན་པ་ནཿ ལེགས་པའི་དཔེ་བྱད་མཚན་བཟང་སུམ་ཅུ་གཉིསཿ དུས་གསུམ་སངས་རྒྱས་པད་འབྱུང་སྐུ་ལ་རྫོགསཿ པད་འབྱུང་སྐུ་ཡིས་ཐ་དད་མོས་པ་འདུལཿ མཚན་དང་དཔེ་བྱད་ལོངས་སྤྱོད་རྫོགས་པའི་སྐུཿ རི་རབ་ལྟ་བུར་སྐུ་ནི་ལྷུན་བརྗིད་མཐོཿ རི་རྒྱལ་བུམ་པ་ལྟ་བུར་དབུ་ནི་ཟླུམཿ བུང་བ་ཨུཏྤལ་ལྟ་བུར་དགུ་སྐྲ་མཛེསཿ ཟླ་བ་རྒྱས་པ་ལྟ་བུ་དཔྱལ་དབྱེས་ཆེཿ སྐར་ཆེ་ན་ཤར་འདྲ་སྤྱན་གཉིས་གནག་ཅིང་རིང་ཿ འདི་ཡི་སྨིན་མ་ཁྱུང་ཆེན་ལྡིང་བ་འདྲཿ ཁྱུང་གཤོག་བརྒྱངས་པ་ལྟ་བུར་རྫི་མ་ལེགསཿ སྙན་ནི་པདྨ་ཁ་ཕྱེ་ལྟ་བུ་སྟེཿ ཤངས་རྒྱུད་ལེགས་ཤིང་ལྟ་ན་སྡུག་པའི་ཤངསཿ རབ་མཛེས་མཆུ་སྒྲོས་པདྨའི་ཟེ་བ་འདྲཿ ལྗགས་རིང་སྲབ་མཉེན་པདྨའི་མདོག་ལྟར་དམརཿ ཚེམས་དཀར་ཐགས་
༼༡༠༤ན༽བཟང་དུང་མདོག་གངས་རི་འདྲཿ ཆོམས་འཕྲེང་ལྔ་བཅུ་རྩ་བརྒྱད་ཞལ་ལ་མཛེསཿ ཞི་བའི་ཞལ་མཐོང་ཨོས་ཀོ་ལྷ་ངེ་བཿ ཀ་ལ་པིངྐ་ལྟ་བུ་ཚངས་པའི་དབྱངསཿ ཞལ་ཚོམས་དོམ་ནག་དཀྱུས་འདྲ་ལྟ་བུར་རིང་ཿ སྐུ་མདོག་དུང་ལ་ཕོ་ཚོས་བསྐུས་པ་འདྲཿ མགུལ་ནི་བུམ་པའི་མགྲིན་པ་ལྟ་བུར་ལེགསཿ འདི་ཡི་སྐུ་སྟོད་སེང་གེ་འགྱིང་བ་འདྲཿ དཔུང་པའི་མགོ་ཟླུམ་ཕྲག་པ་ཡན་ལག་རྒྱསཿ ཕྱག་ཞབས་སོར་མོ་དྲ་བས་འབྲེལ་པ་དང་ཿ སེན་མོའི་མདོག་ནི་ཟངས་དམར་ཤེལ་འོད་འདྲཿ པདྨའི་སྦུ་གུ་ལྟ་བུར་ལྟེ་བ་མཛེསཿ བྱིན་པ་ཨེ་ན་ཡ་འདྲ་ཞབས་པད་འབུརཿ མཁའ་ལ་འཇའ་འཁྱུས་ལྟ་བུར་འཕུར་རྩལ་འགྲོཿ སྦ་བ་སྦུབས་སུ་རྟ་གླང་ལྟ་བུར་ནུབཿ གཞོན་ནུ་བཙས་འདྲ་སྐུ་ལུས་ཡན་ལག་རྒྱསཿ འཛུམ་ཞིང་ཤིན་ཏུ་མཛེས་པའི་དྲི་མེད་ཞལཿ གཟུགས་བལྟས་མི་ངོམས་སྐྱེ་བོས་མཐོང་ན་དགའཿ འོད་ཟེར་དུ་མ་འབར་བས་འོད་ཁྱིམ་འདྲཿ རོ་མཆོག་འཇམ་ཞིང་དམ་པ་མཆོག་རབ་འཕགསཿ མི་ཤིགས་རྡོ་རྗེ་ལྟ་བུར་ཟག་པ་མེདཿ འདྲ་བ་འདི་དག་པད་འབྱུང་མཚན་བཟང་པོཿ སུམ་ཅུ་རྩ་གཉིས་རྒྱལ་སྲས་སྐུ་ལ་བསྟོདཿ ཅེས་པས་གུས་བསྟོད་ཕྱག་ཀྱང་མང་དུ་འཚལཿ དགྱེས་པའི་ཞལ་བསྟན་བདག་ལ་འདི་སྐད་གསུང་ཿ ཆ་མཐུན་རྟགས་ཙམ་ཕྱི་ཡི་སྡུག་བསྔལ་གཞིཿ ཁ་ཅིག་ད་ལྟའི་དགྲ་ལ་ངོས་འཛིན་ཏེཿ དེ་མིན་དགྲ་སྡང་ངན་
༼༡༠༤བ༽སོང་གསུམ་ལ་ཟེརཿ ད་ལྟའི་དགྲ་འདི་གཉེན་འགྲོར་ཚེགས་མེད་གསུང་ཿ གཉེན་བྱས་ད་ལྟའི་གཉེན་ལ་ངོས་འཛིན་ཏེཿ གཉེན་བྱམས་བྱ་བ་མཚན་ལྡན་བླ་མ་ཡིནཿ ཕན་པའི་ལམ་སྟོན་གནོད་པའི་ལམ་ལས་བཟློགཿ ད་ལྟའི་གཉེན་བྱམས་ཤ་ཚ་བཞིན་དུ་བྱསཿ ཆོས་བཤོལ་གང་མིན་འདུག་པ་ཐམས་ཅད་སློབཿ དཔེ་ངན་མང་པོ་བགྲང་ཞིང་འཁོར་བར་བསྐྱུརཿ མེད་པ་བཙལ་གྱིས་མི་རྙེད་སྡུག་བསྔལ་རྒྱུཿ ནོར་དང་ལོངས་སྤྱོད་འདི་ལ་མི་ཟེར་ཏེཿ ད་ལྟའི་ནོར་དང་ལོངས་སྤྱོད་བཙལ་ཀྱང་རྙེདཿ བཙལ་བས་མི་རྙེད་འཕགས་པའི་ནོར་བདུན་ཡིནཿ ཡོད་པ་བསྐྱངས་ཀྱི་མི་ལང་སྡུག་བསྔལ་ཏེཿ ད་ལྟའི་འཁོར་འདབ་ནོར་ལ་ཟེར་བ་མིནཿ སངས་རྒྱས་རང་ལ་ཡོད་པ་ཡན་པར་ཤོརཿ ངོ་མ་འཕྲོད་པས་བསྐྱངས་ཀྱང་མ་འཁྱོངས་ཡིནཿ རྐྱེན་ངན་དངོས་གྲུབ་ཤེས་པས་དང་དུ་ལང་ཿ བར་ཆད་ཡོན་ཏན་ཤེས་པས་ནང་དུ་བསུབསཿ དེ་སྐད་གསུངས་པས་ལྷ་ལྕམ་དགྱེས་པར་གྱུརཿ དེ་ནས་རྒྱལ་སྲིད་ལྷ་ལྕམ་བཅས་པ་དང་ཿ ནོར་གྱི་བང་མཛོད་དཔག་ཏུ་མེད་པ་ཡིཿ ཡིད་བཞིན་ནོར་བུ་སྐྱེ་བདུན་རིལ་བུ་རྣམསཿ ཆགས་ཞེན་མེད་པར་སྤྲུལ་སྐུའི་དྲུང་ཕུལ་ནསཿ ཆོས་ཀྱི་འཁོར་ལོ་བསྐོར་བར་ཞུ་བ་ཕུལཿ རྒྱལ་པོ་མ་འདས་བར་དུ་བཞུགས་པར་ཞུསཿ ཟ་ཧོར་མ་སྨིན་བར་དུ་བསྡད་ཀྱི་གསུང་ཿ བཀའ་འདུས་ཆོས་ཀྱི་རྒྱ་མཚོའི་ཆོས་བཀའ་ཕྱེཿ སངས་རྒྱས་
༼༡༠༥ན༽བསྟན་པ་མཐའ་དབུས་མེད་པར་བརྡལཿ ཕྱོགས་བཅུ་ཀུན་ཏུ་པད་འབྱུང་སྙན་པས་ཁྱབཿ མུན་སངས་ཤེས་པ་བུན་ཅིང་རིག་པ་བདེཿ ཁས་བརྒྱ་ཆོས་བྱེད་སྡིག་མེད་དགེ་བ་འཕེལཿ རྒྱལ་སྲས་པདྨ་འབྱུང་གནས་གདུལ་ཞིང་གྱུརཿ སེམས་ཅན་མ་སྨིན་པ་ནི་གཅིག་ཀྱང་མེདཿ དེ་ནས་གཏམ་ཚོལ་རང་རང་ཡུལ་ལ་འགྲོརཿ ཐོས་མཐོང་བཀད་སར་རང་རང་རྒྱལ་པོས་སྨྲསཿ ཐམས་ཅད་མི་བདེན་སྒྱུ་མ་ཡིན་མཆིས་ཟེརཿ མཐའ་ཡི་རྒྱལ་པོས་དམག་བསྡུས་བརྒྱག་པར་བརྩམསཿ རྒྱ་གར་རྒྱལ་པོ་གྲགས་འཛིན་ཞེས་པའི་བུཿ མཧཱ་བཱ་ལས་དམག་ཁྱེར་འོངས་པ་ལསཿ ཟ་ཧོར་མི་རྣམས་ས་བསྲེག་རྡོ་རྡོད་བྱེདཿ ལ་ལ་ཡར་སྐྱེལ་ལ་ལ་མར་སྐྱེལ་ཞིང་ཿ ལ་ལ་འཐབ་ཟེར་གོ་གསར་བྱེད་པ་ལཿ རྒྱལ་སྲས་དམ་པ་པདྨ་འབྱུང་གནས་ཀྱིསཿ སྐད་ཅིག་ལྷ་མ་ཡིན་གྱི་གནས་སུ་བྱོནཿ པདྨ་རྣམ་པར་རྒྱལ་བའི་མདའ་གཞུ་གཡརཿ མདའ་གཞུ་གླང་པོ་ཆེ་ལ་བཀལ་ནས་སུཿ གྱད་གཉིས་སྔོན་མཇུག་བསྐུར་ནས་དམག་གསེབ་བཏང་ཿ གཞུ་འདིར་མདའ་འདི་འཕེན་པའི་དམག་སྟོང་ཡོདཿ འཐབ་ཡ་བྱེད་པའི་ལག་ཆ་ས་རེ་གྱིསཿ ཞེས་པའི་ཤོག་འཕྲིན་མཧཱ་བཱ་ལར་སྤྲདཿ གཞུ་དེ་དམག་གིས་ཐེན་པས་ཁ་མ་ཕྱེདཿ འདི་ནི་ཁེངས་སིམ་སྲིད་བརྫུན་ཡིན་པསཿ ངེས་པར་བདེན་ན་ཕོབ་ལ་ཁྱེར་ཤོག་ཟེརཿ གླང་པོར་གཞུ་བཀལ་ཟ་ཧོར་ཡུལ་དུ་
༼༡༠༥བ༽འོངསཿ གཞུ་འདི་ཕོབ་ལས་བསྐུར་ཟེར་སྨྲས་པ་དང་ཿ རྒྱལ་བས་སྟོབས་ལྡན་གཞུ་དེ་ཐབས་ཀྱིས་ཕབཿ དགྱེ་ལང་དགུ་ལང་བྱས་ནས་བསྐུར་བཏང་བསཿ གྱད་དམག་ཐམས་ཅད་ཧ་ལས་གྱུར་པ་དང་ཿ ཐུབ་པ་སྲིད་ཟེར་ནས་དམག་རྣམས་ཟགསཿ རྒྱལ་པོ་གཞན་གྱི་དམག་རྣམས་ཀུན་ལ་ཡང་ཿ དཔའ་བོ་ཡོད་ན་གཞུ་འདི་བདུངས་ཤིས་སྨྲསཿ གཞུ་བདུངས་སྤོབས་པ་གཅིག་ཀྱང་མ་བྱུང་ནསཿ གཞུ་འདི་འགེངས་པའི་མི་དེ་ཁྲིད་ཤོག་ཟེརཿ རྒྱལ་བས་ཁྱབ་འཇུག་རཱ་ཧུ་ལ་བཏང་སྟེཿ དཔག་ཚད་བཅུ་རུ་རྭ་ཞིག་འབེན་ལ་བཙུགསཿ བྱང་ཆུབ་སེམས་དཔས་མདའ་བརྒྱབ་ཧ་ལས་གྱེསཿ མགོ་དགུ་བྱ་རོག་མགོ་དང་བཅུ་ཡོད་པཿ ལུས་པོ་ཐམས་ཅད་མིག་གིས་གང་བ་ཡིཿ དམག་མི་འདུག་ཅེས་ཡོངས་སུ་གྲགས་པར་གྱུརཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ ཟ་ཧོར་ཡུལ་དུ་མཐའ་དམག་སློག་པའི་ལེའུ་སྟེ་ཞེ་གཉིས་པའོཿ ཿཐ་ཐ་ཉྲ་རྒྱ་རྒྱཿ ཿ