ཚེའི་རིག་འཛིན་གྲུབ་པའི་ལེའུ།
དེ་ནས་ཟ་ཧོར་རྒྱལ་པོ་ཚེའི་དུས་བྱསཿ སྲས་ནི་ཀུན་སྐྱོང་ཞེས་བྱར་རྒྱལ་སྲིད་གཏདཿ ཨུ་རྒྱན་ཡབ་ཡུམ་ཕོ་བྲང་རྩེ་མོ་ནསཿ ད་ནི་ཚེ་ཡི་རིག་འཛིན་ཞིག་བསྒྲུབས་པ་ལཿ རྒྱ་གར་ཡུལ་དང་ཨུ་རྒྱན་མུ་སྟེགས་ཡུལཿ ཡུལ་རིགས་དུ་མའི་མི་རྣམས་ཆོས་ལ་གཟུང་ཿ སྙམ་ཞིང་ཐུགས་དགོངས་གཏད་པའི་དེ་མ་ཐགཿ ནམ་མཁའི་མཐོངས་ནས་ལྷ་མོ་བཞི་བྱུང་ནསཿ གསེར་གྱི་རྡོ་རྗེ་རྒྱ་གྲམ་གདན་དུ་བཏིངསཿ དེ་ཡི་སྟེང་དུ་ཡབ་ཡུམ་བཞུགས་སུ་གསོལཿ ཙཱ་རྩི་མཐིང་ནག་ཆིབས་སུ་དྲི་ཟ་ཞོནཿ ལག་པ་གཉིས་ཀྱིས་ཤར་གྱི་རྡོ་རྗེ་བཏེགཿ འཛིན་བྱེད་སེར་མོ་ཆིབས་སུ་གྲུལ་བུམ་ཞོནཿ ལག་པ་གཉིས་ཀྱིས་ལྷོ་ཡི་རྡོ་རྗེ་བཏེགཿ དུས་ལྕེ་དམར་མོ་ཆིབས་སུ་ཀླུ་དབང་ཞོནཿ ལག་པ་གཉིས་ཀྱིས་ནུབ་ཀྱི་རྡོ་རྗེ་བཏེགཿ ཚངས་མ་ལྗང་ཁུ་ཆིབས་སུ་གནོད་སྦྱིན་ཞོནཿ ལག་པ་གཉིས་ཀྱིས་བྱང་གི་རྡོ་རྗེ་བཏེགཿ མདུན་གྱི་ནམ་མཁའ་ཉིད་ལ་
༼༡༠༨བ༽གཤེགས་པར་གྱུརཿ རི་བོ་དེ་ཤན་ཡ་ག་ཞེས་བྱ་བཿ རི་རྩེར་གཡུ་ཡི་ན་བུན་འཐུལ་བ་ལཿ རྨད་ན་རྒྱ་མཚོ་གཏིང་ཟབ་འཁྱིལ་བ་ཡིཿ མདུན་དུ་མེ་ཏོག་སྣ་ཚོགས་གླིང་ཆགས་པཿ བྱ་སྐད་སྙན་པ་སྣ་ཚོགས་སྒྲོག་པའི་སཿ གནམ་སྒོ་ཟླ་གམ་ཁ་ནི་ཤར་དུ་ལྟཿ དུས་བཟང་ལ་ནི་མཁའ་འགྲོ་དངོས་སུ་འབྱོནཿ ཉམས་དགའ་དང་སྤྲོ་སྐྱོ་བ་མེད་པའི་གནསཿ ཏིང་འཛིན་རྒྱུད་ལ་རང་ཤུགས་སྐྱེ་བའི་སཿ ཕོ་བྲང་རི་བོ་ཏ་ལའི་རྩེ་མོར་བྱོནཿ བྲག་ཕུག་མཱ་ར་ཏི་ཀ་ཞེས་བྱ་བཿ རིགས་གསུམ་མགོན་པོས་བྱིན་གྱིས་བརླབས་པའི་གནསཿ དགུན་ཡང་མེ་ཏོག་ཆར་དུ་འབབ་པ་ལཿ བཀྲ་ཤིས་བྱིན་རླབས་ཆེ་བའི་གནས་མཆོག་དེརཿ ཚེ་དཔག་མེད་པའི་དཀྱིལ་འཁོར་ཞལ་ཕྱེ་ནསཿ ཚེ་ཡི་རིག་འཛིན་ཟླ་བ་གསུམ་དུ་བསྒྲུབསཿ ཚེ་དཔག་མེད་པ་མདུན་གྱི་ནམ་མཁར་བྱོནཿ ཡབ་ཡུམ་གཉིས་ཀྱི་སྤྱི་བོར་བུམ་པ་བཞགཿ བསྐལ་པ་ཆགས་ནས་འཇིག་རྟེན་མ་སྟོངས་པརཿ རྡོ་རྗེའི་སྐུ་ལ་སྐྱེ་འཆི་མེད་དབང་བསྐུརཿ ཏིང་འཛིན་བསྒོམས་པས་འཁོར་འདས་རུ་ཤན་ཕྱེདཿ ཚེ་ཡི་རིག་འཛིན་འཇའ་ལུས་ཐོབ་པར་གྱུརཿ སེམས་རྟགས་ལུས་ཤར་བགྲེས་རྒོད་མི་མངའ་བཿ ཟག་པ་མེད་པ་འཇའ་འོད་ཟེར་རང་བཞིནཿ འཁོར་བ་མ་སྟོངས་བཞུགས་པའི་ཚེ་ཐོབ་གྱུརཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ ཚེའི་རིག་འཛིན་གྲུབ་
༼༡༠༩ན༽པའི་ལེའུ་སྟེ་ཞེ་བཞི་པའོཿ ཿཐ་ཐ་ཉྲ་རྒྱ་རྒྱཿ ཿ