རྒྱལ་པོ་ཨ་ཤྭ་ཀ་ཆོས་ལ་བཙུད་པའི་ལེའུ།
དེ་ནས་ཟ་ཧོར་རྒྱ་གར་གཉིས་ཀྱི་མཚམསཿ ཀོ་ཏ་ལ་ཞེས་བྱ་བའི་ཡུལ་དུ་བྱོནཿ གཡའ་རི་གོང་གི་བྲག་ཕུག་གང་མར་བཞུགསཿ བཀའ་འདུས་ཆོས་ཀྱི་རྒྱ་མཚོའི་དལ་ཞལ་ཕྱེཿ མི་ལོ་བཅུ་གཉིས་བར་དུ་སྒྲུབ་པ་མཛདཿ རྒྱལ་པོ་ནུ་ཤ་རཱུ་པས་ཞབས་ནས་བཏེགཿ དེ་ནས་རིང་པོར་མ་ལོན་དུས་ཤིག་ནཿ དུར་ཁྲོད་ཆེན་པོ་ཧཱ་ཧཱ་སྒྲོག་པ་ནཿ གཅན་གཟན་མང་པོ་དཔག་ཏུ་མེད་པ་ཚོགསཿ དུར་ཁྲོད་རོ་མེད་ཉིན་མཚན་ཁ་སྦྱར་དུཿ ལྟོགས་ནས་ངུ་བའི་གཅན་གཟན་སྙིང་རྗེ་སྐྱེསཿ དུར་ཁྲོད་ཕྱིན་ནས་སྐྱུ་ལུས་སྦྱིན་པར་བཏང་ཿ གཅན་གཟན་ཟ་རྒྱུ་མ་རྙེད་རྒྱབ་བསྟན་དུཿ ཞག་བདུན་ཁོངས་སུ་གཅན་གཟན་ཚོ་དུས་བྱེདཿ དེ་ནས་མནར་མེད་དམྱལ་ཁམས་འགྲོ་བར་གཟིགསཿ རྒྱལ་པོ་གཙུག་ལག་འཛིན་དེ་གར་སྐྱེས་བལྟསཿ ནུ་ཤའི་བུ་མོ་མནྡྷེ་བཟང་མོར་སྐྱེསཿ དེའི་ཤ་ལྟོར་སོང་མཐོང་རིས་སྤོར་བར་མཁྱེནཿ སྙིང་རྗེའི་སེམས་དང་ལྡན་པའི་མཁའ་འགྲོ་མཿ སྙིང་རྗེ་སྐྱེ་ཕྱིར་ནིའུ་ལེའི་ཚང་དུ་སྤྲུལཿ དེ་ཡང་ཤིན་ཏུ་ཉེན་ཅིང་ཉོན་མོངས་པཿ གནོད་པ་མང་ཞིང་ལྟ་མི་བཟོད་པར་སྤྲུལཿ མནྡྷེ་བཟང་མོས་ཀུ་ཤ་འཐུ་རུ་ཕྱིནཿ ཚང་ལ་ཏ་ལའི་ལོ་མ་བཅད་ནས་བཀབཿ རླུང་གིས་བཏེག་པས་མཐའ་མ་རྡོ་ཡིས་མནནཿ ནེའུ་ལེ་ཕོ་བྱུང་རྡེག་སེམས་མེད་པར་ཕོགཿ རྐྱེན་དེས་བསྐུར་ནས་བུ་མོས་
༼༡༠༩བ༽ཆོས་བྱེད་བརྩམསཿ ཟང་ཟིང་བཀལ་ནས་གཡའ་རི་གོང་དུ་ཕྱིནཿ རྒྱལ་བས་དབང་བསྐུར་བྱིན་གྱིས་བརླབས་ནས་ནིཿ ཁྱོད་ཀྱི་ལུས་འདི་དུར་ཁྲོད་ཕ་གིར་ཕྱིནཿ གཅན་གཟན་འདི་དག་མི་ལུས་ཐོབ་ནས་ཀྱང་ཿ ཁྱོད་ཀྱིས་འདུལ་བའི་གདུལ་བྱའི་ཞིང་དུ་འགྱུརཿ ཁྱོད་ནི་སྐྱེ་བ་འགའ་ཞིག་བརྒྱུད་པ་ནཿ ཁ་བ་ཅན་དུ་གནམ་རི་ཞེས་བྱའི་བརྒྱུདཿ སྲོང་བཙན་སྒམ་པོ་ཞེས་བྱའི་རྒྱལ་པོར་སྐྱེཿ ཐུགས་རྗེ་ཆེན་པོ་སྤྱན་འདྲེན་ཕོ་ཉ་བཿ མཐའ་འཁོབ་ཡུལ་ནས་རྒྱ་གར་ཡུལ་དུ་འགྲིམཿ དེ་དུས་གཅན་གཟན་འདི་དག་མི་ལུས་ཐོབཿ གཅན་གཟན་མང་ཞིག་རྒྱ་གར་ཡུལ་དུ་སྐྱེཿ ལ་ལ་སེངྒེ་ལ་ཡི་ཡུལ་དུ་སྐྱེཿ ད་ལྟ་འགྲེལ་ཐོགས་ཁྱོད་ལ་མདུན་དུ་འོང་ཿ འདི་དག་རྣམས་ཀྱིས་ལྷ་ཁང་ཉིས་བརྒྱ་བཞེངསཿ དཀོན་ཅོག་གསུམ་བཞུགས་དེ་ལ་མཆོད་པ་བྱེདཿ སྤྲེའུའི་ཆ་རྣམས་ལྷ་ཕྱག་འཚལ་བའི་རྟེནཿ ཐུགས་རྗེ་ཆེན་པོ་བཅུ་གཅིག་ཞལ་ཡང་འབྱོནཿ དམ་རྫས་ངོ་མཚར་ཅན་ནི་རྒྱུ་དང་བཅསཿ ལྷ་ཡི་བུ་མོ་བཅུ་དྲུག་མཆོད་གཡོག་བྱེདཿ ཅེས་གསུངས་དེ་ནས་བུ་མོས་ལུས་རྒྱན་ཕུལཿ དུར་ཁྲོད་ཕྱིན་པས་གཅན་གཟན་ཟོས་པར་གྱུརཿ ཞག་ཏུ་སོང་ནས་རྒྱལ་པོ་འཁོར་བཅས་བྱུང་ཿ སྙིང་ནི་མི་དགའ་བུ་མོར་རྨི་ལམ་ངནཿ མནྡྷེ་བཟང་མོ་གང་དུ་སོང་ཟེར་འདྲིཿ ཕྱོགས་རྣམས་ཀུན་ཏུ་ཡོངས་སུ་ཚོལ་བར་གྱུརཿ དུར་ཁྲོད་སོང་བས་ཁྲག་གིས་འཁྲས་པ་དང་ཿ རས་གོས་ཕ་ཚད་སྐྲ་ལོ་
༼༡༡༠ན༽ཕན་ཚུན་འཐོརཿ རྐང་གི་ཁྲལ་ཁྲོལ་ཐོད་པ་བུམ་རིལ་མཐོང་ཿ དུར་ཁྲོད་འདི་རུ་སུ་བསྐྱལ་སུ་ཤི་སྙམཿ མནྡྷེ་བཟང་མོ་མུན་ན་རུང་སྟེ་ཟེརཿ མྱ་ངན་དུ་བཤུམ་རྒྱལ་བ་ཉིད་ལ་འདྲིཿ ཁྱོད་ཀྱི་བུ་མོ་གཅན་གཟན་ཟོས་སོ་གསུངསཿ དེ་མ་ཐག་ཏུ་སེམས་ཉམས་བརྒྱལ་བར་གྱུརཿ སློབ་དཔོན་ཆུ་བརྒྱབ་བརྒྱལ་བ་སངས་པ་དང་ཿ རྒྱལ་བས་མནྡྷེ་བཟང་མོའི་སྐྱེ་རྒྱུད་གསུངསཿ དེ་ནས་རྒྱལ་པོ་འཁོར་བཅས་ཆོས་ལ་ཚུདཿ ཡུལ་དེར་ཐེག་པ་ཆེན་པོ་སྤྱི་ཏི་དརཿ དེ་ནས་རྒྱ་གར་ཡུལ་དུ་བྱོན་དགོངས་ནསཿ གྲོང་ཁྱེར་མེ་ཏོག་རྒྱས་པ་ཞེས་བྱ་ནཿ རྒྱལ་པོ་ཨ་ཤྭ་ཀ་ཞེས་བདུད་དབང་སྒྱུརཿ བསྟན་པའི་དབེན་བྱས་དགེ་འདུན་ཐམས་ཅད་འཁྲུགསཿ ཉན་ཐོས་སྡེ་པ་གཉིས་སུ་ཆད་པར་གྱུརཿ གཞོན་ནུ་མང་ཞིག་ཆད་པས་ཕལ་ཆེན་སྡེཿ རྒན་པ་ཉུང་ཞིག་ཆད་པས་གནས་རྟེན་སྡེཿ མི་ལོ་ཉིས་བརྒྱ་ལྷག་ཙམ་སོང་བར་གྱུརཿ རྒྱལ་པོ་དེ་ཡིས་རྔ་སྒྲ་ཅན་རྣམས་བཅོམཿ གྲོང་ཁྱེར་ཤིང་ཐག་ཅན་རྣམས་འཇོམས་པ་ལཿ ཨ་ཤྭ་ཀ་ནི་ཁང་པ་ཞིག་ཏུ་འདུགཿ རྒྱལ་པོ་དེ་ཉིད་གདུལ་བྱའི་ཞིང་དུ་གཟིགསཿ པད་འབྱུང་དགེ་སློང་ཞིག་ཏུ་སྤྲུལ་ནས་ནིཿ རྒྱལ་པོའི་ནང་དུ་བསོད་སྙོམས་སློང་དུ་ཕྱིནཿ ང་ལ་བརྙས་པ་བྱེད་འདི་ཟུངས་ཤིག་ཟེརཿ ཟངས་མོ་ཆེ་ནང་ཏིལ་གྱི་མར་ཁུ་བླུགཿ འོག་ནས་རབ་ཏུ་ཚ་བའི་ཤིང་མེ་བུསཿ དགེ་སློང་ཆས་
༼༡༡༠བ༽ཕྱུང་ཟངས་ཀྱི་ནང་དུ་བཅུགཿ ནང་པར་བལྟས་པས་ཟངས་ནང་པདྨ་སྐྱེསཿ འདོམ་པོ་འཕགས་ནས་པདྨའི་ཟེའུ་འབྲུའི་དབུསཿ དགེ་སློང་ཅི་ཡང་མ་ཉེས་བཞུགས་པར་གྱུརཿ རྒྱལ་པོ་ཨ་ཤྭ་གནོང་འགྱོད་དྲག་པོ་སྐྱེསཿ སྦྱིན་གནས་འདི་ལྟ་བུ་ལ་མི་མཚམ་བྱསཿ ང་ཡིས་སྡིག་པ་མཚམས་མེད་མང་པོ་བསགསཿ སྡིག་པ་ཇི་ལྟར་བྱས་ན་འདག་ཅེས་ཞུསཿ དེ་ནི་དགེ་སློང་དབང་པོའི་སྡེ་ལ་དྲིསཿ སྤྲུལ་པའི་དགེ་སློང་རྒྱལ་པོས་ཁྲིད་ནས་ཕྱིནཿ དགེ་སློང་དབང་པོའི་སྡེ་ཡིས་ཞལ་ནས་ནིཿ ཛམྦུའི་གླིང་གིས་གནས་བྱེ་བ་རུཿ ནུབ་གཅིག་མཆོད་རྟེན་བྱེ་བ་བཞེངས་པ་དང་ཿ སྐྱབས་མགོན་མེད་ལ་ཟས་ནོར་བྱིན་ན་འདགཿ དེ་སྐད་གསུངས་པས་རྒྱལ་པོའི་བསམ་པ་ལཿ མགོན་མེད་ཟས་སྦྱིན་གཏོང་དང་སླ་སྟེ་ནཿ ནུབ་གཅིག་རྟེན་བྱེ་བས་གཅིག་མི་འགྲུབཿ སྡིག་པ་མི་འདག་ཟེར་བ་ཡིན་ཅེས་སྨྲསཿ དེ་ནས་དགེ་སློང་ཆེན་པོ་དབང་པོའི་སྡེསཿ ཁྱོད་ནི་སངས་རྒྱས་ལུང་བསྟན་རྒྱལ་པོ་ཡིནཿ བྱང་ཆུབ་ཤིང་དྲུང་སོང་ལ་སྨོན་ལམ་ཐོབཿ རྒྱལ་པོ་ཨ་ཤྭས་བྱང་ཆུབ་ཤིང་དྲུང་ཕྱིནཿ སངས་རྒྱས་ལུང་བསྟན་རྒྱལ་པོ་ང་ཡིན་ནཿ ནུབ་གཅིག་འཛམ་གླིང་ས་གནས་བྱེ་བ་རུཿ ལྷ་འདྲེས་མཆོད་རྟེན་བྱེ་བ་བཞེངས་པར་ཤོགཿ དེ་མ་ཐག་ཏུ་མཆོད་རྟེན་བྱེ་བ་གྲུབཿ དབུལ་པོ་ཐམས་ཅད་ཟས་ནོར་གོས་ཀྱིས་བསྐྱངསཿ ཡངས་པ་ཅན་དུ་བསྟན་པའི་སོ་ནམ་བྱསཿ མྱ་ངན་མེད་
༼༡༡༡ན༽པར་མགོན་མེད་ཟས་སྦྱིན་གྲགསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ རྒྱལ་པོ་ཨ་ཤྭ་ཀ་ཆོས་ལ་བཙུད་པའི་ལེའུ་སྟེ་ཞེ་ལྔ་པའོཿ ཿཐ་ཐ་ཉྲ་རྒྱ་རྒྱཿ ཿ