བཻདྡྷའི་ཡུལ་དང་སིངྒ་ལའི་ཡུལ་ཆོས་ལ་བཀོད་པའི་ལེའུ།
དེ་ནས་ལྷོ་ཕྱོགས་བཻདྡྷའི་ཡུལ་དུ་བྱོནཿ དྲ་བ་གཙུག་དགུའི་དུར་ཁྲོད་བཞུགས་པ་ལསཿ རྒྱལ་པོ་སྟོབས་ཞེས་བྲམ་ཟེ་སྨན་པས་བཏེགཿ གསོ་བྱེད་སྤོར་ཐང་མཁས་པའི་རྒྱལ་པོ་དེཿ ཁབ་ཏུ་ཆེན་ཆུན་གཉིས་བཞེས་ཡོད་པ་ལཿ ཆེན་མའི་སྲས་ལ་ཡབ་ཀྱིས་ཐུགས་ལ་བཏགསཿ གསོ་བའི་རིག་གནས་ཐམས་ཅད་རྫོགས་པར་བསླབསཿ ཡུན་རིང་སྦྱང་བཅུ་ག་མཁས་པའི་མངའ་བདག་གཏདཿ ཆུན་མའི་སྲས་ལ་དུས་གཅིག་གནང་ནས་སུཿ ཁྱེད་གཉིས་ཤེས་པའི་ཡོན་ཏན་བསྡུར་དགོས་ཟེརཿ ཆུན་མ་ཤིན་ཏུ་སྡུག་བསྔལ་གདུངས་པར་གྱུརཿ ངའི་བུས་རྒྱལ་ས་མི་ཐོབ་སྙམ་ནས་སུཿ སྲས་ཀྱིས་དྲ་བ་གཙུག་དགུའི་དུར་ཁྲོད་ཕྱིནཿ དགེ་སློང་ཆེན་པོ་དབང་པོའི་སྡེ་ཉིད་ལཿ རིག་པའི་གནས་ལྔ་ཉིན་མཚན་ཁ་སྦྱར་བསླབསཿ དབུ་མཚན་མཐོང་བས་དབུ་ཞབས་དོན་ཁོང་ཆུང་ཿ ཡུམ་གྱིས་ཤེས་སམ་དྲིས་པས་ཕུལ་ཕྱིན་གསུང་ཿ མ་དེ་ཤིན་ཏུ་དགའ་ནས་བུར་ཕྱག་འཚལཿ དེ་ནས་ཡོན་ཏན་བསྡུར་བའི་དུས་ལ་བབཿ ཁྲི་གཉིས་བརྩིགས་ནས་སྲས་གཉིས་བཞུགས་སུ་བཅུགཿ གང་མཁས་པ་ལ་རྒྱལ་ས་གཏོད་པ་ལཿ ཆེན་མའི་སྲས་ཀྱིས་
༼༡༡༡བ༽གསོ་རེག་སྔོན་ལ་གསུངསཿ བམ་པོ་སུམ་བརྒྱ་མཁྱེན་པས་ཡ་མཚན་སྐྱེསཿ དམངས་རྣམས་ཆུན་མའི་སྲས་ལ་སྨྲ་མི་དགོསཿ མ་བསླབས་ཤེས་པ་དཀའ་ཟེར་ཆས་ཆོད་བྱེདཿ དེར་ཡང་ཡུམ་ནི་ཐུགས་མ་བདེ་བར་དུསཿ ཆེན་མས་སྲས་ལ་བསྐོར་བ་མང་དུ་བྱསཿ ཕྱག་བཙལ་ངའི་བུས་མངའ་ཐང་ཐོབ་བོ་ཟེརཿ དེ་ནས་ཆུན་མའི་སྲས་ཀྱིས་གསོ་རིག་གསུངསཿ ལྷ་དང་ཀླུ་དང་དྲི་ཟར་བཅས་པ་འདུསཿ ཡབ་ཀྱིས་གནང་བའི་བམ་པོ་སུམ་བརྒྱའི་སྟེང་ཿ གསོ་རིག་བསྟན་བཅོས་སྔར་མ་གྲགས་པ་གསུངསཿ ལྷ་ཀླུས་ཕྱག་བཙལ་བསྐོར་བ་བྱས་ནས་དེང་ཿ དམངས་རྣམས་མ་བསླབས་ཤེས་པ་ཨ་ལ་ཟེརཿ ཡབ་ཀྱིས་ཕྱག་བཙལ་ཞབས་ནི་སྤྱི་བོར་བླངསཿ མངའ་ཐང་སྲས་གཉིས་བགོ་བཤའ་བཏང་བ་ལཿ མངའ་ཐང་མི་འདོད་རབ་ཏུ་བྱུང་གསོལ་ཞེསཿ ཐངས་གསུམ་ཞུས་ཀྱང་མ་གནང་དེ་ནས་གནང་ཿ དགེ་སློང་དབང་པོའི་སྡེ་ལ་རབ་ཏུ་བྱུང་ཿ བསྙེན་རྫོགས་མཛད་ནས་དམ་པའི་ཆོས་ལ་སྦྱངསཿ ཆོས་མིང་སིདྡྷི་ཕ་ལ་ཞེས་སུ་གྲགསཿ དེ་ནས་འགྲོ་བ་རྣམས་ལ་ཕན་པའི་ཕྱིརཿ སྒྲ་དང་ཚད་མའི་བསྟན་བཅོས་མང་པོ་མཛདཿ གསང་སྔགས་གྲུབ་བརྙེས་སྒྲུབ་ཐབས་མང་པོ་མཛདཿ དེ་དུས་ཀྲ་མ་ཤཱ་ལའི་གཙུག་ལག་ཁང་ཿ མུ་སྟེགས་ཉི་མ་སིདྡྷི་ས་མིག་བལྟས་བསྲེགསཿ མངོན་པའི་བཀའ་རྣམས་ཕལ་ཆེར་ཚིག་པར་གྱུརཿ དེ་ཡི་མེ་
༼༡༡༢ན༽གྲིབ་ཀླུ་ཡི་རྒྱལ་པོར་ཕོགཿ ཀླུ་ཡི་རྒྱལ་པོ་བཏང་གཟུང་ནད་ཀྱིས་བཏབཿ ཤིན་ཏུ་ཉམ་ཐག་ཅི་བྱས་ཕན་མེད་ནསཿ ཀླུ་འཁོར་གདུང་བའི་སྨྲེ་སྔགས་མང་པོ་བཏོནཿ ཀླུ་ཡི་རྒྱལ་པོ་དགའ་བའི་ཞལ་ན་རེཿ ཛམྦུའི་གླིང་གི་འཚོ་བྱེད་སྤྱན་འདྲོངས་ནཿ ན་ཚ་འདི་ལས་ཐར་བ་ཅང་སྲིད་དམཿ དེ་མིན་ཅི་བྱས་ཕན་མེད་ཚོའི་དུས་བྱེདཿ ཅེས་ཐོས་ཀླུ་རིགས་ནང་ནས་ཆོས་དད་པཿ གཉིས་ཀྱིས་སྤྱན་འདྲེན་འགྲོ་བར་ཁས་བླངས་ནསཿ དེ་གཉིས་ལ་ནི་རིན་ཆེན་མང་དུ་བསྐུརཿ དགེ་སློང་ཆེན་པོ་དེ་ལ་མཆོད་ཅིག་བསྒོཿ དེ་ནས་ནོར་རྒྱས་དང་ནི་དུང་སྐྱོང་གིསཿ རྫུ་འཕྲུལ་ཛམྦུའི་གླིང་དུ་སྐད་ཅིག་ཕྱིནཿ དགེ་སློང་ཆེན་པོ་སིདྡྷི་ཕ་ལ་ལཿ མགོ་བོས་ཕྱག་འཚལ་ཐལ་མོ་སྦྱར་ནས་སུཿ གྲོས་མཐུན་ཚིག་མཐུན་སྐད་མཐུན་རཏྣ་ཕུལཿ དགེ་སློང་ཆེན་པོས་གཟིགས་སྟོང་གསུམ་ལ་གཟིགསཿ གཟིགས་སྟོངས་དང་པོ་ཀླུ་བསྙུང་ལས་ཐར་བཿ གཟིགས་སྟོང་གཉིས་པ་གཏི་མུག་ནད་བསལ་བཿ གཟིགས་སྟོངས་གསུམ་པ་རྒྱས་པ་འབུམ་ལ་གཟིགསཿ ཀླུ་ཡི་ཡུལ་དུ་སྐད་ཅིག་ཕྱིན་པར་གྱུརཿ ཀླུ་རྣམས་མཚེའུ་ཚལ་དུ་དགེ་སློང་འདུསཿ ཀླུ་ཡི་རྒྱལ་པོ་ཀླུ་སྨན་སྣ་ཚོགས་གསོསཿ རྒྱལ་པོ་ནད་ལས་གྲོལ་བའི་དྲིན་ལན་དུཿ རིན་པོ་ཆེ་དང་ཕ་རོལ་ཕྱིན་ཡུམ་ཕུལཿ ཨཱ་ཙརྻ་མཆོག་ནཱ་གཱ་རྫུ་ནར་གྲགསཿ དེ་ནས་ཨུ་རྒྱན་པདྨ་འབྱུང་
༼༡༡༢བ༽གནས་ཀྱིསཿ སིངྒ་ལ་ཡི་རྒྱལ་ཁམས་གདུལ་བྱར་གཟིགསཿ གི་ཛ་ར་ཡི་དུར་ཁྲོད་བཞུགས་ནས་སུཿ རྒྱལ་པོ་ཤྲཱི་ཀུ་མཱ་ས་ཞབས་ནས་བཏེགཿ འདི་དུས་ཀྲ་མ་ཤྲཱི་ལའི་གཙུག་ལག་ཁང་ཿ མུ་སྟེགས་དམག་དྲངས་གཙུག་ལག་ཁང་འགའ་བསྲེགསཿ རེ་ཞིག་དུས་ན་རྒྱལ་པོའི་ལྡུམ་རའི་ནང་ཿ མཚོ་དཀྱིལ་མེ་ཏོག་པདྨའི་སྡོང་པོ་ལསཿ མེ་ཏོག་མང་པོ་ཉིན་པར་ཁ་འབྱེད་ཅིང་ཿ མཚན་མོ་ཁ་ནི་ཟུམ་ནས་སྡོད་པ་ལཿ པདྨ་གཅིག་ནི་ཉིན་ཡང་ཁམ་བྱེཿ ལྡུམ་ར་བས་ནི་རྒྱལ་པོར་དེ་ལྟར་བསྙེདཿ རྒྱལ་པོའི་ཞལ་ནས་གཉེར་ཀ་གྱིས་ཤིག་གསུང་ཿ དེ་ནས་རྒྱལ་པོ་བཙུན་མོ་འཁོར་བཅས་ཀྱིསཿ གཟིགས་སུ་བྱོན་པས་པདྨ་ཁ་བྱེའི་དབུསཿ ཁྱེའུ་ལོ་བརྒྱད་ཟིལ་པོ་ཁྲོམ་མེར་འདུགཿ རྒྱལ་པོས་མཁན་པོ་སུ་མི་ཏྲ་ལ་དྲིསཿ མཁན་པོའི་ཞལ་ནས་རྒྱལ་པོ་གསོན་ཅིག་གསུང་ཿ དེ་ནི་ཤཱཀྱ་མི་ཏྲའི་སྐྱེ་བ་སྟེཿ རྒྱ་གར་ཤར་ཕྱོགས་བྲམ་ཟེས་བྷ་ལའིཿ བུ་ནི་ཤཱཀྱ་བཤེས་གཉེན་ཚེ་འཕོས་པཿ དབང་ཕྱུག་ཆེན་པོའི་གྲུབ་ཐོབ་ནང་པའི་དགྲཿ མ་ཏི་ཙི་ཏྲ་འདུལ་བའི་གཉེན་པོ་ཡིནཿ ཕོ་བྲང་སྤྱན་དྲངས་བཀུར་སྟི་གྱིས་ཤིག་གསུང་ཿ དབང་བསྐུར་ཆོས་བཤད་ཨཱརྻ་དེ་བར་བཏགསཿ ཚངས་སྤྱོད་རབ་ཏུ་འབྱུང་བར་ཞུ་ཕུལ་བསཿ སློབ་དཔོན་ཀླུ་སྒྲུབ་རབ་ཏུ་བྱུང་ལུང་བསྟནཿ མི་ལོ་ཉིས་བརྒྱ་བཞུགས་ནས་ཆོས་ལ་བཀོདཿ ཨུ་རྒྱན་གུ་རུ་པདྨ་འབྱུང་གནས་ཀྱི་
༼༡༡༣ན༽སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ བཻ་དྡྷའི་ཡུལ་དང་སིངྒ་ལའི་ཡུལ་ཆོས་ལ་བཀོད་པའི་ལེའུ་སྟེ་ཞེ་དྲུག་པའོཿ ཿཐ་ཐ་ཉྲ་རྒྱ་རྒྱཿ