བྷངྒ་ལའི་རྒྱལ་ས་ཕྲོགས་པའི་ལེའུ།
དེ་ནས་ཤར་ཕྱོགས་བྷངྒ་ལ་རུ་བྱོནཿ རཱ་ཛ་ཆེན་པོ་ནོར་བུ་འོད་ལྡན་ཞེསཿ མུ་སྟེགས་རྒྱལ་པོ་གསུང་རབ་མི་དད་པཿ དང་པོར་མངོན་པར་མི་དགའ་གནོད་པར་བྱེདཿ ཕོ་བྲང་མཁར་གྱིས་ནི་བརྒྱད་ཡོད་པཿ ཕྱི་སྒོའི་ནང་ན་དབང་པོའི་ཡུལ་སྟོན་གྱིཿ བུ་མོ་ལྔ་ནི་ཤིན་ཏུ་མཛེས་པ་ལཿ ཡིད་དུ་འོང་བའི་ཆ་ལུགས་དུ་མ་སྟོནཿ འདོད་ཡོན་ལྔ་ནི་ལག་ཏུ་བླངས་ནས་སྟེང་ཿ བར་སྒོ་ཞིག་ན་མ་འོངས་ལུང་སྟོན་པའིཿ སྒོ་འགྲམ་འདས་འོངས་གླེང་སློང་བུ་མོ་གཉིསཿ ངག་ནི་ཚངས་པའི་དབྱངས་ལྟར་སྙན་པ་ལཿ གཏམ་ཡང་ཚངས་པ་ཆེན་པོ་ལྟ་བུར་མཁསཿ ནང་སྒོའི་ཕྱི་འགྲམ་རཀྴ་སྟོབས་པོ་ཆེའིཿ བུ་ལྔ་འཇིགས་པའི་མཚོན་ཆ་སྣ་ཚོགས་ཐོགསཿ སྒོ་ཡི་ནང་འགྲམ་སྒོ་སྲུང་སྡིག་ལྟོ་ཅནཿ ཕྱི་ལ་རེ་མིག་སྟོང་ཕྲག་བརྒྱད་ཅུ་བརྒྱདཿ ཕོ་བྲང་དེ་ལ་འོབས་ཀྱི་འཁོར་ས་དྲུགཿ མཁར་དེའི་བར་ཁང་ཉི་ཟླ་ཁ་སྦྱར་གྱིཿ ནང་ནི་རིན་ཆེན་སྣ་ལྔའི་འོད་ཀྱིས་ཁེངསཿ དེ་ལ་རིན་ཆེན་ཤེལ་གྱི་སྐས་བཙུགས་པཿ རཏྣ་འཕྲུལ་གྱི་མེ་ལོང་ལས་བྱས་མཐོང་ཿ དེ་ནང་རཱ་ཛ་ནོར་བུ་འོད་ལྡན་སྡོདཿ གནས་པ་ནང་གནས་གཟིགས་པ་ཕྱི་རུ་གཟིགསཿ དེ་ཡི་སྤྱི་གཙུག་ཡིད་བཞིན་ནོར་བུ་ནིཿ རིན་པོ་ཆེ་ནི་
༼༡༡༣བ༽བསམ་འཕེལ་བྱ་བ་ཡོདཿ འཁོར་ནི་མུ་སྟེགས་གྲངས་མེད་བསྐོར་བའི་དབུསཿ རྒྱལ་པོ་དེ་ནི་ཤིན་ཏུ་དབང་ཆེ་བསཿ ནོར་བུ་རིན་ཆེན་ཡོད་བཞིན་གཞན་གྱི་འཕྲོགཿ སེམས་ཅན་དབུལ་ཕོངས་དུབ་ཅིང་སྡུག་བསྔལ་འཇུགཿ དེ་ནི་པད་འབྱུང་གདུལ་བྱའི་ཞིང་དུ་གཟིགསཿ གྲོང་ཁྱེར་སྲང་གར་མནྡ་ར་བ་བཞགཿ བྱི་ལའི་གདོང་པ་ཅན་དུ་སྤྲུལ་ཅིག་གསུངསཿ གདོང་ཅན་སྐྱེས་བུ་གསུམ་གྱིས་དམག་དཔོན་བྱསཿ མཚོན་གྱིས་མི་ཕེད་སྲ་བའི་གོ་ཆ་གྱོནཿ རྩེ་གསུམ་ལྡན་པའི་མཚོན་ཆ་མང་དུ་ཐོགསཿ བརྒྱད་ཁྲི་བཞི་སྟོང་འཁོར་བཅས་དམག་དྲངས་འཐབཿ རྒྱལ་པོའི་འཁོར་ས་དྲུག་བཅོམ་དམག་རྣམས་བསདཿ འདོད་ཡོན་བུ་མོ་ལྔ་ཕྲོགས་སྒོ་སྲུང་བཀུམསཿ གནམ་སྒོ་འབྱུང་འཇུག་མེད་པའི་ནང་དུ་ཕྱིནཿ ཁྲོ་བཅུས་རྒྱལ་པོ་བཀོད་པ་ལྷུན་གྲུབ་ཁྲིདཿ པདྨ་ཀུན་ཏུ་འཆང་གི་སྐུ་རུ་བཞེངསཿ རྒྱལ་པོ་འོག་མིན་གནས་སུ་བསྒྲལ་བར་གྱུརཿ རྒྱལ་པོའི་ཤུལ་བཟུང་ཆོས་ཀྱིས་རྒྱལ་སྲིད་བསྐྱངསཿ འདི་དུས་ཀྲ་མ་ཤཱི་ལའི་གཙུག་ལག་ཁང་ཿ ཏ་ཟིག་རྒྱལ་པོ་ཧུ་ལུ་ཀས་དམག་གཡབསཿ གཙུག་ལག་ཁང་ནི་བཅུ་གཉིས་མེ་ལ་བསྲེགསཿ མངོན་པའི་བཀའ་ནུབ་གཙུག་ལག་ཁང་ནི་མེདཿ དགེ་སློང་གསལ་བའི་ཚུལ་ཁྲིམས་ལུས་བསྐྱེད་ནསཿ བྱམས་པའི་ཆོས་ལྔ་པྲ་ཀ་ར་ཎ་སྡེ་བརྒྱདཿ ཐོགས་མེད་དབྱིག་གཉེན་
༼༡༡༤ན༽བསྟན་བཅོས་ཕྱིས་བརྩམས་དང་ཿ པད་འབྱུང་བསྟན་པ་བྷངྒ་ལ་ན་རྒྱསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ བྷངྒ་ལའི་རྒྱལ་ས་ཕྲོགས་པའི་ལེའུ་སྟེ་ཞེ་བདུན་པའོཿ ཿཐ་ཐ་ཉྲ་རྒྱ་རྒྱཿ ཿ