ཨུ་རྒྱན་ཡུལ་ཁམས་འདུལ་བར་དགོངས་པའི་ལེའུ།
དེ་ནས་གདུལ་བྱར་གྱུར་པ་གང་འདུག་གཟིགསཿ ཨིནྡྲ་བོ་དྷིས་ཕོ་ཉ་བཏང་དང་ཕྲདཿ གྲོགས་པོ་གསེར་འོད་གཞོན་ནུ་ཞེས་བྱ་བཿ མནྡཱ་ར་བ་མཐོང་བས་ལོག་ལྟ་སྐྱེསཿ ཀྱེ་མ་དུས་ངན་ཆོས་པ་འདི་འདྲ་བཿ སོ་སོའི་སྐྱེ་བོ་ཡིན་ཡང་ངོ་མི་མཚརཿ གཏམ་ནི་མང་དུ་སྨྲས་ཀྱང་ལྷག་མ་ལྔསཿ མགོ་ནག་མི་ལ་འདུན་མ་ཅི་ཡང་ཡོདཿ འོད་འཆང་མ་ནི་བར་མ་དོ་རུ་འཁྱམསཿ གླགས་ལྟ་ཐ་མ་མཆིས་པར་བགྱིད་ལགས་སོཿ དེ་སྐད་སྨྲས་ནས་ཨུ་རྒྱན་ཡུལ་དུ་དང་ཿ དེ་ནས་ཨུ་རྒྱན་ཐབས་ཀྱིས་འདུལ་བར་དགོངསཿ འབྲས་ལྡན་ཀརྐ་ཏ་ཡི་ཚོང་དུས་སུཿ བྲམ་ཟེ་ཕོ་མོའི་ཁྱེའུ་ཞིག་ཏུ་སྤྲུལཿ སྐྱེ་བདུན་ཤ་ཞིག་བཙལ་ནས་དོན་བྱ་བསམཿ ཁར་ས་པཱ་ཎའི་གཙུག་ལག་ཁང་འཁོར་ནཿ བྲམ་ཟེ་སྐྱེ་བདུན་དུང་གི་རྣ་ཆ་ཅནཿ དེ་ལ་ལུས་འདོད་ཕྱག་དང་བསྐོར་བ་བྱསཿ ང་ལ་བསྐོར་བ་བྱས་ནས་ཅི་བྱེད་ཟེརཿ སེམས་ཅན་དོན་བྱེད་སྐྱེ་བདུན་ཤ་དགོས་པསཿ ཁྱོད་ཀྱི་བློས་ཐོངས་ད་ལྟ་ལུས་འདི་ཞུཿ མི་ཐོངས་ནམ་ཤི་ཙ་ན་ཞུ་བྱས་པསཿ བྲམ་ཟེ་དུང་རྣས་ཅུང་ཞིག་བསམས་ནས་
༼༡༡༤བ༽སུཿ འཇིག་རྟེན་འདི་ན་གཅེས་པ་རང་སྲོག་ཡིནཿ ང་འཆིའི་དུས་ན་སྐད་ཅིག་བཏང་གི་ཟེརཿ དེ་ནས་ལོ་ལྔ་སོང་ནས་སྐད་བྱུང་སྟེཿ ཌོམྦྷི་པ་དང་སྐད་ནི་ཕྲད་ཙམ་བྱུང་ཿ དེ་ནས་རོ་དྲངས་ཅེ་སྤྱང་མང་པོ་བྱུང་ཿ ཌོམྦྷིས་རེངས་པའི་ལྟ་སྟངས་བྱས་ནས་ནིཿ སྟག་ལ་ཞོན་ནས་རོ་དེ་པང་དུ་ཁྱེརཿ ཞེ་སྡང་གདུག་པའི་སྦྲུལ་གྱིས་གོང་རྨེད་བྱསཿ རུས་པའི་རྒྱན་གྱོན་ཁ་ཊཾ་རྩེ་གསུམ་ཐོགསཿ གྲོང་ཁྱེར་འབྲས་ལྡན་དངོས་གྲུབ་སུ་འདོད་བྱསཿ བཅོས་མིའི་རྣལ་འབྱོར་ཐོ་ཅོ་ལས་མེད་པརཿ སྟག་ལ་སྦྲང་རྒོད་བླུད་ནས་ཞོན་པ་ཡིནཿ དུག་སྦྲུལ་གླ་རྩིས་བྱིན་པའི་རྟགས་ཡིན་ཟེརཿ ང་མིན་ཁྱོད་ཀྱིས་འདི་འདྲ་མི་ཐུབ་གླང་ཿ དེ་ནས་ཆང་ཚོང་བི་ན་ས་ཞེས་ལཿ ཆང་ཉོར་ཕྱིན་ཏེ་ཆད་ནི་ཙམ་ཉོ་ཟེརཿ ཁྱོད་ལ་ཆང་ནི་ཙམ་ཡོད་ཉོ་བྱས་པསཿ ང་ལ་ཆང་ཁལ་ལྔ་བརྒྱ་ཙམ་ཡོད་ལོཿ ཆང་ཚོང་བྱས་པས་ཆང་རིན་ཇི་ཙམ་ཟེརཿ ཆང་རིན་ཉི་མ་འདི་ནུབ་ཙ་ན་སྟེརཿ དེ་སྐད་སྨྲས་པས་ཆང་མས་ཆང་བཙོངས་སོཿ དུས་ལ་མ་འཇལ་རྒྱལ་ཁྲིམས་ཆད་པ་ཡོང་ཿ ཆང་རིན་མེད་ནས་ཉི་མ་སྟོད་ལ་མནནཿ རྩྭ་དང་ཤིང་དང་ཆུ་མིག་ཐམས་ཅད་བསྐམསཿ སེམས་ཅན་ཕྲ་མོ་ཐམས་ཅད་ཚིག་པ་ལཿ རཱ་རྫ་ཟངས་ཀྱི་དྲེག་པ་བྱ་བ་དེསཿ ཡུལ་མི་ཐམས་ཅད་བསགས་ནས་གྲོས་བྱས་པསཿ བེ་ནས་ངའི་ག་ན་རྣལ་འབྱོར་ཡོད་དོ་ཟེརཿ ཡུལ་མི་ཐམས་ཅད་ཁ་འཆམ་ཚིག་གཅིག་
༼༡༡༥ན༽ཏུཿ རྣལ་འབྱོར་བྱ་བ་ཐབས་མང་དེས་ལེན་ཟེརཿ དེ་ནས་རཱ་ཛས་སློབ་དཔོན་དྲུང་དུ་ཕྱིནཿ རྣལ་འབྱོར་བྱ་བ་སེམས་ཅན་དོན་བྱེད་ཡིནཿ འདི་འདྲའི་གནོད་འཚེ་མ་བྱེད་བྱས་པ་ཡིསཿ ཆང་རིན་མེད་ཟེར་རཱ་ཛས་ཁས་ལེན་བྱསཿ ཉི་མ་བཏང་བས་ཞག་བདུན་ཐོ་རངས་སོང་ཿ དེ་ནས་ཀུ་རུ་ཀུལླའི་བྲག་ཕུག་བཞུགསཿ ཆང་ཚོར་བི་ན་ས་ནི་དད་པ་སྐྱེསཿ གླང་པོ་ཆེ་ལ་ཆང་བཀལ་བྲག་ཕུག་བྱུང་ཿ ཌོམྦྷ་ཧེ་རུས་གདམས་ངག་རྫོགས་པར་བྱིནཿ རླུང་སེམས་འབྱོངས་པས་ཆུར་མི་འབྱིང་པ་དང་ཿ ནམ་མཁའ་དག་ལ་བྱ་བཞིན་ཐེགས་པ་མེདཿ དེ་ནས་རེ་ཞིག་དུས་ན་རྒྱལ་པོ་ནིཿ ཨིནྡྲ་བོ་དྷིས་དུར་ཁྲོད་ས་འཆག་ཕྱིནཿ དུག་སྦྲུལ་ཟིན་ནས་ཤིན་ཏུ་ན་བར་གྱུརཿ བྲམ་ཟེ་སྔགས་མཁན་སྨན་པ་རྣམས་ལ་བསྟནཿ ཐམས་ཅད་རྒྱ་མཚོའི་གཏིང་གི་ཆུས་ཕན་ཟེརཿ ཆུ་ལེན་པ་ལ་རྐང་མགྱོགས་བཏང་བར་གྱུརཿ ཆུ་ལོན་ཁྱེར་ནས་ཡོངས་པའི་ལམ་ག་རུཿ རྒྱལ་པོ་ལ་གནོད་ཀླུ་ཡིས་ཁྱེའུ་སྤྲུལཿ ངུ་ཡིན་བྱུང་བས་ཅི་ཉེས་བྱས་པ་ལཿ ཨིནྡྲ་བོ་དྷི་གྲངས་ཞེས་ཟེར་བ་དང་ཿ ལམ་དུ་ཆུ་ཕོ་དུ་ཡིན་ཕྱི་ནང་ཡིསཿ མ་གྲངས་འདུག་ནས་ཆུ་ཁྱོངས་ག་རེ་ཟེརཿ ར་ཛཱ་གྲངས་ཟེར་ཕོ་ནས་མེད་བྱས་པསཿ འོ་ན་ང་འཆི་གདམས་པ་ཡོད་པ་ཡིཿ རྣལ་འབྱོར་པ་འདྲ་ཚོལ་ཟེར་རྒྱལ་པོས་དུསཿ བཙུན་མོ་ལྔ་བརྒྱའི་ཆུང་
༼༡༡༥བ༽དག་ཆོས་ལ་མོསཿ པདྨ་རྒྱལ་པོ་སྤྱན་དྲངས་འཐད་ཅེས་ཟེརཿ བི་ན་ས་ལ་གདམས་པ་ཡོད་ཟེར་བོསཿ བི་ནས་ཆང་ཁྱེར་ཡོངས་ནས་རྒྱལ་པོ་ལཿ རིགས་ཀྱི་རྟོག་པ་སྤོངས་ལ་ཆང་འདི་གསོལཿ རྒྱལ་པོས་འཐུངས་པས་ན་ཚ་ཞི་བར་གྱུརཿ རྒྱ་མཚོའི་གཏིང་གི་ཆུ་ཡང་ངས་བླང་ཟེརཿ རཱ་ཛ་འདི་ནི་ཙུག་བྱེད་ལྟོས་ཤིག་བསྒོཿ ཕྱི་ན་ཕར་ལ་རྐང་མགྱོགས་བཏང་བར་གྱུརཿ ཆུ་ཐོག་ཕར་ལ་ཡེ་རེ་རེ་སོང་ནསཿ ཆུ་ཡི་དཀྱིལ་དུ་རྡོག་གིས་སོང་ནས་སུཿ རྒྱ་མཚོའི་གཏིང་གི་ཆུ་བླངས་ཁྱེར་བྱུང་བསཿ རྐང་མགྱོགས་དབུགས་ནི་ཧལ་ཧལ་བརྒྱུགས་བྱུང་ནསཿ རྒྱལ་པོས་དེ་ཙམ་རྒྱུག་པ་ཅི་བྱུང་གསུང་ཿ བི་ན་ས་ཡིས་ཆུ་ཁྱེར་བྱུང་ཞེས་ཟེརཿ དེ་ནས་བི་ནས་ཆུ་དྲངས་གསོས་པར་གྱུརཿ ང་འགྲོ་བྱས་པས་མཆོད་གནས་གྱིས་ཟེར་བཟུང་ཿ འབངས་རྣམས་ཨིནྡྲ་བོ་དྷི་ཅོལ་རེ་ཆུང་ཿ རིགས་ངན་བུད་མེད་མཆོད་གནས་འཚོལ་བ་ཟེརཿ བཙུན་མོ་རྣམས་ཀྱང་སྣང་བ་ངན་པ་འཛིནཿ བི་ནས་ང་ལ་ཡིད་མི་ཆེས་པར་འདུགཿ མི་ཡང་གླེང་འདུག་ང་འགྲོ་བྱས་པ་ལཿ རྒྱལ་པོས་ཁྱོད་འགྲོ་ང་ཡང་ཤི་ནས་སྡོདཿ ཁྱོད་ཀྱི་རྐེ་འབྲེག་ཟེར་ནས་མ་བཏང་ངོ་ཿ ང་ཡིས་མི་ཐུལ་བུ་ཞིག་སྤྲུལ་དགོས་སྙམཿ བུ་དེ་རྒྱལ་པོ་ཨིནྡྲ་བོ་དྷིར་བཏདཿ མ་ནི་གར་སོང་ཆ་མེད་སྤྱོད་པར་སོང་ཿ བུ་ནི་དུས་ཕྱིས་ལ་བ་པ་ཞེས་གྲགསཿ ཨུ་རྒྱན་གུ་རུ་པདྨ་འབྱུང་
༼༡༡༦ན༽གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ ཨུ་རྒྱན་ཡུལ་ཁམས་འདུལ་བར་དགོངས་པའི་ལེའུ་སྟེ་ཞེ་བརྒྱད་པའོཿ ཿཐ་ཐ་ཉྲ་རྒྱ་རྒྱཿ ཿ