ཨུ་རྒྱན་རྒྱལ་ཁམས་ཆོས་ལ་བཙུད་པའི་ལེའུ།
དེ་ནས་ཨུ་རྒྱན་ཡུལ་ཁམས་གདུལ་བྱར་གཟིགསཿ མཁའ་འགྲོ་མ་བཞིས་འོད་ལེའི་སྟེང་ལ་བཏེགཿ ཨུ་རྒྱན་ཡུལ་དུ་ཡབ་ཡུམ་བསོད་སྙོམས་མཛདཿ སྔར་གྱི་བུ་བསད་རྒྱལ་བློན་རྣམས་ཀྱིས་ཤེསཿ ཁམས་ཀྱི་རྒྱལ་པོའི་བུ་བསད་དྲན་པ་བསྐུལཿ བཙུན་མོ་མཆོག་གྱུར་འོད་འཆང་མ་འདྲ་ངོརཿ ཨུ་པ་ཏ་ཡི་བུ་སྨད་གཉིས་ཀ་བཀུམསཿ སྤྲང་མོ་ཞིག་དང་བསྡེབས་ནས་ཡུལ་དུ་བྱུང་ཿ ད་ཡང་ཡུལ་འདིར་གནོད་པ་ཅི་བྱེད་ནཿ བདེ་བར་མི་འཚལ་ཉེས་པའི་སླད་དུ་སྟེཿ བློན་པོ་ཐམས་ཅད་ཡོངས་སུ་འདུས་པར་གྱུརཿ རྒྱལ་པོ་ཉིད་ལ་ཚངས་པར་སྨྲ་རྒྱུ་མེདཿ ཙནྡན་ཁུར་ཏེ་ཏིལ་མར་གྲེ་རེ་བསྡུསཿ ཡབ་ཡུམ་ལྷན་སྦྱར་བཅིངས་ནས་བསྲེགས་པར་གྱུརཿ སྔོན་ཆང་བསྲེགས་པ་ཞག་བདུན་དུ་བ་འཆདཿ ཉེར་གཅིག་བར་དུ་དུ་བ་མཆད་ནསཿ རྒྱལ་པོས་ལྟོས་ཤིག་བསྐུལ་བས་བལྟ་མ་ནུསཿ སྔར་གྱི་ཡབ་ཉིད་ཐུགས་མ་ཆེས་ནས་དྲིསཿ བཙུན་མོ་འོད་འཆང་མ་ནི་མིག་སེར་གྱིསཿ ང་ཡིས་གྲོགས་གོ་མ་ཆད་མི་ཞིག་ཡིནཿ རྒྱལ་པོའི་སྙན་དུ་རྟིང་ལ་བརྗོད་བྱ་ཟེརཿ སྤྲུལ་པའི་སྐུ་ཞིག་ཡིན་ནི་མི་འཚིག་སྙམཿ འཁོར་དང་བཅས་པས་ལྟ་རུ་ཡོངས་ཙ་ནཿ
༼༡༡༦བ༽ཏིལ་མར་ཞིང་དོར་གཅིག་ཙམ་མཚོ་འཁྱིལ་དབུསཿ སུལ་བའི་གུར་ཆེན་སྟེང་ན་པད་སྡོད་སྐྱེསཿ པདྨའི་སྟེང་ན་ཡབ་ཡུམ་སྙམ་འཇུག་གརཿ སྐུ་མཆོག་རབ་གསལ་དྲི་བཟང་བསིལ་དང་ལྡནཿ སྔར་གྱི་འགྲོ་རྣམས་ཐུགས་རྗེས་བསྒྲལ་བའི་ཕྱིརཿ ཐོད་པའི་འཕྲེང་བ་སྐུ་ལ་གསོལ་ནས་བཞུགསཿ རྒྱལ་པོ་ལ་སོགས་ཐམས་ཅད་ངོ་མཚར་སྐྱེསཿ ཨུ་རྒྱན་རྒྱལ་ཁམས་ཆེ་ཆུང་མེད་པར་འདུསཿ ས་ཡི་ལྷ་མོ་བརྟན་མ་འཁོར་བཅས་ཀྱིསཿ ཏམྦུ་ར་ཡི་རྒྱུད་བསྒྲེངས་བསྟོད་པས་བསྙནཿ ཧཱུཾཿ རྒྱ་མཚོར་སྐུ་འཁྲུངས་ཨུ་རྒྱན་ཡུལ་དུ་བྱོནཿ རྒྱལ་པོའི་སྲས་མཛད་རྫུ་འཕྲུལ་སྣ་ཚོགས་བསྟནཿ འཁོར་བར་མ་ཆགས་ཐབས་ཀྱི་རོལ་རྩེད་མཛདཿ པདྨ་རྒྱལ་པོའི་སྐུ་ལ་ཕྱག་འཚལ་བསྟོདཿ རྒྱ་གར་ཡུལ་བྱོན་རྡོ་རྗེ་གདན་དུ་བཞུགསཿ བདུད་བཞི་བཅོམ་བས་སངས་རྒྱས་ཀུན་དང་མཉམཿ འདུལ་ཁྲིམས་ལྡན་པས་དགེ་སློང་ཆ་ལུགས་འཛིནཿ ཤཱཀྱ་སེང་གེའི་སྐུ་ལ་ཕྱག་འཚལ་བསྟོདཿ ཟ་ཧོར་ཡུལ་བྱིན་མ་ག་དྷཿརུ་བཞུགསཿ བསིལ་བའི་ཚལ་དུ་བ་མ་རོའི་སྒྲུབ་པ་མཛདཿ སྡེ་སྣོད་བཅུ་གཉིས་ཐུགས་ཀྱི་ཀློང་ན་གསལཿ པདྨ་སམྦྷའི་སྐུ་ལ་ཕྱག་འཚལ་བསྟོདཿ མུ་སྟེགས་ཡུལ་བྱོན་དགའ་བའི་ཚལ་དུ་བཞུགསཿ སྙན་པའི་སྒྲ་ཡིས་ཕྱོགས་མཚམས་ཀུན་ཏུ་ཁྱབཿ གསང་སྔགས་ཕྱི་ནང་ཐུགས་ཀྱི་དཀྱིལ་ན་གསལཿ རྡོ་རྗེ་གྲོ་
༼༡༡༧ན༽ལོད་སྐུ་ལ་ཕྱག་འཚལ་བསྟོདཿ ཡངས་པ་ཅན་བྱོན་སོ་ས་གླིང་དུ་བཞུགསཿ ལྟ་བ་མི་ཚོལ་ཞི་གནས་སྒོམ་མི་བྱེདཿ ཐ་དད་ཕྱོགས་འཛིན་མ་གོས་ནམ་མཁར་གདལཿ པདྨ་ཐོད་འཕྲེང་སྐུ་ལ་ཕྱག་འཚལ་བསྟོདཿ ཁ་ཆེའི་ཡུལ་བྱོན་སིངྒ་ལ་རུ་བཞུགསཿ ཐོས་བསམ་ལྡན་པས་འགྲོ་བ་མ་ལུས་འདུལཿ བྱམས་པ་ཆེན་པོས་ཕ་མ་ལྟ་བུར་མཛདཿ བློ་ལྡན་མཆོག་སྲེད་སྐུ་ལ་ཕྱག་འཚལ་བསྟོདཿ ལི་ཡི་ཡུལ་བྱོན་ལྕང་ར་སྨུག་པོར་བཞུགསཿ ཤེལ་གོང་བྲག་ལ་མངོན་ཤེས་མཁའ་ལྟར་ཁྱབཿ གཞན་དོན་འཕྲིན་ལས་འབྲས་བུ་ལོ་འདབ་རྒྱསཿ ཉི་མ་འོད་ཟེར་སྐུ་ལ་ཕྱག་འཚལ་བསྟོདཿ བལ་པོའི་ཡུལ་བྱོན་ཡང་ལེ་ཤོད་དུ་བཞུགསཿ གནོད་སྦྱིན་རྫོང་དུ་དམ་སྲི་སྡེ་བརྒྱད་བཏུལཿ ཁམས་གསུམ་དབང་སྡུས་སྲིད་གསུམ་ཟིལ་གྱིས་གནོནཿ སེང་གེ་སྒྲ་སྒྲོག་སྐུ་ལ་ཕྱག་འཚལ་བསྟོདཿ བོད་ཡུལ་དབུས་འབྱོན་སྟག་ཚང་སེང་ཕུག་བཞུགསཿ སྣང་བ་མཐའ་ཡས་སྤྲུལ་པ་མི་ཡི་མགོནཿ མཁའ་འགྲོ་སྡེ་བཞི་མ་ཚོགས་རོལ་དུ་ཁྲིདཿ བདེ་བའི་དངོས་གྲུབ་སྐུ་ལ་ཕྱག་འཚལ་བསྟོདཿ སྲིན་པོའི་ཡུལ་འབྱོན་རྔ་ཡབ་གླིང་དུ་བཞུགསཿ ཟངས་མདོག་དཔལ་རིར་གདོང་དམར་སྲིན་པོ་འདུལཿ སྐྱེ་འགྲོ་སེམས་ཅན་ཐམས་ཅད་བདེ་ལ་འགོདཿ པདྨ་འབྱུང་གནས་སྐུ་ལ་ཕྱག་འཚལ་བསྟོདཿ ཅེས་བསྟོད་
༼༡༡༧བ༽གཡས་ཕྱོགས་ལན་གསུམ་བསྐོར་བྱས་ནསཿ མདུན་ནས་ཕྱག་བྱས་ས་ལ་ཐིམ་པར་གྱུརཿ དེ་ནས་རྒྱལ་པོས་ཕོ་བྲང་གདན་འདྲེན་ཞུསཿ བཀའ་འདུས་ཆོས་ཀྱི་རྒྱ་མཚོའི་བཤད་སྒྲུབ་བཙུགསཿ མི་ལོ་ཉིས་བརྒྱར་བཞུགས་ནས་ཚོས་གསུངས་ཏེཿ ཨུ་རྒྱན་རྒྱལ་ཁམས་ཐམས་ཅད་ཆོས་ལ་བཀོདཿ ཨིནྡྲ་བོ་དྷི་བཙུན་མོ་འཁོར་བཅས་རྣམསཿ ཚོམ་བུ་ལྔ་བརྒྱ་དང་བཅས་ལྷག་མེད་དུཿ ཕྱག་རྒྱ་ཆེན་པོ་མཆོག་གི་རིག་འཛིན་ཐོབཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ ཨུ་རྒྱན་རྒྱལ་ཁམས་ཆོས་ལ་བཙུད་པའི་ལེའུ་སྟེ་ཞེ་དགུ་པའོཿ ཿཐ་ཐ་ཉྲ་རྒྱ་རྒྱཿ ཿ