ཟངས་གླིང་དང་གསེར་གླིང་གི་མུ་སྟེགས་པ་བཏུལ་བའི་ལེའུ།
དེ་ནས་མུ་སྟེགས་བསྟན་པ་བསྣུམ་པའི་ཕྱིརཿ ཟངས་གླིང་ཡུལ་ཕྱིན་མུ་སྟེགས་སྟོན་པའི་ཁྱུཿ ལྔ་བརྒྱ་དག་དང་བགྲོ་གླེང་བྱས་པ་ཡིསཿ མུ་སྟེགས་པ་ཡིས་མ་ཐུབ་མཐུ་བྱེད་ཟེརཿ ནགས་ཁྲོད་ཕྱིན་ནས་མཐུ་ནི་བསྒྲུབ་པའི་ཚེཿ མཁའ་འགྲོ་བདུད་འདུལ་མ་ཡིས་རྒྱལ་བ་ལཿ བསེ་སྒྲོམ་གཏད་ནས་མུ་སྟེགས་ཐུལ་ཅིག་བསྒོསཿ བསེ་སྒྲོམ་ནང་ནས་སྲོག་སེར་གཏད་དང་བཅསཿ མཁའ་འགྲོའི་ངན་སྔགས་ཞག་བདུན་རེག་ཕུ་ང་བྱུང་ཿ མུ་སྟེགས་ནགས་ཁྲོད་མཐུ་བྱང་ཐོག་ཕབ་ནསཿ ཐམས་ཅད་མེས་ཚིག་མུ་སྟེགས་ཁ་དག་གྱུརཿ མ་ཤི་བ་རྣམས་ནང་པའི་བསྟན་ལ་བཅུགཿ དེ་ནས་རྒྱ་གར་གསེར་གླིང་བྱ་བའི་ཡུལཿ མུ་སྟེགས་བྱེད་ཀྱི་གྲོང་ཁྱེར་ཆེན་པོའི་དབུསཿ མུ་སྟེགས་རྒྱལ་པོ་ནམ་མཁའི་ཤུགས་ཅན་དང་ཿ བཙུན་མོ་ཙནྟི་ད་ལ་བྱ་བ་ལཿ བུ་ནི་ཉི་མའི་ཤུགས་ཅན་ཞེས་བྱ་བཿ མདོག་ནི་སྔོ་རིགས་ངན་མིག་ནི་ཡ་གཅིག་ཞརཿ རྐང་པ་གཡོན་ཞ་ལག་པ་གཡོན་མ་ལགཿ ང་སྐལ་ཡོད་ཅིང་ཀོ་རུལ་གསེབ་དྲི་མ་ནམཿ རྒྱལ་བུ་དེ་ཉིད་གཞན་གྱིས་མཐོང་དོགས་ནསཿ ཕྱི་རུ་མི་འགྲིམ་ཕོ་བྲང་ནང་དུ་སྦེདཿ ཆེ་བར་ནང་སོན་ཕ་མ་གཉིས་ལ་ནིཿ
༼༡༢༠ན༽ང་ལ་ཁྱིམ་ཐབ་གྱིས་ཤིག་ཟེར་བ་ལཿ ཀྱེ་མ་ཀྱི་ཧུད་བུ་ཁྱོད་ཁ་རོག་སྡོདཿ ཁྱོད་ནི་གཟུགས་བྱད་མ་ལེགས་གཏི་མུག་པསཿ ཆུང་མ་ཁྱོད་ལ་ཡོང་མཁན་མི་ཡོད་ནཿ བུ་ཁྱོད་ཆོས་གྱིས་ཆོས་བརྒྱགས་སྦྱིན་གྱི་སྨྲསཿ ཆོས་དེ་ནང་གཏད་ཕྱི་བྱུགས་ངས་མི་ཡོང་ཿ ཁྱེད་གཉིས་ང་ལ་ཆུང་མ་མི་ལེན་ནཿ ཁྱིམ་ལ་མེ་བརྒྱབ་ལྕེབས་ནས་བསྡོད་དོ་ཟེརཿ ལག་ཏུ་མེ་ཁྱེར་བཟུང་བས་མ་ཐུབ་སྟེཿ བུ་ཁྱོད་དེ་ཡི་ནག་ལ་ཐུག་གྱུར་ནཿ ཅིས་ཀྱང་མ་ཕན་ཆུང་མ་ལོན་ཅིག་ཟེརཿ བུད་མེད་ཕལ་གྱིས་ཆུང་མའི་གོ་མི་ཆོདཿ ང་ནི་ཇི་ལྟར་ཞན་ཀྱང་རྒྱལ་པོ་ཡིནཿ མཚན་ལྡན་ལྟ་ན་སྡུག་པ་ལོང་ཞིག་ཟེརཿ རྒྱ་གར་ཏྲེ་ཏ་རཱ་ཛའི་སྲས་མོ་ནིཿ ལྷ་ལྕམ་ཨ་ཐམ་རྒྱལ་མོ་ཞེས་བྱ་བཿ ལེགས་པའི་དཔེ་འཇོག་མཚན་དང་ལྡན་པ་དེཿ སྨྱན་ཁ་བཅུག་ནས་རིན་བསྐྱལ་བཀུག་པར་གྱུརཿ རྒྱལ་བུ་ཕོག་ནས་ཕ་མས་ཟུར་དུ་བསྡདཿ བུད་མེད་དེ་ཉིད་ཁྱོ་ལ་མ་དགའ་སྟེཿ འཕྲོས་པར་བརྩམས་པས་ཁྱོ་བོས་སྒོ་བཀག་ཉལཿ ལྕེབས་པར་བརྩམས་པས་ཆས་མ་འཛོམ་པར་ལུསཿ བྱ་བ་མི་བྱེད་ཉིན་མཚན་མེད་བར་དུཿ རུས་མིག་ཤ་དིབ་རྒྱུ་མ་སྒལ་ཚིག་འབྱརཿ ཁྱོ་བོ་དེ་ཡང་ཆུང་མ་བྲོས་དོགས་དུབཿ བཟའ་མི་དེ་གཉིས་གདུལ་བྱའི་ཞིང་དུ་གཟིགསཿ ཕོ་བྲང་ནང་དུ་སྒྱུ་མའི་ལྟད་མོ་མཛདཿ ཁྱོ་བོས་སྒོ་བཅད་ཕྱིར་འོངས་ཕྱི་
༼༡༢༠བ༽ནས་བལྟསཿ ཆུང་མས་གློ་སྐར་སྒོ་ཕྱེ་ནང་ནས་བལྟསཿ སྒྱུ་མ་མཁན་འདི་བདག་གྲོགས་ཡིན་ན་སྙམཿ སེམས་ཀྱིས་ཤེས་ནས་ཆོས་གསུངས་འདི་སྐད་ལོཿ བུད་མེད་སྙིང་དུ་སྐྱེས་པ་ཞུགས་པ་ནིཿ ནང་དུ་སྙིང་རླུང་ཞུགས་པའི་དོ་ཟླ་མིནཿ སྐྱེས་པའི་སྙིང་དུ་བུད་མེད་ཞུགས་པ་ནིཿ སྨྱེ་འདྲེ་རྒྱལ་འགོང་ཕལ་གྱི་དོ་ཟླ་མིནཿ བཟའ་མི་སྙོམས་ཆུང་ཁྱིམ་ཐབ་བྱེད་པ་ནིཿ ཆོམ་རྐུན་ཨ་ར་ཕར་གྱི་དོ་ཟླ་མིནཿ ཞེས་གསུངས་གཉིས་ཀ་དད་ཅིང་འདུན་པར་གྱུརཿ ནང་པ་སངས་རྒྱས་བསྟན་ལ་བཙུད་པ་ཡིསཿ རྒྱལ་པོ་ནམ་མཁའི་ཤུགས་ཅན་མ་དགྱེས་ནསཿ ན་ཆུང་སྡོམ་བུ་དགེ་སྦྱོང་འདྲ་བ་འདིསཿ དང་པོར་ང་ཡི་བླ་མཆོད་ཐོག་ཕབ་བསདཿ བར་དུ་བུ་ཡི་ཁྱིམ་བཤིག་བསོད་དགོས་ཟེརཿ གསེར་གླིང་མི་ལ་སོ་ཕག་ཕ་གུ་བསྡུསཿ རྒྱལ་སྲས་ཕ་གུའི་སྒྲོམ་བཅུག་བསྲེགས་པ་ཡིསཿ གསེར་གྱི་མཆོད་རྟེན་བང་རིམ་བུམ་པ་བྲེཿ གདུགས་དང་ཆོས་འཁོར་ཡོད་པ་ཞིག་ཏུ་གྱུརཿ ཉི་མའི་ཤུགས་ཅན་བཟའ་མིས་སྐོར་བ་བྱེདཿ རྒྱལ་པོ་འགྱོད་ཅིང་དད་ནས་ཆོས་ལ་ཚུདཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ ཟངས་གླིང་དང་གསེར་གླིང་གི་མུ་སྟེགས་པ་བཏུལ་བའི་ལེའུ་སྟེ་ང་གཅིག་པའོཿ ཿཐ་ཐ་ཉྲ་རྒྱ་རྒྱཿ ཿ