གཏེར་གྱི་བགྲོ་བ་གཏེར་ཆོས་གཏེར་སྟོན་གླེང་པའི་ལེའུ།
དེ་ནས་ཨུ་རྒྱན་པདྨ་འབྱུང་གནས་ཀྱིསཿ རྡོ་རྗེ་གདན་བཞུགས་རབ་གནས་མེ་ཏོག་འཐོརཿ ཆོས་ཁྲིས་རྟེན་བཞེངས་བསྟན་པ་སོ་རུ་ཆུདཿ ལི་ཁར་ཤིང་འཕེལ་གཙུག་ལག་ཁང་དུ་བྱོནཿ མདོ་སྔགས་བསྟན་པ་ཟུང་འཇུག་ཉིས་བརྒྱ་བཞུགསཿ དེ་ནས་ཕྱག་རྒྱ་ཆེན་པོའི་རིག་འཛིན་ཞིགཿ གྲུབ་པར་མ་གྱུར་དོན་མེད་དགོངས་ནས་སུཿ རྒྱ་གར་བལ་པོ་གཉིས་ཀྱི་མཚམས་སུ་བྱོནཿ སེང་གེ་གནམ་མཆོང་འདྲ་བའི་རི་ལ་བཞུགསཿ སེམས་ལ་རྩལ་སྦྱོང་སྒོམ་གྱེན་ཡོད་ཙ་ནཿ ཡུལ་དེའི་སྡིག་སྤྱོད་རྔོན་པ་མི་བདུན་གྱིསཿ ཁྱི་ཁྲིད་རི་དྭགས་གཤོར་དུ་བྱུང་བ་ལཿ ཁྱི་དང་རྔོན་པ་ཁ་བཅིངས་རེངས་བཅུག་ནསཿ རྒྱལ་པོས་ཕོ་ཉ་བཏང་ནས་མ་འདེད་ཟེརཿ ཤིང་ཀུན་གཙུག་ལག་ཁང་ལ་བསྐོར་བར་ཕྱིནཿ རྒྱལ་པོའི་བཙུན་མོ་བུ་ནད་ལོག་ནས་ཤིཿ བུ་མོ་དང་བཅས་དུར་ཁྲོད་བསྐྱལ་བ་ལསཿ སྤྲེའུ་ཞིག་གིས་བུ་མོ་དེ་ཉིད་གསོསཿ ཉིན་པར་ཤིང་རྩེར་ཤིང་ཐོག་ཟ་ཡིན་སྡོདཿ མཚན་མོ་བྲག་སྟེང་ཤིང་ལོ་གྱོན་ནས་ཉལཿ བལ་མོ་ཤཱཀྱ་དེ་བ་ཞེས་བྱ་སྟེཿ རྐང་ལག་
༼༡༢༤ན༽སེར་མོ་ངང་པ་བཞིན་དུ་འབྲེལཿ མཚན་ལྡན་མྱུར་བདེའི་ཕོ་ཉར་དེ་ཉིད་ཁྲིདཿ བལ་ཡུལ་ཡང་ལེ་ཤོད་ཀྱི་བྲག་ཕུག་ཕྱིནཿ གཏེར་ཀ་བྱེ་བ་འབུམ་ཁྲི་སྦད་པ་ཡིཿ བགྲོ་བ་བྱས་པས་བར་ཆོད་རྣམ་བཞི་བྱུང་ཿ སྲོག་ལ་བྱི་དུར་གློག་མ་སྤྲིན་བྱུང་ནསཿ དགོངས་པ་བཞིན་ནས་བར་སྣང་ཁམས་ལ་སོང་ཿ གནམ་ལ་ཆར་མེད་ཉི་མ་མེ་བཞིན་འབརཿ དགུང་ལ་བདུད་ནི་ཁ་ཏོན་བྱེད་ཚུལ་བྱུང་ཿ དགོངས་པ་བཤིག་ནས་བར་སྣང་ཁམས་ལ་སོང་ཿ བར་ཡུལ་མུ་གེ་སྤྲིན་དམར་བཞིན་དུ་འཁྲིགསཿ ཐོ་རང་ཇོ་བོར་ཤིང་བྱ་ཅན་བྱུང་ནསཿ དགོངས་པ་བཤིག་ནས་པར་སྣང་ཁམས་ལ་སོང་ཿ བལ་ཡུལ་མི་རོ་ལུད་ཕུང་བཞིན་དུ་སྐྱེལཿ ཉིན་པར་དམ་སྲི་དུང་དུང་བྱུང་ནས་ནིཿ མི་ནད་ཕྱུགས་ནད་བཀྲ་མི་ཤིས་པར་བྱསཿ བར་ཆད་རྣམ་བཞི་བཟློག་པའི་གླུ་འདི་གསུངསཿ མ་རུངས་མི་བཟོད་གནོད་བྱེད་རྣམསཿ སངས་རྒྱས་བཀའ་ལས་འགལ་བྱེད་པཿ འདི་ལྟར་མེ་ཏོག་པདྨ་གིཿ འདམ་གྱི་སྐྱོན་གྱིས་མ་གོས་ཏེཿ འདོད་པ་བཞིན་དུ་བདེ་བར་འཚོཿ ཐབས་མཆོག་ལྡན་པའི་རྣལ་འབྱོར་པཿ བཅིངས་པ་ལས་ནི་གྲོལ་བར་བྱེདཿ སྡིག་གཅན་ཁྱེད་བཞིས་མི་ཤེས་སོཿ ཡི་གེར་བྲིས་ནས་གཏེར་སྦས་ཡིསཿ དུས་མཐའ་སེམས་ཅན་འདུལ་དཀའ་བཿ གཏེར་ཆོས་སྤང་དུ་ག་ལ་རུང་ཿ འདི་ནི་བྲིས་པ་
༼༡༢༤བ༽ཙམ་གྱིས་ཀྱང་ཿ སངས་རྒྱས་བསྟན་པ་འཕེལ་བར་འགྱུརཿ སྙིང་རྗེའི་ལྕགས་ཀྱུ་དང་བྲལ་ནཿ སྙིགས་མའི་སེམས་ཅན་སུ་ལ་རེཿ བར་ཆད་མ་བྱེད་གཏེར་སྲུང་གྱིསཿ ཞེས་གསུངས་བར་ཆད་བདུད་ཀྱི་གཡུལ་ལས་རྒྱལཿ མཚོ་ལས་རླངས་བྱུང་གནམ་ལས་ཆར་པ་བབསཿ རྩི་ཤིང་འབྲས་བུ་རྒྱས་པས་ནད་མུག་སངསཿ བསྟན་གཉིས་དབང་པོ་ཐམས་ཅད་མཁྱེན་པ་ཡིསཿ མ་འོངས་དོན་དུ་ཟབ་གཏེར་སྦས་ཚུལ་ནིཿ བག་ཆགས་ཅན་གྱི་གདུལ་བྱ་ཡིད་དྲང་ཕྱིརཿ ལོ་བརྒྱད་ཁྱེའུ་ཆུང་མཛེས་པའི་ཞལ་མངའ་བཿ པདྨ་ལྟ་བུར་བཀྲག་མདངས་དམར་ཆགས་པཿ ཉི་འོད་བཞིན་དུ་ལྟར་མི་བཟོད་པའི་ཞལཿ མཚན་དང་དཔེ་བྱད་རྫོགས་པའི་སྐུ་དངོས་བསྟནཿ དར་དམར་ཆོས་གོས་གསེར་གྱི་པ་ཏྲས་བཀླུབསཿ ཐེག་པ་སྣ་ཚོགས་ཟབ་ཆེན་བེར་ཕྱམ་གསོལཿ དུག་གསུམ་རྩད་གཅོད་ཁ་ཊྭཱཾ་རྩེ་གསུམ་ལཿ སྐུ་གསུམ་ལྷུན་གྲུབ་ཐོད་པ་གསུམ་བརྩེགས་བརྒྱནཿ ཟུང་འཇུག་བརྡ་སྦྱོར་རྡོ་རྗེ་དྲིལ་བུ་བསྣམསཿ ཤ་བའི་གཉེན་ཞུ་གསེར་གྱི་པ་ཏྲས་མཛེསཿ ལྟ་བ་ཡས་འབིབས་རྒོད་ཀྱི་རྩེ་རྒྱལ་བཙུགསཿ སྐུ་ལྔ་རབ་རྫོགས་དར་སྣ་ལྔ་ཡིས་བརྒྱནཿ གདུལ་བྱའི་རེ་སྐོང་སེང་གེ་རཏྣའི་ཁྲིཿ པདྨའི་གདན་ལ་ཞབས་གཉིས་སྐྱིལ་ཀྲུང་བཞུགསཿ འདོད་དགུར་བསྒྱུར་བའི་ཆོས་སྨྲ་རིན་ཆེན་བརྩེགསཿ རེས་འགའ་
༼༡༢༥ན༽པདྨ་འགྲོ་མགོན་རྩལ་དུ་གྲགསཿ རེས་འགའ་པདྨ་དབང་ཕྱུག་མགོན་དུ་གྲགསཿ རེས་འགའ་པདྨ་གྲུབ་པའི་བློ་གྲོས་གྲགསཿ རེས་འགའ་པདྨ་ཆེ་མཆོག་རྩལ་དུ་གྲགསཿ རེས་འགའ་པདྨ་མཁའ་འགྲོའི་དབང་ཕྱུག་གྲགསཿ རེས་འགའ་མགོན་པོ་བིརྺ་པ་ཞེས་གྲགསཿ རེས་འགའ་པདྨ་ནག་པོ་སྤྱོད་པར་གྲགསཿ རེས་འགའ་ཁྱེའུ་ཆུང་མཁའ་ལྡིང་རྩལ་དུ་གྲགསཿ རེས་འགའ་པདྨ་ས་ར་ཧ་ཞེས་གྲགསཿ རེས་འགའ་པདྨ་མངའ་བདག་རྩལ་དུ་གྲགསཿ རེས་འགའ་པདྨ་ཀུན་ཏུ་རྒྱུ་ཞེས་གྲགསཿ རེས་འགའ་པདྨ་ཆགས་མཆོག་རྩལ་དུ་གྲགསཿ རེས་འགའ་པདྨ་འགྲོ་བའི་སྐྱབས་སུ་གྲགསཿ རེས་འགའ་པདྨ་འཕྲིན་ལས་མགོན་དུ་གྲགསཿ རེས་འགའ་པདྨ་དོན་ཡོད་ཞགས་པར་གྲགསཿ རེས་འགའ་པདྨ་གཟི་བརྗིད་འོད་འཕྲོར་གྲགསཿ རེས་འགའ་པདྨ་དོམྦྷི་པ་ཞེས་གྲགསཿ རེས་འགའ་རིགས་ལྡན་པདྨ་དཀར་པོར་གྲགསཿ རེས་འགའ་པདྨ་བཛྲ་ཞེས་སུ་གྲགསཿ རེས་འགའ་པདྨ་ཐོད་འཕྲེང་རྩལ་དུ་གྲགསཿ འདོད་དགུར་བསྒྱུར་བའི་འཕྲུལ་མཚན་ཉི་ཤུ་སྟེཿ བསྟན་པའི་སྒྲོན་མ་གཏེར་ཆོས་ནམ་མཁའ་མཛོདཿ ཞ་ཉེ་རིན་ཆེན་བསེ་ཤིང་རྡོ་རྗེ་ཐོདཿ རཏྣའི་སྒྲོམ་བུ་སྣ་ཚོགས་གཏེར་གྱི་སྣོདཿ ཏ་ལ་མཐིང་ཤོག་གྲོ་ག་སྐྱང་ནུལ་བཿ གསེར་དངུལ་ཟངས་ལྕགས་བཻ་ཌཱུརྻ་གཡུ་མཚལཿ སྣག་ཚ་ལ་སོགས་བྲིས་ཤིང་ཞུས་
༼༡༢༥བ༽དག་མཛདཿ འཁྲུགས་བསྡེབས་གབ་བསེལ་སྦས་བསྟན་རྡོར་ཚིག་བཀྲོལཿ ལྷ་ཀླུ་མི་ཡི་ཡུལ་དུ་སྦས་པའི་གཏེརཿ གཏེར་གྱི་ངོ་བོ་ཟད་མི་ཤེས་པ་སྟེཿ ངེས་ཚིག་མཚོན་དཔེ་ཡིད་བཞིན་ནོར་བུའི་གཏེརཿ དབྱེ་ན་གཏེར་གྱི་རིགས་བྱེད་བཅོ་བརྒྱད་དེཿ གསང་གཏེར་ཟབ་གཏེར་ཐུགས་གཏེར་དགོངས་གཏེར་བཞིཿ རྫས་གཏེར་བླ་གཏེར་གཏེར་ཕྲན་གཏེར་སྨྱོན་དང་ཿ རྒྱ་གཏེར་བོད་གཏེར་རྗེ་གཏེར་ཡང་གཏེར་བཞིཿ ཡུམ་གཏེར་མ་ནིང་གཏེར་དང་ཕྱི་གཏེར་གསུམཿ ནང་གཏེར་བར་གཏེར་ནོར་གཏེར་བཅོ་བརྒྱད་དོཿ དེ་དག་རེ་རེའང་སྤྱི་དོན་བཅུ་བཅུར་ལྡནཿ གཏེར་སྣོད་གཏེར་ཤོག་བྲི་བའི་རྒྱུ་དང་གསུམཿ གཏེར་ཡིག་གཏེར་གནས་གཏེར་སྲུང་གཏེར་སྟོན་བཞིཿ འདོན་དུས་འདུལ་བྱེད་གདུལ་བྱའི་ཞིང་བཅུའོཿ དང་པོ་གསང་གཏེར་སྣོད་གསང་བའི་སྣོདཿ གཏེར་ཤོག་གསང་ཤོག་གཏེར་སྣག་གསང་སྣག་རྒྱུཿ གཏེར་ཡིག་གསང་ཡིག་གཏེར་གནས་གསང་གནས་ཏེཿ གཏེར་སྲུང་གསང་སྲུང་གཏེར་སྟོན་གསང་སྟོན་དང་ཿ འདོན་དུས་འདུལ་བྱེད་གདུལ་བྱའང་ཟབ་པའོཿ གསུམ་པ་ཐུགས་
༼༡༢༦ན༽གཏེར་གཏེར་སྣོད་ཐུགས་སྣོད་དུཿ ཐུགས་ཤོག་ཐུགས་ཡིག་ཐུགས་སྣག་ཐུགས་གནས་སུཿ ཐུགས་སྲུང་ཐུགས་སྟོན་ཐུགས་དུས་ཐུགས་འདུལ་ལོཿ བཞི་པ་དགོངས་གཏེར་གཏེར་སྣོད་དགོངས་པའི་སྣོདཿ དགོངས་ཤོག་དགོངས་རྒྱུ་དགོངས་ཡིག་དགོངས་གནས་སུཿ དགོངས་སྲུང་དགོངས་སྟོན་དགོངས་དུས་དགོངས་འདུལ་ལོཿ ལྔ་པ་རྫས་གཏེར་གཏེར་སྣོད་རྫས་ཀྱི་སྣོདཿ རྫས་ཤོག་རྫས་སྣག་རྫས་ཡིག་རྫས་གནས་སུཿ རྫས་སྲུང་རྫས་སྟོན་རྫས་དུས་རྫས་འདུལ་ལོཿ དྲུག་པ་བླ་གཏེར་གཏེར་སྣོད་བླ་སྣོད་དུཿ བླ་ཤོག་བླ་སྣག་བླ་ཡིག་བླ་གནས་སུཿ བླ་སྟོན་བླ་སྲུང་བླ་དུས་བླ་འདུལ་ལོཿ འདི་ནི་བསྐལ་ཞབས་སྲིད་མགོར་མི་སྲིད་གང་ཿ བླ་གཏེར་བཏོན་པས་རྒྱལ་ཁམས་ཕུང་བར་འགྱུརཿ རྒྱ་བོད་གཉིས་ན་བླ་གཏེར་ལྔ་ཡོདཿ སེམས་ཅན་ཡུན་དུ་བདེ་ཕྱིར་ཡུལ་དུ་སྦསཿ བདུན་པ་གཏེར་ཕྲན་གཏེར་སྣོད་ཕྲན་སྣོད་དུཿ ཕྲན་ཤོག་ཕྲན་སྣག་ཕྲན་ཡིག་ཕྲན་གནས་སུཿ ཕྲན་སྲུང་ཕྲན་སྟོན་ཕྲན་དུས་ཕྲན་འདུལ་ལོཿ བརྒྱད་པ་གཏེར་སྨྱོན་གཏེར་སྣོད་སྨྱོན་སྣོད་དུཿ སྨྱོན་ཤོག་སྨྱོན་སྣག་སྨྱོན་ཡིག་སྨྱོན་གནས་སུཿ སྨྱོན་སྲུང་སྨྱོན་སྟོན་སྨྱོན་དུས་སྨྱོན་འདུལ་ལོཿ དགུ་པ་རྒྱ་གཏེར་སྣོད་རྒྱ་སྣོད་དུཿ རྒྱ་ཤོག་རྒྱ་སྣག་རྒྱ་ཡིག་རྒྱ་གནས་སུཿ རྒྱ་སྲུང་རྒྱ་སྟོན་རྒྱ་དུས་རྒྱ་འདུལ་ལོཿ བཅུ་པ་བོད་གཏེར་གཏེར་སྣོད་བོད་སྣོད་དུཿ
༼༡༢༦བ༽བོད་ཤོག་བོད་སྣག་བོད་ཡིག་བོད་གནས་སུཿ བོད་སྲུང་བོད་སྟོན་བོད་དུས་བོད་འདུལ་ལོཿ བཅུ་གཅིག་རྗེ་གཏེར་གཏེར་སྣོད་རྗེ་སྣོད་དུཿ རྗེ་ཤོག་རྗེ་སྣག་རྗེ་ཡིག་རྗེ་གནས་སུཿ རྗེ་སྲུང་རྗེ་སྟོན་རྗེ་དུས་རྗེ་འབུལ་ལོཿ འདི་ནི་རྒྱལ་པོའི་རྫས་ཡིན་གཞན་གྱིས་མིནཿ བཅུ་གཉིས་ཡབ་གཏེར་གཏེར་སྣོད་ཡབ་སྣོད་དུཿ ཡབ་ཤོག་ཡབ་སྣག་ཡབ་ཡིག་ཡབ་གནས་སུཿ ཡབ་སྲུང་ཡབ་སྟོན་ཡབ་དུས་ཡབ་འབུལ་ལོཿ བཅུ་གསུམ་ཡུམ་གཏེར་གཏེར་སྣོད་ཡུམ་སྣོད་དུཿ ཡུམ་ཤོག་མཚལ་ཟངས་ཁྲག་ཚོས་སྣག་ཚའི་རྒྱུཿ ཡུམ་ཡིག་ཡུམ་གནས་ཡུམ་སྲུང་ཡུམ་སྟོན་གྱིཿ ཡུམ་དུས་ཡུམ་འདུལ་གདུལ་བྱའི་ཞིང་གྱུར་ཡུམཿ བཅུ་བཞི་མ་ནིང་གཏེར་སྣོད་མ་ནིང་སྣོདཿ མ་ནིང་ཤོག་བུར་མ་ནིང་སྣག་ཚས་བྲིསཿ མ་ནིང་ཡི་གེ་གནས་སྲུང་མ་ནིང་སྟེཿ མ་ནིང་གཏེར་སྟོན་མ་ནིང་དུས་ཚད་དུཿ མ་ནིང་འདུལ་བྱེད་མ་ནིང་གདུལ་ཞིང་ངོ་ཿ བཅོ་ལྔ་ཕྱི་གཏེར་གཏེར་སྣོད་ཕྱི་སྣོད་དུཿ ཕྱི་ཤོག་ཕྱི་སྣག་ཕྱི་ཡིག་ཕྱི་གནས་སུཿ ཕྱི་སྲུང་ཕྱི་སྟོན་ཕྱི་དུས་ཕྱི་འདུལ་ལོཿ འདི་ནི་སློབ་དཔོན་ཀླུ་སྒྲུབ་ཨཱརྻ་དེསཿ ཕྱི་པ་ནང་པའི་བསྟན་ལ་བཙུད་པའོཿ བཅུ་དྲུག་ནང་གཏེར་གཏེར་སྣོད་ནང་སྣོད་དུཿ ནང་ཤོག་ནང་སྣག་ནང་ཡིག་ནང་གནས་སུཿ ནང་སྲུང་ནང་སྟོན་ནང་དུས་ནང་འདུལ་ལོཿ བཅུ་བདུན་བར་གཏེར་གཏེར་སྣོད་བར་སྣོད་དུཿ བར་ཤོག་བར་སྣག་བར་
༼༡༢༧ན༽ཡིག་བར་གནས་སུཿ བར་སྲུང་བར་སྟོན་པར་དུས་བར་འབུལ་ལོཿ བཅོ་བརྒྱད་རིན་ཆེན་ནོར་གཏེར་གཏེར་སྣོད་ནིཿ ས་ཆུ་མེ་རླུང་ནམ་མཁའ་རི་དང་བྲགཿ ནོར་ཤོག་ནོར་སྣག་ནོར་ཡིག་ནོར་གནས་སུཿ ནོར་སྲུང་ནོར་སྟོན་ནོར་དུས་ནོར་འདུལ་ལོཿ འདི་ནི་རྒྱལ་པོ་ཨིནྡྲ་བོ་དྷི་ཡིསཿ སྤྱིར་བསྡུས་བརྒྱ་དང་བརྒྱད་ཅུར་བསྡུས་ཏེ་སྦསཿ ཕྱོགས་བཅུའི་ས་གཡོས་འཇིག་རྟེན་འོད་ཀྱིས་བཀང་ཿ ལྷས་ཀྱང་མེ་ཏོག་སྣ་ཚོགས་ཆར་དུ་ཕབཿ བར་སྣང་སྤྲིན་གསེབ་མཆོད་པ་རྒྱ་ཆེན་ཕུལཿ མཁའ་འགྲོ་ཆོས་སྐྱོང་གཏེར་སྲུང་སྐོར་བ་བྱེདཿ འཇིག་རྟེན་མ་རིག་མུན་པ་བསལ་བའི་ཕྱིརཿ སྐྱེ་སྔོན་དབང་ཐོབ་ལུང་བསྟན་ལས་འཕྲོ་ཅནཿ གཏེར་གྱི་དབང་སྐལ་བཏད་པའི་མི་དྲུག་སྟེཿ མི་གཅིག་བགྲས་ཉན་སྦས་པའི་གཏེར་ལ་དབང་ཿ གཅེས་དགུ་ཅོག་བཞག་སྦས་པའི་གཏེར་ལ་དབང་ཿ ནད་དུ་མཛེ་འགོས་སྦས་པའི་གཏེར་ལ་དབང་ཿ དབུལ་ཕོངས་སྒྲུབ་ནུས་སྦས་པའི་གཏེར་ལ་དབང་ཿ བུ་ལོན་ཤ་འདད་སྦས་པའི་གཏེར་ལ་དབང་ཿ ཁ་ཉེན་དབང་ཆུང་སྦས་པའི་གཏེར་ལ་དབང་ཿ གཏེར་གྱི་ལས་འཕྲོ་མེད་པའི་མི་ལྔ་སྟེཿ མི་དབང་སྟོབས་བོ་ཆེ་ལ་ལས་འཕྲོ་མེདཿ བསོད་ནམས་མངའ་ཐང་རྒྱས་ལ་ལས་འཕྲོ་མེདཿ མི་ནོར་ཟས་གསུམ་འཛོམ་ལ་ལས་འཕྲོ་མེདཿ འཇིག་རྟེན་གཡེང་བ་ཆེ་ལ་
༼༡༢༧བ༽ལས་འཕྲོ་མེདཿ མིག་རྣོ་ལག་བདེ་ཤེས་ཞིབ་ལས་འཕྲོ་མེདཿ ལས་འཕྲོ་མེད་པས་ཐོན་རེ་ན་རཀ་སྐནཿ གལ་ཏེ་བྱུང་ན་ཚབས་ཆེར་སྤང་བར་བྱཿ བརྫུན་གཏེར་གཅོས་མ་གཏེར་འདྲ་གཏེར་ཆོས་སེལཿ བསྟན་པའི་ཆོམ་ཆེན་བྱེད་པའི་དམར་ལས་མཁནཿ གང་གི་བློ་ལས་མ་རུངས་སུ་ངོ་ཤེསཿ དམྱལ་བས་མི་བསྡིགས་འཇིགས་བསྲན་ཅན་རྣམས་དང་ཿ ཨུ་རྒྱན་ང་དང་སྨོན་ལམ་གང་དུ་བཏབཿ གཏེར་ཁུང་ས་ཕྱུང་ཡང་རྡོ་ནུས་ཅུང་ཟད་མེདཿ དེ་འདྲའི་ཐོ་ཕྱིར་མི་ཉེ་སྤང་བའི་རྒྱུཿ ཤེས་རབ་ཡོད་ན་ས་སྟེང་ཆོས་ཀྱིས་གང་ཿ མོས་གུས་ཡོད་ན་བླ་མར་མ་གྱུར་མེདཿ བཅོ་བརྒྱད་སེང་གེ་གངས་ལ་འགྲོ་བ་ལཿ བརྫུན་གཏེར་སེང་གེའི་གྲོགས་པོ་གང་དུ་འགྲོཿ གཏེར་ཞེས་བྱུང་ཁུངས་ཡིད་ཆེས་ལོ་རྒྱུས་ཀྱང་ཿ རཱུ་དྲ་ཐར་པ་ནག་པོ་བཏུལ་ལས་བྱུང་ཿ རྣམ་ཤེས་ཚོགས་བརྒྱད་ལ་ནི་དུར་ཁྲོད་བརྒྱདཿ པགས་པ་ཤོག་བུ་རྐང་པ་སྨྱུ་གུ་བྱུང་ཿ ཆུ་བཞི་སྣག་ཚ་དུག་ལྔ་ཆོས་ཚིག་བྱུང་ཿ ཐོད་པ་སྒྲོ་བ་ཁ་སྣ་གཏེར་སྣོད་བྱུང་ཿ སྣོད་དྲུག་གཏེར་གྱི་དབང་སྐལ་ལུང་བསྟན་བྱུང་ཿ དོན་སྙིང་ལྔ་ལས་སྐལ་མེད་ལུང་བསྟན་བྱུང་ཿ ཕུང་པོ་ལྔ་དང་དབང་པོ་ལྔ་དང་ནིཿ འབྱུང་པ་ལྔ་དང་ལུས་ངག་ཡིད་གསུམ་ལསཿ གཏེར་གྱི་རིགས་བྱེད་བྱེ་བ་བཅོ་བརྒྱད་བྱུང་ཿ བསྡུ་ན་བཅུར་བསྡུ་གཏེར་དབུགས་གཏེར་ཤ་གཉིསཿ གཏེར་ལྤགས་གཏེར་
༼༡༢༨ན༽སྤུ་གཏེར་གྱི་སྙིང་ཁྲག་དང་ཿ གཏེར་གྱི་ལྟོ་ཆིལ་གཏེར་གྱི་ཡན་ལག་བདུནཿ གཏེར་གྱི་ཆུ་བ་རྐང་མར་གཏེར་ཀླད་བཅུཿ གཏེར་སྨྱོན་ཞེས་པ་མིག་གི་འབྲས་བུ་ཡིནཿ གཏེར་ཕྲན་ཞེས་པ་མིག་རྣག་རྣས་སྤབས་ཡིནཿ མ་ནིང་བྱ་བ་སྣབས་ལུད་ཁུ་བ་ཡིནཿ བླ་གཏེར་ཞེས་ནི་སྲོག་བརྩལ་ཟེརཿ བར་གཏེར་བྱ་བ་གཏེར་ཀྱི་མཆེན་ཁྲི་ཡིནཿ ཀུན་ལ་དེ་བཞིན་འགྲེས་འདེད་ཤེས་པར་བྱཿ སྐབས་སུ་སྦས་པའི་གཏེར་རེ་རྡོལ་བ་ཡང་ཿ གོ་སྙོད་སྡེའུ་ཟྭ་ཚོད་ལྕམ་ལོ་བཞིནཿ ངེས་མེད་གང་བྱུང་གནས་ལ་མི་སྐྱེ་སྟེཿ ཨུ་དུམྦར་མཆོག་གི་མེ་ཏོག་ནིཿ མ་དྲོས་བྱང་ཕྱོགས་རྩེ་ལྔའི་ཕ་རོལ་ལམཿ ཨུ་རྒྱན་དྷ་ན་ཀོ་ཤའི་ནུབ་བྱང་དུཿ འཇིག་རྟེན་མགོན་པོ་སངས་རྒྱས་འབྱོན་ཆེ་སྐྱེཿ ཡིད་ཆེས་ངེས་ཤེས་བསྐྱེད་པའི་གཏེར་སྟོན་དང་ཿ དེ་བཞིན་དུས་གཅིག་གཏེར་མང་རྡོལ་མི་སྲིདཿ སྲིད་པ་སླ་ལོག་བསྒྱུར་བའི་རྒྱལ་པོ་གཅིགཿ དེ་ལ་ཡིད་ཆེས་བསྐྱེད་པའི་གཏེར་སྟོན་གཅིགཿ དཔེར་ན་འཇིག་རྟེན་སྒྲོན་མའི་རྒྱལ་བ་ནིཿ རྒྱལ་རིགས་འཁྲུངས་ན་མེ་ཏོག་དཀར་པོ་སྐྱེཿ བྲམ་ཟེའི་རིགས་འཁྲུངས་མེ་ཏོག་དམར་པོ་སྐྱེཿ རྗེའུ་རིགས་འཁྲུངས་ན་མེ་ཏོག་སེར་པོ་སྐྱེཿ དམངས་རིགས་འཁྲུངས་ན་མེ་ཏོག་མཐིང་ཁ་སྐྱེཿ ལྷུམས་སུ་ཞུགས་ཚེ་མེ་ཏོག་ཁ་ནི་འབུསཿ སྐུ་བལྟམས་ཚེ་ན་མེ་ཏོག་ཁ་ནི་བྱེཿ ཆོས་འཁོར་བསྐོར་ཚེ་མེ་ཏོག་རབ་ཏུ་རྒྱསཿ མྱ་ངན་འདས་ཚེ་མེ་ཏོག་
༼༡༢༨བ༽དབྱིངས་སུ་ཡལཿ དེ་བཞིན་སྐལ་ལྡན་ཟབ་གཏེར་སྤྱོད་པའི་དུསཿ མཁའ་འགྲོ་ཆོས་སྐྱོང་ལྷ་སྲིན་སྡེ་བརྒྱད་འཐིབསཿ ཁ་རྒྱས་གཡུལ་འཁྲུགས་དབུས་སུ་འཇུག་པ་བཞིནཿ ལྷ་འདྲེ་ཡིད་ཀྱི་གཟུགས་ཅན་བར་དུ་གཅོདཿ འདོད་ཆགས་ལས་གྱུར་བུད་མེད་བདུད་མོ་དང་ཿ ཞེ་སྡང་ལས་གྱུར་བཙུན་གཟུགས་སྡོམ་ཉམས་དང་ཿ གཏི་མུག་ལས་གྱུར་སྔགས་པ་དམ་ཉམས་དང་ཿ གཞན་ཡང་དེ་འདྲའི་རིགས་བྱེད་ཤེས་པ་བསྒྱུརཿ ལྷ་འདྲེ་མི་གསུམ་བར་གཅོད་བྱེད་པར་འགྱུརཿ ཆེས་ཏེ་གཏེར་འཆོར་རང་གི་སྲོག་ལ་ཡོདཿ ཆུང་སྟེ་མི་ནོར་ཟས་གསུམ་བྱར་མི་བཏུབཿ ནག་པོ་བདུད་དང་སྟོབས་འགྲན་དུས་ཡིན་པསཿ གཏད་པའི་གཏེར་བདག་ཐམས་ཅད་འཁྲེན་ཅིང་འཚུབཿ ལས་ཀྱིས་བསྐུལ་བས་ཟོན་བྱེད་གཞག་ཏུ་མེདཿ དེ་ཕྱིར་ལས་འཕྲོ་སྔོན་དུ་སོང་བ་ལསཿ གཏེར་སྟོན་དཔེར་ན་ཉིན་སྐར་བཞིན་དུ་ཉུང་ཿ དུས་གཅིག་གཏེར་སྟོན་གཉིས་གསུམ་འབྱུང་མི་སྲིདཿ བྱུང་ན་གཏེར་སེལ་ལྡེམ་དགོངས་ཅན་དུ་ངེསཿ བར་ཆོད་མེད་པའི་དངོས་གྲུབ་མི་འབྱུང་བསཿ ཟུང་འཇུག་འདུག་གམ་ཡ་བྲལ་གོང་བཞིན་བརྟགཿ ཟུང་འཇུག་འདུག་ན་གཅིག་ནི་ཚེ་དུས་བྱེདཿ ཡུལ་གཅིག་དུས་གཅིག་གཏེར་སྟོན་གཉིས་མི་སྲིདཿ གཅིག་ལ་གཅིག་དགྲ་བྱེད་ཕྱིར་མ་བསྟན་ནོཿ ལྷན་ཅིག་གཉིས་མིན་པདྨའི་གཏེར་ཆོས་བཞིནཿ གཅིག་པོ་མར་འགྲིབ་
༼༡༢༩ན༽གཅིག་ལས་ཡར་འཕེལ་ཡིནཿ ང་ཡི་གཏེར་ཆོས་གཏད་དོ་གཉེར་ཆེན་པོཿ སྟོང་གསུམ་ཆོས་ཀྱིས་བཀང་ངོ་ཨུ་དུམ་ཝ་རཿ མ་རིག་མུན་པ་སོལ་ཅིག་འོད་པོ་ཆེཿ དུས་གསུམ་འགྲོ་བ་ཐུལ་ཅིག་ཕྱི་ཐག་ཅནཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ གཏེར་གྱི་བགྲོ་བ་གཏེར་ཆོས་གཏེར་སྟོན་གླེང་པའི་ལེའུ་སྟེ་ང་གསུམ་པའོཿ ཿཐ་ཐ་ཉྲ་རྒྱ་རྒྱཿ