བོད་ཀྱི་རྒྱལ་པོས་མཁན་པོ་བོ་དྷི་ས་ཏྭ་གདན་དྲངས་པའི་ལེའུ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིསཿ རྒྱལ་བའི་བློ་གྲོས་ལ་སོགས་དཔོན་གཡོག་གསུམཿ ཟ་ཧོར་ཡུལ་དུ་གཏམ་མྱུལ་བ་ལ་བཏང་ཿ སངྷ་རཱ་ཛ་རྒྱ་གར་ཡུལ་དུ་བཏང་ཿ གྲུ་གུ་ཨེ་བག་རྒྱ་ནག་ཡུལ་ལ་བཏང་ཿ དེ་ནས་རྒྱལ་བའི་བློ་གྲོས་དཔོན་གཡོག་གསུམཿ རྡོ་རྗེ་གདན་གྱི་ནུབ་བྱང་མཚམས་ཁ་གཏདཿ ཟ་ཧོར་ཡུལ་དུ་ས་ལམ་བགྲོད་པར་གྱུརཿ མི་རིགས་མི་འདྲ་སྐད་རིགས་མི་འདྲ་བསཿ མང་པོ་འདུས་ནས་སྣ་ལག་བཀབ་ཀྱིན་བལྟཿ རིམ་པར་མཆེད་ནས་བཙུན་མོ་རྣམས་ཀྱིས་བལྟསཿ རྒྱལ་པོས་གསན་ནས་མི་གཞན་ཅི་ཡོད་འདྲིཿ ཕར་ཚུར་གཏམ་ནི་མ་གོ་དུད་འགྲོ་འདྲཿ དེ་ནས་བགས་ཀྱིས་འདྲིས་ཤིང་གཏམ་གོ་ནསཿ ཆོས་རྒྱལ་གཅིག་
༼༡༣༢བ༽དང་སྲིད་རྒྱལ་གཉིས་ཀྱི་འོགཿ ཟ་ཧོར་རྒྱལ་ཁམས་ཐམས་ཅད་འདུ་བ་ལཿ ཆོས་རྒྱལ་དེ་ཉིད་ཆོས་ལས་སྲིད་མི་བསྲུང་ཿ སྲིད་རྒྱལ་དེ་ཉིད་སྲིད་ལས་ཆོས་མ་འཆདཿ ཆོས་རྒྱལ་གོ་མ་དེ་བྱིའི་སྲས་པོ་ནིཿ སྐུ་གཅིག་མཚན་གསུམ་གྲགས་པའི་མཁན་པོ་ཞིགཿ ཆོས་ཀྱི་འཁོར་ལོ་བསྐོར་བའི་ཆོས་གྲར་ཕྱིནཿ གསུང་ནི་མ་གོ་སྐུ་ལ་མོས་པ་ཐོབཿ བོ་དྷི་ས་ཏྭ་ཤཱནྟ་དེ་བ་ཉིདཿ ཟ་ཧོར་ཡུལ་ན་རྩོད་མེད་ཆོས་སྨྲར་གྲགསཿ གཏམ་ཁུངས་ཆོད་ནས་བོད་དུ་ཡོངས་པར་གྱུརཿ རྒྱལ་པོའི་སྙན་དུ་གསོལ་བས་རྒྱལ་པོ་དགྱེསཿ དེ་ནས་སྦ་མི་ཛྙཱ་ན་ཤྭ་ར་དང་ཿ གཉགས་པ་ཛྙཱ་ན་ཀུ་མཱ་ར་གཉིས་ལཿ གཡོག་པོ་གསུམ་གསུམ་གསེར་ཕྱེ་བྲེ་རེ་བསྐུརཿ བཀའ་འཕྲིན་ཤུན་པའི་ལོགས་ལ་བཀོད་པ་ནིཿ བསྟན་པ་རིན་ཆེན་མཆོག་ཏུ་གདུགས་ཁེབས་པཿ མཐའ་འཁོབ་མུན་པའི་གླིང་དུ་སྐར་ཙམ་མེདཿ ས་སྟེང་གནས་པའི་རབ་རིབ་ཉིད་ཀྱིས་སོལཿ ལྷ་སྲིན་མ་བྱེ་འདྲ་ཡིས་གཟིངས་པས་འཁུམསཿ ཞེས་པའི་བཀའ་ནན་ཆེ་བར་མཛད་ནས་སུཿ མྱུར་མགྱོགས་པ་རྣམས་དགོངས་མཐུན་གཉིས་གཉིས་བསྡེབསཿ སྔ་ཕྱི་ཉི་མ་སྟེང་འོག་འགྲོ་ན་ཚན་བཞིཿ སྔ་མའི་ཞག་སར་ཕྱི་མས་གནས་མལ་འདུགཿ འགྲོན་ཚ་ན་གཉིས་ནི་གཅན་འཕྲང་པ་ཡིས་བཅོམཿ ཛྙཱ་ན་ཤྭ་ར་ཛྙཱ་ན་ཀུ་མཱ་ཡིསཿ ཟ་ཧོར་ས་ཆོད་མཁན་པོའི་དྲུང་དུ་སླེབསཿ བཀའ་འཕྲིན་གསེར་ཕྱེ་ཕྱག་ཏུ་ཕུལ་བ་ཡིསཿ མཁན་
༼༡༣༣ན༽པོས་དགྱེས་པའི་ཞལ་མདངས་དཀར་བསྟན་ནསཿ མྱུར་མགྱོགས་པ་དང་བསྡོངས་ནས་བོད་དུ་བྱོནཿ བོད་དུ་ཕེབས་ནས་གསང་ཕུར་རྫི་དང་མཇལཿ ཟ་ཧོར་མཁན་པོས་རྗེ་ལ་ཕྱག་བཙལ་ནསཿ རང་དོན་འགལ་མེད་ཆེན་པོའི་རྣམ་ཐར་ནིཿ ཁུར་ལ་མི་རྩེག་ས་ཡིས་འཇིག་རྟེན་འདེགསཿ ཉི་མ་རླབས་ཆེན་རྟ་ཞོན་རྒྱུ་བར་བྱེདཿ གླང་ཆེན་རྒྱབ་ཁལ་རབ་ཏུ་བརྟན་པར་འཁུརཿ ཞེས་གསུངས་རྒྱལ་པོའི་ཕྱག་ལ་འཇུས་པ་ཡིསཿ ཡོན་མཆོད་ཐུགས་དགོངས་ཤིན་ཏུ་འདྲེས་པར་གྱུརཿ མཁན་པོས་བསྙེན་གནས་སྡོམ་པའི་ཆོ་ག་མཛདཿ དེ་ནས་བྲག་དམར་མགྲིན་བཟང་ཕྱགས་ཕེབས་ནསཿ ཇོ་མོ་གཉིས་ལ་བསྙེན་གནས་ཆོ་ག་མཛདཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ བོད་ཀྱི་རྒྱལ་པོས་མཁན་པོ་བོ་དྷི་ས་ཏྭ་གདན་དྲངས་པའི་ལེའུ་སྟེ་ང་བདུན་པའོཿ ཿཐ་ཐ་ཉྲ་རྒྱ་རྒྱཿ ཿ