མཁན་པོ་བོ་དྷི་སཏྭས་ལུང་བསྟན་པའི་ལེའུ།
དེ་ནས་མེ་མོ་གླང་ལོའི་ཉི་ཤུ་ལཿ བསམ་ཡས་གླིང་བཞི་གླིང་ཕྲན་བཅུ་གཉིས་དང་ཿ ཡཀྵ་ལྟག་འོག་ཉི་ཟླ་གཉིས་ཀྱི་ཚུལཿ ས་རིས་བཅད་ནས་མཁན་པོས་ས་བཏུལ་ནསཿ རྒྱལ་པོའི་སྐུ་ལ་དར་དཀར་ན་བཟའ་གསོལཿ ཕྱག་ཏུ་གསེར་གྱི་འཇོར་ལ་སྨན་སྣ་བྱུགསཿ ས་ལ་ཁྲུ་གང་བརྐོས་པའི་འོག་ནས་ནིཿ ས་ཞག་དཀར་སེར་དམར་གསུམ་བྱུང་བ་ཡིསཿ རྒྱལ་པོས་ཞལ་དུ་གསོལ་
༼༡༣༣བ༽ཞིང་དབུ་ལ་ཕྱུགསཿ མཁན་པོའི་ཞལ་ནས་རྗེ་ཡི་བསམ་པ་འགྲུབཿ བསྟན་པ་རབ་ཏུ་དར་བར་གྱུར་ཅིག་གསུང་ཿ དེ་ནས་རྩིག་པའི་རྨིང་བཙུག་བརྩིགས་པ་ལསཿ ཨཱརྻ་པ་ལོའི་སེ་ཕུང་ཞིག་ཡོད་ཀླུསཿ སེ་ཕུང་གཅོད་པར་ཤེས་ནས་མ་བཟོད་པརཿ ལྷ་འདྲེ་ཐམས་ཅད་ར་མདར་ལྷོགས་ནས་ནིཿ དགེ་བསྙེན་གསུམ་དང་གནོད་སྦྱིན་མི་མ་ཡིནཿ བོད་ཀྱི་ལྷ་འདྲེས་གཙོས་བྱས་ཐམས་ཅད་ཀྱིསཿ ཉིན་བརྩིགས་མཚན་བཤིག་ས་རྡོ་རང་གནས་བསྐྱལཿ དེ་ནས་མངའ་བདག་རྒྱལ་པོས་མཁན་པོ་ལཿ ད་ལྟ་མ་འོངས་སེམས་ཅན་སྐྱབས་གནས་སུཿ གཙུག་ལག་ཁང་འདི་ལེགས་པར་བཞེང་འདོད་པསཿ བདག་སྒྲིབ་ཆེའམ་མཁན་པོས་བྱིན་མ་རློབསཿ བསམ་པ་མི་འགྲུབ་འདྲའོ་ཞུས་པ་ཡིསཿ བདག་ནི་བྱང་ཆུབ་སེམས་བློ་འབྱོངས་བར་སྦྱངསཿ ཞི་བས་མི་ཐུལ་དྲག་པོས་འདུལ་དགོས་འདུགཿ ད་ལྟ་རྒྱ་གར་རྡོ་རྗེ་གདན་དྲུང་ནཿ ཨུ་རྒྱན་མཁན་པོ་པདྨ་འབྱུང་གནས་བཞུགསཿ རིག་པའི་གནས་ལྔ་ལ་ནི་མཁས་ཆེན་པོཿ དོན་གྱི་རྩལ་འབྱོངས་མཆོག་ཐུན་དངོས་གྲུབ་བརྙེསཿ བདུད་བཅོམ་སྡེ་བརྒྱད་བྲན་དུ་ཁོལ་བ་ཡིསཿ ལྷ་འདྲེ་འདར་ཞིང་འབྱུང་པོའི་ཚོགས་རྣམས་དུདཿ དུས་གསུམ་སངས་རྒྱས་མཆོག་དེ་སྤྱན་དྲངས་ནཿ ལྷ་འདྲེས་འཁུ་མི་ནུས་ཏེ་ཐུགས་དགོངས་འགྲུབཿ ཅེས་གསུངས་རྒྱལ་པོས་སྤྱན་མི་འདྲོངས་ཞུས་པསཿ མཁན་
༼༡༣༤ན༽པོས་སྤྱན་འདྲོངས་སྔོན་གྱི་སྨོན་ལམ་ཡོདཿ སྤྱིར་ན་ཡང་དག་རྫོགས་པའི་སངས་རྒྱས་ཀྱིསཿ འགྲོ་བའི་དོན་མཛོད་སངས་རྒྱས་རིམ་པར་བྱོནཿ ཁྱད་པར་འཕགས་པ་སྤྱན་རས་གཟིགས་དབང་གིསཿ འགྲོ་བ་དཔག་མེད་འཁོར་བའི་མཚོ་ལས་བསྒྲལཿ ཕོ་བྲང་རི་བོ་ཏ་ལའི་རྩེ་མོར་བྱོནཿ སེམས་ཅན་གཅིག་ཀྱང་མེད་སྙམ་གཟིགས་པ་ཡིསཿ འགྲོ་བའི་མཐའ་ལ་ཐུགས་མེད་སྔ་མ་བཞིནཿ སྤྱན་རས་གཟིགས་ཀྱང་དོན་མི་འདུག་སྙམ་ནསཿ སྤྱན་གཉིས་ནས་ཀྱང་སྤྱན་ཆབ་གཉིས་བྱུང་སྟེཿ སྲིན་ལག་གཉིས་ཀྱིས་གཏོར་ནས་མ་འོངས་དུསཿ སྤྱན་ཆབ་གཉིས་ཀྱིས་འགྲོ་བའི་དོན་བྱེད་ཤོགཿ ཅེས་པའི་སྨོན་ལམ་བཏབ་པས་ལྷ་ཡུལ་དུཿ དབང་པོ་བརྒྱ་བྱིན་སྲས་མོ་གཉིས་སུ་སྐྱེསཿ ལྷ་མོ་གང་མ་གང་ཆུང་ཞེས་བྱ་ཡོདཿ གང་ཆུང་གིས་ནི་ལྷ་ཡི་མེ་ཏོག་བརྐུསཿ ལྷ་ཡི་འདུལ་ཁྲིམས་རྣམ་པར་དག་པ་ཉམསཿ མི་ཡི་གནས་སུ་ལྷུང་ནས་བལ་ཡུལ་དུཿ བྱ་རྫི་གསལ་ལེའི་བུ་མོ་བདེ་མཆོག་སྐྱེསཿ རིགས་ངན་བཞི་དང་བཤོས་པས་བུ་བཞི་བྱུང་ཿ རྟ་རྫིས་བཤོས་པའི་བུ་ནི་ཆེ་ཤོས་ཡིནཿ དེ་འོག་ཕག་རྫིས་བཤོས་པའི་བུ་གཅིག་སྐྱེསཿ དེ་འོག་ཁྱི་རྫིས་བཤོས་པའི་བུ་གཅིག་སྐྱེསཿ དེ་ནས་བྱ་རྫིས་བཤོས་པའི་བུ་གཅིག་སྐྱེསཿ བྱ་བཅོས་གླ་བསགས་བུ་ཚོ་མངའ་ཐང་ཕོགཿ གླའི་ལྷག་མཆོད་རྟེན་བྱ་རུང་ཁ་ཤོར་བཞེངསཿ དེ་ཡང་
༼༡༣༤བ༽བུམ་པ་ནས་ནི་བུམ་སྟེགས་ཁརཿ གོམ་པ་དགུ་དགུ་ཡོད་པ་ཞིག་ནི་བཞེངསཿ བུམ་པ་མ་ཐོགས་པར་ནི་ཚེ་དུས་བྱསཿ དམ་ཚིག་ལྷ་མོ་པྲ་མོ་ཧར་སངས་རྒྱསཿ དེ་ནས་བུ་བཞིས་འདུས་ནས་གྲོས་བྱས་པཿ བྱ་རྫི་མ་གཅིག་བུ་བཞིར་མངའ་ཐང་ཕོགཿ མཆོད་རྟེན་བཞེང་འཕྲོར་ངེད་བཞིས་མཆོད་རྟེན་ལཿ བུམ་པ་གདགས་དགོས་ཟེར་ནས་བུམ་པ་བཏགསཿ དེ་དུས་བུ་བཞིས་སྨོན་ལམ་རེ་རེ་བཏབཿ དེ་དག་རྟ་རྫི་བུ་ཡི་སྨོན་ལམ་ནིཿ མཆོད་རྟེན་འདི་ལ་བུམ་པ་བཏགས་པའི་མཐུསཿ ས་བདག་མགོ་ནག་རྒྱལ་པོར་སྐྱེ་བར་ཤོགཿ དེ་སྐད་བཏབ་པས་རྗེ་རྒྱལ་ཁྱེད་ཉིད་ཡིནཿ དེ་འོག་ཕག་རྫི་བུ་ཡི་སྨོན་ལམ་ནིཿ མཆོད་རྟེན་འདི་ལ་བུམ་པ་བཏགས་པའི་མཐུསཿ རིག་འཛིན་སྔགས་འཆང་དགོངས་རྒྱུད་དག་པ་ཡིསཿ བརྫུས་སྐྱེས་ལྷ་འདྲེ་མི་གསུམ་འདུལ་བར་ཤོགཿ སྨོན་ལམ་མཐུ་བཙན་པདྨ་འབྱུང་གནས་ཡིནཿ དེ་འོག་བྱི་རྫིའི་བུ་ཡི་སྨོན་ལམ་ནིཿ མཆོད་རྟེན་འདི་ལ་བུམ་པ་བཏགས་པའི་མཐུསཿ བསྟན་པའི་གཞི་མ་དགེ་འདུན་མཆོག་ཏུ་ཤོགཿ དགེ་སློང་བོ་དྷི་ས་ཏྭ་ང་ཉིད་ཡིནཿ བྱ་རྫི་བུ་ཡི་སྨོན་ལམ་བཏབ་པ་ནིཿ ཕུ་བོས་སངས་རྒྱས་བསྟན་པ་འཛིན་པར་འདུགཿ དེ་འོག་སངས་རྒྱས་བསྟན་པ་བསྲུང་བར་འདུགཿ དེ་འོག་སངས་རྒྱས་བསྟན་པ་སྐྱོང་བར་འདུགཿ ང་ཡིས་འཕྲིན་བློན་པ་རུ་སྨོན་ལམ་འདེབསཿ མཆོད་རྟེན་འདི་ལ་བུམ་པ་བཏགས་
༼༡༣༥ན༽པའི་མཐུསཿ སྤུན་ཟླ་རྣམས་ཀྱི་འཕྲིན་བློན་བྱེད་པར་ཤོགཿ ད་ལྟ་ཡར་ཀླུངས་སྦ་མི་ཁྲི་གཞེར་ཡིནཿ སྨོན་ལམ་འབྲེལ་པ་ཡོད་པས་སྤྱན་འདྲོངས་གསུང་ཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ མཁན་པོ་བོ་དྷི་སཏྭས་ལུང་བསྟན་པའི་ལེའུ་སྟེ་ང་བརྒྱད་པའོཿ ཿཐ་ཐ་ཉྲ་རྒྱ་རྒྱཿ ཿ