རྒྱལ་པོའི་བསྐྱར་ཤོག་པ་དང་མཇལ་བའི་ལེའུ།
དེ་ནས་སིངྷ་རཱ་ཛས་རྒྱ་གར་འཁོརཿ རྒྱལ་པོ་ཁྲི་སྲོང་ལྡེའུ་བཙན་སྙན་གསོལ་པཿ རྒྱ་གར་ཡུལ་ན་པཎྜི་ཏ་ཡི་ཚོགསཿ ནམ་མཁའི་སྐར་ཚོགས་ཙམ་ལ་ཚོད་མ་ཐེབསཿ དེ་དག་ནང་ནས་མཆོག་ཏུ་གྱུར་པ་ནིཿ གུ་རུ་པདྨ་འབྱུང་གནས་ཞེས་བྱ་བཿ གཡའ་རི་གོང་གི་བུག་ལ་བཞུགས་ནས་མཆིསཿ མངལ་སྐྱེས་མ་ཡིན་བརྫུས་སྐྱེས་སྤྲུལ་སྐུར་གྲགསཿ དེ་སྐད་གསོལ་པས་རྒྱལ་པོ་ཤིན་ཏུ་དགྱེསཿ དེ་ནས་རྒྱལ་པོས་མྱུར་མགྱོགས་ཁ་གསུམ་བཏང་ཿ སྦ་མི་ཁྲི་གཞེར་རྡོ་རྗེ་བདུད་འཇོམས་དང་ཿ མཆིམས་ཀྱི་ཕྲུག་གུ་ཤཱཀྱ་པྲ་བྷ་དང་ཿ ཤུད་བུ་དཔལ་གྱི་སེང་གེ་བཞི་ལ་ནིཿ གསེར་ཕྱེ་བྲེ་རེ་གསེར་གྱི་པ་ཏྲ་རེཿ རྒྱ་གར་རྡོ་རྗེ་གདན་དུ་བརྫངས་པར་གྱུརཿ ལོ་ཙཱ་བཞི་པོས་རྒྱ་གར་ཡུལ་དུ་བགྲོདཿ གསེར་ཕྱེ་བྲེ་གང་རྒྱལ་པོ་ཉི་མར་ཕུལཿ གསེར་གྱི་པ་ཏྲ་བཀའ་འཕྲིན་ཕྱག་ཏུ་སྤྲདཿ བྲེ་གང་བླ་མཆོད་པཎྜི་ཏ་ལ་ཕུལཿ བྲེ་གང་པ་ཏྲ་ཨོ་རྒྱན་པདྨར་ཕུལཿ སློབ་དཔོན་ཆེན་པོས་རྒྱལ་པོ་ཡོན་
༼༡༣༥བ༽མཆོད་དགོངསཿ བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་ཉིདཿ བསྟན་པའི་གཞི་མ་ཐུགས་དམ་གཙུག་ལག་ཁང་ཿ བཞེང་པར་འཚལ་བས་ལྷ་འདྲེ་རྣམས་ཀྱིས་བཀགཿ ས་གཞི་བྱིན་རླབས་རབ་གནས་བྱ་ཕྱིར་དང་ཿ སངས་རྒྱས་བསྟན་པ་འཛིན་སྐྱོང་བསྲུང་བའི་ཕྱིརཿ སྤྱན་འདྲེན་མཆིས་པས་ཐུགས་རྗེས་བཟུང་བར་ཞུཿ ཞེས་གསོལ་ཨུ་རྒྱན་ཆེན་པོས་བཀའ་གནང་ནསཿ ས་ཕོ་རྟ་ལོ་དགུན་ཟླ་འབྲིང་པོ་ཡིཿ བཅོ་ལྔ་སྐར་མ་སྨིན་དྲུག་བཤུལ་ལམ་ཞུགསཿ གནམ་སྟོང་ཉིན་པར་བལ་ཡུལ་གདན་ཕེབས་ཏེཿ ཨུ་རྒྱན་མཁན་པོ་པདྨའི་ཞལ་ནས་ནིཿ བོད་ཀྱི་ལྷ་འདྲེ་གཟིངས་པ་ལངས་འདུག་པསཿ ང་ཡིས་འདུལ་ཞིང་ཕྱི་ན་མར་ལ་འོང་ཿ མངལ་སྐྱེས་ལུས་ཀྱིས་ལྷ་འདྲེའི་ཟེར་མི་ཐུབཿ ལོ་ཙཱ་བ་རྣམས་སྔོན་ལ་སོང་ཞིག་གསུང་ཿ བྱིན་རླབས་བསྲུང་བ་བཏགས་ནས་སྔོན་ལ་བཏང་ཿ ཨུ་རྒྱན་ཆེན་པོས་བལ་ཡུལ་ཟླ་གསུམ་བཞུགསཿ བལ་པོ་བ་སུ་དྷ་ར་ལ་སོགས་པཿ བལ་པོའི་འགྲོ་དོན་རྒྱ་ཆེན་མཛད་ནས་ནིཿ ཨེ་ཡི་གཙུག་ལག་ཁང་དུ་གཏེར་ཀ་སྦསཿ ཨ་སུ་ར་དང་ཡང་ལེ་ཤོད་ལ་སོགསཿ བལ་ཡུལ་ཤིང་ཀུན་ལ་སོགས་གཙུག་ལག་ཁང་ཿ ས་བཙན་བྲག་ལ་གཏེར་ཀ་སྟོང་རྩ་སྦསཿ དེ་ནས་དབྱར་ཟླ་ར་བའི་ཚེས་གཅིག་ལཿ བཤུལ་ལམ་ཞུགས་ནས་འབྱོན་པར་བཞེད་པའི་ཚེཿ རྒྱ་བལ་ཤིང་སྐྱེས་རྩི་མོ་བོད་དུ་བསྟནཿ མེ་ཏོག་ཐམས་ཅད་བོད་བལྟས་ཁ་བྱེར་
༼༡༣༦ན༽གྱུརཿ རྒྱ་དང་བལ་པོའི་པཎ་ཆེན་རྨི་ལྟས་ལོགཿ ཉི་ཟླ་དུས་གཅིག་བོད་དུ་ཤར་བ་དང་ཿ རྒྱ་ཆོས་མ་ལུས་བོད་དུ་སོང་བ་ལསཿ མཐའ་འཁོབ་གཙུག་ལག་ཁང་གིས་ཁེངས་པ་རྨིསཿ དེ་ཚེ་མཁའ་འགྲོ་སྡེ་བཞི་སེར་སྣ་ཤོརཿ གུ་རུ་བོད་དུ་བཞུད་པ་འདི་སྐད་བཤོལཿ རྡོ་རྗེ་སློབ་དཔོན་དགོངས་མཛོད་དང་ཿ རྩི་ཤིང་རྩེ་མོའི་སྟོན་ལུགས་སམཿ མེ་ཏོག་ཁ་ཡི་ལྷ་ཕྱོགས་སམཿ པཎ་ཆེན་རྨི་ལམ་ངན་ལུགས་སམཿ དཀྱིལ་འཁོར་མདངས་ཡལ་སྐྱེན་ལུགས་ཀྱིསཿ སློབ་དཔོན་བོད་དུ་བཞུད་བཞུད་འདྲཿ ནམ་མཁའ་གཡོ་འགུལ་མེད་ལགས་ཏེཿ འབྱུང་བཞི་མཐའ་རྒྱས་ལྷུན་གྱིས་གྲུབཿ སློབ་དཔོན་གཤེགས་བཞུགས་མ་མཛད་ཀྱང་ཿ འགྲོ་དོན་མཐའ་རྒྱས་ལྷུན་གྱིས་འགྲུབཿ སློབ་དཔོན་མི་གཤེགས་བཞུགས་པར་ཞུཿ ཞེས་གསོལ་སློབ་དཔོན་ལན་བཏབ་པཿ མཁའ་འགྲོ་དམ་ཅན་ཚུར་གསོན་དང་ཿ ནམ་ཟླས་བསྐུལ་བས་རྩི་ཏོག་འབོཿ གདུལ་བྱས་བསྐུལ་བས་ཐུགས་རྗེ་སྐྱེཿ ལས་ཆོས་མཐོང་ནས་སྡོད་མི་ཁོམཿ ཁྱུང་གཤོག་རྒྱས་པ་མཁའ་ལ་འཕྱོཿ རང་དོན་ཕུན་ཚོགས་སྔོན་ལ་སོང་ཿ ཕྱོགས་མེད་གཞན་དོན་དུས་ལ་བབཿ མ་སྲིད་མཁའ་འགྲོ་གྲོགས་ལ་ཆོསཿ དེ་སྐད་གསུངས་ནས་མང་ཡུལ་བྱོན་པ་ལསཿ བལ་མོ་ཤཱཀྱ་དེ་བར་ལུང་བསྟན་ཏེཿ དེ་ནས་མི་རབས་ཉིས་བརྒྱ་ལྷག་
༼༡༣༦བ༽སོང་ནཿ མངའ་རིས་སྐོར་གསུམ་པུ་རངས་མང་ཡུལ་དུཿ གདུང་བརྒྱུད་རྒྱལ་པོ་མགོན་གསུམ་ཞེས་བྱ་འབྱུང་ཿ ཁ་ཆེར་འཕགས་པ་མཆེད་གསུམ་སྟོད་ཧོར་གྲགསཿ བལ་ཡུལ་ཨེ་ཡི་གཙུག་ལག་ཁང་ནང་ནསཿ ཨུ་རྒྱན་སྦས་པའི་དམ་པའི་ཆོས་གཏེར་རྡོལཿ གྲོང་ཁྱེར་སླད་ལར་གཙུག་ལག་དཔལ་དགེ་འབྱུང་ཿ ཆོས་ཕྱོགས་དབུལ་ཕོངས་ལུས་སྲོག་མི་ལྟ་ནཿ སངས་རྒྱས་བསྟན་པའི་སྲོག་ཤིང་ཀ་བ་ཚུགསཿ ཞེས་གསུངས་བལ་མོ་ཤཱཀྱ་དེ་བ་ཡིསཿ ཆོས་ཕྱོགས་གཙོར་སྟོན་འཇིག་རྟེན་བྱ་བ་བཏང་ཿ ཨུ་རྒྱན་ཆེན་པོའི་ཐུགས་ཀྱི་མངོན་མཁྱེན་ལཿ ལས་འཕྲོའི་དབང་གིས་གདུལ་བྱ་ངུས་བབ་སྙམཿ བལ་ཡུལ་ཉི་མ་ཁུད་ཀྱི་མཚོ་ཁར་བྱོནཿ རྒྱལ་པོས་བསྐྱར་ཤོག་མི་བདུན་བཏང་དང་ཕྲདཿ ནམ་མཁའི་སྙིང་པོས་གཙོ་བྱས་གཡོག་པོ་བདུནཿ དེ་བས་མང་རྗེ་གསལ་སྣང་སེང་གོང་ལྷ་ལུང་ཿ དེབས་མི་ཀྲ་གཟིངས་ཅོག་རོ་དཔལ་གཟུངས་མགོནཿ སྣ་ནམ་བདུད་འདུལ་ཤ་མི་པུ་ཏྲ་ཤྲིཿ བློན་པོ་སྟག་སྣ་གདོ་ཟིགས་དང་བཅས་རྣམསཿ མང་ཡུལ་ཁ་གནོན་གཏོང་བ་ཙུག་བྱས་ནསཿ ཡོངས་སུ་ཚོལ་བ་ཁོ་ན་ཉིད་ལ་དགོངསཿ ཆོས་ཀྱིས་ཀུན་དགའ་འཕེལ་བའི་དགའ་སྟོན་ཆརཿ བཀྲ་ཤིས་བཟང་ལྡན་ཡིད་ལེ་རེ་བ་སྦྱོརཿ དེ་ཡིས་སྐྱེ་བ་དམ་ཆོས་སྤྱོད་ལ་དདཿ ཅེས་པའི་དྲིལ་ཡིག་གསེར་ཕྱེ་བསྐུར་ནས་ཕྱིནཿ རྒྱ་གར་ཕ་རོལ་བལ་
༼༡༣༧ན༽པོའི་ཚུར་རོལ་ཏུཿ ཨུ་རྒྱན་ཆེན་པོ་པད་འབྱུང་ཉིད་དང་མཇལཿ རྒྱལ་པོའི་དྲིལ་ཡིག་སྐྱེས་ནི་ཕྱག་ཏུ་ཕུལཿ བར་མི་བདུན་པོ་བསམ་ཡས་སྔ་འགྲོས་བཏང་ཿ ཨུ་རྒྱན་ཆེན་པོས་ནམ་མཁའ་ལ་བྱོན་ནསཿ མང་ཡུལ་གུང་ཐང་ཟླ་བ་གསུམ་དུ་བཞུགསཿ ཕུག་མདའི་ནང་དུ་ཡིད་བཞིན་གཏེར་ཅིག་སྦསཿ བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱིསཿ སྐ་བ་དཔལ་རྩེགས་རྡོ་རྗེ་བདུད་འཇོམས་དང་ཿ ཅོག་རོ་ཀླུ་ཡི་རྒྱལ་མཚན་གསེར་བསྐུར་ནསཿ ལམ་ལ་ཉིན་བཤད་མཚན་དུབ་པར་བརྫངསཿ སློབ་དཔོན་སྲུང་མ་རྣམས་ཀྱིས་ཐུགས་དམ་བསྐུལཿ བང་ཆེན་མི་གསུམ་ཐང་ཆད་ཉོན་མོངས་པསཿ མང་ཡུལ་གུང་ཐང་ཙམ་དུ་གཤེགས་པར་ཞུསཿ མཇལ་ནས་མཁྱེན་བཞིན་ཁྱེད་རྣམས་སུ་ཡིན་དྲིསཿ ངེད་རྣམས་བོད་ཀྱི་སློབ་དཔོན་གདན་འདྲེན་ཡིནཿ ཅེས་སྨྲས་ཕྱག་བྱས་གསེར་ཕྱེ་བྲེ་གང་ཕུལཿ པྲེ་ཏ་པུ་རིའི་རྒྱལ་པོའི་སྐུ་ཡོན་ནམཿ ཞེས་གསུངས་མང་ཡུལ་བལ་ཡུལ་ཕྱོགས་ལ་གཏོརཿ ཕངས་སེམས་སྐྱེས་པས་སློབ་དཔོན་ཞལ་ནས་ནིཿ ཐུ་བ་བཟེད་གསུང་ས་དང་གསེག་མ་བླུགསཿ སོ་སོར་ཕྱིན་ནས་ཁ་ཕྱེ་བལྟས་པ་ཡིསཿ གསེར་དངུལ་གཡུ་དང་རིན་པོ་ཆེ་རྣམས་འདུགཿ ཡིད་ཆེས་སྐྱེས་ནས་སྐུ་ལ་མོས་པ་ཐོབཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་
༼༡༣༧བ༽པ་ལསཿ རྒྱལ་པོའི་བསྐྱར་ཤོག་པ་དང་མཇལ་བའི་ལེའུ་སྟེ་ང་དགུ་པའོཿ ཿཐ་ཐ་ཉྲ་རྒྱ་རྒྱཿ ཿ