བོད་ཀྱི་ལྷ་འདྲེ་གདུག་པ་ཅན་རྣམས་བཏུལ་ཞིང་དམ་ལ་བཏགས་པའི་ལེའུ།
དེ་ནས་མང་ཡུལ་སྟོན་ལ་མཁར་དུ་བྱོནཿ ཞང་ཞུང་དགྲ་བླ་ཛ་མུན་ཞེས་བྱ་བསཿ སློབ་དཔོན་རི་བྲག་གཉིས་ཀྱི་བར་དུ་བཅརཿ བར་སྣང་བྱོན་པས་མོ་སྐྱེངས་སྲོག་སྙིང་ཕུལཿ གསང་མཚན་རྡོ་རྗེ་གཡུ་བུན་མ་རུ་བཏགསཿ གཏེར་ཀ་ཆེན་པོ་ཞིག་གི་གཉེར་ཀ་གཏདཿ དེ་ནས་གནམ་ཐང་མཁར་ནག་ལ་ཀར་བྱོནཿ གངས་དཀར་གནམ་སྨན་དཀར་མོས་ཐོག་ཕབ་སྟེཿ སློབ་དཔོན་ཕྱག་མཛུབ་ལ་དཀྲིས་མཚོར་དོར་བསཿ མོ་བྲེད་དཔལ་མོ་དཔལ་ཐང་མཚོ་ནང་བྲོསཿ མཚོ་བསྐོལ་ཤ་རུས་བྱེ་སྟེ་བྲལ་བ་ལསཿ སློབ་དཔོན་རྡོ་རྗེ་བརྒྱབ་པས་མིག་གཡས་བཅརཿ མཚོ་ཁར་ཡེར་བྱུང་ཞུ་བ་གསོལ་བ་ནིཿ སྟོན་པའི་ཞལ་སྐྱིན་རྡོ་རྗེ་ཐོད་འཕྲེང་རྩལཿ བར་ཆད་མི་བགྱིད་ཐུགས་དམ་དགོངས་པ་གློདཿ ཅི་བགྱིའི་བཀའ་ཉན་སློབ་དཔོན་འབངས་སུ་མཆིཿ ཞེས་ཟེར་སྲོག་སྙིང་ཕུལ་ནས་དམ་ལ་བཏགསཿ གསང་མཚན་ཤ་མེད་རྡོ་རྗེ་གཡུའི་སྒྲོན་མཿ གཏེར་ཀ་ཆེན་པོ་ཞིག་གི་གཉེར་བྱེད་གཏདཿ དེ་ནས་འོ་ཡུག་ཟེ་མོ་ལ་ཀར་བྱོནཿ བརྟན་མ་བཅུ་གཉིས་ཐོག་སྨད་བཅུ་གཉིས་ཕབཿ རི་ཡི་བར་དུ་བཙིར་བར་བྱས་པ་ལཿ སོལ་དུམ་རེར་གྱུར་སྟོབས་ཟད་བྱིན་གྱིས་བརླབསཿ བརྟན་མ་བཅུ་གཉིས་སྐྱོང་མ་བཅུ་གཉིས་དང་ཿ ཡ་མ་བཅུ་
༼༡༣༨ན༽གཉིས་སྲོག་གི་སྙིང་པོ་ཕུལཿ དམ་ལ་བཏགས་ནས་གཏེར་རེའི་གཉེར་ཀ་གཏདཿ དེ་ནས་འོ་ཡུག་བྱེའུ་ཚང་རྫོང་དཀར་སླེབཿ དགེ་བསྙེན་ཆེན་པོ་རྡོ་རྗེ་ལགས་པ་སྐྱོང་ཿ མཆེད་ནི་སུམ་བརྒྱ་དྲུག་ཅུས་བསུ་བ་བྱུང་ཿ དམ་ལ་བཏགས་ནས་གཏེར་གྱི་གཉེར་ཀ་གཏདཿ དེ་ནས་ཤོམ་པོ་ལུང་དུ་བྱོན་ཙ་ནཿ ཤམ་པོས་གཡག་དཀར་རི་ལོགས་ཙམ་ཞིག་སྤྲུལཿ ཁ་རླངས་སྣ་རླངས་ཁ་བ་བུ་ཡུག་འཚུབསཿ སློབ་དཔོན་ལྕགས་ཀྱུའི་ཕྱག་རྒྱས་སྣ་ནས་བཟུང་ཿ ཞགས་པས་བཅིང་ས་ནས་ལྕགས་སྒྲོག་དམ་པར་བཅུགཿ དྲིལ་བུའི་ཕྱག་རྒྱས་ལུས་སེམས་བཙོགས་པ་ཡིསཿ སྲོག་སྙིང་ཕུལ་ནས་དམ་བཏགས་གཉེར་ཀ་གཏདཿ དེ་ནས་སྐུ་གཉན་ཐང་ལྷས་ཉམས་སད་ཕྱིརཿ མགོ་བོ་གྲུ་གུའི་ཡུལ་དུ་སླེབ་པ་ལཿ གཞུག་མ་ཁམས་ཀྱི་སོག་ཆུ་གཡེར་ཐང་བརྐྱངསཿ སྦྲུལ་དཀར་ཞིག་གིས་ལམ་འཕྲང་བཅད་པ་ལཿ སློབ་དཔོན་སྦྲུལ་གྱི་རྐེད་པར་ཕྱག་མཁར་བཙུགསཿ ཀླུ་ཡི་རྒྱལ་པོ་ནི་ཐོད་དཀར་ཁྱོདཿ དྲི་ཟེའི་རྒྱལ་པོ་ཟུར་ཕུད་ལྔ་པ་ཞེསཿ ཁྱོད་རང་ཕར་སོང་ཚོགས་འཁོར་ཤོམས་དང་གསུངསཿ ཐང་ལྷས་གངས་ལ་བྲོས་པས་གངས་ཞུ་ནསཿ རྩེ་མོ་ནག་ཟང་གཡའ་སྔོན་ཉིལ་གྱིས་བྱུང་ཿ མ་བཟོད་ཞལ་ཟས་སྣ་ཚོགས་ཚོགས་འཁོར་དྲངསཿ བྱིས་པ་གཡུ་ཡི་ཟུར་ཕུད་ཅན་དུ་གྱུརཿ
༼༡༣༨བ༽དར་དཀར་རལ་གུ་ཞིག་གྱོན་ཕྱག་བསྐོར་བྱསཿ སྲོག་སྙིང་ཕུལ་ནས་དམ་བཏགས་གཏེར་བརྒྱ་གཏདཿ གསང་མཚན་རྡོ་རྗེ་མཆོག་རབ་རྩལ་དུ་གསོལཿ དེ་ནས་བྱང་ཐང་འཕན་ཡུལ་ལུང་པར་བྱོནཿ བྱང་གི་ཏིང་ཏིང་ཏིང་ལོ་སྨན་གདོང་གིསཿ བྱང་ཕུགས་རྣམས་ཀྱི་ལྷགས་པ་དུས་གཅིག་བསྡུསཿ སློབ་དཔོན་འཁོར་དང་བཅས་ལ་བརྒྱབ་པ་ཡིསཿ འཁོར་རྣམས་སྒྲིབས་ཤིང་སློབ་དཔོན་བསིར་ལ་ཁདཿ མ་རླུང་མནན་པས་མར་ལ་ཉི་སོད་བཞིནཿ ཏིང་ལོ་སྨན་གཅིག་གཞུ་ནས་དམ་ལ་བཏགསཿ སྲོག་སྙིང་ཕུལ་ནས་གཏེར་གྱི་གཉེར་བྱང་གཏདཿ དེ་ནས་གནམ་གྱི་ཤུག་སྡོང་གླང་སྒྲེམ་དུཿ བླ་མེད་དོན་རྫོགས་ཕོ་བྲང་ཞལ་ཕྱེ་ནསཿ སྒྲུབ་པ་ཞག་བདུན་ཕྱི་མའི་ནམ་དགུང་ལཿ ཐུགས་སྡངས་ཡིད་ཀྱིས་བྱུང་ནས་གཟིགས་ཙ་ནཿ བདུད་ཀྱི་དམག་དཔོན་རུ་དར་རེ་རེ་ཕྱརཿ སློབ་དཔོན་ཐུགས་སྡངས་གྱུར་པ་བཟོད་པར་གསོལཿ སྲོང་སྙིང་ཕུལ་ནས་དམ་བཏགས་གཏེར་ཀ་གཏདཿ དེ་ནས་ཁམས་ཀྱི་གླ་བ་རྐང་གཅིག་བྱོནཿ ཐེའུ་རང་མ་ལུས་ཐམས་ཅད་དམ་ལ་བཏགསཿ དེ་ནས་ཁམས་ཀྱི་སེང་གེ་བྲག་ཏུ་བཞུགསཿ མ་སངས་གཡའ་སྤང་སྐྱེས་གཅིག་བྱ་བ་ནིཿ རྒོད་པོ་མགོ་ལ་སྤྲེའུའི་ཞྭ་གྱོན་པཿ མགོ་བོ་སློབ་དཔོན་པང་དུ་བཞག་བྱས་ནསཿ རྐང་པ་ཁམས་ཀྱི་གཡར་མོ་ཐང་ལ་བརྐྱངསཿ ལག་གཉིས་ཏི་སེ་མ་ཕམ་མཚོ་ལ་
༼༡༣༩ན༽བསྐྱལཿ མི་མ་ཡིན་ནི་བྱེ་བ་ཁྲག་ཁྲིག་སྟོང་ཿ བསམ་གྱིས་མི་ཁྱབ་གང་དག་ལྷགས་པར་གྱུརཿ མཚོན་གྱི་རིགས་བྱེད་ཆར་པ་ཕབ་པ་ཡིསཿ གུ་རུས་དྲག་པོ་རིགས་ལྔར་ཁྲོས་ནས་སུཿ གཡའ་སྤང་གཙོ་བྱས་ལྷ་འདྲེ་ཐམས་ཅད་བཏུལཿ དེ་ནས་ཆུ་བོ་རི་དང་ཁ་རག་བྱོནཿ མ་མོ་བསེན་མོ་ཐམས་ཅད་དམ་ལ་བཏགསཿ དེ་ནས་གཙང་གི་གསིལ་མ་ལ་ཁར་བྱོནཿ སྨན་མོ་ལྷ་སྨན་ཐམས་ཅད་དམ་ལ་བཏགསཿ གེམ་པ་ཆུ་མིག་དགེ་བསྙེན་ཐམས་ཅད་བཏུལཿ བྱེ་མ་རབ་གར་ལྷ་སྲིན་སྡེ་བརྒྱད་བཏུལཿ རོ་ཧ་ལུང་པ་ཁྲ་མོར་མ་ཡམས་བཏུལཿ རོང་དོང་ལུང་པ་ནག་པོར་སྲིན་པོ་བཏུལཿ མལ་གྲོའི་ནང་དུ་ཀླུ་རིགས་དམ་ལ་བཏགསཿ གཡུ་འཛིན་ཕུག་མོང་ཕོ་རྒྱུད་དམ་ལ་བཏགསཿ དུང་མདོག་བྲག་དམར་དྲི་ཟ་དམ་ལ་བཏགསཿ གངས་དཀར་ཏི་སེར་རྒྱུ་སྐར་ཉེར་བརྒྱད་བཏུལཿ གླང་ཆེན་སྦས་ཕུག་གཏེར་ཀ་ཞིག་ཀྱང་སྦསཿ སྟར་སྒོའི་གངས་སུ་གཟའ་ཆེན་བརྒྱད་སོགས་བཏུལཿ གཏེར་ཀ་ཆེན་པོ་ཉི་ཤུ་རྩ་གཅིག་སྦསཿ བུ་ལེ་གངས་སུ་ལྷ་འདྲེས་ཚོགས་འཁོར་བཤམསཿ འཇིག་རྟེན་ཁམས་ཀྱི་ཟས་ནོར་ཐམས་ཅད་ཕུལཿ བུ་ལེ་གངས་དང་སྟར་སྒོའི་གངས་མཚོར་སྦསཿ གློ་བོར་ལྔ་ནམ་སྤུན་དགུ་དམ་ལ་བཏགསཿ ཕོ་མ་གངས་ཇོས་གདན་དྲངས་དམ་ལ་བཏགསཿ གང་བ་བཟང་པོས་གདན་
༼༡༣༩བ༽དྲངས་དམ་ལ་བཏགསཿ རྩེ་ལྷ་གངས་སུ་གདན་དྲངས་དམ་ལ་བཏགསཿ མཁའ་རི་ཅན་གྱིས་གདན་དྲངས་དམ་ལ་བཏགསཿ དེ་དག་ཀུན་ལ་གཏེར་ཀ་རེ་རེ་གཏདཿ དེ་ནས་མངའ་བདག་རྒྱལ་པོའི་བསྐྱལ་ཤོག་བྱུང་ཿ སྟོད་ཀླུང་གྲམ་བུ་ཚེལ་དུ་འཛོམ་དུས་བཏབཿ རྒྱལ་པོ་ང་ཆེ་ང་བཙན་ང་རྒྱལ་ཞིང་ཿ ཕོ་ཉ་མང་བཏང་རྒྱལ་པོ་ཉིད་མ་བྱོནཿ ཁ་ལ་བྲག་རིར་དགུན་ཞིག་དང་ཡོལ་བཞུགསཿ བཙན་རྣམས་དམ་ལ་བཏགས་ཤིང་གཏེར་ཀ་གཏདཿ དེ་ནས་ཟུལ་ཕུག་རྐྱང་བུ་ཚལ་དུ་བཞུགསཿ བདུད་གཟའ་དམ་སྲི་བཏུལ་ནས་གཏེར་ཀ་གཏདཿ དེ་ནས་གཡའ་རི་གོང་དུ་དཔྱིད་ཅིག་བཞུགསཿ ཇ་རོང་འགོད་པོ་སོ་ཤ་དམ་སྲི་བཏུལཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ བོད་ཀྱི་ལྷ་འདྲེ་གདུག་པ་ཅན་རྣམས་བཏུལ་ཞིང་དམ་ལ་བཏགས་པའི་ལེའུ་སྟེ་དྲུག་ཅུ་པའོཿ ཿཐ་ཐ་ཉྲ་རྒྱ་རྒྱཿ ཿ