བོད་ཀྱི་རྒྱལ་པོ་དང་མཇལ་ཕྲད་མཛད་ཅིང་ཕྱག་ལ་མ་འཆམ་པའི་ལེའུ།
དེ་ནས་ལྷ་སར་མཉེས་མཛད་སྟོད་ཀླུང་བྱོནཿ རྒྱལ་པོས་ལོ་ཧི་ཏ་འགྲམ་ཐབ་བཏེག་ནསཿ ལྷ་བཟང་ཀླུ་དཔལ་རྒྱལ་པོའི་ཚབ་མར་བཏང་ཿ ལྕགས་ཅན་རྟ་ཞོན་ལྔ་བརྒྱ་དག་གིས་བསྐོརཿ སྟོད་ཀླུང་གཞོང་པ་མདའ་རུ་མཇལ་ཙ་ནཿ དྲོ་བར་འདེབས་པའི་ཇ་ཆུ་མ་རྙེད་ནསཿ ཨུ་རྒྱན་ཆེན་པོ་པདྨ་འབྱུང་གནས་ཀྱིསཿ སྟོད་ཀླུང་དོང་པའི་གདོང་ལ་ཕྱག་མཁར་བཙུགསཿ ལྷ་བཟང་ཆུ་བྱུང་གཞོང་པ་བཟེད་ཅིག་གསུངསཿ
༼༡༤༠ན༽མིང་ཡང་གཞོང་པའི་ལྷ་ཆུ་ཞེས་སུ་ཐོགསཿ དེ་ནས་ཟུང་མཁར་ལོ་ཧི་ཏ་འགྲམ་ཚལཿ མངའ་བདག་རྒྱལ་པོ་ཉིད་དང་མཇལ་ཕྲད་མཛདཿ བོད་ཀྱི་རྒྱལ་པོ་ཕོ་སྐྱེས་ཡོངས་ཀྱིས་བསྐོརཿ ཕུག་རན་ཁྱུ་བཞིན་དཀར་ཁྲིགས་ཅེམ་ཅེམ་བྱུང་ཿ བཙུན་མོ་གཉིས་ལ་མོ་སྐྱེས་ཡོངས་ཀྱིས་བསྐོརཿ ཟ་འོག་གུར་བཞིན་ཁྲ་ཤིགས་ཅེམ་ཅེམ་བྱུང་ཿ རྔ་ཤོན་གླུ་ཤོན་འབག་ཤོན་སེང་ཤོན་བསུཿ ཨུ་རྒྱན་ཆེན་པོ་པདྨའི་ཐུགས་དགོངས་ལཿ ང་ནི་མངལ་སྐྱེས་མ་ཡིན་བརྫུན་སྐྱེས་ཡིནཿ རྒྱལ་པོ་མངལ་སྐྱེས་སྐྱེ་བས་ང་ཉིད་ཆེཿ ཨུ་རྒྱན་ཆོས་ཀྱི་རྒྱལ་པོའི་རྒྱལ་སྲིད་བཟུང་ཿ བོད་ཡུལ་སྡིག་པའི་རྒྱལ་པོ་ཚེ་རིགས་ཆེཿ ངེད་གཉིས་ངོ་གང་ཁོང་ནི་རྨོངས་པ་ཡིནཿ ང་ནི་རིགས་པའི་གནས་ལྔ་ཀུན་ལ་མཁསཿ ཚེ་གཅིག་སངས་རྒྱས་སྐྱེ་ཤི་གཉིས་མི་མངའཿ ཁོང་ལ་དགོངས་པ་བྱུང་ནས་སྤྱན་དྲངས་ཡིནཿ སྔོན་ལ་རྒྱལ་པོས་ང་ལ་ཕྱག་འཚལ་ཡོང་ཿ ཕྱག་ལེན་འདེབས་སམ་མི་འདེབས་སྙམ་དུ་དགོངསཿ བཏབ་ན་སངས་རྒྱས་བསྟན་པའི་ཆེ་བ་འཚོརཿ མ་བཏབ་རྒྱལ་པོ་ཡིན་པས་མི་དགའ་ཡོང་ཿ རྒྱལ་པོ་ཆེ་ཡང་ངའི་ཕྱག་མི་ཐུབ་སྙམཿ རྒྱལ་པོ་ཁྲི་སྲོང་ལྡེའུ་བཙན་ཐུགས་དགོངས་ལཿ ང་ནི་བོད་ཀྱི་མགོ་ནག་ཡོངས་ཀྱི་རྗེཿ མཁན་པོ་བོ་དྷི་ས་ཏྭས་སྔོན་ཕྱག་འཚལཿ དེ་བཞིན་སློབ་དཔོན་ང་ལ་ཕྱག་འཚལ་སྙམཿ ཕྱག་ལམ་འཆམ་
༼༡༤༠བ༽ཚོམ་མེ་ཚོམ་མེར་ལུསཿ སློབ་དཔོན་ང་ཆེ་ང་བཙན་མགུར་འདི་གསུངསཿ དུས་གསུམ་སངས་རྒྱས་མངལ་སྒོ་འགྲིམཿ གྲངས་མེད་གསུམ་དུ་ཚོགས་གཉིས་བསགསཿ ང་སངས་རྒྱས་པདྨ་འབྱུང་གནས་ཡིནཿ ཆོས་ལྟ་བ་ཡས་འབིབས་ཀྱི་གདམས་ངག་བདོགཿ སྡེ་སྣོད་རྒྱུད་སྡེའི་ལུང་ལ་སྦྱངསཿ ཐེག་ཀུན་མ་འདྲེས་ཡོངས་རྫོགས་འཆདཿ ང་དམ་ཆོས་པདྨ་འབྱུང་གནས་ཡིནཿ ཆོས་སྤྱོད་པ་མས་འཇོག་གི་གདམས་ངག་བདོགཿ ཕྱི་ངུར་སྨྲིག་དགེ་སློང་གི་ཆ་ལུགས་འཛིནཿ ནད་བླ་མེད་གསང་སྔགས་རྣལ་འབྱོར་པཿ ང་དགེ་འདུན་པདྨ་འབྱུང་གནས་ཡིནཿ ཆོས་ལྟ་སྤྱོད་ཟུང་འཇུག་གི་གདམས་ངག་བདོགཿ ལར་རྟོགས་པ་ནམ་མཁའ་བས་ཀྱང་མཐོཿ ལས་རྒྱུ་འབྲས་བག་ཕྱེ་བས་ཀྱང་ཞི་བཿ ད་བླ་མ་པདྨ་འབྱུང་གནས་ཡིནཿ ཆོས་འབྲེལ་ཚད་དོན་ལྡན་གྱི་གདམས་ངག་བདོགཿ སྣང་སྲིད་འཁོར་འདས་ཀྱི་དཔེ་ཆ་ལཿ དྲང་དོན་ངེས་དོན་གྱི་བཤད་པ་བྱེདཿ ང་དགེ་བཤེས་པདྨ་འབྱུང་གནས་ཡིནཿ ཆོས་དགེ་སྡིག་ཤན་འབྱེད་ཀྱི་གདམས་ངག་བདོགཿ ཡེ་ཤེས་ལྔ་ལྡན་གྱི་སྣམ་སྦྱར་གྱོནཿ སྐུ་ལྔ་ཡོངས་རྫོགས་ཀྱི་ལྷུང་བཟེད་ཐོགསཿ ང་མཁན་པོ་པདྨ་འབྱུང་གནས་ཡིནཿ མི་སངས་རྒྱས་སུ་གཏོང་བའི་གདམས་ངག་བདོགཿ ཞི་གནས་དང་ལྷག་མཐོང་ཟུང་དུ་འཇུགཿ སྒོམ་མེད་རྫོགས་ཆེན་གྱི་ལྟ་བ་སྐྱོང་ཿ ང་སྒོམ་ཆེན་པདྨ་འབྱུང་གནས་ཡིནཿ ཆོས་
༼༡༤༡ན༽མཉམ་གཞག་རྗེས་ཐོབ་ཀྱི་གདམས་ངག་བདོགཿ འཁོར་འདས་རྒྱལ་བའི་དཀྱིལ་འཁོར་ལཿ བསྐྱེད་རྫོགས་སྤང་བླང་ཆ་མ་མཆིསཿ ང་སྔགས་པ་པདྨ་འབྱུང་གནས་ཡིནཿ ཆོས་བསྐྱེད་རྫོགས་ཟུང་འཇུག་གི་གདམས་ངག་བདོགཿ སྣང་བ་དཀར་དམར་གྱི་གབ་རྩེ་ལཿ རྒྱུ་འབྲས་ཀྱི་སྤང་བླང་ཞིབ་ཏུ་བརྩིཿ ད་བརྩེས་མཁན་པདྨ་འབྱུང་གནས་ཡིནཿ ཆོས་སྡོམ་གསུམ་དབྱེར་མེད་ཀྱི་གདམས་ངག་བདོགཿ མི་དུག་ལྔའི་ནད་ཀྱིས་ཟིན་པ་ལཿ ཆོས་ཟག་མེད་སྨན་གྱིས་གསོ་བར་བྱེདཿ ང་སྨན་པ་པདྨ་འབྱུང་གནས་ཡིནཿ ཆོས་བདུད་རྩི་འཆི་གསོས་ཀྱི་གདམས་ངག་བདོགཿ ལར་འདི་ལྟར་སྣད་བའི་གྱང་ལོག་ལཿ གཉིས་སུ་མེད་པའི་ལྷ་སྐུ་བཞེང་ཿ ད་ལྷ་བཟོ་པདྨ་འབྱུང་གནས་ཡིནཿ ཆོས་དབྱིངས་འོད་གསལ་གྱི་གདམས་ངག་བདོགཿ སེམས་ཉིད་ཀྱི་ཤོག་བུ་རྣལ་མ་ལཿ དོན་ཚིག་དང་བྲལ་བའི་ཡི་གེ་འདྲིཿ ང་ཡིག་མཁན་པདྨ་འབྱུང་གནས་ཡིནཿ ཆོས་ཡི་གེ་མེད་པའི་གདམས་ངག་བདོགཿ གླིང་བཞིར་སྐྱེས་པའི་མི་རྣམས་ལཿ དུས་གསུམ་མཁྱེན་པས་མངོན་ཤེས་འཆང་ཿ ང་མོ་མ་པདྨ་འབྱུང་གནས་ཡིནཿ ཆོས་གང་ལ་གང་འདུལ་གྱི་གདམས་ངག་བདོགཿ དུག་ལྔ་གདོན་ལྔ་དགྲར་ལངས་ཀྱང་ཿ ཡེ་ཤེས་ལྔ་ཡི་ཁོང་དུ་འགྲུབཿ ང་མཐུ་མཁན་པདྨ་འབྱུང་གནས་ཡིནཿ ཆོས་དྲུག་ལྔ་རྩད་གཅོད་ཀྱི་
༼༡༤༡བ༽གདམས་ངག་བདོགཿ འདོད་ཡོན་མི་སྤོང་ལམ་དུ་འཁྱེརཿ ཡེ་ཤེས་ལྔ་ལ་ལོངས་སྤྱོད་པཿ ང་བོན་པོ་པདྨ་འབྱུང་གནས་ཡིནཿ ཆོས་ལྟས་ངན་གཡང་བློན་གྱི་གདམས་ངག་བདོགཿ ལར་རིགས་དྲུག་སེམས་ཅན་བདེ་ལ་བཀོདཿ ལྷ་སྲིན་སྡེ་བརྒྱད་བྲན་དུ་འཁོལཿ ང་རྒྱལ་པོ་པདྨ་འབྱུང་གནས་ཡིནཿ ཆོས་ཁམས་གསུམ་དབང་སྡུད་གདམས་ངག་བདོགཿ ལས་སྣ་འཁོར་བ་དོང་སྤྲུག་འཛིནཿ བྱ་བ་རང་སེམས་ཅི་དུལ་བྱེདཿ ང་བློན་པོ་པདྨ་འབྱུང་གནས་ཡིནཿ ཅི་བྱས་ཆོས་འགྲོ་ཡི་གདམས་ངག་བདོགཿ འདུན་ཕུགས་ཕྱི་མ་དོན་དུ་གཉེརཿ ཁ་ངོ་དཀོན་ཆོག་གསུམ་ལ་ལྟཿ ང་བཙུན་མོ་པདྨ་འབྱུང་གནས་ཡིནཿ འཆི་གར་སངས་རྒྱས་གདམས་ངག་བདོགཿ མི་དད་པ་ཆེ་བའི་འདུན་མ་བསྐྱངསཿ མི་ཚེ་ཕྱི་མའི་བདེ་སྐྱིད་བྱསཿ ང་གཙོ་བོ་པདྨ་འབྱུང་གནས་ཡིནཿ ཆོས་འཕྲུལ་བ་རྩད་གཅོད་ཀྱི་གདམས་ངག་བདོགཿ བྱང་སེམས་སྙིང་རྗེའི་མཚོན་ཐོགས་ནསཿ རྣམ་རྟོག་ལོག་ལྟའི་དགྲ་བོ་བསདཿ ང་དཔའ་བོ་པདྨ་འབྱུང་གནས་ཡིནཿ ཆོས་འཁོར་བ་གཡུལ་ཟློག་གི་གདམས་ངག་བདོགཿ སྦྱིན་པ་གསུམ་གྱི་ནོར་ཕོག་ནསཿ སྐལ་ལྡན་བུ་རྣམས་ཆོས་ལ་བཀོདཿ ང་རྒད་པོ་པདྨ་འབྱུང་གནས་ཡིནཿ ཆོས་རྒད་པོ་མཛུབ་བཙུགས་ཀྱི་གདམས་ངག་བདོགཿ ཚུལ་ཁྲིམས་གསུམ་གྱི་སྐྱེལ་མ་ཁྲིདཿ མཐོ་རིས་ཐར་པའི་ལམ་ལ་འགྲོཿ ང་རྒན་མོ་པདྨ་
༼༡༤༢ན༽འབྱུང་གནས་ཡིནཿ ཆོས་རྒན་མོ་མཛུབ་ཁྲིད་ཀྱི་གདམས་ངག་བདོགཿ བཟོད་པ་གསུམ་གྱི་གོ་ཆ་གྱོནཿ ཉོན་མོངས་འཁྲུལ་པའི་དགྲ་བོ་འཇོམསཿ ང་སྟག་ཤར་པདྨ་འབྱུང་གནས་ཡིནཿ ཆོས་བདུད་བཞི་ལམ་ལོངས་ཀྱི་གདམས་ངག་བདོགཿ བརྩོན་འགྲུས་གསུམ་གྱི་རྒྱན་ཆ་བཏགསཿ སེམས་ཅན་ཡོངས་ལ་བག་མར་འགྲོཿ ང་སྨན་ཤར་པདྨ་འབྱུང་གནས་ཡིནཿ ཆོས་དྲང་དོན་ངེས་དོན་གྱི་གདམས་ངག་བདོགཿ བསམ་གཏན་གྱི་མཁར་རྫོང་བཟུང་ཿ སྣ་ཚོགས་ཡུལ་ལ་རྩེད་མོ་རྩེཿ དབྱིབས་པ་པདྨ་འབྱུང་གནས་ཡིནཿ ཆོས་སྐྱོན་མཚང་སུན་འབྱིན་གྱི་གདམས་ངག་བདོགཿ ཤེས་རབ་གསུམ་གྱི་མིག་གིས་བལྟཿ དབྱིངས་རིག་དབྱེར་མེད་ཀྱི་ནུ་ཞོ་འཐུང་ཿ ང་བུ་ཆུང་པདྨ་འབྱུང་གནས་ཡིནཿ ཆོས་བསམ་གཏན་ཉལ་ཆོག་གི་གདམས་ངག་བདོགཿ ལར་ཁམས་གསུམ་སེམས་ཅན་མི་རྟག་འཆིཿ དཔལ་ཡོ་ག་ཚེ་ཡི་རིག་འཛིན་གྲུབཿ ང་འཆི་མེད་པདྨ་འབྱུང་གནས་ཡིནཿ ཆོས་རྡོ་རྗེ་ཚེ་སྒྲུབ་ཀྱི་གདམས་ངག་བདོགཿ ཕྱི་འབྱུང་བ་བཞི་ལ་རག་མ་ལུསཿ ནང་ཤ་ཁྲག་ལུས་ལ་རྟེན་མི་འཆའཿ ང་སྐྱེ་མེད་པདྨ་འབྱུང་གནས་ཡིནཿ ཆོས་ཕྱག་རྒྱ་ཆེན་པོའི་གདམས་ངག་བདོགཿ རྡོ་རྗེ་ཡི་སྐུ་ལ་བགྲེས་རྒུད་མེདཿ བྱང་ཆུབ་ཀྱི་སེམས་ལ་གསལ་འགྲིབ་མེདཿ ང་རྒས་མེད་པདྨ་འབྱུང་གནས་ཡིནཿ ཆོས་
༼༡༤༢བ༽ཉོན་མོངས་ཞི་བྱེད་ཀྱི་གདམས་ངག་བདོགཿ ལུས་ལང་ཚོར་ལྡན་པ་ནད་ཀྱིས་འཇོམསཿ བཀྲག་མདངས་དང་ལྡན་པ་རྐྱེན་གྱིས་འཕྲོགཿ ང་ནད་མེད་པདྨ་འབྱུང་གནས་ཡིནཿ ཆོས་རྫོགས་པ་ཆེན་པོའི་གདམས་ངག་བདོགཿ མཐའ་འཁོབ་བོད་ཀྱི་རྒྱལ་པོ་ཁྱོདཿ མི་དགེའི་གླིང་གི་རྒྱལ་པོ་ལཿ གདོལ་པ་ཤ་ཟན་སྲིན་པོས་བསྐོརཿ མུ་གེ་ཡི་
འབངས་ལ་བརྟེན་པ་ནིཿ ཉམས་མི 
་དགའ་ཞིང་བག་མི་དྲོཿ སྲིན་མོ་མི་གཟུགས་བཙུན་མོ་ལཿ འདྲེ་མོ་དམར་ནག་མཚར་མོས་བསྐོརཿ དར་ཟབ་གསེར་གཡུས་བརྒྱན་པ་ནིཿ སྙིང་མི་སྡུག་ཅིང་ཡིད་མི་འོང་ཿ རྒྱལ་པོ་ཡིན་པ་གློ་བ་དགའཿ མངའ་ཐང་ཆེ་བ་མཆིན་པ་སྐྱིདཿ ཕྱག་ལ་འགྱིང་བ་ཕོ་བ་ཟོ་མཐོཿ ང་རྒྱལ་པོ་ཁྱེད་ལ་ཕྱག་མི་འཚལཿ འོན་ཀྱང་སྨོན་ལམ་འབྲེལ་པ་ཡིསཿ བོད་ཡུལ་དབུས་སུ་འོངས་ནས་མཆིསཿ རྒྱལ་པོ་ཆེན་པོ་དེར་བྱོན་ནམཿ ཞེས་གསུངས་ཕྱག་དེང་མཛད་པས་ཕྱག་སོར་ལསཿ རྫུ་འཕྲུལ་མེ་འབར་རྒྱལ་པོའི་ན་བཟའ་ཚིགཿ རྒྱལ་བློན་འཁོར་བཅས་ཀུན་གྱིས་མ་བཟོད་ནསཿ ཕྱག་ནི་གུག་རིལ་གྱང་འགྱེལ་བཞིན་དུ་བཙལཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ བོད་ཀྱི་རྒྱལ་པོ་དང་མཇལ་ཕྲད་མཛད་ཅིང་ཕྱག་ལ་མ་འཆམ་པའི་ལེའུ་སྟེ་རེ་གཅིག་པའོཿ ཿཐ་ཐ་ཉྲ་རྒྱ་རྒྱཿ ཿ