བསམ་ཡས་རབ་གནས་མཛད་པའི་ལེའུ།
དེ་ནས་རྟ་ཡི་ལོག་གཞུག་དགུན་ཟླ་འབྲིང་ཿ སྐར་མ་རྒྱལ་ལ་མཁན་སློབ་མེ་ཏོག་འཐོརཿ བོ་དྷི་སཏྭས་རབ་གནས་ལན་གསུམ་མཛདཿ དེ་ནས་ལུག་ལོ་དགུན་ཟླ་ར་བ་ཡིཿ བཅོ་ལྔ་ནམ་གྲུ་
༼༡༤༧ན༽ཟླ་བ་གཟས་བསྒྲིབས་ཉིནཿ རྡོ་རྗེ་དབྱིབས་ཀྱི་སྒྲུབ་པ་ཞག་བདུན་ཐོནཿ མངའ་བདག་རྒྱལ་པོར་དབང་བསྐུར་མཛད་ནས་སུཿ སློབ་དཔོན་པདྨས་རབ་གནས་མེ་ཏོག་འཐོརཿ དབུ་རྩེ་རིགས་གསུམ་མེ་ཏོག་འཐོར་བའི་ཚེཿ ནང་གི་ལྷ་རྣམས་ཕྱི་རུ་ཤར་གྱིས་འཐོནཿ ཕྱག་མཚན་ཐམས་ཅད་གདེངས་ཤིང་བསྒྱུར་བ་བྱུང་ཿ རྒྱལ་པོའི་ཐུགས་ལ་ནང་དུ་མི་ཚུད་སྙམཿ དབུ་རྩེ་མཆོད་རྟེན་བཅས་པར་ཐེངས་གསུམ་བསྐོརཿ སླར་ཡང་ལྷ་རྣམས་ལྷ་ཁང་ནང་དུ་བཞུདཿ སྒོ་སྲུང་ཁྲོ་བོར་མེ་ཏོག་འཐོར་བའི་ཚེཿ ཁྲོ་བོའི་མེ་རི་དུ་བ་སྔོ་ཕྱུར་བྱུང་ཿ མེ་རི་དམར་ཡམ་འབར་བ་ཀུན་གྱིས་མཐོང་ཿ རྒྱལ་པོ་མེ་ཤོར་སྙམ་ནས་ཐུགས་གཟེག་བྱེདཿ ཇོ་མོ་གླིང་གསུམ་མེ་ཏོག་འཐོར་བའི་ཚེཿ ཡ་མཚན་རྨད་དུ་བྱུང་བའི་ལྟས་བཟང་དང་ཿ ལྷ་ཁང་ཐམས་ཅད་འོད་ཀྱིས་གང་བ་བྱུང་ཿ པདྨའི་སྡོང་པོ་སྐྱེས་པ་ཀུན་གྱིས་མཐོང་ཿ 
བྱམས་པ་གླིང 
་དུ་མེ་ཏོག་འཐོར་བའི་ཚེཿ ལྷ་བྲན་སྤྲིན་གསེབ་ཡོངས་ནས་མཆོད་པ་ཕུལཿ བཻ་ཙ་གླིང་དུ་མེ་ཏོག་འཐོར་བའི་ཚེཿ ཚོན་སྣ་ལྔ་ཡི་འོད་ཟེར་དྲ་བར་འབྲེལཿ འཇམ་དཔལ་གླིང་དུ་མེ་ཏོག་འཐོར་བའི་ཚེཿ མེ་ཏོག་ཆར་པ་ལན་གསུམ་འབབ་པ་བྱུང་ཿ ཚང་མང་གླིང་དུ་མེ་ཏོག་འཐོར་བའི་ཚེཿ ལྷ་རྣམས་ཟབ་རྒྱས་ཆོས་ཀྱི་བགྲོ་བ་མཛདཿ སྔགས་པ་གླིང་དུ་མེ་ཏོག་
༼༡༤༧བ༽འཐོར་བའི་ཚེཿ ལྷ་རྣམས་ནམ་མཁའི་དབྱིངས་ལ་གཤེགས་བཞུད་བྱེདཿ ཁྲུས་ཁང་གླིང་དུ་མེ་ཏོག་འཐོར་བའི་ཚེཿ ལྷ་རྣམས་གསུང་བྱོན་གདམས་པ་ཆོས་སུ་སྨྲསཿ བསམ་གཏན་གླིང་དུ་མེ་ཏོག་འཐོར་བའི་ཚེཿ ཉི་ཟླ་དུས་གཅིག་ཤར་བ་ཀུན་གྱིས་མཐོང་ཿ ཨཱརྻ་པ་གླིང་རྟ་མགྲིན་མེ་ཏོག་འཐོརཿ རྟ་སྐད་ཐེངས་གསུམ་བཏོན་པ་ཀུན་གྱིས་ཐོསཿ འོན་པ་བྱིད་པོས་མ་ཐོས་དེར་མིང་བཏགསཿ འཁོར་སའི་སྨྱུག་རིང་སྐྱེས་པ་ཤར་གྱིས་བྱུང་ཿ སྒྲ་བསྒྱུར་གླིང་དུ་མེ་ཏོག་འཐོར་བའི་ཚེཿ རོལ་མོ་ཐམས་ཅད་རང་སྒྲ་དུས་གཅིག་འཁྲོལཿ སེམས་བསྐྱེད་གླིང་དུ་མེ་ཏོག་འཐོར་བའི་ཚེཿ མ་ཆགས་པདྨ་ཅན་ནི་བར་སྣང་བཞུགསཿ ལྕགས་དྲ་གླིང་དུ་མེ་ཏོག་འཐོར་བའི་ཚེཿ ཡོ་བྱད་བལྡབ་ཏུ་འཕེལ་ཞིང་དྲི་ཞིམ་ལྡང་ཿ པེ་ཀར་གླིང་དུ་མེ་ཏོག་འཐོར་བའི་ཚེཿ པེ་ཀར་དབུ་རྩེའི་ཐང་འཆམས་ཟོར་གཉན་བླངསཿ མཆོད་རྟེན་བཞི་ལ་མེ་ཏོག་འཐོར་བའི་ཚེཿ གདུགས་དང་རྒྱལ་མཚན་འཕན་དར་རང་ཕྱར་བྱུང་ཿ མགོན་ཁང་བཞི་ལ་མེ་ཏོག་འཐོར་བའི་ཚེཿ ལྡེར་ཚོས་ཁྲོམ་འུར་སྒོ་བཞིའི་ནང་དུ་སོང་ཿ རྡོ་རིང་བཞི་ལ་མེ་ཏོག་འཐོར་བའི་ཚེཿ ཟངས་ཀྱི་ཁྱི་མོ་བཞི་ཡིས་ཕྱོགས་བཞིར་མཆོངསཿ ཁྱི་སྐད་དགུ་སྟོན་རྡོ་རིང་རྩེ་ནས་ཉེརཿ ལྕགས་རི་སྐོར་གསུམ་མེ་ཏོག་འཐོར་བའི་ཚེཿ ཨ་རུ་རློན་པའི་ཆར་པ་
༼༡༤༨ན༽ལན་གསུམ་བབསཿ རྡོ་ཡི་མཆོད་རྟེན་མེ་ཏོག་འཐོར་བའི་ཚེཿ མཆོད་རྟེན་ལྔ་ལ་འཇའ་སྣ་རེ་རེ་ཟུགཿ ལྷ་མི་ཐམས་ཅད་ངོ་མཚར་མཆོག་ཏུ་གླིང་ཿ སྐྱིད་པའི་གླུ་ལེན་ཉམས་དགའི་རྐང་བྲོ་བརྡུང་ཿ མཛེས་པའི་ལྷར་བལྟ་སྙན་པའི་གཏམ་དགུ་གླེང་ཿ མི་རེས་གླུ་རེ་རྟ་རེས་བང་རེ་བརྒྱུགསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ བསམ་ཡས་རབ་གནས་མཛད་པའི་ལེའུ་སྟེ་རེ་བཞི་པའོཿ ཿཐ་ཐ་ཉྲ་རྒྱ་རྒྱཿ ཿ