བསམ་ཡས་ལ་བཀུར་སྟི་བྱས་པའི་ལེའུ།
དེ་ནས་ལྷ་ས་ཁྲ་འབྲུག་ལ་སོགས་པཿ གཙུག་ལག་ཁང་ནི་བརྒྱ་དང་རྩ་བརྒྱད་ལཿ སློབ་དཔོན་ཆེན་པོ་པདྨ་འབྱུང་གནས་ཀྱིསཿ མེ་ཏོག་འཐོར་ཞིང་རབ་ཏུ་གནས་པ་མཛདཿ ཁྲི་གདུགས་འོག་ན་འགྲན་ཟླ་མ་མཆིས་པའིཿ རྒྱ་གར་རྡོ་རྗེ་གདན་མཚུངས་བསམ་ཡས་འདིཿ མིག་གིས་མཐོང་ཚད་ངན་སོང་སྐྱེ་སྒོ་བཅདཿ གང་དག་འདི་ལ་སྐོར་བ་སུས་བསྐོར་བཿ བཤན་པ་ཡིན་ཀྱང་མཐོ་རིས་གནས་སུ་སྐྱེཿ གང་ཞིག་བསམ་ཡས་འདི་ལ་ཕྱག་འཚལ་བཿ ཐུན་མོང་ཁྱད་པར་ཆེས་ཆེར་རྒྱལ་པོར་འགྱུརཿ གང་ཞིག་བསམ་ཡས་རྣམ་ཐར་གཞན་བརྗོད་པཿ གང་གིས་ཐོས་པས་ལས་རྣམས་ཀུན་ལས་གྲོལཿ གང་ཞིག་བསམ་ཡས་དད་པས་པུས་འཛུགས་པཿ ཚེ་རིགས་བཙན་པ་རྒྱལ་རིགས་
༼༡༤༨བ༽འཁོར་ལོ་སྒྱུརཿ གང་ཞིག་བསམ་ཡས་འདི་ལ་ཐལ་སྦྱོར་བཿ མི་དེ་ཡང་དག་ལམ་ལ་གནས་པར་འགྱུརཿ གང་ཞིག་བསམ་ཡས་འདི་ལ་མཎྜལ་འབུལཿ གནས་སྐབས་མཐར་ཐུག་འབྲས་བུ་མཆོག་ཀུན་ཐོབཿ གང་ཞིག་བསམ་ཡས་འདི་ལ་མེ་ཏོག་འབུལཿ མི་རྣམས་དགའ་ཞིང་རབ་ཏུ་སྐྱིད་པར་འགྱུརཿ བསམ་ཡས་མེ་ཏོག་ཉལ་ཉིལ་སུས་འཆག་པཿ སྤྱིན་གནས་མཚུངས་མེད་སངས་རྒྱས་ཐོབ་པར་འགྱུརཿ གང་ཞིག་བསམ་ཡས་འདི་ལ་སྤོས་འབུལ་བཿ བལྟ་བར་འོས་ཤིང་ནོར་ཆེན་ལྡན་པར་འགྱུརཿ གང་ཞིག་བསམ་འདི་ལ་མར་མེ་འབུལཿ བྱེ་བ་ཁྲག་ཁྲིག་ལྷ་ཞལ་ངེས་མཐོང་འགྱུརཿ གང་ཞིག་བསམ་ཡས་མར་མེའི་རྒྱུན་འཛུགས་པཿ ཆོས་ཀྱི་འོད་ཟེར་བདག་ཉིད་གསལ་བར་འགྱུརཿ གང་ཞིག་བསམ་ཡས་འདི་ལ་དྲི་ཡབ་འབུལཿ ཡི་དྭགས་མི་སྐྱེ་ལོངས་སྤྱོད་ཆེ་བར་འགྱུརཿ གང་ཞིག་བསམ་ཡས་འདི་ལ་ཞལ་ཟས་འབུལཿ ནད་མུག་མེད་ཅིང་ཚེ་རིང་ལོངས་སྤྱོད་འཕེལཿ གང་ཞིག་བསམ་ཡས་འདི་ལ་སིལ་སྙན་འབུལཿ ཟབ་ཅིང་སྤོབས་པ་ཕུན་སུམ་ཚོགས་པར་འགྱུརཿ གང་ཞིག་བསམ་ཡས་འདི་ལ་གདུགས་འབུལ་བཿ ཀུན་མཆོད་བཀུར་སྟི་བྱ་བའི་འོས་སུ་འགྱུརཿ གང་ཞིག་བསམ་ཡས་འདི་ལ་ན་བཟའ་འབུལཿ མྱུར་དུ་བླ་མེད་བྱང་ཆུབ་ཐོབ་པར་འགྱུརཿ
༼༡༤༩ན༽འཕྲེད་བ་གདན་ཁྲི་སྟན་འབུལ་བྱེད་པཿ བདེ་བའི་ཡོ་བྱད་ཐམས་ཅད་དེ་ལས་འབྱུང་ཿ གང་ཞིག་བསམ་ཡས་ཡི་དམ་ལྷར་བསྒོམ་པཿ ཕྱག་རྒྱ་ཆེན་པོའི་རིག་འཛིན་ས་ལ་འགྲོཿ བསམ་ཡས་སེར་ཁ་ཙམ་ཞིག་སུས་བསུབས་པཿ མཚུངས་པར་བྱང་ཆུབ་མངོན་འཚང་རྒྱ་བར་འགྱུརཿ བསམ་ཡས་འདི་ལ་ཅོད་པན་སུས་འདོགས་པཿ མི་དེ་ལྷ་མའི་གོ་འཕང་ཐོབ་པར་འགྱུརཿ གང་ཞིག་བསམ་ཡས་འདི་ལ་ཞིག་གསོས་བྱེདཿ མྱ་ངན་མེད་པའི་བླ་མེད་བྱང་ཆུབ་འཐོབཿ གང་ཞིག་བསམ་ཡས་རྗེས་སུ་ཡི་རང་བའིཿ དགེ་དེས་སྡིག་བྱང་འབྲས་བུ་བླ་མེད་འགྱུརཿ གང་ཞིག་བསམ་ཡས་འདི་ལ་ཉོན་བཤད་བྱེདཿ སངས་རྒྱས་འཕྲིན་ལས་ཐམས་ཅད་རྒྱས་པ་ཡིནཿ གང་ཞིག་བསམ་ཡས་འདི་ལ་བཞུགས་སུ་གསོལཿ ཟད་མི་ཤེས་པའི་དགེ་བ་ཐོབ་བར་འགྱུརཿ གང་ཞིག་བསམ་ཡས་འདི་ལ་མཆོད་བྱེད་པཿ མི་ནོར་ཟས་གསུམ་གང་བསམ་འབྱུང་བར་འགྱུརཿ གང་ཞིག་བསམ་ཡས་འདི་ལ་ཐིགས་ཚགས་བྱེདཿ མི་དེ་དུས་མིན་འཇིགས་པ་བརྒྱད་དང་བྲལཿ གང་ཞིག་བསམ་ཡས་མེ་ཡི་འཇིགས་པར་སྲུང་ཿ འདི་དག་ཐམས་ཅད་མྱུར་དུ་སངས་རྒྱས་འགྲུབཿ གང་ཞིག་བསམ་ཡས་འདི་ལ་གནོད་བྱེད་བསྲུང་ཿ ཁ་ལག་སྤྱོད་གསུམ་སུན་འབྱིན་སུས་སྤོབས་པཿ ཕྱིར་མི་ལྡོག་ཅིང་བྱང་ཆུབ་
༼༡༤༩བ༽སེམས་དཔར་འགྱུརཿ གང་ཞིག་བསམ་ཡས་འདི་ལ་རབ་གནས་སྐྱོརཿ དུག་གསུམ་ནད་ཞི་རྒྱལ་ཁམས་བདེ་བར་འགྱུརཿ དེ་བཞིན་ལྷ་ས་ཁྲ་འབྲུག་གཙུག་ལག་ཁང་ཿ བསོད་ནམས་གསོག་པའི་ཞིང་མཆོག་དམ་པ་སྟེཿ དད་པ་ཅན་རྣམས་བསོད་ནམས་ཨ་རེ་བསགསཿ བཀུར་སྟི་མཛོད་ཅིག་རྗེ་འབངས་འཁོར་བཅས་རྣམསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ བསམ་ཡས་ལ་བཀུར་སྟི་བྱས་པའི་ལེའུ་སྟེ་རེ་ལྔ་པའོཿ ཿཐ་ཐ་ཉྲ་རྒྱ་རྒྱཿ ཿ