སློབ་དཔོན་རྣམ་གཉིས་བཞུགས་པར་ཞུས་པའི་ལེའུ།
དེ་ནས་མཁན་པོ་བོ་དྷི་ས་ཏྭ་དང་ཿ སློབ་དཔོན་ཆེན་པོ་པདྨ་འབྱུང་གནས་ཀྱིསཿ སླར་ཡང་རྒྱ་གར་ཡུལ་དུ་འབྱོན་དགོངས་ནསཿ མངའ་བདག་རྗེ་ལ་འདི་སྐད་བཀའ་སྩལ་ཏོཿ བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱིཿ ཐུགས་བསྐྱེད་དག་པའི་མངའ་ཐང་བཀའ་དྲིན་ལཿ བྲག་དམར་དཔལ་གྱི་བསམ་ཡས་གཙུག་ལག་ཁང་ཿ སྟག་ལ་རྨང་བཏིང་རྟ་ཡིས་ལོ་ལྔར་འབྱོངསཿ རབ་གནས་ཚར་ཞིང་རྒྱལ་པོའི་ཐུགས་དགོངས་རྫོགསཿ ད་ནི་རང་ཡུལ་འགྲོ་བས་གནང་བར་ཞུཿ རྒྱལ་པོས་སྤྱན་ཆབ་བཏོན་ནས་ཞུ་རྟེན་དུཿ ཟ་འོག་དགུ་བརྩེགས་གདན་ལ་སློབ་དཔོན་བཞུགསཿ ལྔ་བརྩེགས་གདན་ལ་མཁན་པོ་བཞུགས་སུ་གསོལཿ སྐུ་ལ་མཛེས་པ་ཞལ་དུ་བདའ་བ་དྲངསཿ ཐུགས་སུ་བྱོན་པ་ཡིད་འཇུག་མཐའ་བརྟེན་
༼༡༥༠ན༽ནསཿ གསེར་ཕྱེ་ཤ་བའི་རླིང་བུ་བཀང་ནས་ཕུལཿ བླ་གཡུ་སྙིང་འཁོར་ཞགས་པས་སྣ་དྲངས་ནསཿ ནོར་སྣ་ཁྱད་དུ་འཕགས་པའི་བརྒྱ་འབུལ་བྱསཿ ཕྱག་མང་བཙལ་ཞིང་ཐལ་མོ་སྦྱར་ནས་ཞུསཿ མཁན་སློབ་ཉི་ཟླ་ཟུང་ཅིག་དགོངས་མཛོད་དང་ཿ བཅུ་གསུམ་ལོན་ནས་ཡབ་ཀྱིས་བོར་བའི་བུཿ གདོང་དམར་བོད་ཀྱི་རྒྱལ་པོ་ཡུས་མི་ཆེཿ བཅོ་ལྔ་ལོན་ནས་རྒྱལ་སྲིད་དམག་ཇག་བཟུང་ཿ ལས་ཐབས་བྱ་ཕྱིར་བློན་པོར་གདམ་ང་བསྐུརཿ བཅུ་བདུན་ལོན་ནས་ཆོས་ཀྱི་བསམ་པ་སྐྱེསཿ ལྟོ་དཔྱད་བྱས་པས་མཁན་ཆེན་གདན་དྲངས་ཟེརཿ བསོད་ནམས་མི་ཆུང་མཁན་ཆེན་བོད་དུ་ཁུགསཿ ས་འདུལ་མཛད་པས་གེགས་ཀྱིས་བསྒྲུབ་མ་སྟེརཿ སློབ་དཔོན་སྤྱན་དྲོངས་འགྲུབ་ཅེས་ལུང་བསྟན་བྱུང་ཿ ལས་འཕྲོ་མི་ཞན་སློབ་དཔོན་བོད་དུ་བྱོནཿ བསམ་ཡས་བརྩིགས་པ་མི་འདྲ་སྐྱེས་པ་འདྲཿ སྐུ་དྲིན་ཡོད་དོ་རྩང་པོས་བརྗོད་མ་ཟདཿ ཁྲི་སྲོང་ལྡེའུ་བཙན་ཚེ་དུས་མ་བྱས་པརཿ སློབ་དཔོན་རྣམ་གཉིས་མི་བཞུད་བཞུགས་པར་ཞུཿ སྐུ་རྟེན་གྲུབ་ཀྱང་གསུང་རྟེན་མ་འགྱུར་བསཿ སྔགས་དང་མཚན་ཉིད་བོད་དུ་གསུང་བར་ཞུཿ བོད་ཡུལ་མུན་འོག་འཐིབས་པོ་ལམ་སྟོར་ལཿ བསྟན་པ་གཉིས་ཀྱི་སྒྲོན་མེ་སྤར་བར་ཞུཿ ཞེས་ཞུས་ཕྱག་བཙལ་མང་དུ་བཤུམ་པས་ཡིསཿ སློབ་དཔོན་གཉིས་ཀྱིས་བཀའ་བགྲོས་མཛད་
༼༡༥༠བ༽པ་ལཿ བོད་ཀྱི་མི་ལ་དད་མེད་ཆོས་སྣོད་མིནཿ བློན་པོ་ཆོས་ལ་གནག་ཅིང་གདུག་པ་ཆེཿ རྒྱལ་པོའི་རིགས་ཆགས་ཙམ་ནི་འབྲིང་ཁར་ཡང་ཿ སྔ་མ་ཡང་ནི་རྒྱལ་པོ་དགྱེས་པར་བྱསཿ ང་ཡང་ཕྱིན་ན་རྒྱལ་པོ་མི་དགྱེས་འདུགཿ འདྲི་ཀློག་སྒྲ་དང་རིག་པ་གཙོ་བོར་འདོནཿ བོད་དུ་ཆོས་བསྟན་ཚུགས་པར་ལྟ་ཅི་སྨྲོསཿ སློབ་དཔོན་གཉིས་ཀྱིས་མི་བཞུད་བཞུགས་པར་གནང་ཿ རྒྱལ་པོས་ཆོས་ཁྲིམས་དམ་པར་སྡོམས་ཤིག་གསུངསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ སློབ་དཔོན་རྣམ་གཉིས་བཞུགས་པར་ཞུས་པའི་ལེའུ་སྟེ་རེ་དྲུག་པའོཿ ཿཐ་ཐ་ཉྲ་རྒྱ་རྒྱཿ ཿ