བོད་ཀྱི་རྒྱལ་པོ་ཁྲི་སྲོང་ལྡེའུ་བཙུན་གྱིས་ཆོས་ཁྲིམས་བསྡམས་པའི་ལེའུ།
དེ་ནས་རྒྱལ་པོ་དགྱེས་ནས་ཕྱག་མང་བཙལཿ ཆོས་ཁྲིམས་དར་གྱི་མདུད་པ་ལྟ་བུར་བསྡམསཿ རྒྱལ་ཁྲིམས་གསེར་གྱི་གཉའ་ཤིང་སྦྲམ་ལྕི་དང་ཿ ཆོས་ཁྲིམས་དར་མདུད་འཇམ་དམ་གཉིས་སུ་སྤེལཿ བོད་ཡུལ་རུ་བཞི་མངའ་འོག་འདུས་ཚད་བསྡུསཿ ཁྲིམས་ཤོག་མ་བུ་དཀར་ནག་ཚིག་སྒྲགས་པཿ ཁྲིམས་ལ་ཆོས་ཁྲིམས་རྒྱལ་ཁྲིམས་ཐང་ཁྲིམས་གསུམཿ བོད་ཀྱི་རྒྱལ་པོ་ཁྲི་སྲོང་ལྡེའུ་བཙནཿ དེ་ནས་ཆོས་ཀྱི་རྒྱལ་པོ་ང་ཡིན་པསཿ ང་ཡི་མངའ་འོག་ཡོད་པ་ཐམས་ཅད་རྣམསཿ ལེགས་བྱས་ཉེས་བྱས་རྣམ་སྨིན་འབྲས་བུ་བསྐྱེདཿ ལེགས་པར་བྱེད་པ་དམ་པའི་ཆོས་ཡིན་པསཿ རབ་བྱུང་སྡེ་འཛུགས་སྔགས་པའི་སྡེ
༼༡༥༡ན༽འཛུགས་ཤིང་ཿ ཆོས་ལུགས་གཉིས་པོ་གང་མོས་ཅི་དགའ་གྱིསཿ མི་སྐྱ་ཕོ་མོ་ཐམས་ཅད་ཡིག་རྩིས་སློབསཿ ཆོས་བྲིས་ཆོས་ཐོན་ཆོས་སློབས་ཆོས་བཤད་གྱིསཿ བྱིས་པ་བརྡ་འཕྲོད་འདི་ཀློག་ཡོན་ཏན་སློབསཿ བཙས་པར་བཙས་སྟོན་སྔགས་པའི་མཆོད་གནས་བསྟེནཿ ན་བར་སྨན་བཅོས་རིམ་གྲོ་ནད་གཡོག་གྱིསཿ རྒས་པ་ཡི་མུག་མ་འཇུག་བཀུར་སྟིས་སྐྱོངསཿ ཤི་བར་བུམ་ཆོག་ཆོས་སྟོན་སྔགས་སྟོན་གྱིསཿ ཡོད་པས་མེད་ལ་བུ་ལོན་སྐྱང་འཕེལ་ཐོངསཿ མེད་པས་འཇོལ་ལ་སྨར་སྐྱིན་དྲིན་དུ་ཁུརཿ མ་འཁོར་བ་ལ་ཞུ་འཇལ་ཕྱེད་འཆག་གྱིསཿ དགྲ་ལ་ཟོན་ཆུག་གཉེན་ལ་ནང་གཤིན་གྱིསཿ གཞོན་པས་འཕམ་ལོང་རྒན་པའི་ངག་ལ་ཉོནཿ བུ་མང་རྒན་རིམ་གཞི་ཟུང་ནུ་ཆོས་གྱིསཿ བུ་མེད་པ་རྣམས་བུ་མོར་གོ་དམག་སུསཿ གཟའ་མི་ཁ་དུམ་མ་ཕྱེད་ཕ་མར་དྲིསཿ ཕོ་མོ་གང་མ་དགའ་ལ་ཕོག་རྫས་པོརཿ སྔར་ལོངས་ཕྱི་ཉོལ་བྱ་བ་མཐའ་རུ་ཐོནཿ བཟའ་མི་གྲོས་མེད་ཁྱོ་ཆུན་འཐེན་མ་བསྟེནཿ གྲོས་བྱས་རབས་ཆད་རླུང་ཁྱེར་ནོར་མ་བསྲེལཿ མི་ལ་མཐར་འདེད་མ་བཏང་བཟང་འགྲོགས་གྱིསཿ ཁྲེལ་གདོང་དོ་ཚ་མེད་པའི་ཡ་མ་སྲོང་ཿ ཁ་ཉེན་མི་རྣམས་སྡོད་ལུགས་མཁས་སུ་གྱིསཿ དྲག་པོ་དྲག་མོ་མ་ཐལ་རན་ཚོད་གཟུང་ཿ མ་བརྐུ་མ་འཕྲོག་མ་བརྡུང་མ་གསོད་
༼༡༥༡བ༽ཅིགཿ རབ་བྱུང་མཁན་པོས་སྡོམ་ཕོག་ཁྲིམས་བཅས་བཞིནཿ སྡེ་སྣོད་གསུམ་ནས་ཇི་ལྟར་བཤད་བཞིན་གྱིསཿ དགེ་འདུན་སྐོམ་དུ་དཀར་དང་ཇ་གསོལ་ཅིགཿ ཟས་སུ་འབྲུ་དང་བུར་སྒྲང་མར་ཐུད་གསོལཿ གོས་སུ་མ་ཐང་ཤམ་ངུར་སྨྲིག་ཆས་མཛོད་ཅིགཿ གནས་སུ་གཙུག་ལག་ཁང་སྡེའི་ནང་དུ་བཞུགསཿ ཆང་ནག་ཤ་དང་ལྷད་ཟས་མ་སྟེན་ཅིགཿ སྔགས་པ་བླ་མས་དམ་ཚིག་བསྒྲགས་པ་དང་ཿ རྒྱུད་ནས་ཇི་ལྟར་བཤད་པ་བཞིན་དུ་གྱིསཿ སྐོམ་དུ་ཆང་གསོལ་དགེ་འདུན་དཀོར་མ་འབགསཿ ཟས་སུ་ཅི་དགར་ལོངས་སྤྱོད་དུག་མ་ཟཿ གོས་སུ་དཀར་དམར་ནག་པོ་སྔགས་ཆས་གྱིསཿ གནས་སུ་སྒྲུབ་ཁང་གཟུང་ལ་ཡོན་ཏན་སྤེལཿ བསྟན་པ་བསྲུང་ཕྱིར་སྒྲུབ་པ་དང་དུ་ལོངསཿ རབ་བྱུང་དགེ་བར་མདོ་སྡེ་སེར་སྟོན་གྱིསཿ སྔགས་པའི་དགེ་བར་དཀྱིལ་འཁོར་སྔགས་སྟོན་གྱིསཿ མི་ནག་དགེ་བ་བསྟན་གཉིས་སྡེ་ལ་ཐོངསཿ མ་ནུས་པ་ལ་ཐམས་ཅད་སྙིང་རྗེ་བསྐྱེདཿ དབུལ་བའི་མི་ལ་སྦྱིན་པ་ཙམ་ཐོངས་བྱིནཿ ཁ་ཉེན་མི་ལ་སྐྱབས་ཁ་ཚིག་གྲོན་ཐོགསཿ ཟེར་ལོ་འདུག་ལོ་མང་པོ་བཏང་སྙོམས་ཞོགཿ ཆོས་འཆད་གང་འདུག་མོས་ཕྱག་རྒྱར་ནས་འཚོལཿ བསྟན་པ་མ་བསྲེ་རང་རང་ཆོས་ལུགས་གྱིསཿ བོན་འདི་མུ་སྟེགས་ཡིན་འདུག་སུས་མ་བྱེདཿ བོན་པོ་བསམ་ཡས་མི་མཐོང་ཡུལ་ཕུད་སོང་ཿ བོན་པོས་སྐྱིད་ཤོང་
༼༡༥༢ན༽ཕྱིན་པས་ཡོག་ཐང་བྱུང་ཿ གཙང་དུ་ཕྱིན་པས་དབེན་ཙ་ཁ་ཞེས་གྲགསཿ ང་ཡིས་ཆོས་ཁྲིམས་བསྡམས་ལྟར་མ་བྱས་ནཿ ངེས་པར་གཅོད་པ་རྒྱལ་པོའི་ཁྲིམས་ཡིན་པསཿ སྡོམ་བུས་མཁན་པོ་སློབ་བུས་སློབ་དཔོན་དང་ཿ གཡོག་པོས་དཔོན་པོ་བུ་ཚས་ཕ་དང་མཿ ནུ་བོས་ཕུ་བོ་ཆུང་མས་ཁྱོ་ཕོ་ལཿ མི་འཆམ་ལས་བྱས་བསད་དམ་དོ་བསྔོས་པཿ འདི་རྣམས་མེ་ལ་བསྲེག་གམ་ཆུ་ལ་བསྐྱུརཿ ངན་བྱས་ཨན་ལྕགས་བཙོན་དོང་ཁྲིམས་འཇིགས་འབེབསཿ ཡུལ་ཁྲིམས་མེད་ན་ངན་བྱེད་རྒྱགས་པས་འཇོམསཿ བེར་ག་ཤག་ཤག་གཅེར་ཕྱུང་རྐྱེ་ཐག་ཁྱིགསཿ གསུམ་ལྔ་བདུན་དགུ་བཅུ་གཅིག་བཅུ་གསུམ་ཁྲིམསཿ བཅོ་ལྔ་བཅུ་བདུན་བཅུ་དགུ་ཉེར་གཅིག་ཁྲིམསཿ རྩ་གསུམ་རྩ་ལྔ་རྩ་བདུན་རྩ་དགུ་ཁྲིམསཿ སོ་གཅིག་སོ་གསུམ་སོ་ལྔ་སོ་བདུན་དགུཿ ཞེ་གཅིག་ཞེ་གསུམ་ཞེ་ལྔ་ཞེ་བདུན་དགུཿ ང་གཅིག་ང་གསུམ་ང་ལྔ་ང་བདུན་དགུཿ རེ་གཅིག་རེ་གསུམ་རེ་ལྔ་རེ་བདུན་དགུའོཿ མེ་ཁྲིམས་རླུང་ཁྲིམས་ཆུ་ཁྲིམས་ལྕགས་ཁྲིམས་བཞིཿ ཤིང་ཁྲིམས་ས་ཁྲིམས་ནམ་མཁའི་ཁྲིམས་དང་བདུནཿ ཐོབ་བྱ་གང་ཡིན་གཟུགས་ཕུང་སྟེང་དུ་སྨིནཿ བསད་ན་སྟོང་འདོན་ཕྲོགས་ན་མིག་སྒྱིད་འདྲེགཿ བརྐུས་ན་འཇལ་འདོན་བྱི་བྱས་བྱི་རིན་ལེནཿ ཕྲ་མ་ར་འབོད་འགེལ་འཐབ་པ་བཙོན་
༼༡༥༢བ༽དོང་འཇུགཿ བརྡུངས་ན་གསོས་འདེད་མི་ཉན་རྣ་བ་འདྲེགཿ ཆོས་ལུགས་མཐུན་པར་མི་བྱེད་ཁྱུ་ནས་འཕུདཿ བརྫུན་གཏོར་མཐར་སྤྱུག་མི་འཇལ་གཏའ་མ་ལེནཿ མི་བདེན་པ་ལ་ཐམས་ཅད་ཡོ་ལོག་ཐོང་ཿ མི་ཚོད་ཕྲེང་བས་འཛིན་ཆུག་ཅེས་བསྒྲགས་སོཿ ནས་ལ་བྲེ་ཚད་ལྗིད་ལ་སྲང་ཚད་ཚུགསཿ ཟོང་ལ་གོང་རྒྱོབ་གསེར་ལ་ན་རར་ཐེགཿ རྐུན་སྲུང་ཁྱི་གསོས་ནམ་ཚོད་བྱས་འཛིན་ཆུགཿ ཁ་འོག་ལུས་ཆུག་མི་ལ་མགོ་སྡུད་དགོསཿ ཆོས་སྲིད་སྔགས་སྲིད་བློན་སྲིད་སྲིད་དུ་བཅདཿ གཅིག་མགོ་གཅིག་ཐོན་མི་དགེ་བསྐྱར་ལ་ཐོནཿ ལ་དང་འཕྲང་འཇམ་ཡུལ་ན་མི་ངན་མེདཿ མི་དགེ་བཅུ་སྤོངས་དགེ་བ་བཅུ་པོ་སྤེལཿ ཁ་ཉན་ཆགས་བདེ་དུད་འགྲོ་གཉའ་ཡངས་མཛོདཿ ཡོད་པ་བཞག་ཆོག་མེད་པ་ཚོལ་སླར་བཅུགཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ བོད་ཀྱི་རྒྱལ་པོ་ཁྲི་སྲོང་ལྡེའུ་བཙུན་གྱིས་ཆོས་ཁྲིམས་བསྡམས་པའི་ལེའུ་སྟེ་རེ་བདུན་པའོཿ ཿཐ་ཐ་ཉྲ་རྒྱ་རྒྱཿ ཿ