ལོ་ཙཱ་བ་གསུམ་ལུང་བསྟན་ནས་རྒྱལ་པོའི་ཐུགས་གསོས་པའི་ལེའུ།
དེ་ནས་དམངས་ཀྱི་ཕྲུག་གུ་རིག་པ་ཅནཿ ཁ་སྤྲོ་གསང་ཞིང་སྐྱེ་མཆེད་དྭངས་པ་དང་ཿ ཤེས་རབ་ཆེ་ཞིང་ཁ་ལྕེ་བདེ་བ་རྣམསཿ རྒྱ་གར་ཡུལ་དུ་སྒྲ་བསྒྱུར་སློབ་ཏུ་གཏོང་ཿ འཕྲལ་སྐད་ཆོས་སྐད་ཐམས་ཅད་སློབ་པ་ལཿ མཁན་པོས་སྒྲ་བསླབས་བསྒྱུར་དུ་བཅུག་པ་ནིཿ
༼༡༥༣ན༽ན་མོ་བུདྡྷ་ཡཿ ན་མོ་དྷརྨྨཱ་ཡཿ ན་མཿསངྒྷ་ཡཿ བོད་སྤྲུག་ཁ་ལྕེམ་བདེ་ཡེ་མ་ཤེསཿ མ་མོ་སྤུད་པ་ཡཿ མ་མོ་སྤང་མ་ཡཿ མ་མོ་ཕ་བ་ཡཿ སྒྲ་དེ་བོད་ཀྱི་སྐད་དུ་བསྒྱུར་བསླབས་པཿ སངས་རྒྱས་ལ་ཕྱག་འཚལ་ལོ་སྐྱབས་སུ་མཆིའོཿ ཆོས་ལ་ཕྱག་འཚལ་ལོ་སྐྱབས་སུ་མཆིའོཿ དགེ་འདུན་ལ་ཕྱག་འཚལ་ལོ་སྐྱབས་སུ་མཆིའོཿ བོད་སྤྲུག་ལྕེ་ཡིས་མ་འགྱུར་འདི་སྐད་ཟེརཿ ཕར་འགེལ་ཐག་ཐམ་མོ་སྦབས་ཧུ་ཧིཿ ཆོས་ཡ་ཐག་ཐམ་མོ་སྦབས་ཧུ་ཧིཿ འེ་འུན་ལ་ཐག་ཐམ་མོ་སྦབས་ཧུ་ཧིཿ སློབ་དཔོན་ཆེན་པོ་པདྨས་སྒྲ་བསྒྱུར་བསླབསཿ ན་མོ་གུ་རུ་བེཿ ན་མོ་དེ་ཝཱ་ཡཿ ན་མོ་ཌཱ་ཀཱི་ནྱཻཿ བོད་སྤྲུག་ཇི་ཙམ་བསླབས་ཀྱང་མ་ཤེས་ཏེཿ མ་མོ་སྦུ་འུ་ཡཿ མ་མོ་འདྲེ་བྷ་ཡཿ མ་མོ་བྷ་ཁྱི་ཡཿ རྒྱ་སྐད་དེ་དག་བོད་སྐད་བསྒྱུར་ནས་བསླབསཿ བླ་མ་ལ་ཕྱག་འཚལ་ལོ་སྐྱབས་སུ་མཆིའོཿ ཡི་དམ་ལ་ཕྱག་འཚལ་ལོ་སྐྱབས་སུ་མཆིའོཿ མཁའ་འགྲོ་ལ་ཕྱག་འཚལ་ལོ་སྐྱབས་སུ་མཆིའོཿ བོད་སྤྲུག་བྱིས་པས་དེ་ཡང་མ་ཤེས་ཏེཿ མནའ་མ་ཡ་ཐག་ཐམ་མོ་སྦབས་ཧུ་ཧིཿ བྱི་བ་མ་ཡ་ཐག་ཐམ་མོ་སྦབས་ཧུ་ཧིཿ ཤ་འབོ་ཐང་ཐག་ཐམ་མོ་སྦབས་ཧུ་ཧིཿ སློབ་དཔོན་རྣམ་གཉིས་བཞད་ཅིང་ཕྱག་རྡབ་མཛདཿ རྒྱལ་པོ་ཐུགས་མུག་མང་དུ་བཤུམས་པ་ཡིསཿ ཤ་ལྤགས་རུས་དིམ་བཞེས་པ་དུས་མི་འགྲོཿ
༼༡༥༣བ༽མཁན་སློབ་གཉིས་ལ་རྒྱལ་པོས་ཕྱག་ཕུལ་ནསཿ ཆོས་མེད་མཐའ་འཁོབ་བོད་ཡུལ་མུན་གླིང་འདིརཿ མི་ལ་སངས་རྒྱས་ཐོབ་པར་བྱ་དོན་དུཿ སློབ་དཔོན་རྣམ་གཉིས་སྤྱན་དྲངས་ལྷ་ཁང་བཞེངསཿ བཞུད་པར་བཤོལ་བཏབ་ཆོས་གསུང་ཞུ་བ་ཕུལཿ ཐུགས་རྗེས་དགོངས་ནས་བཞུགས་པར་བཀའ་ཡིས་གནང་ཿ ཆོས་ཁྲིམས་བསྡམས་ནས་གང་འཚམ་བྱིས་པ་བསྡུསཿ སྒྲ་ཙམ་མི་ཤེས་ལོ་ཙཱ་མི་འཁྱུར་བསཿ ཆོས་བསྟན་མི་ཚུགས་ཇི་ལྟར་བྱ་ན་གསུང་ཿ དུས་གསུམ་མཁྱེན་པ་སློབ་དཔོན་པདྨ་ཡིསཿ ཐབས་ཤིག་ཡོད་ཀྱི་རྒྱལ་པོ་ཐུགས་གློད་གསུང་ཿ རྒྱ་གར་རྡོ་རྗེ་གདན་གྱི་ཆོས་གྲ་ནསཿ ཤཱཀྱ་ཐུབ་པའི་ཉེར་གནས་ཀུན་དགའ་བོཿ ཚི་འཕོས་ལོངས་སྐུའི་ཞིང་ཁམས་མང་མྱུལ་ནསཿ མི་ལུས་ཆོས་ལྡན་སྐྱེ་བདུན་ཐ་མ་ནིཿ གཙང་གི་སྙེ་མོ་བྱེ་མཁར་བྱ་བ་ཡིཿ གནས་གཞི་ཞིག་གི་བྲང་ཁང་དམིག་གུ་ནཿ ཕ་མིང་པ་གོར་ཧེ་འདོད་བྱ་བ་ལཿ མ་མིང་བྲན་ཀ་བཟའ་སྒྲོན་སྐྱིད་ཀྱི་བུཿ གན་ཇག་ཐང་ཏ་ཞེས་པ་ལོ་བརྒྱད་པཿ ཕ་མ་གཉིས་ལ་བསླངས་ན་སྟེར་བར་མཆིཿ སྤྲུལ་པའི་ལོ་ཙཱ་རྩོད་མེད་གྲགས་པ་འབྱུང་ཿ དབུ་རུ་འཕན་ཡུལ་སྐབས་ཞེས་བྱརཿ ཡབ་མིང་སྐ་བ་བློ་ལྡན་ཞེས་བྱ་དང་ཿ ཡུམ་མིང་འབྲོ་བཟའ་རྡོ་རྗེ་ལྕམ་གྱི་བུཿ ཤཱཀྱ་ཐུབ་ཉེར་གནས་ཙུནྡ་ཚེ་འཕོས་པཿ སྐྱེས་མཆོག་སྐ་བ་དཔལ་བརྩེགས་ཞེས་བྱ་
༼༡༥༤ན༽བཿ ཕ་མ་གཉིས་ལ་བསླངས་ན་སྟེར་བར་མཆིཿ རུ་ལག་ཤངས་ཀྱི་དར་མ་སྒང་བྱ་བརཿ ཡབ་མིང་ཅོག་རོ་ཀླུ་ཡི་རྒྱལ་འབྱུང་དང་ཿ ཡུམ་ནི་འབྲང་བཟའ་མཛེས་མ་གཉིས་ཀྱི་བུཿ དགེ་བསྙེན་ལིཙྪ་བྱི་ནི་ཚེ་འཕོས་པཿ ཅོག་རོ་ཀླུ་ཡི་རྒྱལ་མཚན་ཞེས་བྱ་བཿ ཕ་མ་གཉིས་ལ་བསླངས་ན་སྟེར་བར་མཆིཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ ལོ་ཙཱ་བ་གསུམ་ལུང་བསྟན་ནས་རྒྱལ་པོའི་ཐུགས་གསོས་པའི་ལེའུ་སྟེ་རེ་བརྒྱད་པའོཿ ཿཐ་ཐ་ཉྲ་རྒྱ་རྒྱཿ ཿ