བཻ་རོ་ཙ་ན་གདན་དྲངས་པའི་ལེའུ།
དེ་ནས་རྒྱལ་བློན་དཔོན་གཡོག་བདུན་བྱས་ནསཿ རྐང་ཐང་ཉི་ཤུ་རྩ་ལྔ་རྟ་ཕྱིར་ཁྲིདཿ སྙེ་མོ་བྱེ་མཁར་གནས་གཞིའི་བདུན་དུ་བཞུགསཿ དེ་མིས་ཕྱག་དང་ཞེས་མི་ཤེས་པསཿ མཇལ་བར་མ་ནུས་སྒོ་ཕྱིའི་རྒྱུ་འགྲུལ་ཆདཿ ཕྱེད་སྐད་དུས་ན་བྱིས་པ་ཐལ་སྐྱ་བྱུང་ཿ ལུས་བསྐྱོད་ངག་གླུ་འབྲེང་པ་འཁོར་གཅིག་བཅིངསཿ རྒྱལ་པོའི་ཞལ་ནས་འདི་ལ་གཏམ་དྲིས་གསུངསཿ བློན་པོས་བྱིས་པའི་མདྲན་ཕྱིན་ཁྲིད་ནས་འོངསཿ པ་གོར་ཧེ་འདོད་ཞི་རུ་ཡོད་དམ་དྲིསཿ ཡོད་པ་ཡོད་དེ་ད་ལྟ་གཏམ་ཚོལ་སོང་ཿ བྲན་ཀ་བཟའ་སྒྲོན་སྐྱིད་དེ་ཤེས་སམ་དྲིསཿ ཤེས་པ་ཤེས་ཏེ་ད་ལྟ་མིག་ཚོལ་སོང་ཿ སུའི་བུ་ཡིན་དྲིས་པ་ཕ་ཡི་བུ་ཡིན་ཟེརཿ ཁྱོད་ཀྱི་ཕ་མའི་མིང་ལ་ཇི་སྐད་ཟེརཿ ཁོང་རང་མིང་ངོ་
༼༡༥༤བ༽ཤེས་པ་དེ་ཀ་ཡིཿ ཁྱོད་ཀྱི་ཁང་པ་གང་ཡིན་ཁྱིམ་ཡིན་ཟེརཿ དེ་ལ་རྒྱལ་པོ་དགྱེས་ཏེ་འདིར་ཤོག་གསུངསཿ ཕྱག་འཚོལ་བྱས་པས་ཁྱོད་ཀྱིས་སློབས་དང་ཟེརཿ བསླབས་པས་ཤེས་ནས་རྒྱལ་པོར་ཕྱག་བཙལ་ལོཿ ཿམགོ་ལ་ཕྱག་གིས་བྱིལ་བྱིལ་མཛད་ནས་སུཿ སློབ་དཔོན་གསུང་བའི་བུ་དེ་འདི་རང་ཡིནཿ ཁ་རྟགས་ལ་ཉེ་བཟང་ལ་སྤྱང་པོར་འདུགཿ ང་ཡི་ཕྱི་ལ་ཨེ་འགྲོ་གསུངས་པ་ཡིསཿ ཕྱིན་ཆོག་ཁྱོད་ཀྱི་རྟ་མཇུག་སྐྱོན་ཅིག་ཟེརཿ ཕ་དེས་ཆང་ཁུར་མ་དེས་མར་ནག་ཁུརཿ ཁྱིམ་དུ་སོང་བས་ཨ་ཏ་ཨ་མ་ཟེརཿ གཏམ་ཁུངས་ཆང་ཡིན་མུན་པ་མར་མེས་སེལཿ གོ་བརྡ་འཕྲོད་ནས་བུ་དེ་རྟ་ལ་བསྐྱོནཿ རྐང་ཐང་ཉི་ཤུའི་དཀྱིལ་བཅུག་སྔོན་ལ་བཏང་ཿ རྒྱལ་བློན་བཅུ་གཉིས་ཕྱི་ལ་ཐེན་བྱས་བསྡདཿ དེ་ནས་པ་གོར་ཧེ་འདོད་སྔོན་དུ་བྱུང་ཿ རྒྱལ་བློན་འཁོར་བཅས་ནང་དུ་སྤྱན་དྲངས་ནསཿ ཞུགས་ཆེན་སྒྲོན་ནས་དྭངས་མ་གསེངས་པོ་དྲངསཿ མངའ་བདག་འདིར་བྱོན་ཞབས་དོན་ཅི་བདོག་ཅེསཿ མངའ་བདག་རྒྱལ་པོས་འདིར་མཆིས་དོན་གཞན་མེདཿ ཁྱོད་ཀྱི་བུ་འདི་སློང་དུ་འོང་བ་ཡིནཿ ཅེས་ཀྱང་བུ་འདིང་ལ་བྱིན་ཅིག་གསུངསཿ ཕ་མ་གཉིས་ནི་ངུ་ཞིང་མ་དགའ་སྟེཿ གཅིག་པུ་འདི་ལས་བུ་གཞན་ངེད་ལ་མེདཿ ལོ་ཡང་བརྒྱད་ལས་མ་ལོན་ཅི་མཛད་དགོངསཿ དེ་ནས་མངའ་བདག་རྒྱལ་པོས་བཀའ་སྩལ་པཿ
༼༡༥༥ན༽བོད་སྤྲུག་གཞན་གྱིས་ལོ་ཙཱ་མ་ཤེས་པསཿ ལོ་ཙཱ་བསླབས་ནས་བོད་དུ་ཆོས་བསྒྱུར་འཇུགཿ སློབ་དཔོན་ཆེན་པོ་པདྨས་ལུང་བསྟན་ཡིནཿ ཁྱོད་ཀྱི་བུ་འདི་མིན་པས་མི་ཡོང་གསུང་ཿཔ་གོར་ཧེ་འདོད་ཤིན་ཏུ་སྡངས་ནས་སུཿ རྒན་རྒོན་གཉིས་ལ་སྙིང་བརྩེ་གཅིག་པུ་འདིཿ རྒྱ་གར་ཡུལ་རྟོལ་ཀྱང་ག་ལ་རྟོལཿ ལོ་བརྒྱད་ལོན་པས་ཆོས་བསྒྱུར་མི་ཡོང་ལགསཿ དེ་སྐད་མི་གསུང་ཞུ་ཞེས་ཕྱག་བཙལ་བསཿ རྒྱལ་པོའི་ཞལ་ནས་བུ་འདི་ལོ་གཞོན་ཡང་ཿ ད་ལྟ་འདི་ག་བཞིན་དུ་གཏོང་བ་མིནཿ ལོངས་ནས་འགྲོ་བ་ཡོང་དུས་གཏོང་བ་ཡིནཿ རྒན་རྒོན་གཉིས་ཀྱི་སྐྱིད་སྡུག་ངས་ཤེས་གསུངསཿ བུ་འདི་ང་ལ་མི་སྦྱིན་མེད་ཐབས་མེདཿ དེ་ནས་བུ་བྱིན་ཡབ་ཡུམ་ཁྲིད་ནས་འོངསཿ ཡུལ་དབུས་གང་བཟང་འདོམས་ལ་སྡོད་ཅིག་གསུངསཿ ཡུལ་དབུས་གནམ་ལ་ཁ་བལྟས་ཡར་ཀླུངས་བཟང་ཿ ཡབ་ཡུམ་ཡར་ཀླུངས་རོག་བ་རྩ་རུ་བཞགཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ བཻ་རོ་ཙ་ན་གདན་དྲངས་པའི་ལེའུ་སྟེ་རེ་དགུ་པའོཿ ཿཐ་ཐ་ཉྲེ་རྒྱ་རྒྱཿ ཿ