སློབ་དཔོན་རྣམ་གཉིས་དང་ལོ་ཙཱ་བ་གསུམ་གྱིས་ཆོས་བསྒྱུར་བའི་ལེའུ།
དེ་ནས་གན་ཇག་ཐང་ཏ་བསམ་ཡས་ཁྲིདཿ མཁན་སློབ་གཉིས་ཀྱི་དྲུང་དུ་བཞུགས་སུ་བཅུགཿ ལོ་བདུན་བར་དུ་དཀར་གསུམ་མངར་གསུམ་བྱིནཿ ཤེས་རབ་བསྐྱེད་ཐབས་བློ་འཕེལ་གཟུངས་སྒྲུབ་བཅུགཿ
༼༡༥༥བ༽དེ་ནས་ལོ་ཙཱ་སྒྲ་རྣམས་མཁས་པར་བསླབསཿ སྐ་བ་དཔལ་བརྩེགས་ཅོག་རོ་ཀླུའི་རྒྱལ་མཚནཿ རྒྱལ་པོས་འགུགས་པའི་ཕོ་ཉ་བཏང་ནས་བཀུགཿ ལོ་ཙཱ་སྒྲ་རྣམས་བསླབས་པས་མཁས་པར་ཤེསཿ དེ་ནས་རྒྱལ་པོས་སློབ་དཔོན་རྣམ་པ་གཉིསཿ བསམ་ཡས་སྒྲ་བསྒྱུར་གླིང་དུ་སྤྱན་དྲངས་ནསཿ གསེར་གྱི་ཁྲི་ལ་སློབ་དཔོན་པདྨ་བཞུགསཿ དངུལ་གྱི་ཁྲི་ལ་མཁན་ཆེན་བོ་དྷི་བཞུགསཿ གཡས་གྲལ་གཡོན་གྲལ་གབ་རྩེའི་གདན་གསུམ་ལཿ བཻ་རོས་གཙོས་བྱས་ལོ་ཙ་རྣམ་གསུམ་བཞུགསཿ དགུང་གྲལ་གཞི་ལ་རྒྱལ་པོ་ཉིད་བཞུགས་ནསཿ སློབ་དཔོན་གཉིས་ལ་གསེར་གྱི་མཎྜལ་རེཿ ཁྲུ་གང་པ་ལ་གསེར་གཡུའི་མེ་ཏོག་བཀོདཿ ལོ་ཙཱ་རྣམ་ལ་རཏྣའི་མཎྜལ་ཕུལཿ རྒྱལ་པོས་ཕྱག་བཙལ་ཆོས་གསུང་ཞུ་བ་ཕུལཿ ཨེ་མ་ཧོཿ རྒྱ་གར་ཆོས་ཀྱི་ཡུལ་ནས་བྱོན་པ་ཡིཿ བོད་དུ་ཉི་ཟླ་ཟུང་ཞིག་ཤར་བ་གཉིསཿ མདོ་སྔགས་སྣལ་མཚམས་མ་ལོག་གསུང་བར་ཞུཿ ལོ་ཙཱ་གསུམ་གྱིས་བོད་སྐད་བསྒྱུར་བར་ཞུཿ གསེར་ཕྱེ་ཀ་ཏོར་གང་གི་མེ་ཏོག་གཏོརཿ དེ་ནས་སློབ་དཔོན་པདྨ་འབྱུང་གནས་ཀྱིསཿ གླང་གི་ལོ་མཇུག་སྟག་གི་ལོ་འགོའི་བརཿ གསང་སྔགས་ཕྱི་པ་ཀྲཱྀ་ཡོག་སྡེ་གསུམ་རྒྱུདཿ ཅོག་རོ་ཀླུ་ཡི་རྒྱལ་མཚན་བསྒྱུར་ནས་གསུངསཿ གསང་སྔགས་ནང་པ་ཡོག་རྣམ་གསུམ་རྒྱུདཿ བཻ་རོ་ཙ་ནས་
༼༡༥༦ན༽ལོས་བསྒྱུར་ནས་གསུངསཿ སྐུ་རིམ་ཕྱི་སྐོང་རྒྱལ་པོའི་མདོ་བཅུ་བསྒྱུརཿ ཤེས་རབ་སྙིང་པོ་ཟབ་མོ་ལྟ་བའི་མདོཿ འདའ་ཀ་ཡེ་ཤེས་ངེས་དོན་སྒོམ་པའི་མདོཿ བཟང་པོ་སྤྱོད་པ་རྒྱ་ཆེན་སྨོན་ལམ་མདོཿ རྡོ་རྗེ་རྣམ་པར་འཇོམས་པ་ཁྲུས་ཀྱི་མདོཿ བྱང་ཆུབ་ལྟུང་བཤགས་ལས་སྒྲིབ་བཤགས་པའི་མདོཿ གཙུག་ཏོར་ནས་བྱུང་གདུགས་དཀར་བཟློག་པའི་མདོཿ གསང་བདག་གོས་སྔོན་ཅན་ནི་བསྲུང་བའི་མདོཿ མགོན་པོ་ཚེ་དཔག་མེད་པ་ཚེ་བསྲིང་མདོཿ ནོར་གྱི་རྒྱུན་མ་ལོངས་སྤྱོད་སྤེལ་བའི་མདོཿ ཡི་གེ་གཅིག་མ་སྙིང་པོའི་མདོ་རྣམས་བསྒྱུརཿ ནང་གི་སྐོང་དུ་ན་རག་ཆ་ལགས་དང་ཿ གསང་བའི་སྐོང་དུ་བསྙེན་སྒྲུབ་ཆ་ལག་བསྒྱུརཿ དེ་ནས་རྒྱལ་པོའི་ཐུགས་དམ་མ་ཆག་པཿ ཁ་ཏོན་དྲི་མེད་བཤགས་རྒྱུད་ཉིད་ལ་མཛདཿ ཟླ་རེ་བཞིན་དུ་དམ་སྐོང་དོང་སྤྲུགས་མཛོདཿ དགུང་ལོ་བཞི་བཅུ་ཞེ་དྲུག་ཚེ་དུས་ལཿ མི་ལོ་བཅུ་གསུམ་སླར་ལ་བསྲིངས་པར་གྱུརཿ དེ་བར་ཆོས་ཀྱི་བསྒྱུར་ཚུལ་མང་ཡོད་ཀྱང་ཿ འདི་རུ་ཡི་གེ་མང་དོགས་མདོ་ཙམ་བསྡུསཿ བཀའ་འདུས་ཆོས་ཀྱི་རྒྱ་མཚོ་འཐུད་དུ་བཅུགཿ ཆོས་ཚན་བརྒྱ་དང་སུམ་ཅུ་སོ་བརྒྱད་བསྒྱུརཿ ཞི་བ་རྡོ་རྗེ་དབྱིངས་ཀྱིས་གཙོ་བྱས་ནསཿ བདེར་གཤེགས་འདུས་པ་བརྒྱ་དང་སུམ་ཅུ་ལྔཿ གསང་སྔགས་ཕྱི་མདོ་བརྒྱ་དང་རྩ་གཅིག་
༼༡༥༦བ༽བསྒྱུརཿ སྒྱུ་འཕྲུལ་སྡེ་བརྒྱད་བླ་མེད་དོན་རྫོགས་འདུསཿ གསང་སྔགས་བསྒྱུར་ཚུལ་མཁའ་ལ་ཉི་ཤར་འདྲཿ དེ་ནས་མཁན་པོ་བོ་དྷི་ས་ཏྭ་དང་ཿ སྐུ་གཅིག་མཚན་མང་བནྡེ་ཡེ་ཤེས་སྡེསཿ འདུལ་བ་ལུང་དང་ལུང་རྩ་སྡེ་བཞི་དང་ཿ སྟོང་ཕྲག་བརྒྱ་པ་བྱམས་ཞུས་རྟག་ཏུ་ངུ་ཿ མདོ་ཆོས་རྒྱས་འབྲིང་རྣམ་གསུམ་མ་ལུས་བསྒྱུརཿ ལངྐར་གཤེགས་པ་བམ་པོ་བཅོ་ལྔ་དང་ཿ དཀོན་ཅོག་བརྩེགས་པ་སུམ་ཅུ་རྩ་ལྔ་དང་ཿ ཕལ་པོ་ཆེ་ལ་བམ་པོ་ཉིས་བརྒྱ་བརྒྱདཿ མྱ་ངན་འདས་པ་བམ་པོ་བརྒྱ་བཅུ་གཉིསཿ ལས་འབྲས་དྲང་དོན་བསྟན་པའི་མདོ་རྣམས་བསྒྱུརཿ སྐ་བ་དཔལ་བརྩེགས་གསང་སྔགས་ཕྱི་བ་བསྒྱུརཿ བྱ་རྒྱུད་ཀྲཱྀ་ཡ་སྡེ་སྡུག་སྡེ་ལྔ་དང་ཿ གཉིས་སྤྱོད་ཨུ་པ་ཡ་ཡི་རྒྱུད་བཞི་དང་ཿ རྣལ་འབྱོར་ཡོ་གའི་རྒྱུད་སྐོར་མ་ལུས་བསྒྱུརཿ གཞུང་ཆེན་བམ་པོ་སུམ་བརྒྱ་མ་འགྱུར་རོཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ སློབ་དཔོན་རྣམ་གཉིས་དང་ལོ་ཙཱ་བ་གསུམ་གྱིས་ཆོས་བསྒྱུར་བའི་ལེའུ་སྟེ་བདུན་ཅུ་པའོཿ ཿཐ་ཐ་ཉྲ་རྒྱ་རྒྱཿ ཿ