བོད་ཀྱི་བཻ་རོ་ཙ་ན་མཇལ་ཕྲད་མཛད་པའི་ལེའུ།
དེ་ནས་ལྷོ་བྲག་རྩངས་རྗེ་ཐེ་ལེན་བུཿ བློ་གསལ་རྩངས་སྔོན་ལེགས་ཅེས་བྱ་བཿ ཉི་ཤུ་རྩ་ལྔའི་ལོ་ལོན་སྒོ་མཐོན་དང་ཿ ཡ་རབས་བློ་དང་ལྡན་པའི་བཻ་རོ་གཉིསཿ སྔོན་ཞུགས་བྱས་པའི་སྔོན་ལ་རྒྱ་གར་ཕྱིནཿ ཟླ་བ་གཉིས་ན་རིགས་ངན་གཅན་འཕྲད་སླེབཿ གཅན་འཕྲང་པ་ཡིས་མི་གསོད་གསེར་འཕྲོག་པསཿ བཻ་རོ་ཙ་ནས་རྫུ་འཕྲུལ་བྱས་ནས་ཀྱང་ཿ རིན་ཆེན་ཟ་མ་ཏོག་ཅིག་ནང་དུ་ནིཿ ལྕགས་ཀྱི་སྤུ་གྲི་ཞིག་ཏུ་སྤྲུལ་ནས་བསྡདཿ འཕྲང་སྲུང་ཀུ་མཱ་ར་ནི་ངོ་མཚར་སྐྱེསཿ ལེགས་
༼༡༥༨བ༽གྲུབ་གསོད་བདོད་མཐའ་མི་སྤྱི་ཟླུམ་སྤྲུལཿ གཅན་འཕྲང་པ་ཡིས་མ་སོད་ཀེ་རེ་ལུསཿ དེ་ནས་བཻ་རོ་ཙ་ནས་མགུར་གསུངས་པཿ གསལ་ཁྱབ་ནམ་མཁའ་ལྟ་བུའི་ལུས་འདི་ལཿ བསད་དང་མ་བསད་ཤི་དང་མ་ཤི་མེདཿ སྲོག་འདི་བཅད་ན་ཁྱོད་ལ་སྡིག་པ་འོང་ཿ སྒྱུ་མའི་གསེར་ཕྱེ་བརྔན་པ་འདི་བཞེས་ལཿ ལམ་སྣ་ཇི་ལྟར་ཡིན་པ་བསྟན་དུ་གསོལཿ དེ་སྐད་གསུངས་ནས་གསེར་ཕྱེ་ཚོམ་ཅིག་བྱིནཿ འཕྲང་སྲུང་དགའ་ནས་ས་ལ་མ་དྲང་པོར་བསྟནཿ དེ་ནས་རྒྱ་གར་རྡོ་རྗེ་གདན་དུ་རྟོལཿ རྒྱ་གར་ཡུལ་རྣམས་མ་ལུས་ཁྱི་བཞིན་འཁྱམསཿ ཕྲད་ཚད་མི་ལ་དམ་ཆོས་སུ་མཁས་དྲིསཿ རྒྱ་གར་མཁས་པ་ཉི་ཤུ་རྩ་ལྔ་རྙེདཿ པྲ་བརྟྟ་དང་ཤཱི་ལནྡྲ་བོ་དྷིཿ ཛི་ན་མི་ཏྲ་ཛྙཱ་ན་སཱུ་ཏྲ་དང་ཿ ཨཱ་ནནྟ་དང་སུ་རེནྡྲ་བོ་དྷིཿ དྷརྨཱ་ཤྲཱི་དཱ་ན་ཤཱི་ལ་དང་ཿ ཙནྡྲ་གོ་མི་པཉྩ་ཛྙཱ་ན་དང་ཿ ཀ་ན་ཀ་དང་ཤཱཀྱ་ཤྲཱི་པྲ་བྷཿ པྲ་ཛྙཱ་ཝརྟྟ་ཀཱ་ལ་ག་ལ་བྷཿ བི་མ་མི་ཏྲ་གུ་ཧྱ་བུ་དྡྷ་དང་ཿ ཨཱརྻ་དེ་བ་ཀ་མ་ལ་ཤཱི་ལཿ དྷརྨཱ་གཱིརྟི་ཤཱནྟ་དེ་བ་དང་ཿ ཤྲཱི་བ་ལེ་དྷ་ར་ཙི་ཏྲ་མ་ཎི་དང་ཿ ཤཱིནྟི་ངྒརྦྷ་ཤཱི་ལ་མཉྫུ་དང་ཿ བུ་དྡྷ་གུ་བྷ་ཉི་ཤུ་རྩ་ལྔ་འདིཿ སྐུ་ལེ་ཁྲོ་བ་མི་མངའ་བྱང་ཆུབ་སེམསཿ པཎ་ཆེན་ཀུན་དང་མཇལ་ཚུལ་ཟུར་ཙམ་ནིཿ ཆུ་ལེན་པ་ལ་འཕྲིན་བསྐུར་ལན་མ་བྱུང་ཿ ཏ་ལའི་ལོ་མར་སྒྲ་འདི་བྲིས་ནས་བསྐུརཿ མཧཱ་ཀཱ་རུ་ཎ་བུ་དྡྷ་དྷ་རྨཱ་སངྒ་ཛྙཱ་ན་མོ་ཡཿ བོ་དྷི་ས་ཏྭ་ཀཱ་
༼༡༥༩ན༽རུ་ཎ་ས་མ་ཡཿ ཛྙཱ་ན་གརྦྷ་ཀུ་རུ་བྷ་སྨི་ནཿ ཞེས་བསྐུར་སྒྲ་ལ་མཁས་པ་རྣམས་ཀྱིས་བསྒྱུརཿ འཕགས་པའི་འཕགས་པ་བྱང་ཆུབ་སེམས་དཔའ་ཁྱོདཿ འགྲོ་བ་རིགས་དྲུག་བསོད་ནམས་མི་ལུས་སྐུཿ རིན་ཆེན་འབར་བ་སྡེ་སྣོད་གསུམ་གྱི་དབྱིགཿ ཡིད་བཞིན་ནོར་ལྟར་ཐུགས་རྗེའི་སྟོབས་མཆོག་ཅནཿ གསལ་ཁྱབ་ཉི་མ་ལྟ་བུའི་སྐུ་ལུས་ལཿ སྐྱེ་བ་བརྒྱུད་ནས་མི་ལུས་ཐོབ་པ་ཡིཿ བོད་ཀྱི་དགེ་སློང་དངོས་ན་བདག་དངོས་ཀྱིསཿ སྒྲིབ་པ་སྦྱང་ཕྱིར་དཀོན་ཆོག་རིན་ཆེན་ལཿ རྟག་པར་མཆོད་ཅིང་ཡུན་དུ་ཞབས་འཁོར་བསཿ མུན་པ་བསལ་ནས་བསོད་ནམས་ཚོགས་བསྐྱེད་ནཿ ཐུགས་རྗེ་མ་བསྐྱེད་སྨེན་ལམ་མ་དག་པསཿ འཕགས་པའི་བཞུགས་གནས་སེམས་ཅན་གནས་སུ་འགྱངསཿ སྟུག་པོའི་ཉི་ཞལ་འཕགས་པའི་འཐིབས་བསལ་འཁུམསཿ སྟོན་པའི་ཐུགས་རྗེའི་ཞབས་པས་གཟུང་གསོལ་ལོཿ དེ་ནས་སྒྲ་ལན་བསྐུར་བ་འདི་ལྟ་སྟེཿ ས་མ་ཡ་ཨ་བཱ་ར་མི་ཏ་ཛྙཱ་ནཿ ཞེས་བྱ་བ་བསྐུར་བཻ་རོ་ཙ་ནས་བསྒྱུརཿ སྔོན་གྱི་དམ་ཚིག་ཆེན་པོས་བདག་བསྐུལ་ནཿ ཁྱོད་དང་མི་འཕྲད་པ་ཡི་རང་དབང་མེདཿ འགྲོ་བའི་སེམས་ཉིད་དེ་བཞིན་གཤེགས་པ་ཡིནཿ སྲིན་བུ་པདྨ་ཡན་ཆད་སངས་རྒྱས་རྒྱུཿ རིགས་དྲུག་འགྲོ་བ་སངས་རྒྱས་མཉམ་གྱུར་ཡང་ཿ འཕགས་
༼༡༥༩བ༽པའི་འཕགས་པ་སྟོན་པ་ཁྱོད་ཀྱིས་རྙེདཿ དཀོན་ཅོག་རིན་ཆེན་བླ་མེད་མཆོད་གནས་ལཿ བསྔགས་པ་མཐོང་མ་ཚོགས་རྣམས་སྐྱེ་བའི་རྒྱུཿ སེམས་ཀྱི་རུས་པས་ཡན་ལག་ཐང་བཅད་ནསཿ དཀའ་བས་བྱོན་པ་བདག་ཀྱང་དགའ་བའི་མཆོགཿ ཤེས་པ་བསྡུར་ལ་ཁད་ཀྱིས་འཕྲད་བྱར་གོཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ རྒྱ་གར་གྱི་པཎ་ཆེན་ཉི་ཤུ་རྩ་ལྔ་དང་ཿ བོད་ཀྱི་བཻ་རོ་ཙ་ན་མཇལ་ཕྲད་མཛད་པའི་ལེའུ་སྟེ་དོན་གཉིས་པའོཿ ཿཐ་ཐ་ཉྲ་རྒྱ་རྒྱཿ ཿ