བཻ་རོ་ཙ་ནས་ཀུ་ཤ་ལྕགས་སྡོང་དུ་རྐང་མགྱོགས་བསྒྲུབས་པའི་ལེའུ།
དེ་ནས་གསེར་གྱི་པ་ཏྲ་གསེར་ཕྱེ་ཕུལཿ བོད་ཀྱི་རྒྱལ་པོའི་ལོ་རྒྱུས་ཞིབ་ཏུ་བསྙདཿ དགེ་སློང་ཆེན་པོ་བོ་དྷི་ས་ཏྭ་དང་ཿ སྔགས་པ་པདྨ་འབྱུང་གནས་བོད་ན་བཞུགསཿ རྒྱུ་དང་འབྲས་བུ་གཉིས་ཀྱི་ཆོས་སྒོ་ནསཿ སངས་རྒྱས་བསྟན་པ་གཉིས་ལྡན་གསལ་བར་མཛདཿ རྒྱལ་པོ་རྒྱུ་འབྲས་ཆོས་ཀྱིས་མ་ཚིམ་ཞིང་ཿ ཅིག་ལས་དང་ཉོ་ག་ཐོས་སི་ལསཿ ལུང་དྲངས་པ་ཡི་ཆོས་ཚོ་ཚོལ་དུ་བཏང་ཿ ཐུགས་ལ་གདགས་པར་ཞུས་པས་རབ་ཏུ་མཉེསཿ པཎ་ཆེན་རིམ་པ་བཞིན་དུ་ཆོས་བཀའ་བསྒོཿ ལེགས་གྲུབ་ངོ་སོ་འདོད་ནས་སྔོན་ལ་སོང་ཿ མ་དེ་མ་ཤིའི་གོང་དུ་ཆོས་འཆད་ཟེརཿ བསམ་པ་ལ་མ་ལུས་གཅན་འཕྲང་དམ་པོས་བསདཿ བཻ་རོ་ཙ་ནས་བསྡད་དེ་ཆོས་ལ་སྦྱངསཿ བླ་མས་ཚིམ་མམ་གསུངས་
༼༡༦༠ན༽ཀྱང་མ་ཚིམ་ཞུསཿ ལག་པ་སྔས་བཅུག་ཁ་སྦུབ་ཉལ་ནས་བསྡདཿ ནའམ་གསུང་པས་ན་ཞུས་ཅི་ན་གསུང་ཿ བཻ་རོས་ན་བ་བཞི་ཡི་མགུར་འདི་གསུངསཿ བདག་ནི་མཐོང་སྟེ་མ་འཕྲད་རང་སེམས་ནཿ མྱོང་སྟེ་མ་ཚིམ་ད་དུང་རང་སེམས་ནཿ ཆ་ཙམ་ཐོས་ཏེ་མ་གོ་རང་སེམས་ནཿ ནད་ནི་རྫོགས་ཆེན་སེམས་སྡེ་མ་བུས་ནཿ ནད་དེ་མཐའ་རུ་ཕྱིན་པའི་སྨན་ཞིག་ཞུཿ བླ་མ་དགྱེས་ཏེ་བདག་གིས་ཀུན་བསྟན་ནཿ ཁྱོད་ཀྱིས་ཅི་ལ་བརྡུགས་ནས་མ་བྱུང་གསུངསཿ བཻ་རོས་བརྡུགས་པ་བཅུ་ཡི་མགུར་འདི་གསུངསཿ ཕྱོགས་རིས་མེད་པའི་ལྟ་བ་དེཿ ལ་ཤན་གཉིས་ཀྱི་འཕྲང་ལ་བརྡུགསཿ དུས་གསུམ་སངས་རྒྱས་དགོངས་པ་དེཿ བྱིང་རྒོད་གཉིས་ཀྱི་འཕྲང་ལ་བརྡུགསཿ འབྲས་བུ་སྐུ་གསུམ་ལྷུན་གྲུབ་དེཿ བརྡ་དོན་མ་འཕྲད་འཕྲང་ལ་བརྡུགསཿ རྫོགས་ཆེན་བྱ་བྲལ་ལྷུན་གྲུབ་དེཿ དོན་དང་བྲལ་བའི་འཕྲང་ལ་བརྡུགསཿ སངས་རྒྱས་སྤྱོད་ཡུལ་རང་དབང་དེཿ སྤྱི་བླུགས་ཚངས་པའི་དབང་ལ་བརྡུགསཿ སྤྱོད་པ་བླང་དོར་བྲལ་བ་དེཿ འདོད་རྩོལ་གཉིས་ཀྱི་འཕྲང་ལ་བརྡུགསཿ ལམ་ལ་བགྲོད་དུ་མེད་པ་དེཿ ལུང་རིག་གཉིས་ཀྱི་འཕྲང་ལ་བརྡུགསཿ ཡེ་ཤེས་རང་བྱུང་ཟང་ཐལ་དེཿ བག་ཆགས་འཐུག་པོའི་འཕྲང་ལ་བརྡུགསཿ མན་ངག་སེམས་སྡེ་མ་བུ་འདིཿ ཟུང་ངུ་མ་འབྲེལ་འཕྲང་ལ་བརྡུགསཿ བཻ་རོ་
༼༡༦༠བ༽ཙ་ན་འགྲོ་བ་ལཿ འགྲོ་དང་འགྲོ་སྟེ་འཕྲང་ལ་བརྡུགསཿ ཞེས་གསུངས་བླ་མ་རབ་ཏུ་དགྱེས་པར་གྱུརཿ སྔར་གྱི་སྟེང་དུ་བྱང་སེམས་རྨད་བྱུང་བཤདཿ མདོ་རྩ་མདོ་ལུང་མདོ་འགྲེལ་ལ་སོགས་པཿ རྫོགས་པ་ཆེན་པོ་སེམས་སྡེ་མ་བུ་བཤདཿ རྫོགས་པ་ཆེན་པོ་འཁོར་བ་རྩད་གཅོད་རྒྱུདཿ རྒྱ་མཚོ་ཀློང་དང་ཀློང་ཁྲ་ཀློང་ནག་བཤདཿ མན་ངག་ཐུགས་ཐག་ཆོད་པ་མང་པོ་གནང་ཿ བློ་ལ་ཟིན་ཚད་བཟུང་ཞིང་མ་ཟིན་རྣམསཿ ཏ་ལའི་ལོ་མར་བྲིས་ནས་ཡང་ཆས་བྱསཿ དེ་ནས་བོད་དུ་འགྲོ་བར་དགོངས་པ་ལཿ གུ་རུས་ཁྱོད་ཀྱི་གྲོགས་པོ་ལེགས་གྲུབ་གུམཿ ཁྱོད་ཀྱང་བསད་འགྲོ་རྐང་མགྱོགས་སྒྲུབ་ཤིག་གསུངསཿ རྐང་མགྱོགས་མཁན་པོ་ཀུ་མཱ་ར་ལ་ཞུསཿ སྐུ་ཤ་ལྕགས་ཀྱི་སྡོང་པོ་ཅན་གནས་སུཿ རེ་ཏཱི་ལྕགས་ཀྱི་དྲེའུ་རྟ་རྐང་གསུམ་བསྒྲུབསཿ ཡུལ་དེའི་མི་རྣམས་ཁྱོད་འདིར་ཅི་བྱེད་ཟེརཿ ལན་དུ་བཻ་རོ་ཙ་ནས་མགུར་འདི་གསུངསཿ བདག་ནི་ལོ་ཙ་བཻ་རོ་ན་སྟེཿ དམིགས་མེད་མཁའ་ལྟར་དག་པ་ཆོས་ཀྱི་དབྱིངསཿ བདེ་ཆེན་འདུ་འབྲལ་མེད་པའི་ཀློང་དཀྱིལ་ནསཿ ཡ་མཚན་རྨད་བྱུང་བདག་གི་ལུས་འདི་རྙེདཿ མཁའ་ཀློང་རྣམ་དག་ཆོས་ཀྱི་དབྱིངས་ནས་འོངསཿ འཇིག་རྟེན་འདི་ཡི་དགོས་པའི་གཏམ་བགྱིས་ཏེཿ ཀུན་གཞི་མ་བཅོས་བདེ་ཆེན་ལྷུན་རྫོགས་པའིཿ མཁའ་ལྟར་དག་པའི་བྱང་ཆུབ་སེམས་ཉིད་འདིཿ རིག་པའི་ཀློང་ནས་ཐུགས་རྗེའི་ཉི་མ་ཤརཿ དུས་གསུམ་རྒྱལ་བའི་དགོངས་པ་བདག་གིས་རྙེདཿ སྐྱེ་མེད་མི་དམིགས་ཡི་གེ་
༼༡༦༡ན༽ཨ་གཅིག་ལསཿ དགོངས་པའི་དོན་དུ་བྱ་བ་དེ་ལས་མེདཿ ཨ་ནི་ཡེ་ན་ས་མི་དམིགས་སྐྱེ་མེད་དེཿ སྐྱེ་མེད་ཆོ་འཕྲུལ་དགོས་དགུ་འབྱུང་བའི་ཕྱིརཿ དེ་ལས་བྱུང་བའི་དོན་ནི་འདི་རྣམས་སོཿ ནོར་ནི་མ་མཆིས་མཁས་པའི་མན་ངག་འཆང་ཿ བླ་མ་མ་མཆིས་པཎ་ཆེན་ཉི་ཤུ་ལྔཿ འཁོར་ནི་མ་མཆིས་ལྷ་སྲིན་སྡེ་བརྒྱད་བསྐོརཿ ཆུང་མ་མ་མཆིས་ཀུན་ཏུ་བཟང་མོ་ཡིནཿ གྲོགས་ནི་མ་མཆིས་མ་མོ་མཁའ་འགྲོའི་གྲོགསཿ རྟ་ནི་མ་མཆིས་ཚོགས་བརྒྱད་ཡིད་ཀྱི་རྟཿ བུ་ནི་མ་མཆིས་རིག་པའི་ཡེ་ཤེས་བུཿ ལྷ་ནི་མཆིས་རང་སེམས་དོན་གྱི་ལྷཿ མཐུ་ནི་མ་མཆིས་དུག་གསུམ་རྩད་ནས་གཅོདཿ རྟེན་ས་མ་མཆིས་དོ་ནུབ་རྟེན་ས་མཛོདཿ ཅེས་གསུངས་འདུས་པའི་ཚོགས་རྣམས་ཡི་རང་བྱུང་ཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ བཻ་རོ་ཙ་ནས་ཀུ་ཤ་ལྕགས་སྡོང་དུ་རྐང་མགྱོགས་བསྒྲུབས་པའི་ལེའུ་སྟེ་དོན་གསུམ་པའོཿ ཿཐ་ཐ་ཉྲ་རྒྱ་རྒྱཿ ཿ