བཻ་རོ་ཙ་ནས་རྐང་མགྱོགས་བསྒྲུབས་ནས་བོད་དུ་འབྱོན་པར་ཆས་པའི་ལེའུ།
དེ་ནས་རྐང་མགྱོགས་གྲུབ་སྟེ་ཆོས་རྣམས་ཁུརཿ ཡུལ་དཀོ་ཤ་ཙནྡན་གླིང་དུ་བྱོནཿ དཀོའི་རྒྱལ་པོ་རཱ་ཧུལ་བྱི་བྱི་འོངསཿ རས་ཀྱི་བར་ཀ་ཏ་ཞིག་གུས་ཕུལ་ནསཿ བོད་ཀྱི་བནྡི་སྐྱེ་མེད་ཆོས་བྱ་བཿ ཇི་ལྟ་བུ་ལ་ཟེར་བ་གསུངས་དང་ཟེརཿ བར་ཏ་སྐུ་ལ་གསོལ་ནས་མགུར་གསུངས་པཿ བདག་ནི་རྣམ་པར་སྣང་
༼༡༦༡བ༽མཛད་དེཿ འགྲོ་བ་རྣམ་པ་སྣ་ཚོགས་ལཿ གསལ་བྱའི་ཉི་མ་བྱ་དགོངས་ནསཿ དཀའ་བ་བཅུ་དྲུག་དཀའ་ལས་བགྱིསཿ སྒྱུ་མའི་ཕུང་པོ་ལུས་བཤིག་ནསཿ སྔོན་པའི་ཐུགས་རྗེ་བདག་ལ་ཤརཿ ཀུན་ལ་སྣང་བར་མཛད་པས་ནཿ མིང་ཡང་རྣམ་པར་སྣང་མཛད་ཡིནཿ མིང་དང་དོན་དུ་བདག་མཐུན་ཏེཿ ཆོས་དབྱིངས་མཁའ་ལྟར་དག་པའི་གཏིང་རྫོགས་པསཿ སངས་རྒྱས་ངོ་བོར་མ་གྱུར་གཅིག་ཀྱང་མེདཿ སྟོན་པའི་ཞལ་སྐྱིན་བདག་གིས་བཤད་པ་འདིཿ རྒྱལ་པོའི་ཐུགས་ལ་དགོངས་ལ་བག་ཙམ་ཉོནཿ དམིགས་སུ་མེད་པའི་བྱང་ཆུབ་སེམསཿ གཟུང་དང་འཛིན་པ་གཉིས་དང་བྲལཿ ཐ་སྙད་ཚིག་གི་སྒྲ་སྤངས་ནསཿ དེ་ཉིད་གསལ་ལ་མ་ཡེངས་པཿ སྐྱེ་བ་མེད་པའི་ཆོས་དབྱིངས་ཡིནཿ དགོངས་པའི་དོན་དུ་དེ་བཞག་གོཿ དེ་ཉིད་མ་ནོར་སྒོམ་པསཿ སྐྱེ་བ་ཕྱི་མ་མི་ལེན་ངེསཿ ཞེས་གསུངས་རྒྱལ་པོ་རབ་ཏུ་མཉེས་གྱུར་ནསཿ འཕགས་པ་བྱམས་སྐུ་གསེར་ལས་བྱས་ཤིག་ཕུལཿ དེ་ནས་བོད་དུ་འགྲོ་བར་ཆས་པ་ལཿ རྒྱལ་བློན་པཎྜི་ཏ་ཀུན་རྨི་ལྟས་ལོགཿ གྲོང་ཁྱེར་སེར་སྐའི་ཤཱི་ལ་ནཱ་ལནྡྲའིཿ སྒོ་དྲུང་ཚོགས་ནས་བགྲོས་ཤིང་པྭ་མོ་ཕབཿ ཡ་གི་རྫོགས་པ་ཆེན་པོ་མན་ཆད་ནསཿ མ་གི་ཉན་ཐོས་ཐེག་པ་ཡན་ཆད་ཀྱིཿ མདོ་སྔགས་ཆོས་རྣམས་བོད་དུ་ཁྱེར་བས་ལནཿ དེ་ནས་རྐང་
༼༡༦༢ན༽མགྱོགས་བཏང་སྟེ་གསོད་པར་བྱསཿ རྐང་མགྱོགས་མཁན་པོས་བཻ་རོའི་གན་དུ་བརྒྱུགསཿ མཁས་པ་བདུན་པོའི་རྨི་ལམ་བཟླས་པ་ནིཿ ཀྱེ་ཧོ་གྲོགས་པོ་བྱང་ཆུབ་སེམས་དཔའ་སྙན་གསོན་དང་ཿ རྒྱལ་པོ་ཀུཀྐུ་རཱ་ཛ་འདི་སྐད་ཟློཿ ཐེག་པའི་རྒྱལ་པོ་མན་ངག་བདེ་ཆེན་འདིཿ རྡོ་རྗེའི་ཡང་ཐེག་མན་ངག་དོན་གྱི་བླཿ ཚེ་གཅིག་འབྲས་བུ་ཐོབ་པའི་མན་ངག་ཆོསཿ གབ་པའི་མན་ངག་སེམས་ལ་སྦས་པ་ལསཿ དགོངས་པའི་ཉམས་སུ་བདག་ལ་འདི་ལྟར་བྱུང་ཿ ཀུན་ལ་སྙོམས་པའི་ཉི་མ་མཆིས་པ་ལསཿ ས་བརྒྱད་བྱང་ཆུབ་སེམས་དཔའི་སྤྲུལ་པ་ནིཿ སྒྲིབ་པ་སྦྱངས་པའི་གནོད་སྦྱིན་མགོ་ཅན་གཉིསཿ འོ་སྐོལ་རྒྱ་གར་ཡུལ་དུ་མཆིས་པ་ལསཿ ཉི་མ་སྨིན་གྲག་བཅུག་ནས་ཁྱེར་བ་རྨིསཿ རྡོ་རྗེ་གདན་གྱི་མན་ངག་མ་ཤོར་རམཿ པཎྜི་ཏ་ཡིས་རྐང་མགྱོགས་ལ་འུར་ཐོདཿ དེ་སྐད་གསུངས་ནས་སྤྱན་སྔར་མཆིས་པ་ལགསཿ དངོས་གྲུབ་ཐོབ་ནས་ད་ནི་གཤེགས་པར་རིགསཿ འཇམ་པའི་དཔལ་བཟང་ནོར་བུ་ཁྱེར་བ་རྨིསཿ བདག་ཉིད་མ་ཡི་མིག་ཕྱུང་ཁྱེར་བ་རྨིསཿ ཤྲཱི་སིངྷའི་སྙིང་ཕྱུང་ཁྱེར་བ་རྨིསཿ ཀུན་དགའ་མོ་ཡིས་བྱང་ཆུབ་ཤིང་བཅད་ནསཿ བོད་དུ་ཁྱེར་བ་རྨིས་པ་ལ་སོགས་བཤདཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་པ་རྒྱས་པར་བཀོད་པ་ལསཿ
༼༡༦༢བ༽བཻ་རོ་ཙ་ནས་རྐང་མགྱོགས་བསྒྲུབས་ནས་བོད་དུ་འབྱོན་པར་ཆས་པའི་ལེའུ་སྟེ་དོན་བཞི་པའོཿ ཿཐ་ཐ་ཉྲ་རྒྱ་རྒྱཿ ཿ