བཻ་རོ་ཙ་ནས་ཆོས་གསུང་བ་ལ་ཕྲ་མ་བྱུང་བའི་ལེའུ།
དེ་ནས་བཻ་རོ་ཙ་ནས་ལན་བཏབ་པཿ མི་རུ་སྐྱེས་པས་སྐྱེ་བ་གཞན་ལས་འཕགསཿ སྨོན་ལམ་དག་པས་རྒྱ་གར་ཡུལ་དུ་རྟོལཿ དངོས་གྲུབ་ཐོབ་པས་རྫུ་འཕྲུལ་རྐང་མགྱོགས་གྲུབཿ བླ་མ་མཆོད་ལས་ཆོ་རིགས་བཙུན་པར་སྐྱེསཿ དམ་ཚིག་བསྲུངས་པས་འདི་རུ་བསམ་དགུ་འགྲུབཿ སྒྲིག་པ་བྱང་བས་མཁས་པའི་བཀའ་བགྲོས་པཿ གཞུང་ལུགས་བཟང་པོ་ཀུན་གྱིས་བསྟན་པར་འཁུརཿ དགོས་དགུ་ལུས་ལ་ཚང་བས་བདག་གིས་གྲོགས་སུ་བཙལཿ ལུས་སྲོག་ཕ་མས་བསྐྱེད་ཀྱང་སྲིད་སྲོག་གྲོགས་པོས་བཏོནཿ ཁྱོད་དང་འགྲོགས་པས་བདག་གིས་ཡང་དག་བྱང་ཆུབ་བརྙེསཿ བོད་ཀྱི་རྒྱལ་ཁམས་མ་རིག་མུན་པ་ཀུན་སེལ་བསཿ འགྲོ་བ་ཇི་ལྟར་སྨིན་ཅིང་གྲོལ་བར་བྱ་བའི་དོནཿ ཀུ་མཱ་ར་ལ་དགེ་བའི་རྩ་བ་ཡོངས་སུ་བསྔོཿ རྐང་མགྱོགས་ལེགས་པར་གྲུབ་པས་ད་ནི་བདག་ཀྱང་འགྲོཿ བལ་ཡུལ་ཙམ་དུ་སྙིང་གཏམ་བཟླ་ཡི་གྲོགས་པོས་སྐྱོལཿ ཞེས་གསུངས་གསེར་གྱི་པ་ཏྲ་གཅིག་བྱིན་ནོཿ ཿདེ་ནས་ཀུ་མཱ་ར་ཡིས་གཅན་འཕྲང་བསྒྲལཿ འཕྲང་སྲུང་པ་ལ་བརྔན་པ་བྱིན་ནས་བཀྲོལཿ རྐང་མགྱོགས་བྱུང་ནས་བནྡེ་འདྲི་བ་ནཿ མ་མཐོང་གནོད་སྦྱིན་ཤ་བའི་ཡིབ་ཞུ་ཅནཿ གླང་འཁོར་སྐྱ་བོ་ལག་ན་ཐོགས་ཤིག་སོང་ཿ
༼༡༦༣ན༽ད་ཙམ་བོད་ཡུལ་མཐིལ་དུ་སླེབ་བགྱིས་ཤིགཿ ཀུ་མཱས་མནའ་དག་བཅུག་ནས་སེར་སྐྱར་བརྒྱུགསཿ བོད་བན་གསད་བྱས་རྐང་མགྱོགས་ཟླ་སྤྲན་ཡོང་ཿ གཅན་འཕྲང་པར་དྲིས་ངག་བཅུག་བཞིན་དུ་ཟེརཿ དེ་ནས་བཻ་རོ་ཙ་ན་བལ་ཡུལ་སླེབཿ གསེར་སྐུ་འཕགས་པ་ཤིང་ཀུན་ལ་ཕུལ་ནསཿ འབུལ་བ་བཞེས་པའི་ཆེད་དུ་མགུར་འདི་གསུངསཿ སྒྲིབ་རྐྱེན་མི་མངའ་དུས་གསུམ་རྒྱལ་བའི་སྐུཿ ཐུགས་རྗེའི་བཀའ་བཙན་འཛམ་གླིང་ནམ་མཁའ་འདྲཿ སྟོན་པའི་ཐུགས་རྗེ་ཕྱོགས་ལྷུང་མི་མངའ་ཡང་ཿ འཁོར་བའི་ལམ་ནི་མཐའ་མེད་རྒྱ་མཚོ་འདྲཿ ཐུགས་རྗེས་འཁོར་བའི་རྒྱ་མཚོ་སྐོམ་པའི་ཕྱིརཿ དུས་གསུམ་རྒྱལ་བའི་སྐུ་ལ་བཟོད་པར་གསོལཿ ཅེས་པའི་མགུར་གསུངས་འཕགས་པའི་སྐུ་ཕུལ་ལོཿ ཿདེ་ནས་བོད་དུ་བྱོན་པའི་ལམ་ཁ་རུཿ རྒྱ་གར་བརྟན་མ་རེ་ལྕམ་ཁ་བ་བཏང་ཿ བཀའ་འདི་བདེན་བརྫུན་བརྟག་པའི་མགུར་གསུངས་པཿ དུས་གསུམ་སངས་རྒྱས་རང་གི་སེམས་ཉིད་དེཿ སྐྱི་ཤི་མེད་པ་དུས་གསུམ་སངས་རྒྱས་སོཿ ཡ་རབས་བློ་དང་ལྡན་པའི་སྐལ་ལྡན་ལཿ སེམས་ཀྱི་ཉི་མ་གསལ་བར་བྱ་བའི་ཕྱིརཿ བསམ་པ་བཟང་པོ་གསེར་དང་འདྲ་བ་ཡིསཿ བོད་ཀྱི་ཡུལ་ནས་རྒྱ་གར་ཡུལ་བར་ལཿ བཀའ་བ་བཅུ་དྲུག་བསྡོས་ནས་མན་ངག་བཙལཿ བཀའ་བ་གཅིག་གིས་བར་དུ་མཆོད་
༼༡༦༣བ༽པསཿ བཀའ་འདི་བདེན་ན་ཁ་བ་འདི་ཆོད་ཅིགཿ ཅེས་གསུངས་རེ་ལྕམ་ལྷ་མོ་དམར་མོའི་ཚུལཿ སྤྲིན་གསེབ་སྐུ་བསྟན་བྱས་བྲན་ཁས་བླངསཿ དེ་ནས་བསམ་ཡས་བྱོན་པས་རྒྱལ་པོ་ཉིདཿ ཟ་འོག་གུར་ཁྱིམ་འདབ་ན་བཞུགས་པ་ལཿ བཻ་རོས་རྗེ་དང་མཇལ་བའི་འཕྲིན་བསྐུར་བསཿ རྒྱལ་པོ་དགྱེས་ནས་ལམ་ལ་སྣ་ལེན་མཛདཿ བཻ་རོས་གུར་འདབ་བྱང་ངོས་སློག་ནས་བྱོནཿ རྗེ་ཡིས་བཀའ་སྩལ་དམ་ཆོས་ལོན་ནས་བདོགཿ རྒྱ་གར་ཕྲག་དོག་ཕྲ་མང་མི་གསན་ཞུཿ གསོལ་བས་རྒྱལ་པོ་དམ་ཆོས་ལོན་པས་དགྱེསཿ དབུ་སྐྲ་ཐེམ་པར་བཀྲམ་ནས་ནང་སྤྱན་དྲངསཿ འབངས་ནས་ཡར་བཏོན་དབུ་ཡི་མཆོད་གནས་མཛདཿ རྒྱལ་པོའི་ཆིབས་པ་མཚའ་ལུ་མེ་སྟག་ལཿ སྟག་ལྤགས་སྟན་སྟེང་སེང་ལྡིང་སྒ་གཏད་ནསཿ གསེར་གྱི་སྲབ་བཅུག་གཡུ་ཡི་མཐུར་བཏགས་ཕུལཿ རྒྱལ་པོ་ཁྲི་སྲོང་ལྡེའུ་བཙན་ཕྱག་བཙལ་ནསཿ ཀྱེ་ཧོཿ དགོངས་ཤིག་སློབ་དཔོན་ལགསཿ མཚའ་ལུ་མེ་སྟག་འོད་ཟེར་འཕྲོཿ ཁྲ་བོ་སྟག་གི་སྒ་སྟན་གཏདཿ གསེར་གྱི་སྲབ་ལ་གཡུ་ཡི་མཐུརཿ ཁྲི་སོང་ལྡེའུ་བཙུན་གུས་པས་འབུལཿ བཻ་རོ་ཙ་ནས་རབ་བཞེས་ལཿ ལྟ་བའི་རྒྱལ་པོ་བཤད་དུ་འཚལཿ ཅེས་ཞུས་བཻ་རོ་ཙ་ན་ཡིསཿ ལྟ་བའི་རྒྱལ་པོ་ནམ་མཁའ་ཆེཿ དུད་འགྲོའི་རྒྱལ་པོ་རྟར་མི་འཚོང་ནཿ དུད་འགྲོའི་རྒྱལ་པོ་རྟར་བཙོངས་ནཿ དུས་གསུམ་རྒྱལ་བའི་
༼༡༦༤ན༽ཐུགས་ཀྱིས་ཁྲེལཿ ཞེས་གསུངས་བཤད་པར་མ་བཞེས་སོཿ དེ་ནས་གསེར་དངུལ་ཕྱག་མང་ཕུལ་ནས་ཞུསཿ ནམ་གྱི་དགུང་ལ་གསང་སྔགས་ཆོས་རྣམས་གསུངསཿ ཉིན་པར་དུས་སུ་མདོ་ཆོས་མང་དུ་བསྒྱུརཿ བར་སྐབས་མན་ངག་ཟབ་དགུའི་ཆོས་རྣམས་གསུངསཿ ད་ཡང་མན་ངག་ཆོས་རྣམས་གོས་དཔེར་བླངསཿ ནམ་མཁའ་ཆེ་ནི་ལེགས་པའི་སྟོད་གུར་ལཿ ཡུལ་རྣམས་ཀུན་ལ་འཇུག་པའི་ཤམ་བུ་བཏགསཿ ཁུ་བྱུག་དང་ནི་རྩལ་ཆེན་ཕུ་དུང་ལཿ བྱང་སེམས་དོན་གྲུབ་གོང་བས་བརྒྱན་ནས་བཤདཿ རྒྱུད་ལུང་ཆོས་ལ་གཤིན་རྗེའི་གཏམ་རྒྱུད་དང་ཿ རིན་ཆེན་འདི་རྒྱུད་དབང་བསྐུར་རྒྱལ་པོའི་རྒྱུདཿ ནམ་མཁའ་ཆེ་ལ་སོགས་པའི་རྒྱུད་ལྔ་དང་ཿ རྨད་དུ་བྱུང་བ་ཀུན་བྱེད་རྒྱལ་པོ་དང་ཿ མདོ་བཅུ་དང་ནི་རྒྱ་མཚོའི་ཀློང་རྣམས་བསྒྱུརཿ ནང་སྔགས་ཏནྟྲ་སྡེ་ནི་བཅོ་བརྒྱད་སོགསཿ མཧཱ་ཡོ་གའི་རྒྱུད་སྡེ་བཅུ་དྲུག་བསྒྱུརཿ བཻ་རོ་ཙ་ན་ཉིད་ཀྱིས་མཛད་པའི་ཆོསཿ སྙན་རྒྱུད་ཐུགས་ཀྱི་སྙིང་ཁུ་ལ་སོགས་གསུངསཿ དེ་ལྟར་ཆོས་གསུང་འདུག་པ་རྒྱ་གར་ཐོསཿ རྒྱ་གར་པཎྜི་རྟ་ཡིས་ཕྲག་དོག་བྱསཿ བོད་ལ་ཐེ་ཚོམ་བསྐྱེད་པའི་ངན་སྒྲོག་བཏང་ཿ བོད་ཀྱི་བནྡེས་དམ་ཆོས་མ་རྙེད་པརཿ ཁྲོ་ཆུ་ཕྲ་མན་ངན་སྔགས་མང་པོ་ཁྱེརཿ བོད་ཕུང་འགྲོ་བས་བཀའ་ཁྲིམས་སྦྱོར་ཅིག་ཟེརཿ བོད་རྣམས་ཕྲ་མ་སྡེ་བཙན་དགའ་བ་དང་
༼༡༦༤བ༽རྒྱལ་པོའི་བློན་ཕྱེད་བོན་བློན་ཡིན་པ་དང་ཿ བོན་ཆོས་གཉིས་པོ་ཆགས་སྡང་ཆེ་བ་ཡིསཿ རྒྱལ་པོས་བོན་སྤྱུགས་ཆོས་ཀྱི་ཁ་བཟུང་བསཿ བོན་གྱི་བློན་པོ་ལི་སྟག་ཆེན་པོ་དང་ཿ བོན་བློན་ཆེ་བ་ལི་ཐི་ཁྲ་མི་ཡིསཿ བློན་པོ་བསྡུས་ནས་རྗེ་ལ་གྲོས་བཏབ་བྱསཿ པ་གོར་ག་ན་ཇག་ཐང་ཏ་བྱ་བ་འདིསཿ ཚོལ་དུ་བཏང་བའི་ཆོས་ནི་མ་རྙེད་པརཿ མི་གཉིས་བཏང་བས་ལེགས་གྲུབ་ལམ་དུ་བསདཿ བོད་ཡུལ་ཕུང་བའི་ངན་སྔགས་ཁྱོངས་འདུག་པསཿ རྒྱལ་པོ་ཕོ་བྲང་བཞུགས་ལ་དགྲ་མི་ཡོང་ཿ བསླུ་བ་མཁན་གྱི་ནག་ཉེས་ཅན་འདི་སོདཿ མེ་ཆུ་རླུང་གི་ཁྲིམས་ཀྱིས་ཚར་གཅོད་ཞུཿ རྒྱལ་པོས་མི་བདེན་ཕྲག་དོག་ཡིན་བརྗོད་པསཿ བོན་བློན་རྣམས་ཀྱིས་ཡང་ནས་ཡང་གཏུགས་ཏེཿ རྒྱལ་པོས་ཆུ་ལ་བསྐུར་བར་ཞལ་གྱིས་བཞེསཿ གཡོར་ཕྱོགས་གྲ་པའི་ལྡོམ་བུ་བ་ཞིག་བཟུང་ཿ བཻ་རོ་ཙ་ནའི་ཞྭ་གོས་ལྷམ་བསྐོན་ནསཿ འཕྲལ་ལ་དགོས་པའི་འཚོ་བ་ཟས་སྐོམ་བསྐུརཿ བསམ་ཡས་རྐ་ཆུའི་འོག་ནས་རྗེ་ཡིས་བོསཿ ཀྭའིཿ ང་ཡི་བོད་འབངས་ཐམས་ཅད་འདིར་འདུས་ཤིགཿ དེ་སྐད་བརྗོད་པས་ཐམས་ཅད་འདུས་པ་དང་ཿ ཕྲ་མེན་ངན་སྔགས་མཁན་པོ་གསོད་བྱས་ཏེཿ ཆུ་ལ་བསྐུར་བ་འདི་ཉིད་ཡིན་ནོ་གསུངསཿ དམངས་རྣམས་དྲུང་དུ་ཉེ་བར་མ་གྱུར་གོང་ཿ ཟངས་གཉིས་ཁ་སྦྱར་ནང་དུ་སྤྲང་པོ་བཅུགཿ ཁ་ལ་ལྕགས་གཟེར་བཏབ་ནས་ཆུ་ལ་བསྐུརཿ དེ་ནས་
༼༡༦༥ན༽བློན་འབངས་ཡིད་གཉིས་ཐེ་ཚོམ་ནསཿ བཻ་རོ་མིན་རེའི་དབུ་སྙུད་བཞེས་དགོས་ཟེརཿ དེ་ནས་ཆོས་རྒྱལ་ཁྲི་སྲོང་ལྡེའུ་བཙན་གྱིསཿ མི་དེ་བཻ་རོ་མིན་རེ་བྲག་བཙན་དཔང་ཿ དེ་ནས་བློན་པོ་ཐམས་ཅད་ཁོ་ཐག་ཆོདཿ མཁས་པ་བཻ་རོ་ཙ་ནའི་ཐུགས་དགོངས་ལཿ ང་ཡི་གླུད་དུ་མུ་ཏོ་སྡུག་སོང་ཿ སྙིང་རྗེས་མ་བཟོད་སྨོན་ལམ་རྒྱ་ཆེར་བཏབཿ བཻ་རོ་ཙ་ནས་སྦྱངས་པའི་ཡོན་ཏན་གང་ཿ དེ་དག་སྤྲང་པོའི་ཡུལ་དུ་རྒྱས་པར་ཤོགཿ སྐབས་སུ་མཁས་པ་སྤྲུལ་སྐུར་འབྱོན་གྱུར་ཅིགཿ སྤྲང་པོ་མིས་བཟུང་བསྟན་པའི་ཡུལ་ཕྱོགས་དེརཿ བཀྲ་ཤིས་བདེ་ལེགས་ལོངས་སྤྱོད་འབྱོར་ལྡན་ཤོགཿ སྤྲང་པོའི་འོལ་ཀ་མཁར་ལྟག་ཁོལ་མར་ཆགསཿ དེ་ཉིད་ཁོལ་གྱི་བདག་པོ་ཞིག་གིས་རྙེདཿ ནང་དུ་ཅི་འདུག་བལྟས་པས་བཙུན་པ་བྱུང་ཿ ཁོལ་བདག་ཁོ་རང་བུ་བྱས་ཁྱིམ་ཕོག་པསཿ འོལ་ཀ་རྒྱུག་ཐང་ལྡོམ་མིའི་གྲོང་ཚོ་ཆགསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ བཻ་རོ་ཙ་ནས་ཆོས་གསུངས་པ་ལ་ཕྲ་མ་བྱུང་བའི་ལེའུ་སྟེ་དོན་ལྔ་པའོཿ ཿཐ་ཐ་ཉྲ་རྒྱ་རྒྱཿ ཿ