བཻ་རོ་ཙ་ནས་མགུར་གསུངས་པའི་ལེའུ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིསཿ བཻ་རོ་ཙ་ན་གཞན་གྱིས་མཐོང་དོགས་ནསཿ རྒྱལ་པོ་ཉི་མ་བསྲོ་བའི་གདུགས་ཁང་གིཿ བྱ་ཁང་ཀ་བའི་ལོག་ལ་ཆོལ་བྲུས་ཏེཿ དེ་ལ་ཕྱོགས་བཞིར་ཀ་བ་བཞི་གཙུགས་ནསཿ དེ་ཡི་ནང་དུ་བཻ་རོ་ཙ་ན་བཞུགསཿ
༼༡༦༥བ༽དེ་ནས་འབངས་ལ་མར་ནག་ཁྲལ་བཀལ་ནསཿ མཚན་མོ་གསང་སྔགས་རྡོ་རྗེའི་ཐེག་པ་བསྒྱུརཿ ཉིན་པར་མཚན་ཉིད་ཐམས་ཅད་བསྒྱུར་དུ་བཅུགཿ དེ་ཡི་དུས་ན་མངའ་བདག་རྒྱལ་པོ་ཉིདཿ ནུབ་ཀྱི་རེས་གར་སོང་ཆ་མེད་ནསཿ ཇོ་མོ་ཚེ་སྤང་བཟའ་བ་དམར་རྒྱན་གྱིསཿ མིག་སེར་ཆེ་བས་བུད་མེད་གཞན་ཡོད་བསམཿ རྒྱལ་པོའི་ཕྱིར་འབྲང་གང་དུ་གཤེགས་བལྟས་པསཿ གློ་འབུར་ནང་དུ་སློབ་དཔོན་ཚ་དྲོ་དྲངསཿ ཞྭ་ཐོད་ཕུད་ནས་བཀུར་སྟི་བྱེད་པ་མཐོང་ཿ བཻ་རོ་ཙ་ནས་མདོ་བསྔོ་གསུང་པ་ཐོསཿ བཙུན་མོས་བལྟས་དང་རྒྱལ་པོའི་སྤྱན་ཟུར་འདྲེསཿ བཙུན་མོས་བློན་འབངས་ཀུན་ལ་བཤད་ཀྱིས་དོགསཿ རྒྱལ་པོས་བལྟས་བྱས་བདས་པས་མོ་མ་ཟིནཿ དེ་དུས་དམག་ལ་འགྲོ་ན་ཟངས་དུང་འབུདཿ ཚ་དྲོའི་དུས་སུ་དུང་དཀར་འབུད་པ་དང་ཿ གྷཎྜཱི་བརྡུངས་ན་ཆོས་ལ་སྤྱོན་ཟེར་ཡིནཿ རྔ་བོ་ཆེ་བརྡུངས་འདུན་མར་འདུས་ཤིག་ཟེརཿ དམར་རྒྱན་རྔ་བོ་ཆེ་ལ་བརྡུངས་བ་ཡིསཿ ཕྱི་བློན་ནང་བློན་གྲོས་དབང་ཐམས་ཅད་འདུསཿ འདུས་པ་རྣམས་ལ་ཇོ་མོས་འདི་སྐད་བརྗོདཿ ཆུ་ལ་བསྐུར་དེ་སྤྲང་པོ་ཡིན་འདུག་པསཿ ངན་ཐབས་མཁན་དེ་ཕུགས་ན་སྦས་ནས་འདུགཿ བོད་ཕུང་མི་དགའ་རྗེ་ལ་གྲོས་ཐོབ་སོང་ཿ དེ་སྐད་ཟེར་བའི་རྒྱུ་མཚན་དམར་རྒྱན་གྱིསཿ བཻ་རོ་ཙ་ན་ནན་ལྟར་མཚར་དྲགས་པསཿ ཇོ་མོས་དུས་བཏིང་སློབ་དཔོན་མ་བྱོན་ནསཿ དེ་ཡི་སྙིང་ནད་བྱས་
༼༡༦༦ན༽པ་ཡིན་ནོ་སྐདཿ དེ་ནས་ཕྱི་བློན་ནང་བློན་བཅུ་བཞི་ཡིསཿ གྲོས་ལ་དབང་བའི་འདུན་གྲོས་མཁན་ཚོ་བསགསཿ འབངས་འཁོར་ཡོངས་ནི་ཇོ་མོ་བདེན་ཞེས་ཟེརཿ མངའ་བདག་དྲུང་དུ་ལྷ་བཟང་ཀླུ་དཔལ་བཏང་ཿ འབངས་རྣམས་ཡོ་འབོག་ལྕམ་མེའི་ཐང་ལ་ཚོགསཿ རྗེ་ལ་ཞུ་བ་བདོག་པས་སྐུ་བསྐྱོད་ཞུསཿ དེ་ནས་རྒྱལ་པོ་འབངས་ཀྱི་གསེབ་ཏུ་བྱོནཿ འབངས་རྣམས་རྗེ་ལ་ཞུ་བ་འདི་བཞིན་བྱེདཿ མངའ་བདག་རྒྱལ་པོ་ཉིད་ལས་ཅོལ་ཆུང་བཿ ལྷ་ཁང་བཞེང་ཟེར་མི་ཚོ་སྡུག་ཏུ་བཅུགཿ ལྷ་ཡིན་ཟེར་ནས་གསེར་ཚོ་འབྱིན་པར་བྱུགསཿ ཆོས་བསྒྱུར་ཟེར་ནས་ངན་སྔགས་དུག་སྦྱོར་སློབཿ བླ་མ་ཡིན་ཟེར་འབངས་ལ་ལྷ་ཕྱག་འཚལཿ འཕན་གདུགས་མཛད་ཟེར་དར་ཟབ་དུམ་བུར་གཏུབསཿ ཆོས་མཛད་ཟེར་ནས་སྤྲང་པོ་ཆུ་ལ་བསྐུརཿ གདུགས་ཁང་ཡིན་ཟེར་བོད་ཕུང་སྦེད་ས་བྱེདཿ ཆོས་དང་ཅིའི་ཆོས་ད་དུང་བནྡེ་སོདཿ དེ་སྐད་གསོལ་བས་རྒྱལ་པོ་མ་དགྱེས་ཏེཿ རྒྱ་བོད་ལོ་ཙཱ་མཁས་པ་གཅིག་པུ་འདིཿ བློན་འབངས་ཀུན་གྱིས་གསོད་དགོས་ཁར་ཐོན་པཿ ཞེས་གསུངས་ས་བརྡབས་རྡོ་བརྡབས་ཐལ་མོ་བརྡབསཿ ཐུགས་བརྡུངས་ཞལ་དུས་འགམས་སྨྲེ་སྔགས་བོསཿ ཀླུ་དཔལ་ལ་སོགས་གྲོས་དབང་གྲོས་བྱས་ནསཿ བོད་ཕུང་འཇུག་པའི་བནྡེ་མི་གསོད་ནཿ རྒྱལ་པོར་ཡོ་ལོག་བཏང་ནས་འདོན་པར་བྱསཿ གློ་འབུར་ནང་ནས་བཻ་རོ་སྒོར་ཕྱུང་སྟེཿ རྒྱལ་པོས་
༼༡༦༦བ༽སློབ་དཔོན་ཕྱག་ལ་འཇུས་ནས་བཤུམཿ དེ་དུས་མཁས་པ་བཻ་རོ་ཙ་ན་ཡིསཿ བཀའ་བ་བཅུ་དྲུག་བཅད་པའི་མགུར་འདི་གསུངསཿ ཐུགས་རྗེ་ལྡན་པའི་ཁྲི་སྲོང་ལྡེའུ་བཙན་གྱིསཿ དམ་ཆོས་ཚོལ་བའི་བདག་པོར་བདག་བསྐོས་ནསཿ གྱོན་པར་དཀའ་བའི་གསེར་གྱི་པ་ཏྲ་གྱོནཿ བགྲོད་པར་དཀའ་བའི་རྒྱ་གར་ཡུལ་དུ་བགྲོདཿ འཛེག་པར་དཀའ་བའི་མཐའ་ལ་མ་གཟར་མོ་འཛེགསཿ གཤག་པར་དཀའ་བའི་ཁ་བ་བུ་ཡུག་གཤགསཿ གསོས་པར་དཀའ་བའི་མཐའ་ནད་མིག་སེར་བསོསཿ བཟའ་བར་དཀའ་བའི་མཐའ་ཟས་མང་པོ་ཟོསཿ མཐོང་བར་དཀའ་བའི་མཁས་པའི་ཞལ་རྣམས་མཐོང་ཿ ཤེས་པར་དཀའ་བའི་སྡེ་སྣོད་མང་པོ་ཤེསཿ ཐོས་པར་དགའ་བའི་བྱང་སེམས་རྣམ་ལྔ་ཐོསཿ གནང་བར་དཀའ་བའི་ཐུགས་ཀྱི་མན་ངག་གནང་ཿ རྟོགས་པར་དཀའ་བའི་རང་བྱུང་ཡེ་ཤེས་རྟོགསཿ ཕྲད་པར་དཀའ་བའི་དྲག་སྔགས་ཀུན་དང་ཕྲདཿ འགྲུབ་པར་དཀའ་བའི་འཕགས་པ་འཇམ་དཔལ་གྲུབཿ ཐོབ་པར་དཀའ་བའི་རྐང་མགྱོགས་དངོས་གྲུབ་ཐོབཿ གྱོན་པར་དཀའ་བའི་ཟོན་ལྷམ་ཕྱིར་ལོག་གྱོནཿ ཐར་བར་དཀའ་བའི་གཅན་འཕྲང་གསོད་ལས་ཐརཿ དོ་ཤི་དོ་ཆད་ཡང་ནས་ཡང་དུ་བྱསཿ རྟོལ་པར་དཀའ་བའི་བོད་ཡུལ་དབུས་སུ་བརྟོལཿ འདི་ལ་སུ་མོས་ཐུགས་རྗེ་ཤར་བར་སྨོནཿ དེ་སྐད་གསུངས་པས་མངའ་
༼༡༦༧ན༽བདག་རྒྱལ་པོ་ཡིསཿ བློན་འབངས་རྣམས་ཀྱི་དེ་ལྟར་མ་ཡིན་ཏེཿ འུ་ཅག་སྔོན་ཡང་དེ་འདྲས་འཁོར་བར་འཁྱམསཿ བསད་པས་མི་ཡོང་མཐའ་ལ་སྤྱུགས་ཀྱི་ཟེརཿ སློབ་དཔོན་ཆིབས་པ་བཟང་པོ་ཞིག་ལ་བསྐྱོནཿ གསེར་དངུལ་ཟས་བཀང་ཆིབས་གོང་གཤེགས་སྐྱེམས་དྲངསཿ སློབ་དཔོན་གང་ལ་འབྱོན་པར་དགྱེས་ཞུས་པསཿ སློབ་དཔོན་ཞལ་ནས་རྒྱལ་མཚོ་བའི་རོང་ཿ ཚེ་རབས་སྔ་མའི་ལས་འཕྲོ་ཞིག་ཡོད་པསཿ རྒྱལ་མོ་ཚ་བའི་རོང་དུ་འགྲོ་བར་ཞུཿ རྗེ་ཡིས་ག་བུར་ལ་སོགས་བསིལ་སྨན་བསྐུརཿ རྒྱལ་བློན་འཁོར་བཅས་ཀུན་གྱིས་སྐྱེལ་དུ་ཕྱིནཿ དབུ་རུ་ཀྱི་ཚང་ལ་ག་བརྒལ་བའི་དུསཿ སློབ་དཔོན་འགྱོད་མཆིས་བདུན་གྱི་མགུར་འདི་གསུངསཿ ཟ་ཧོར་ཡུལ་ནས་བྱོན་པའི་མཁན་པོ་ཞི་བ་མཚོཿ ཨུ་རྒྱན་ཡུལ་ནས་བྱོན་པའི་པདྨ་འབྱུང་གནས་དཔལཿ རྒྱ་གར་མཁས་པ་པཎ་ཆེན་ཉི་ཤུ་རྩ་ལྔ་ལཿ འདི་ན་མཆིས་པའི་བཻ་རོ་ཙ་ནས་ཕྱག་འཚལ་ལོཿ ལོ་བརྒྱད་ལོན་ནས་ལོ་ཙཱ་བསླབས་པའི་མཐའ་འདི་མཆིསཿ བཅོ་ལྔ་མན་ཆད་སྐད་སྣ་སྟོང་དང་དྲུག་བརྒྱ་སྦྱངསཿ རྒྱ་གར་གསང་མཛོད་བརྟོལ་ནས་དམ་ཆོས་བོད་དུ་བསྒྱུརཿ བོད་ཀྱི་མུན་སེལ་ཁྲི་གདུགས་ཉི་མ་འདྲ་བ་སྤྱུགསཿ གོ་རྟོགས་བློའི་པང་འབྱེད་ཚེ་འགྱོད་པའི་དུས་ཤིག་མཆིསཿ བཅོ་ལྔ་ལོན་ནས་ལྔ་བཅུ་རྩ་བདུན་མ་ལོན་བརཿ འགྲོ་བ་མི་འདོར་ཕྱིར་དུ་རྒྱ་
༼༡༦༧བ༽གར་ཡུལ་ཀུན་འགྲིམསཿ བོད་ཀྱི་རྒྱལ་ཁམས་ཐམས་ཅད་དཀར་པོར་ཡོངས་བསྒྱུར་ཏེཿ ཕུང་པོ་ཡོན་ཏན་བརྒྱན་པ་བོད་ཀྱི་བནྡེ་སྤྱུགསཿ བོད་སྤྲུག་རྒྱ་གར་འཁོར་ཚེ་འགྱོད་པའི་དུས་ཤིག་མཆིཿ བོད་སྐད་མ་བྱང་ལོ་ཙཱ་ཤེས་པ་ག་ལ་སྲིདཿ རི་མཐོ་ས་གཙང་ཁ་བ་ཅན་གྱི་རྒྱལ་ཁམས་འདིརཿ མི་རྗེ་ལྷས་མཛད་འདོད་ཡོན་ཕུན་སུམ་ཚོགས་གྱུར་ཀྱང་ཿ རིན་ཆེན་གསེར་གླིང་གསེར་གྱི་དད་ཁྱུ་ཚོགས་པ་ནཿ དངོས་མཆིས་སྤྲུལ་སྐུ་ལྟ་བུའི་བྱང་ཆུབ་སེམས་དཔའ་འདིཿ དང་མོ་གཅིག་པུར་རྒྱལ་མོ་ཚ་བའི་རོང་དུ་སྤྱུགསཿ མདོ་སྔགས་འཆད་ཉན་བྱེད་ཚེ་འགྱོད་པའི་དུས་ཤིག་མཆིཿ ཐུན་མོང་དངོས་གྲུབ་གྲུབ་པའི་ཡ་མཚན་མང་པོ་འབྱུང་ཿ རྗེ་འབངས་ཐམས་ཅད་སྙན་གསང་སྤྱན་གསལ་ཐུགས་བདས་ཀྱང་ཿ རྒྱ་གར་ཆོས་སྐད་སཾ་སྐྲྀ་ཏ་ཡི་སྐད་མི་གོཿ ཆོས་གཞི་གཙུག་ལག་ཁང་ནི་རྒྱ་ཆེར་བཞེངས་གྱུར་ཀྱང་ཿ སྦྱངས་པ་ཅན་གྱི་བཻ་རོ་ཙ་ན་མཐའ་ལ་སྤྱུགསཿ ཆེ་བའི་ཡོན་ཏན་དྲན་ཚེ་འགྱོད་པའི་དུས་ཤིག་མཆིཿ ལས་དཀར་སྤྱད་ཀྱང་ནག་པོར་འགྲོ་བའི་རྗེ་འབངས་རྣམསཿ དམ་ཆོས་སྤྱོད་ཀྱང་རློམ་པས་མ་ཁྱེར་བཻ་རོ་ཙ་ན་ཅོམཿ སངས་རྒྱས་འཕགས་པའི་ཐུགས་རྗེ་ཕུན་སུམ་ཚོགས་གྱུར་ཀྱང་ཿ རང་རྒྱུད་མི་དགེས་རྒྱགས་པའི་བདུད་རིགས་རྒྱས་གྱུར་པསཿ ཡིད་ལ་ཅི་བསམ་འགྲུབ་བམ་རྗེ་འབངས་ཐུགས་ལ་ཞོགཿ དག་པའི་མཁན་སློབ་
༼༡༦༨ན༽འབྱོན་ཚེ་འགྱོད་པའི་དུས་ཤིག་མཆིཿ བོད་དུ་དམ་ཆོས་ཉི་མ་ལན་ཅིག་ཤར་བ་འདིཿ ཕྱི་བློན་ནང་བློན་བཙུན་མོར་བཅས་པས་སྣུམ་པར་བྱེདཿ མ་མྱོང་དགུ་མྱོང་ཤི་བ་མ་མྱོང་ཙམ་གྱི་མིཿ ཆགས་མེད་གཅིག་པུར་འགྲོ་བའི་བཻ་རོ་ཙ་ནང་ཿ སྣང་ཚད་ཆོས་སྐུར་རྟོགས་པས་རྫོགས་ཆེན་དོན་དང་ལྡནཿ སྡོམ་གསུམ་རྒྱུ་འབྲས་ཤེས་པས་མདོ་སྔགས་དོན་དང་ལྡནཿ དགོས་འདོད་ཀུན་འབྱུང་རིན་ཆེན་ཕུང་པོ་འདྲ་བ་སྤྱུགསཿ སྐུ་ཕྱིར་མ་འཁོར་ཙ་ན་འགྱོད་པའི་དུས་ཤིག་མཆིཿ ཞེས་གསུངས་རྒྱལ་མོ་ཚ་རོང་གདུལ་བྱར་གཟིགསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ བཻ་རོ་ཙ་ནས་མགུར་གསུངས་པའི་ལེའུ་སྟེ་དོན་དྲུག་པའོཿ ཿཐ་ཐ་ཉྲ་རྒྱ་རྒྱཿ ཿ