དགེ་སློང་མི་ལྔ་རྒྱ་གར་དུ་བརྫངས་ཤིང་དངོས་གྲུབ་བརྙེས་པའི་ལེའུ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིསཿ ཟ་ཧོར་མཁན་པོ་བོ་དྷི་ས་ཏྭ་ལཿ བོད་ཀྱི་མི་ལྔ་རབ་ཏུ་བྱུང་བ་ཡིཿ ནམ་མཁའི་སྙིང་པོ་གྲུ་གུ་ཨེ་བག་ཤཿ རུ་གྱོང་བཱིརྻ་རླངས་ཆེན་དཔལ་སེང་དང་ཿ འབྲི་བཙུན་རྒྱལ་བའི་བློ་གྲོས་རྣམ་པ་ལྔཿ དབུ་ཡི་མཆོད་གནས་བཀུར་
༼༡༧༡ན༽བར་བཀའ་ལ་བཏགསཿ གསེར་ཕྱེ་བྲེ་རེ་བསྐུར་ནས་ཆོས་ཚོལ་བཏང་ཿ དགེ་སློང་མི་ལྔས་དཀའ་བ་སྲོག་བསྔོས་ནསཿ རྒྱ་གར་ཡུལ་ཕྱིན་ཕྲད་ཚད་དྲི་བ་བྱསཿ གྲུབ་ཐོབ་གྲགས་པ་ཇི་སྐད་བྱ་བ་ཡོདཿ རོ་ལངས་བདེ་བ་ཧཱུཾ་ཀར་ཞེས་བྱ་བསྟནཿ རོ་ལངས་བདེ་བའི་སྤྱན་སྔར་ཕྱིན་པ་ཡིསཿ ངས་བོད་འདུལ་བའི་དུས་ལ་མ་བབས་གསུངསཿ རྒྱལ་པོ་ཀུཀྐུ་རཱ་ཛ་ཞེས་བྱ་བཿ ཉིན་བཞིན་ཁྱི་མོ་ལྔ་བརྒྱའི་དབུས་སུ་ནིཿ དམ་ཆོས་ཁྱི་ཡི་སྐད་དུ་བསྒྱུར་ནས་འཆདཿ མཚན་བཞིན་ཁྱི་མོ་ལྷ་མོ་ལྔ་བརྒྱར་སྤྲུལཿ མ་ཆགས་ཐབས་ཀྱིས་སྦྱོར་བ་དེ་ལ་ཞུསཿ ཞེས་གསུངས་ལུང་བསྟན་ཞུས་པས་གོང་བཞིན་གསུངསཿ གསེར་བྲག་བྱ་སྐྱིབས་ཚལ་ཞེས་བྱ་བ་ནཿ སློབ་དཔོན་ཆེན་པོ་ཧཱུཾ་ཀར་བཞུགས་ཟེར་ཕྱིནཿ ཁང་སྲུང་རྒན་མོ་ཆུ་ལེན་ཞིག་དང་ཕྲདཿ ཧཱུཾ་ཀར་གར་བཞུགས་དྲིས་པས་ལན་མ་བྱིནཿ འཇིག་དེ་རྣ་བ་འོན་སྙམ་སྐད་ཆེར་བསྐྱང་ཿ རྩེ་རྒོད་ནག་པོ་བྱ་བ་ཞིག་ན་རེཿ དེ་ལ་དྲིས་ཀྱང་ལན་མེད་སྨ་བཅད་ཡིཿ བྱ་སྐྱིབས་ཚལ་ན་བཞུགས་ཟེར་གསེར་ཕྱེ་བྱིནཿ ནང་དུ་སྦ་འཚངས་ཕྱིན་པས་མ་དགྱེས་ཏེཿ བོད་ཀྱི་གདུག་འདྲེ་བྱུང་ཞེས་ཧཱུཾ་ཧཱུཾ་གསུང་ཿ ཤངས་ནས་འོད་ཟེར་མེ་སྟག་ཚ་ཚ་འཕྲོསཿ དགེ་སློང་མི་ལྔ་ས་ལ་བརྒྱལ་བར་གྱུརཿ སྔོན་ལ་ནམ་མཁའི་སྙིང་པོ་བརྒྱལ་སངས་ནསཿ བདག་ཅག་བོད་ཀྱི་ལྷ་འདྲེ་གདུག་
༼༡༧༡བ༽ཅན་མིནཿ བོད་ཀྱི་རྒྱལ་པོས་གསང་སྔགས་ཆོས་ཚོལ་བཏང་ཿ ཚེ་འདི་ཉིད་ལ་རིག་འཛིན་སར་འགྲོ་བཿ སློབ་དཔོན་གནང་དགོས་ཞུ་རྟེན་གསེར་འདི་ལགསཿ ཆོས་མ་རྙེད་ན་ངེད་ཚོ་ཁྲིམས་ལ་གཏུགསཿ ཐུགས་རྗེས་བཟུང་བྱས་གུས་ཕྱག་འཚལ་བ་ཡིསཿ ངས་བོད་འདུལ་བའི་དུས་ལ་བབ་མ་བབསཿ ཡེ་ཤེས་ལྷ་ལ་འདྲི་གསུང་དགོངས་པ་མཛདཿ དར་ཅིག་ཙ་ན་དུས་ལ་བབ་འདུག་གསུངསཿ ང་དང་ཕྲད་པ་ཁྱེད་རྣམས་ཚོགས་རེ་བསགསཿ དཔེར་ན་སྣོད་ཀྱིས་བཅུད་ཐུབ་བྱེད་པ་ལཿ བཟོ་གནས་དོང་པས་མི་ཆོག་སོ་བཏང་དགོསཿ དེ་བཞིན་སྔོན་ལ་དབང་བསྐུར་མ་བྱས་པརཿ གསང་སྔགས་བཤད་སྒྲུབ་གང་ཡང་བྱར་མི་རུང་ཿ ཟླ་གམ་ལྔ་བཅུ་རྩ་བརྒྱད་ཞལ་ཕྱེ་ནསཿ ཁྲག་འཐུང་ལྷ་ཚོགས་ལྡེ་བཅུ་རྩ་བརྒྱད་བསྟནཿ དང་པོ་སྒྲུབ་གཞི་ཡང་དག་རྩ་བ་བཤདཿ དེ་ཡི་ཆ་རྐྱེན་དོན་གྱི་ཆ་ལག་དགུཿ རྟོག་པའི་བློ་བཅད་སེམས་ཀྱི་རྩ་བ་ལྔཿ སྒྲུབ་པར་འཇུག་པ་རྫས་ལ་བརྟེན་དགོས་པསཿ ཕྱི་པྲ་བརྟག་པ་བམ་རི་ཐོད་པ་མཁརཿ ནང་པྲ་བརྟག་པ་ལྷ་མོ་གནས་མཁར་བཤདཿ སྒྲུབ་པ་ལ་འཇུག་ཐབས་ཤེས་འབྲེལ་དགོས་པསཿ མུ་དྲའི་བརྟག་ཐབས་ཀརྨ་ཤ་ཏི་བཤདཿ སྒྲུབ་པས་ལྷ་མཆོད་དངོས་གྲུབ་བླང་བའི་ཕྱིརཿ བདུད་རྩི་མཆོག་ལུང་སྨན་གྱི་སྒྲུབ་པ་བཤདཿ དེ་ལྟར་སྒྲུབ་པའི་བར་ཆོད་བཟློག་པའི་ཕྱིརཿ མ་ཏྲང་
༼༡༧༢ན༽བསྒྲལ་མནན་གསལ་ཤིང་ཆེ་ཆུང་བཤདཿ སྒྲུབ་པ་བྱིན་ཆེ་ཉམས་བག་ལྡན་པའི་ཕྱིརཿ འཕྲིན་ལས་གཞུང་སོང་བསྐྱེད་རྫོགས་མ་བུ་བཤདཿ སྒྲུབ་གཞི་བཟླས་བརྗོད་འཛབ་ལ་བསྡུ་བའི་ཕྱིརཿ བཟླས་བརྗོད་བྱེད་ཐབས་རུ་ལུ་གསེར་འཕྲེང་བཤདཿ སྒྲུབ་ལ་བར་ཆད་འོང་བ་བཟློག་པའི་ཕྱིརཿ ཕུར་པ་བི་དྱོཏྟ་མ་འབུམ་སྡེ་བཤདཿ དེ་དུས་དངོས་གྲུབ་རེ་ཡང་རྙེས་པར་གྱུརཿ ནམ་མཁའི་སྙིང་པོ་ཤེས་རབ་ཕུལ་དུ་ཕྱིནཿ བསོད་ནམས་སྙིང་རུས་གཉིས་ཀ་མཆོག་ཏུ་གྱུརཿ ས་ལ་ཆག་གང་མ་རེད་ཙམ་ལ་འགྲོཿ དབང་ཕྱུག་ཉི་ཤུ་རྩ་བརྒྱད་བྲན་བཞིན་འཁོལཿ ཡེ་ཤེས་ལྷ་མོ་བདུན་དང་དངོས་སུ་སྦྱོརཿ རུ་གྱོང་བཱིརྻས་རྫུ་འཕྲུལ་ཡ་མ་ཟུང་ཿ གྲུ་གུ་ཨེ་བག་ཡེ་ཤེས་འོད་དང་འགྲོགསཿ རྒྱལ་བའི་བློ་གྲོས་དུས་མིན་འཆི་བ་ལྷོགསཿ རླངས་དཔལ་འབྲོང་རཱ་གཤིབས་བྱུང་སེ་གོལ་བཟློགཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ དགེ་སློང་མི་ལྔ་རྒྱ་གར་དུ་བརྫངས་ཤིང་དངོས་གྲུབ་བརྙེས་པའི་ལེའུ་སྟེ་དོན་བརྒྱད་པའོཿ ཿཐ་ཐ་ཉྲ་རྒྱ་རྒྱཿ ཿ