ནམ་མཁའི་སྙིང་པོ་ལྷོ་བྲག་མཁར་ཆུར་སྤྱུགས་པའི་ལེའུ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་ལཿ བོད་ཀྱི་བློན་པོ་ཕྲག་དོག་ཅན་རྣམས་ཀྱིསཿ ལོག་མན་སྙན་ཕྲའི་ཡི་གེ་བཅུ་རེ་བསྲིངསཿ འོ་སྐོལ་བནྡེ་ལྔ་པོ་དེས་ཀྱང་ནིཿ ཚོལ་དུ་བཏང་བའི་དམ་ཆོས་མ་རྙེད་པརཿ ཕྲ་མེན་ངན་སྔགས་
༼༡༧༢བ༽མང་པོ་ཁྱེར་ཡོང་ནསཿ བོད་ཕུང་བྱེད་ཟེར་བྲིས་པ་རྗེ་ཡིས་བརྫངསཿ རྒྱ་གར་དགེ་སློང་རྣམས་ཀྱི་ཕྱག་ཏུ་འཕྲོདཿ སློབ་དཔོན་ཧཱུཾ་ཀར་ཉིད་དང་བཀའ་བགྲོས་པསཿ སྒྲུབ་པའི་དལ་ཞལ་རེ་ཙམ་མ་ཕྱེ་བརཿ གསང་སྔགས་ཟབ་མོ་བོད་དུ་ཁྱེར་བ་ནཿ ཁྱེད་རྣམས་ཆོལ་བར་གཅོད་འོང་གསུངས་ནསཿ དགེ་སློང་རྣམས་ཀྱིས་སྒྲུབ་པའི་གྲོས་བྱས་པསཿ དཔལ་གྱི་སེང་གེ་ཉན་དུ་མ་བཏུབ་སྟེཿ འོ་སྐོལ་རུ་འདི་ལྷོ་བལ་ཕྲག་ཏུ་འདུགཿ སྔ་མ་ཟས་ངོ་ནོར་ངོར་ཆོས་བཤད་ཡིནཿ ད་ནི་བོད་དུ་ཆོས་ཟབ་སྒྲོགས་དགོས་པསཿ འོ་སྐོལ་བསད་པའི་ཉན་ཡོད་ཕྱིན་པ་དགེཿ མགྱོགས་པར་མྱུར་དུ་འདོད་ཟེར་མ་ཉན་ནོཿ ནམ་མཁའི་སྙིང་པོས་དེ་སྐད་མ་ཟེར་གསུངསཿ ཕ་ཡིས་བུ་ལ་མ་ལེགས་མི་སློབ་ཅིང་ཿ མ་ཡིས་བུ་ལ་དུག་མི་སྡུད་པས་ནཿ བླ་མས་སློབ་མར་ལོག་པ་མི་སློབ་བོཿ བསླབས་ཀྱང་བཀའ་བཅག་དམྱལ་བའི་གནས་སུ་འགྲོཿ ང་ནི་མི་འགྲོ་ཁྱེད་རྣམས་འགྲོ་ན་སོང་ཿ དཔལ་གྱི་སེང་གེ་བོད་དུ་འགྲོ་བ་ལཿ སློབ་དཔོན་རྫོང་བར་གོང་བྱུང་ཆོས་རྣམས་དང་ཿ བར་ཆད་སེལ་བའི་སེང་ལྡིང་ཕུར་པ་བསྐུརཿ ཕུར་པ་འདི་ཉིད་ཉལ་དུས་སྔས་ཐབ་གསུང་ཿ གཡོག་པོ་མོན་བུ་སྤྱི་ཟླུམ་ཞིག་ཀྱང་བཏང་ཿ བལ་ཡུལ་ཉི་མ་ཁུད་ཀྱི་མཚོ་འགྲམ་དུཿ ས་རུབ་ལམ་མ་མཐོང་བར་ཞག་ས་བྱསཿ གཟིམས་ཏེ་སེང་ལྡེང་ཕུར་བ་སྔས་
༼༡༧༣ན༽སུ་བཏབཿ སློབ་དཔོན་མནལ་སོང་གཡོག་པོར་གཉིད་མ་བྱུང་ཿ མཚོ་ནས་སྦྲུལ་ཆེན་ཞིག་བྱུང་སློབ་དཔོན་བསྐོརཿ གཡོག་པོ་དྲེད་ནས་སློབ་དཔོན་བོས་པ་ཡིསཿ སྦྲུལ་དེ་བྲོས་ནས་མཚོ་ནང་མཆོངས་ཏེ་སོང་ཿ སང་ནུབ་མཚོ་འདི་བརྒལ་ན་རུང་སྟེ་སྙམཿ སང་ནུབ་ཀྱང་ནི་མཚོ་འགྲམ་དེ་ཀར་ཉལཿ སློབ་དཔོན་གཉིད་སོང་སྔས་ནས་ཕུར་པ་བཏོནཿ ཁོ་རང་སྔས་སུ་བཏབ་པས་སྦྲུལ་བྱུང་སྟེཿ སློབ་དཔོན་སྐུ་ལ་འཁྲིལ་ནས་སྐད་ངན་ཤོརཿ མཚོ་དེའི་ཀླུ་ནག་འདམ་འཛིན་བྱ་བ་དེསཿ དཔལ་གྱི་སེང་གེའི་རྩེའུ་ཆུང་འཇིབས་ནས་བཀུམཿ དེ་ནི་བླ་མའི་བཀའ་བཞིན་མ་བགྱིས་པརཿ བཀའ་བཅག་དམ་ཚིག་རལ་པའི་སྐྱོན་ཡིན་གསུངསཿ དགེ་སློང་མི་གསུམ་སྒྲུབ་པ་བྱས་པ་ཡིསཿ མེ་མར་རང་འབར་གཏོར་མ་ཞག་ཏུ་འཁྱིལཿ བནྡྷ་བུམ་པ་ཙམ་སོང་དམ་རྫས་ཁོལཿ དཔལ་ཆེན་ཡབ་དང་ཡུམ་གྱི་ཞལ་མཐོང་ངོ་ཿ དེ་དུས་བོད་ཀྱི་རྒྱལ་པོ་བསྙུ་ན་གྱིས་ཟིནཿ ཅི་བྱས་མ་ཕན་ཀག་བསྐོར་མོ་བཏབ་པསཿ ནམ་མཁའི་སྙིང་པོ་བོད་ན་ཕན་ཅེས་ཟེརཿ བང་ཆེན་བརྫངས་ནས་བོད་དུ་མ་བྱོན་ནཿ ཉེ་གཞི་རྩ་ལག་ཐམས་ཅད་ཁ་དག་གཏོང་ཿ ཞེས་པའི་ཡི་གེ་བསྐུར་བས་མ་དགྱེས་ཏེཿ ད་ཉིད་རྒྱ་གར་ཡོད་པས་མི་འཇིགས་རུང་ཿ བོད་ཀྱི་གནུབས་རྣམས་ཁ་དག་སྙིང་རྗེ་བསམཿ དེ་ནས་
༼༡༧༣བ༽བོད་དུ་འབྱོན་དགོངས་སློབ་དཔོན་ཞུསཿ ཁྱོད་ཀྱིས་མ་ཕྱིན་འོ་སྐོལ་སྒྲིབ་པ་ཡོང་ཿ བོད་དུ་སོང་གསུང་དགེ་སློང་གསུམ་སྔོན་བཏང་ཿ ལྟ་བ་འཕངས་དམས་ཆོས་དབྱིངས་དོན་མ་རྟོགསཿ ཞེས་པ་ལ་སོགས་བཤགས་པ་བྱས་ནས་འོངསཿ གསུམ་པའི་ཕྱི་ལ་ཕྱིན་པས་སྔོན་ལ་རྟོལཿ དེ་ནས་དགེ་སློང་མི་བཞི་རྗེ་དང་མཇལཿ ནམ་མཁའི་སྙིང་པོས་བྱིན་རླབས་མཛད་པས་སོསཿ རྗེ་ཉིད་བཞེད་པའི་ཡང་དག་དོན་ལོན་ཡོདཿ རྒྱུ་ནི་སེམས་ཅན་འབྲས་བུ་ཕྱག་རྒྱ་ཆེཿ དཔལ་ཆེན་ཡང་དག་གྲུབ་པ་གཅིག་པུ་ཉིདཿ སྣང་སྲིད་སངས་རྒྱས་བདེ་ཆེན་ཀུན་འདུས་པཿ ཆུ་རྒྱུན་རྣལ་འབྱོར་ཟབ་མོ་སྐུ་གསུམ་རྫོགསཿ གསང་ཆེན་མཁའ་འགྲོ་སྒྱུ་མ་བདེ་མཆོག་བདེཿ ཞེས་གསུངས་རང་གི་ཐུགས་ཀ་གྲིས་བཤགས་ཏེཿ ཞི་བའི་ལྷ་ཚོགས་བཞི་བཅུ་རྩ་གཉིས་བསྟནཿ ཚིག་དོན་གསུམ་མཐུན་རྒྱལ་པོ་ངེས་ཤེས་སྐྱེསཿ ཕྱག་མང་དབུ་ཐོད་བུད་བུད་བཙལ་བར་གྱུརཿ དེ་ནས་རྗེ་ལ་ཡང་དག་དབང་བསྐུར་ནསཿ ཡང་དག་རྩ་རྒྱུད་འབྲེལ་ཆེན་སྒྲོན་མ་དང་ཿ ཡང་དག་ལུས་དཔེ་མི་གཅིག་སྙིང་ལྟ་བུཿ ཡང་དག་ཆོད་པ་ཕུར་པ་སྐྱེལ་མ་ལྟརཿ ཡང་ཕུར་སྦྲགས་མའི་སྒྲུབ་ཐབས་རྗེ་ལ་གསུངསཿ མཁའ་དབྱིངས་དག་པ་སྦྱོར་བ་བཞི་བསྒྲུབས་པཿ སྙིང་རྗེ་དག་པ་སྒྲོལ་བ་བཅུ་བསྒྲུབ་པཿ སྦྱོར་སྒྲོལ་གཉིས་དང་ཞི་ཁྲོ་རྩ་འབུམ་གསུངསཿ རྗེ་འབངས་ཁ་
༼༡༧༤ན༽ཅིག་སྒྲུབ་པ་བྱས་པ་ལཿ ཚེ་སྤོང་གཟས་འཁུམས་བོན་བློན་རྣམས་ལ་བཤདཿ ཀ་པཱ་ལ་ཟེད་སྟེགས་ཁར་མི་མགོ་བཞགཿ བ་སུ་ཏ་ཡིན་ཟེར་ནས་རྒྱུ་མ་བྲེསཿ རྐང་གླིང་ཡིན་ཟེར་མི་ཡི་རྐང་དུ་འདུགཿ ཞིང་ཆེན་གཡང་གཞི་ཡིན་ཟེར་མི་ལྤགས་བཀྲམཿ རཀྟ་ཡིན་ཟེར་གཏོར་མར་ཁྲག་བྱུག་འདུགཿ དཀྱིལ་འཁོར་ཡིན་ཟེར་ཁྲ་ཁྲ་ཤིག་ཤིག་འདུགཿ གྲད་པ་ཡིན་ཟེར་རུས་པའི་འཕྲེང་བ་གྱོནཿ གིང་པ་ཡིན་ཟེར་མི་རེང་གཅེར་རྒྱུགས་བྱེདཿ བྱིན་འབེབས་ཡིན་ཟེར་ཅི་འདྲའི་གསོབ་གྱོན་འདུགཿ ཞལ་བརྙན་ཡིན་ཟེར་སྣ་ཚོགས་འབག་གྱོན་འདུགཿ ཆོས་མིན་རྒྱ་གར་བོད་ལ་ངན་བསླབས་ཡིནཿ ཞེས་སྨྲས་པ་དམར་རྒྱན་གྱིས་གསངས་གཏོལ་ནསཿ བོན་བློན་རྣམས་ཀྱིས་རྗེས་ལ་ཡང་ཞུས་པཿ ཕྲ་མེན་ངན་སྔགས་མཁན་དེ་ཕུགས་སུ་བཞགཿ ཅེ་ཟེར་ཁ་ལ་ཉན་ནས་ཅི་བྱེད་པཿ ལོག་ཆོས་བྱེད་པའི་སྒྲུབ་པ་དེ་ལྟ་བུཿ དེ་འདྲ་དར་ན་མི་ལ་གསོན་སྒྲོལ་ཡོང་ཿ ཆོས་མ་ཡིན་གྱིས་ལོག་པ་བསླབས་ཏེ་མཆིཿ ཁོང་བཞིས་དཔལ་གྱི་སེང་གེ་བསད་བྱས་ནསཿ རྗེ་ལ་བརྙས་པ་ཡིན་པས་བསད་པ་བྲགཿ ཅེས་གསོལ་རྒྱལ་བློན་བློ་བསྡུས་བསམས་པ་ཡིསཿ རྒྱལ་པོ་ཉིད་ཀྱང་ཅུང་ཟད་ཐེ་ཚོམ་ནསཿ འོ་ན་བསད་པས་མི་འོང་སྤྱུག་གི་གསུངསཿ ནམ་མཁའི་སྙིང་པོ་ལྷོ་བྲག་མཁར་ཆུར་སྤྱུགསཿ གྲུ་གུ་ཨེ་བག་ཞང་ཞུང་ཡུལ་དུ་
༼༡༧༤བ༽སྤྱུགསཿ རུ་གྱོང་བྱང་རྒྱུད་ཐོ་ཡོལ་ནག་པོར་སྤྱུགསཿ རྒྱལ་བའི་བློ་གྲོས་ལི་ཡུལ་ལྕང་རར་སྤྱུགསཿ ནམ་མཁའི་སྙིང་པོས་སྒྲུབ་པ་མཛད་པར་བཞུགསཿ གྲུབ་རྟགས་བྲག་ལ་སྐུ་རྒྱབ་གཏད་པའི་རྗེསཿ མེ་ནི་རང་འབར་བྲག་ལ་ཕུར་པ་བཏབཿ ཉེ་མའི་ཟེར་ལ་ཆིབས་ནས་གཤེགས་བཞུད་མཛདཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ ནམ་མཁའི་སྙིང་པོ་ལྷོ་བྲག་མཁར་ཆུར་སྤྱུགས་པའི་ལེའུ་སྟེ་དོན་དགུ་པའོཿ ཿཐ་ཐ་ཉྲ་རྒྱ་རྒྱཿ ཿ