པཎ་ཆེན་བི་མ་མི་ཏྲས་རྫུ་འཕྲུལ་བསྟན་པའི་ལེའུ།
དེ་ནས་བོད་ཀྱི་བློན་པོ་གདུགས་པ་ཅནཿ བང་སོ་མཆོད་རྟེན་བརྩིག་པའི་ཁ་བརྒྱགས་ལཿ བསམ་ཡས་པཎྜི་ཏ་ཞིག་བྱོན་ཟེར་ཐོསཿ མདོ་བྱང་བཏགས་པའི་ཡི་གེ་བཀྲོལ་ནས་ཕྱིནཿ བློན་པོ་ཐམས་ཅད་རྒྱལ་པོའི་སྤྱན་སྔར་འདུསཿ འོ་སྐོལ་འདི་ན་མཐའ་མི་ཕྲ་མེན་མཁནཿ བོད་ལ་ངན་བྱེད་མི་ཞིག་ཁྲིད་ཡོད་འདུགཿ འདི་རུ་མ་བཞག་ཞུ་ཕུལ་ཡི་གེ་བསྟནཿ ནངས་པར་ལོ་ཙཱ་གསུམ་གྱིས་སྔ་བར་ལངསཿ རྒྱལ་པོར་ཞལ་མཇལ་ཞུ་ཞེས་འཕྲིན་བསྲིངས་པསཿ བཞེངས་མ་ཟིན་ཟེར་ཉི་མ་ཤར་བར་འགོརཿ དེ་ནས་བློན་པོ་འགའ་ཞིག་དོན་བྱུང་བསཿ ལོ་ཙཱ་གསུམ་པོས་མ་ལེགས་མགྲིན་གཅིག་བརྗོདཿ རང་ལ་རང་གི་རིག་པའི་དོན་ཤར་ཏེཿ རྒྱལ་པོ་མཇལ་བས་ཞལ་ནས་འདི་སྐད་གསུངསཿ པཎྜི་ཏ་དེ་གཤའ་མ་མིན་ཡོང་འདུགཿ མུ་སྟེགས་ཕྲ་མེན་མཁན་ཞིག་ཡིན་ཚོར་གདའཿ ཞག་འགའ་མཚན་ཉིད་
༼༡༧༧ན༽བརྟག་ཟེར་མཇལ་མ་གནང་ཿ ལོ་ཙཱ་གསུམ་པོ་རབ་ཏུ་སྡུག་བསྔལ་ཞིང་ཿ ཡི་དྭགས་མདོག་འདྲ་ཁ་སྣ་ཟགས་པར་གྱུརཿ བི་མས་མཁྱེན་ནས་ཞག་གསུམ་ནངས་པར་དེཿ རྣམ་པར་སྣང་མཛད་སྒྱུ་མ་གཟུགས་ཀྱི་ལྷརཿ བི་མ་མི་ཏྲ་ཡེ་ཤེས་ལྷ་ཡི་ལྷསཿ ཀུན་རྫོབ་གཟུགས་ཀྱི་ལྷ་ལ་ཕྱག་འཚལ་ལོཿ ཞེས་གསུངས་ཕྱག་བཙལ་ལྔར་ཆོ་ཐལ་ཕུང་སོང་ཿ ལོ་ཙཱ་གསུམ་པོ་ངོ་མཚར་རབ་སྐྱེས་ནསཿ རྒྱལ་པོའི་སྙན་གསོལ་རྒྱལ་པོའི་ཞལ་ནས་ནིཿ དེ་ཀུན་ཕྲ་མེན་ངན་སྔགས་ཡིན་མོད་དེཿ ང་ཡི་ལྷ་དེ་བཞེངས་པར་དཀའ་ལས་བྱསཿ ལྷ་འཇིག་པ་ལ་གདན་དྲངས་པ་མིན་གསུངསཿ ལོ་ཙཱ་གསུམ་སེམས་རབ་ཏུ་མ་དགའ་ནསཿ གཅིག་ལ་གཅིག་བལྟ་བཞིན་གྱི་དཀྱིལ་འཁོར་ཉམསཿ བདག་ཅག་གསུམ་གྱིས་རྒྱ་གར་ཡུལ་དུ་ཕྱིནཿ དཀའ་བ་སྤྱོད་ནས་བོད་ཡུལ་དབུས་སུ་འོངསཿ ཐམས་ཅད་ཀུན་གྱི་བླ་རུ་ཕྱིན་པ་ཡིཿ མཁས་མཆོག་ངོ་མཚར་འདི་འདྲ་གདན་དྲངས་ནཿ རྒྱལ་པོ་ཅི་ཉེས་སྙམ་ནས་ཐུགས་རབ་མུགཿ དེ་ནས་ཞག་གསུམ་བི་མ་ལ་བཞེངས་ནསཿ རྣམ་པར་སྣང་མཛད་གཟུགས་སྐུ་བཅོས་མའི་ལྷཿ བི་མ་མི་ཏྲ་ཡེ་ཤེས་ལྷ་ཡི་ལྷསཿ ཡེ་ཤེས་ལྔ་ལྡན་རྟགས་ཀྱི་དབང་བསྐུར་རོཿ ཞེས་གསུངས་རྣམ་སྣང་སྤྱི་བོར་ཕྱག་བཞག་པསཿ སྐུ་གཟུགས་སྔ་མ་བས་ལྷག་རྒྱ་གར་ལུགསཿ འོད་ཟེར་
༼༡༧༧བ༽འཕྲོས་པས་དབུ་རྩེ་འོད་ཀྱིས་ཁྱབཿ དེ་ནས་བསམ་ཡས་ལྷ་ཁང་ཐམས་ཅད་ཁྱབཿ ལོ་ཙཱ་གསུམ་གྱིས་རྒྱལ་པོའི་སྙན་དུ་གསོལཿ དེ་ནས་རྒྱལ་པོ་ཐུགས་ཆེས་མངའ་འོག་ལཿ ཟླ་གཅིག་རྐང་མགྱོགས་བརྫངས་ནས་ཚེས་བཅུའི་ཉིནཿ བོད་ཀྱི་རྒྱལ་བློན་མ་ལུས་ཐམས་ཅད་འདུསཿ དབུ་རྩེ་རིགས་གསུམ་སྒོ་མདུན་གཡས་ཕྱོགས་སུཿ རྒྱལ་པོའི་གཡུ་ཁྲི་རབ་ཏུ་དཔངས་མཐོ་བརྩིགསཿ རྒྱལ་པོས་བི་མ་མི་ཏྲ་ཕྱག་མཛད་པསཿ རྒྱལ་པོའི་ཐུགས་ཀར་རིགས་གསུམ་མགོན་པོ་འདུགཿ དེ་ལ་བི་མས་རིན་ཆེན་ཕྲོག་ཞུ་ལཿ ཨོཾ་ཨཱཿཧཱུཾ་སྭཱཧཱཿ ཞེས་གསུངས་སེ་གོལ་ལན་ལྡ་བརྡབས་པ་ལསཿ རིགས་ལྔའི་སངས་རྒྱས་བཀྲ་ལམ་ཀུན་གྱིས་མཐོང་ཿ བོད་ཀྱི་རྒྱལ་ཁམས་ཀུན་གྱིས་བསྟོད་ཅིང་བསྔགསཿ དེ་དུས་བི་མ་མི་ཏྲ་གྱིས་དང་གསུངསཿ བི་མ་མི་ཏྲ་ལས་ནི་མ་ཤེས་སོཿ ལོ་ཙཱ་གསུམ་བསྒྱུར་བི་མས་ཆོས་མང་གསུངསཿ དགུང་ལོ་གླང་ཡིན་སུམ་བརྒྱ་ལོན་ནས་བྱོནཿ དེ་དུས་སངས་རྒྱས་མྱ་ངན་ལས་འདས་ནསཿ ལོ་ནི་སྟོང་དང་བརྒྱད་ཅུ་ཐམ་པ་སོང་ཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ པཎ་ཆེན་བི་མ་མི་ཏྲས་རྫུ་འཕྲུལ་བསྟན་པའི་ལེའུ་སྟེ་གྱ་གཅིག་པའོཿ ཿཐ་ཐ་ཉྲ་རྒྱ་རྒྱཿ ཿ