བོད་ཀྱི་རྒྱལ་པོས་རྒྱ་གར་པཎྜི་ཏ་བརྒྱ་རྩ་བརྒྱད་གདན་དྲངས་ནས་བོན་བསྣུབས་པའི་ལེའུ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིསཿ མི་ཕངས་གསེར་ལ་བྱས་ནས་གདན་
༼༡༧༨ན༽དྲངས་པཿ རྒྱ་གར་ཡུལ་ནས་བུདྡྷཱ་གུ་ཧྱ་དང་ཿ སིངྒ་ལ་ནས་ཨཱརྻ་དེ་བ་དང་ཿ མ་རུ་རྩེ་ནས་ཀ་མ་ཤཱི་ལ་དང་ཿ རྒྱ་ནག་བྷ་སང་ཁྲིག་ཞོར་སཾ་ཤི་དང་ཿ རྗེའུ་རིགས་ཧཱ་ཤར་མཧཱ་རཱ་ཛ་དང་ཿ རྒྱ་ནག་ཡུལ་གྱི་ཧཱ་ཤང་དེ་བ་དང་ཿ ཧཱ་ཤང་མཧཱ་ཡཱ་ན་ཞེས་བྱ་དང་ཿ རྒྱ་ནག་མཁས་པ་ཧ་ར་ནག་པོ་དང་ཿ རྒྱ་ནག་ཧཱ་ཤང་མཧཱ་སཱུ་ཏྲ་དང་ཿ རྒྱ་གར་ཡུལ་ནས་ཨཱ་ཙར་གསལ་བ་དང་ཿ ཙནྡྲ་ཀིརྟྟི་དྷརྨཱ་གཱི་ཏི་དང་ཿ ཤཱནྟ་རཀྵི་ཏ་དང་གསལ་རྒྱལ་དང་ཿ ཤཱནྟ་དེ་བ་བུདྡྷ་གུ་པྟ་དང་ཿ ཤྲཱི་བ་ལ་དྷ་ར་ཙྪིནྡྷ་མ་ཎི་དང་ཿ ཤཱིནྟི་ངྒ་རྦྷ་བི་ཤུདྡྷ་སིངྷཿ རཾ་བུ་གུ་ཧྱ་དེ་བ་ཙནྡྲ་དང་ཿ དཱ་ན་ཤཱི་ལ་བྲམ་ཟེ་ཨཱ་ནནྡཿ ཀ་ལྱཱ་མི་ཏྲ་སུ་རེནྡྲ་བོ་དྷཱིཿ ཛི་ན་མི་ཏྲ་ཤཱི་ལེནྡྲ་བོ་དྷཱིཿ བལ་པོ་ཤཱི་ལ་མཉྫུ་བ་སུ་དྷ་རཿ ཆོས་ཀྱི་བདག་པོ་ག་ག་ཀཱིརྟི་དང་ཿ ཞང་ཞུང་ཡུལ་ནས་གཤིན་ལི་ཤི་སྟག་རིང་ཿ ཐང་ནག་བོན་པོ་ཚ་མི་གཡུང་དྲུང་འབྱུང་ཿ གཤིན་བོན་དྲན་པ་པད་སླུངས་བྱ་བ་དང་ཿ མི་ལུས་བསམ་ལྷག་སྟག་ལྷ་མེ་འབར་དང་ཿ ཐར་བོན་གྲུབ་བསྐྱིལ་རྟ་བོན་བྱོན་ཁྲི་ནགཿ འཕྲུལ་བོན་གསང་བ་དང་རིངས་ལ་སོགས་བོསཿ ཨཱརྻ་པ་ལོའི་གླིང་བཞག་བོན་བསྒྱུར་བཅུགཿ དེ་དུས་རྒྱལ་པོའི་སྐུ་ཡི་རི་མ་གྲོ་ལཿ བན་དུ་ཤ་བ་རྭ་རྒྱས་བྱེད་དགོས་ཟེརཿ བན་པོས་ཤ་བ་གསོན་མ་བཟུང་
༼༡༧༨བ༽ནས་གྱེརཿ ལྷ་ཆ་དགོས་ཟེར་བོན་པོས་གཡག་ལུག་གསོདཿ དེ་ལ་སོགས་པའི་སྡིག་པ་གང་ཞིག་ལཿ ལོ་པཎ་རྣམས་ཀྱི་ས་བོན་པོའི་ལས་ལ་གཟིགསཿ པཎྜི་ཏ་རྣམས་གྲོས་མེད་བློ་གཅིག་ཏུཿ ལོ་ཙཱ་བརྒྱུད་ནས་རྒྱལ་པོའི་སྙན་གསོལ་པཿ ཆོས་ཀྱི་ཁྲིམས་དང་མི་མཐུན་བོན་ལུགས་འདིཿ མི་དགེ་བལ་གྱི་ཐུན་མོང་མ་ཡིན་གྱིཿ འདི་འདྲ་བྱེད་འཇུག་ངེད་རྣམས་རང་ཡུལ་འགྲོཿ བསྟན་པ་གཅིག་ལ་སྟོན་པ་གཉིས་མི་འོང་ཿ ཆོས་ལུགས་གཅིག་ལ་བྱེད་ལུགས་གཉིས་མི་རུང་ཿ རྒྱལ་ས་གཅིག་ལ་རྒྱལ་པོ་གཉིས་མི་འཐདཿ སྡིག་པའི་གྲོགས་དང་བསྐལ་པར་འགྲོགས་མི་བྱེདཿ དེ་སྐད་བསྲིངས་པས་རྒྱལ་པོས་ལན་བསྐུར་བཿ བོན་ཆོས་གཉིས་ནི་གཤེད་མ་ཕྲད་པ་བཞིནཿ གཅིག་ལ་གཅིག་ནི་དག་པ་མི་སྟེར་བསཿ ཆོས་ནི་དར་ཆ་ཆུང་ཞིང་བོན་ཁ་དྲགཿ ལོ་ཙཱ་མཁས་པ་མང་པོ་སྤྱུགས་དགོས་བྱུང་ཿ བོན་ཆོས་གཉིས་ཀ་དར་འཇུག་བཞུགས་ཞུས་པསཿ ཞེས་བསྲིངས་པཎྜི་ཏ་རྣམས་ལན་མི་སྟེརཿ ཆོས་གསུང་ཞུ་བ་ཕུལ་ཀྱང་ཆོས་མི་གསུངསཿ དེ་དུས་རྒྱལ་བའི་བློ་གྲོས་ཨ་མ་དང་ཿ བློན་པོ་ཏ་ར་ཀླུ་གོང་ཤི་བ་ལཿ བོན་ཆོས་གཉིས་ཀས་བུམ་ཆོག་བྱས་པའི་ཚེཿ རྒྱལ་པོ་ཆོས་ལ་ཡིད་ཆེས་བོན་ཐེ་ཚོམཿ དོན་མཁར་ཐང་ལ་ངག་ནུས་འགྲན་བཅུག་པསཿ རྒྱལ་པོ་ཆོས་ལ་ཡིད་
༼༡༧༩ན༽ཆེས་བོན་ཐེ་ཚོམཿ སློབ་དཔོན་པདྨ་ཐང་ནག་བོན་པོ་གཉིསཿ གྲུབ་མཐའ་བཟུང་ནས་བགེགས་རེས་བྱེད་བཅུག་པསཿ རྒྱལ་པོ་ཆོས་ལ་ཡིད་ཆེས་བོན་ཐེ་ཚོམཿ བོ་དྷི་ས་ཏྭ་ཤཱ་རིའི་དབུ་ཆེན་གཉིསཿ གྲུབ་མཐའ་བཟུང་ནས་འགེགས་རེས་བྱེད་བཅུག་པསཿ རྒྱལ་པོ་ཆོས་ལ་ཡིད་ཆེས་བོན་ཐེ་ཚོམཿ བི་མ་མི་ཏྲ་ལི་ཤི་ལྟག་རིངས་གཉིསཿ གྲུབ་མཐའ་བཟུང་ནས་འགེགས་རེས་བྱེད་བཅུག་པསཿ རྒྱལ་པོ་ཆོས་ལ་ཡིད་ཆེས་བོན་ཐེ་ཚོམཿ བོན་གྱི་ཐེག་དགུ་ཆོས་ཀྱི་ཐེག་དགུ་གཉིསཿ ལོ་ཙཱ་རྣམས་ཀྱིས་འགེགས་རེས་བྱེད་བཅུག་པསཿ རྒྱལ་པོ་ཆོས་ལ་ཡིད་ཆེས་བོན་ཐེ་ཚོམཿ རྒྱལ་པོའི་མངའ་འོག་བོན་པོ་ཐམས་ཅད་བསྡུསཿ ཁམས་གསུམ་དཀར་བོན་ནག་པོའི་གྲལ་བྱས་ནསཿ བོན་པོའི་སྐྲ་བསྒོར་ཕ་ཇོའི་མིང་དུ་བཏགསཿ མགོ་ལ་ཝ་ཞྭ་ལག་པར་ཕྱེད་རྔ་གཏདཿ གོས་སུ་རས་སྔོན་ཟས་སུ་ལྷང་ཟས་བྱིནཿ བོན་ལུགས་སྡིག་དང་འདྲེས་པ་ཐམས་ཅད་བསྣུབསཿ འཇིག་རྟེན་འཕྲལ་རྐྱེན་བཟློག་པ་ཙམ་གྱི་བོནཿ ཤ་བ་ཤིང་མགོ་རྭ་རྒྱས་བྱེད་པ་དང་ཿ གཡག་ལུག་ཟན་ལ་གཟུགས་བརྙན་བྱེད་དུ་བཅུགཿ ལྟ་གཡང་སྐོར་གསུམ་མིན་པ་ཐམས་ཅད་བསྣུབསཿ གཤེན་བོ་ན་རྣམས་ལ་ཁལ་དུ་བོང་བུ་བྱིནཿ བ་ལང་གསོན་མར་གཡུ་དྲུང་བོན་རྣམས་བཀལཿ འབངས་ཀྱིས་གཙང་སྟོད་བྱེ་མ་གཡུང་དྲུང་
༼༡༧༩བ༽བསྐྱལཿ རྩ་མི་ཤིང་མི་ལྗང་མོ་མིག་དགུའི་ཡུལཿ གླང་གི་གྱིམ་ཤོད་ཡུ་མོ་མགུལ་གྱི་ཡུལཿ སོག་པོ་སྤྲེའུ་སློག་ཅན་གྱི་ཡུལ་དུ་སྤྱུགསཿ སེམས་ཅན་གསོད་ལ་བཤད་པའི་མིང་དུ་བཏགསཿ སྡིག་གླར་མགོ་བྱིན་མི་ཡི་ཁྱུ་ནས་ཕུདཿ གྲལ་དུ་སྒོ་རྒྱབ་སྐྱས་ཀའི་འོག་ཏུ་བཞགཿ ཟས་སུ་འབགས་ལྷག་སྐོམ་དུ་སྐྱོགས་ཞབས་བྱིནཿ ཁ་བསྲུངས་གོས་བསྲུངས་ཀུན་གྱིས་སྐྱུག་བྲོ་བལྟཿ སྡིག་མཁན་ཡིན་ཟེར་རིས་སུ་བཅད་ནས་བཞགཿ དེ་དུས་བློན་པོས་ལྐོག་ཏུ་གླེང་བ་ལཿ འདི་འདྲའི་རྟེན་འབྲེལ་མི་ཤོང་གཤིས་མི་དགེཿ རྒྱལ་པོའི་མངའ་ཐང་ཆུང་ངུ་འགྲོ་ཟེར་སྐདཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ བོད་ཀྱི་རྒྱལ་པོས་རྒྱ་གར་པཎྜི་ཏ་བརྒྱ་རྩ་བརྒྱད་གདན་དྲངས་ནས་བོན་བསྣུབས་པའི་ལེའུ་སྟེ་གྱ་གཉིས་པའོཿ ཿཐ་ཐ་ཉྲ་རྒྱ་རྒྱཿ ཿ