གཡུ་སྒྲ་སྙིང་པོ་ཆོས་གཏུག་ཏུ་བཏང་ཞིང་རྒྱལ་མོ་ཚ་བའི་རོང་ནས་བཻ་རོ་ཙ་ན་གདན་དྲངས་པའི་ལེའུ།
དེ་ནས་རྒྱལ་པོས་ཆོས་གསུངས་ཞུ་བ་ཕུལཿ ཨུ་རྒྱན་ཡུལ་ནས་སྤྱན་དྲངས་པདྨ་འབྱུང་ཿ ཟ་ཧོར་ཡུལ་ནས་སྤྱན་དྲངས་ཞི་བ་མཚོཿ ཁ་ཆེའི་ཡུལ་ནས་སྤྱན་དྲངས་བི་མ་ལཿ སེང་གེའི་ཁྲི་ལ་ཁྲི་སྙན་པགས་པ་བཤམསཿ ཡོལ་བ་བླ་རེའི་འོག་ཏུ་གདུགས་ཕུབ་ནསཿ གཡས་སུ་རྒྱལ་མཚན་གཡོན་དུ་བ་དན་ཕྱརཿ མདུན་དུ་གསེར་གྱི་མཎྜལ་བརྒྱ་རྩ་བརྒྱདཿ གཡུ་དང་མུ་མེན་བྱུ་རུ་མ་རྒད་དང་ཿ རིན་ཆེན་སྣ་ཚོགས་མཎྜལ་
༼༡༨༠ན༽བཀོད་ནས་བཞག ཿསོ་སོར་ལོ་ཙཱ་བཙུགས་ནས་ཆོས་གསུང་བཅུགཿ བི་མ་མི་ཏྲ་བཻ་རོ་ཙ་ན་འདྲིཿ འབངས་ཀྱིས་རྒྱལ་མོ་ཚ་རོང་སྤྱུགས་ཞུས་པསཿ ཐལ་བརྡབས་བཻ་རོ་གསུང་ཞིང་སྤྱན་ཆབ་ཕྱུང་ཿ མངོན་པ་བྲ་ཀ་ར་ན་སྡེ་བརྒྱད་གསུངསཿ དེ་དུས་བོད་དང་རྒྱལ་མོ་ཚ་རོང་གཉིསཿ ཚོང་མགྲོན་མང་པོ་ཡར་མར་འགྲོ་བ་ལསཿ རྒྱ་རོང་ཚོང་པ་བོད་ཕྱིན་ལོག་བྱུང་བསཿ བོད་ཀྱི་གཏམ་དྲིས་ཇི་ལྟ་བ་བཞིན་སྨྲསཿ མཁས་པ་ཆེན་པོ་བཻ་རོ་ཙ་ན་ཡིསཿ རྣམ་ཐར་སྒོ་གསུམ་ཐང་གི་ཆོས་གྲྭ་རུཿ གཡུ་སྒྲ་སྙིང་པོ་ལ་སོགས་འདོར་དུ་བཏང་ཿ བནྡེ་ཕལ་པ་ཞིག་གི་ཆས་སུ་ཞུགསཿ ཞྭ་གོས་ལྷམ་ལ་ལྷུན་པ་སྣ་ཚོགས་བརྒྱབཿ སྦ་མཁར་རིང་མོ་ཕྱག་ཏུ་བསྣམས་ནས་ཕྱིནཿ གཡུ་སྒྲས་མཇལ་བའི་ཞུ་འཕྲིན་བསྲིངས་པ་ལསཿ ཆོས་ཀྱི་ཐུན་བབ་བག་ཙམ་བཞུགས་ཤིག་ཟེརཿ གཡུ་སྒྲ་དང་ཐུངས་མ་བཞུགས་འཆངས་ཏེ་ཕྱིནཿ སྦ་མཁར་ལག་བཀབ་ཨོག་མཁར་བཙུགས་བྱས་ནསཿ བི་མ་ལ་ལ་ཕྱག་མི་འཚལ་བར་གཟིགསཿ ཀ་ཀ་པ་རི་ཀ་ཀ་པ་རི་གསུངསཿ བི་མས་བརྡ་ཐིམ་གསུངས་ནས་དབུ་འཕང་སྨདཿ གཡུ་སྒྲ་སྙིང་པོས་རྗེ་འབངས་ཡོངས་ལ་གཟིགསཿ སླར་ཡང་ཀ་ཀ་པ་རི་ཟེར་ནས་སོང་ཿ རྒྱལ་པོ་ཁྲི་སྲོང་ལྡེའུ་བཙན་ཞལ་ན་རེཿ སློབ་དཔོན་དབུ་འཕངས་སྨ་ལ་གསུང་རེ་ཆུང་ཿ བནྡེ་
༼༡༨༠བ༽སྐྱ་མིན་སེར་མིན་སྐད་རེ་ཆེཿ ཀ་ཀ་པ་རིའི་སྒྲ་དེ་ཅི་ཡིན་ཞུསཿ སློབ་དཔོན་བི་མ་མི་ཏྲའི་ཞལ་སྔ་ནསཿ ཝ་དང་སྤྲེའུ་ཇི་ལྟར་སྒྲ་བཟང་ཡང་ཿ གཅན་གཟན་རྒྱལ་པོ་སེང་གེའི་སྒྲ་མི་འཁྱུདཿ ཕོ་རོག་རྡོ་རྗེ་འགྲོས་ན་འགྲོ་མགྱོགས་ཀྱང་ཿ སྟོང་གསུམ་ས་སྟེང་འཁོར་བ་ཅང་སྲིད་དམཿ ཉན་ཐོས་བྱིས་པའི་ཚེས་ཀྱིས་འཚོང་མི་རྒྱཿ ཐེག་ཆེན་ངེས་དོན་བླ་མེད་མ་འཆད་པརཿ དེ་སྐད་ཟེར་བ་ཡིན་ནོ་རྒྱལ་པོར་གསུངསཿ བདག་གིས་བརྡ་ཐིམ་བྱས་པ་ཁ་རོག་སྡོདཿ ད་དུང་དུས་ལ་མ་བབ་བྱས་པ་ཡིནཿ རྗེ་འབངས་ཡོངས་ལ་བལྟས་ནས་ཟེར་བ་ནིཿ མཁས་བླུན་བྱེ་བྲག་མི་ཤེས་སྐྱོན་ཅན་ཚོཿ རྨོངས་པ་འདུས་ནས་མཁས་པ་སུན་ཕྱུང་སྤྱུགསཿ ངན་པ་གཞུང་ལོག་གླེན་འཐོམས་བྷ་ཀརཿ ཐམས་ཅད་མཁྱེན་པ་རྒྱལ་པོ་ཚ་རོང་སྤྱུགསཿ དེ་སྐད་ཟེར་བ་ཡིན་ནོ་རྗེ་འབངས་རྣམསཿ དེ་ནས་སྐ་ཅོག་ཀུ་མཱ་ར་གསུམ་གྱིསཿ གཡུ་སྒྲ་སྙིང་པོ་ཚོལ་དུ་ཕྱིན་པ་ཡིསཿ གླིང་གསེབ་ཆང་མ་ཞིག་གི་ཁྱིམ་ན་འདུགཿ རེས་འགའ་དབྱངས་ལེན་རེས་འགའ་གསོལ་བ་འདེབསཿ ཆང་འཚོང་མ་དེ་ངུ་ཞིང་ཕྱག་འཚལ་འདུགཿ གཉགས་ཀྱིས་གྲོགས་པོ་གང་ནས་འོང་བྱས་པསཿ རྒྱལ་མོ་ཚ་བའི་རོང་ནས་འོངས་སོ་ཟེརཿ སྐབས་བཻ་རོ་ཙ་ན་ཤེས་སམ་བྱསཿ ཤེས་ཤེས་ང་ཡི་བླ་མ་ཡིན་ནོ་ཟེརཿ ཅོག་རོས་སྐུ་ཁམས་བཟང་ནས་ཡོད་དམ་བྱསཿ སྐུ་ཁམས་བཟང་ཞིང་ང་ནི་ཆོས་གཏུགས་
༼༡༨༡ན༽བཏང་ཿ བཻ་རོ་ཙ་ནས་ཅི་མཁྱེན་ངས་ཤེས་ཟེརཿ གཉགས་ཆེན་ཀུ་མཱས་གདམས་ངག་ཞུ་བྱས་པསཿ ཡང་ན་རིག་དང་རིག་པ་བརྗེ་བར་བྱཿ ཡང་ན་རིག་པ་མི་ཕངས་ནོར་གྱིས་བླུཿ ཡང་ན་རིག་པ་བུ་ལ་སྦྱིན་པར་བྱཿ ས་སེར་རྡོ་སྡོ་མཆུ་སྙུང་ལང་ལིང་དང་ཿ སྐུལ་མཛེས་པ་ཞལ་དུ་བདའ་བའི་བཅུདཿ ཐུགས་སུ་འབྱོན་པ་བཀོལ་ན་དུས་ལ་རུབཿ དེ་བཞིན་མཆིས་ན་གདམས་ངག་སྦྱིན་ཆོག་ཟེརཿ གཉགས་ཀྱིས་བཀའ་བཞིན་བསྒྲུབས་ནས་གདམས་ངག་ཞུསཿ དེ་ནས་གཡུ་སྒྲ་ཁྲིད་ནས་ཕོ་བྲང་ཕྱིནཿ བི་མ་ལ་ཡིས་དྲི་བ་དྲིས་པ་ཡིསཿ བདག་ནི་པ་གོར་བཻ་རོ་ཙ་ནའི་བུཿ སློབ་མ་གཡུ་སྒྲ་སྙིང་པོ་བྱ་བ་ལགསཿ དེ་སྐད་ཟེར་ནས་ཆོས་ལ་གླེང་བསླང་བྱསཿ སེམས་སྨད་ལྔ་ལ་མཁས་པ་ཞིག་འདུག་གསུངསཿ དེ་ནས་གཡུ་སྒྲས་ཀྱང་ནི་ཆོས་གྲ་བཙུགསཿ མཐུན་ཀྱང་དོན་ནི་གཅིག་ཏུ་མཐུནཿ འདབ་ཆགས་མ་བུ་བསྡེབས་བཞིན་གཅིག་ཏུ་འགྲིལཿ འགྱུར་གཉིས་གཅིག་བསྡོམས་སེམས་སྨད་བཅོ་བརྒྱད་བཏགསཿ དེ་དུས་བོད་ཀྱི་རྒྱལ་བློན་འབངས་བཅས་
༼༡༨༡བ༽རྣམསཿ བཻ་རོ་ཙ་ན་སྤྱུགས་པས་འགྱོད་པ་སྐྱེསཿ བཻ་རོ་ཙ་ནའི་ཡོན་ཏན་ཐམས་བགྲང་ཿ འཕྲལ་ཞིབ་འགྲོགས་བདེ་དང་བ་འདྲན་པའི་མིཿ སྐུ་ཡི་དཀྱིལ་འཁོར་ལྟ་བས་ཆོག་མི་ཤེསཿ ཚངས་པའི་གསུངས་ནི་སྙན་པའི་དབྱངས་སུ་ལེནཿ དགུང་ལོ་བཅོ་ལྔ་ལས་ནི་མ་ལོན་པརཿ ལམ་རྒྱུས་མེད་པར་རྒྱ་གར་ཡུལ་དུ་རྟོལཿ འཇིགས་པ་གང་གིས་མ་ཚུགས་བོད་ཡུལ་སླེབསཿ བོད་སྤྲུག་སྒྲ་མ་ཤེས་བར་བཻ་རོས་ཤེསཿ རྒྱ་བོད་ལམ་ཞག་ཟླ་བ་བཅུ་གསུམ་ལཿ ཟླ་བ་ཕྱེད་ཀྱིས་ཆོད་པའི་རྐང་མགྱོགས་གྲུབཿ ཆོས་ནི་གང་ལའང་མ་རྨོངས་ཐམས་ཅད་མཁྱེནཿ ཐེག་པའི་རྣམ་གྲངས་མ་འདྲེས་སོ་སོར་ཕྱེདཿ རྫུ་འཕྲུལ་སྟོབས་ལྡན་སྟོན་པའི་ཞལ་སྐྱིན་མཆོགཿ ས་བརྒྱད་བྱང་ཆུབ་སེམས་དཔའ་འཛར་ཅིང་སྦྲེང་ཿ དེ་ནས་གཡུ་སྒྲས་རྒྱལ་མོ་ཚ་རོང་བྱོནཿ སྔར་གྱི་བཀའ་མཆིད་ཞིབ་ཏུ་གསོལ་བ་ཡིསཿ བཻ་རོ་ཙ་ན་དགྱེས་པའི་མགུར་འདི་གསུངསཿ བཻ་རོ་ཙ་ན་བདག་ཉིད་མཆིས་པ་འདིཿ ཡང་དག་བཅུ་གཅིག་དོན་དང་ཡེ་ནས་ལྡནཿ ཤེས་བྱའི་སྒྲིབ་པ་ཆ་ཙམ་མ་དག་པསཿ བོད་ཀྱི་སྤུ་རྒྱལ་བཙན་པོའི་ཡུལ་དུ་སྐྱེསཿ རྒྱ་གར་ཡུལ་ནས་དམ་པའི་ཆོས་བཙལ་ཡང་ཿ མ་དག་བཙུན་མོ་བློན་པོ་ཀུན་བགྲོས་ནསཿ གདུལ་དཀའ་རྒྱལ་མོ་ཚ་བའི་རོང་དུ་སྤྱུགསཿ ཚ་བའི་རྒྱལ་ཁམས་
༼༡༨༢ན༽ཐམས་ཅད་དཀར་པོར་བསྒྱུརཿ ད་ནི་སླར་ལོག་བོད་ཡུལ་དབུས་སུ་མཆིཿ མ་དག་སྒྱུ་མའི་ཕུང་པོ་དེར་བསྙིལ་ནསཿ ཟུང་འཇུག་འགྱུར་མེད་ནམ་མཁའི་མཐའ་བཞིན་རྒྱསཿ རྒྱལ་བློན་འབངས་བཅས་ཟོ་མདོག་བདེ་བར་བཞུགསཿ མཐར་ནི་ལོངས་སྐུའི་ཞིང་དུ་མཇལ་བར་སྨོནཿ ཞེས་གསུངས་དེ་ནས་བོད་ཡུལ་དབུས་བྱོན་པའིཿ ལམ་གར་སྦམ་རྒན་མི་ཕམ་མགོན་པོ་ཞེསཿ མགོ་དཀར་ལུས་འཁོགས་ལོ་བརྒྱ་ལོན་པའི་སརཿ ཞག་ས་ཕོག་པས་གང་འོང་གར་འགྲོ་ཟེརཿ གཡུ་སྒྲས་རྒྱལ་རོང་ནས་འོང་བོད་འགྲོ་བྱསཿ རྒད་པོ་ཧམས་ནས་འགྲོན་པོ་ཁྱོད་གཉིས་འཁྲུལཿ ཚ་བའི་རོང་དུ་ཆོས་ཉན་མི་སྡོད་པརཿ མཁས་པ་བཻ་རོ་ཙ་ན་ཞེས་བྱ་བཿ ཆོས་ཀྱི་ཉི་མ་ཤར་འདུག་ཟེར་བ་ཐོསཿ དེར་མི་སྡོད་པར་ཁྱེད་གཉིས་འདྲ་བ་ཟེརཿ བཻ་རོ་ཙ་ནས་དེ་ཉིད་ང་ཡིན་གསུངསཿ རྒད་པོས་མིག་ལ་མཁར་བ་བཙུགས་ནས་བལྟསཿ བཻ་རོ་ཙ་ནའི་མགུལ་པ་ལ་འཁྱུད་ནསཿ རྒད་པོས་ཡུན་ཅིག་དུས་ནས་འདི་སྐད་ལོཿ ང་ནི་རྒས་ཤིང་ཆོས་མེད་འཆི་མ་བཏུབཿ ཉོན་མོངས་སྡུག་རྒ་ནང་འདྲ་ཡོང་བ་སྙམཿ ཁྱོད་དང་མཇལ་བ་སྐྱིད་རྒན་ཨ་རེ་དགའཿ འཆི་ཀར་ཕན་པའི་ཆོས་ཤིག་ཞུ་དང་ཟེརཿ དེ་ནས་བཻ་རོས་སྒོམ་རྟེན་ལུས་ལ་བཙུགསཿ སྒོམ་ཐག་རྐེད་ལ་བསྡམས་ནས་གདམས་ངག་བཏབཿ རྒད་པོ་ལུས་མ་
༼༡༨༢བ༽བོར་བར་སངས་རྒྱས་སོཿ དེ་ནས་བསམ་ཡས་ཆོས་གྲའི་གསེབ་ཏུ་བྱོནཿ ཕ་མ་རྒན་འཁོགས་གཉིས་ཀྱང་དེ་ན་འདུགཿ བཻ་རོས་ཞེ་བློ་བདེ་བའི་མགུར་འདི་གསུངསཿ ཞབས་ཏོག་རྣམ་གསུམ་བླ་མ་བསྟེན་པ་འདིཿ བཻ་རོ་ཙ་ན་པཎ་ཆེན་འཛོམ་པ་འདྲཿ ཁོ་བོའི་གཏུག་ས་འདི་རྣམས་དགྱེས་པ་ནཿ གཞན་དག་སུ་མ་མགུ་ཡང་ཞེ་བློ་བདེཿ ཤེས་རབ་རྣམ་གསུམ་མདོ་རྒྱུད་བལྟ་བ་འདིཿ རིན་ཆེན་གླིང་དུ་ཚོང་དཔོན་ཕྱིན་པ་འདྲཿ ལུས་སྲོག་ལོངས་སྤྱོད་ཆོས་ཕྱོགས་སོང་ལ་ང་ཿ ཚེ་འདིར་སྡུག་ཅིང་ཕོངས་ཀྱང་ཞེ་བློ་བདེཿ བསླབ་པ་གསུམ་གྱིས་ལེགས་པར་བརྒྱན་པ་འདིཿ རྒྱལ་པོའི་ལྷ་གཅིག་བག་མར་ཕྱིན་པ་འདྲཿ རང་གིས་ཆོས་ཚུགས་དྲད་པོར་ཟིན་པ་ང་ཿ གཞན་གྱིས་ངན་སྨྲས་བརྗོད་ཀྱང་ཞེ་བློ་བདེཿ སྡེ་སྣོད་གསུམ་ལ་སྟོད་མོ་བལྟ་བ་འདིཿ མུན་པའི་གླིང་དུ་སྒྲོན་མེ་བཏེག་པ་འདྲཿ རྐྱེན་སྐུ་ལ་དགྲ་ལ་བཟོད་པ་བསྒོམ་པ་ང་ཿ གཞན་དོན་མ་ཕེར་ཟེར་ཡང་ཞེ་བློ་བདེཿ ལུས་ངག་ཡིད་གསུམ་ཆོས་ལ་འཁོལ་བ་འདིཿ ཐག་རིང་འགྲོན་པོ་ཕ་ཡུལ་སླེབ་པ་འདྲཿ རྟག་ཏུ་དགེ་སྦྱོར་དག་ལས་མ་ཡེངས་ང་ཿ མི་རྗེས་མ་སླེབ་ཟེར་ཡང་ཞེ་བློ་བདེཿ དུག་གསུམ་གཉེན་པོར་ཡེ་ཤེས་གཏོང་པ་འདིཿ ཚད་པའི་ནད་ལ་ག་བུར་ཐོངས་པ་འདྲཿ བསམ་རྒྱུ་དམ་པའི་ཆོས་ལས་མེད་པ་ང་ཿ བློ་ཤོ་རྒོད་དོ་ཟེར་ཡང་ཞེ་བློ་བདེཿ ཐོས་བསམ་སྒོམ་པ་ཕྱོགས་
༼༡༨༣ན༽མེད་བྱས་པ་འདིཿ ནམ་མཁའི་དཀྱིལ་དུ་མདུད་བསྐོར་བྱས་པ་འདྲཿ ཕྱི་ནང་ཆོས་ཀྱི་སྒྲོ་འདོགས་ཆོད་པ་ང་ཿ ཆོས་ཀུན་མི་ཤེས་ཟེར་ཡང་ཞེ་བློ་བདེཿ ཨ་ཏི་རྟོགས་པའི་རྣལ་འབྱོར་འཕྱོ་བ་འདིཿ གཞན་དྲིང་མེད་པའི་ཁྲི་མུན་ཐར་པ་འདྲཿ འཆད་ཉན་སྒོམ་ལ་མཁས་པར་གྱུར་པ་ང་ཿ མི་ཆོས་མ་མཁས་ཟེར་ཡང་ཞེ་བློ་བདེཿ རང་བས་གཞན་ལ་གཅེས་པར་འཛིན་པ་འདིཿ བྱང་ཆུབ་སེམས་དཔའི་དགེ་སྦྱོང་སྐྱེས་རབས་འདྲཿ ངོ་བསྲུང་ཕྱོགས་སུ་གདམས་ངག་མི་སྟེར་ང་ཿ མི་སེམས་མ་ཟིན་ཟེར་ཡང་ཞེ་བློ་བདེཿ སྦྱིན་པ་གསུམ་གྱི་བརྒྱགས་ཕྱེ་བསྒྲུབས་པ་འདིཿ དབུལ་པོས་ཡིད་བཞིན་ནོར་བུ་རྙེད་པ་འདྲཿ ཅི་ཡོད་བླ་མའི་ཕྱོགས་སུ་འབུལ་བ་ང་ཿ ལྟོགས་གྲི་འཁྱགས་གྲིར་ཤི་ཡང་ཞེ་བློ་བདེཿ ཚུལ་ཁྲིམས་གསུམ་གྱི་སྐྱེལ་མ་ཁྲིད་པ་འདིཿ འཇིགས་པའི་འཕྲང་ལ་ལམ་རྒྱ་བཙུགས་པ་འདྲཿ བཟང་ངན་འབྲིང་གསུམ་གོང་དུ་འཁུར་པ་ང་ཿ འཁོས་མེད་སྙོམས་ཆུང་ཟེར་ཡང་ཞེ་བློ་བདེཿ བཟོད་པ་གསུམ་གྱི་གོ་ཆ་གྱོན་པ་འདིཿ བཙན་པོའི་མཁར་ལ་རུས་སྦལ་འཛེག་པ་འདྲཿ འཇིག་རྟེན་བྱ་བ་ཐམས་ཅད་བློས་བཏང་ང་ཿ ཁ་ཉེན་དབང་ཆུང་ཟེར་ཡང་ཞེ་བློ་བདེཿ བརྩོན་འགྲུས་གསུམ་གྱི་རྟ་བཟང་རྒྱུག་པ་འདིཿ འཚང་ཅན་མི་དང་ཡུས་ཆེན་འཕྲད་པ་འདྲཿ སྤྱུགས་པའི་ཡུལ་དུ་མི་སྐྱོ་ཚུགས་པ་ང་ཿ འགྲོ་ས་མ་
༼༡༨༣བ༽བྱུང་ཟེར་ཡང་ཞེ་བློ་བདེཿ བསམ་གཏན་གསུམ་གྱི་ས་མཁར་འཛིན་པ་འདིཿ སྤྲིན་མེད་མཁའ་ལ་ཉི་མ་ཤར་བ་འདྲཿ སེམས་ཀྱི་གཞི་རྩ་ལེགས་པར་ཆོད་པ་ང་ཿ ལྟ་ལོག་ཆོས་མིན་ཟེར་ཡང་ཞེ་བློ་བདེཿ བསླབ་གསུམ་ལྡན་ཞིང་སྤོབས་པས་ཁྱོགས་པ་འདིཿ རི་རབ་རྩེ་ནས་རི་ཕྲན་མཐོང་བ་འདྲཿ ཐེག་པའི་འཇུག་སྒོ་ཀུན་རྫོགས་རྫོགས་ཆེན་ང་ཿ མུ་སྟེགས་ཕྲ་མེན་ཟེར་ཡང་ཞེ་བློ་བདེཿ ཞེས་གསུངས་པཎ་ཆེན་བི་མ་མི་ཏྲ་ལཿ སྤྱིར་ནི་སྒྲ་རིག་མཁས་པའི་པཎྜི་ཏཿ ཁྱད་པར་གསང་སྔགས་མཁས་དང་ལྷན་ཅིག་འཛོམཿ ངས་ལོ་བཅུ་གཅིག་བར་དུ་མདོ་སྡེ་ཉནཿ བཅུ་གཉིས་མདོ་སྔགས་ཐམས་ཅད་བོད་དུ་བསྒྱུརཿ ལོ་གཅིག་དབང་རྫོགས་ལག་ཏུ་ལེན་ཐབས་སྦྱངསཿ ཆུ་མ་འཕྲད་པར་སྲོག་དང་དོ་བྲལ་བྱསཿ རྒྱུད་སྟོད་རྐེད་པར་དཀྲིས་ནས་བོད་དུ་འོང་ཿ ཆོས་བཞིན་སྤྱད་ཀྱང་ཆོས་མིན་བློན་པོ་འགསཿ རྨོངས་པ་འདུས་ནས་མཁས་པ་སུན་འབྱིན་བྱེདཿ དམུན་པ་འདུས་ཤིང་བློ་བསྡུར་ང་ཉིད་སྤྱུགསཿ རྒྱ་གར་པཎ་ཆེན་བོད་དུ་བྱོན་པས་དགའཿ ཟང་ཟིང་ཅང་མེད་རྒྱ་རོང་ཆོས་ལ་འཁོདཿ དེ་ཉིད་སྒྲུབ་པའི་མཎྜལ་ཕྱག་ཕྱིར་འབུལཿ ཞེས་གསུངས་བི་མ་ལ་ལ་ཕྱག་བཙལ་བསཿ བི་མ་མི་ཏྲས་བཞེངས་ནས་ཕྱག་ལན་མཛདཿ བོད་ཀྱི་པཎྜི་ཏ་གསུང་སྤྱན་ཆབ་ཕྱུང་ཿ རྗེ་འབངས་ཐམས་ཅད་བཻ་རོ་ཙ་ནར་བལྟཿ རབ་ཏུ་ངུ་ཞིང་ཤིན་ཏུ་
༼༡༨༤ན༽ངོ་མཚར་གྱུརཿ རྒྱ་གར་པཎྜི་ཏ་རྣམས་ཐལ་མོ་སྦྱརཿ མཆི་མ་གཟགས་པ་མཚན་བསྐྱོར་ཕྱི་བར་མཛདཿ ཕ་མ་རྒན་འཁོགས་བུ་ལ་བལྟ་ཞིང་ངུ་ཿ བཻ་རོ་ཙ་ནའང་ཕ་མ་སྙིང་རྗེར་དགོངསཿ མ་གཟིགས་པ་བཞིན་མཛད་ནས་སྤྱན་ཆབ་འབྱིནཿ རྒྱལ་བློན་འབངས་བཅས་ཕྱག་འཚལ་བཤགས་པ་བྱསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས་གཡུ་སྒྲ་སྙིང་པོ་ཆོས་གཏུག་ཏུ་བཏང་ཞིང་རྒྱལ་མོ་ཚ་བའི་རོང་ནས་བཻ་རོ་ཙན་གདན་དྲངས་པའི་ལེའུ་སྟེ་གྱ་གསུམ་པའོཿ ཿཐ་ཐ་ཉྲ་རྒྱ་རྒྱཿ ཿ