སྒྲ་བསྒྱུར་གླིང་དུ་སྒྲ་བསྒྱུར་བའི་ལེའུ།
དེ་ནས་བསམ་ཡས་དབུ་རྩེའི་བར་ཁང་དུཿ ལོ་པཎ་སྤྱན་དྲངས་ཆོས་བསྒྱུར་ཞུ་བ་ཕུལཿ སློབ་དཔོན་པདྨའི་སྐུ་ལ་མངལ་དྲིས་དབེནཿ པད་སྡོང་སྐུ་འཁྲུངས་སྐྱེ་ཤི་གཉིས་མི་མངའཿ ཁམས་གསུམ་དབང་བསྡུས་སྲིད་གསུམ་ཟིལ་གྱིས་མནནཿ ཆོས་མིད་སྨོས་པ་ཙམ་གྱིས་དོན་རྣམས་མཁྱེནཿ མདོ་སྔགས་ཆོས་སོ་ཅོག་ལ་མ་རྨོངས་ཤིང་ཿ ཁྱད་པར་གསང་སྔགས་ནང་པའི་བདག་པོ་ཡིནཿ བོད་དུ་གདན་དྲོངས་ས་བཏུལ་སྐུ་དྲིན་ཆེཿ སེད་ཁྲི་སུམ་བརྩེགས་གདན་ལ་བཞུགས་སུ་གསོལཿ པཎ་ཆེན་བི་མ་མི་ཏྲ་བཀའ་རྒྱ་མཚོཿ སྡེ་སྣོད་གསུམ་དང་གསང་སྔགས་ཕྱི་ནང་སོགསཿ ཆོས་རྣམས་ཐུགས་མངའ་མི་བརྗེད་གཟུང་ཐོབ་ཡིནཿ བོ་དྷི་ས་ཏྭ་
༼༡༨༤བ༽བསྟན་པའི་གཞི་མ་སྟེཿ དགེ་འདུན་མེད་ན་སངས་རྒྱས་བསྟན་པ་མེདཿ དེ་བས་དགེ་འདུན་རིན་ཆེན་མཆོག་ཏུ་གསུངསཿ སྡེ་སྣོད་གསུམ་དང་གསང་སྔགས་ཕྱི་མ་མཁསཿ གཡས་གཡོན་གཉིས་སུ་སེང་ཁྲི་གཉིས་བརྩེགས་ནསཿ གཡས་སུ་བི་མ་གཡོན་དུ་བོ་དྷི་བཞུགསཿ པཎ་ཆེན་གཞན་རྣམས་སེང་ཁྲི་རེ་རེར་བཞུགསཿ བཻ་རོ་ཙ་ནར་གབ་རྩེ་ཉིས་བརྩེགས་བཏིངསཿ ལོ་ཙཱ་གཞན་རྣམས་གབ་རྩེ་རེ་ལ་བཞུགསཿ རྒྱལ་པོས་གསེར་གྱི་མཎྜལ་རེ་རེ་ཕུལཿ རྒྱ་ནག་ཇ་དང་བལ་པོའི་གོ་ལ་དང་ཿ བོད་ཀྱི་འབྲུ་ཆང་རྒྱ་གར་འབྲས་ཆང་དང་ཿ འཇིག་རྟེན་ཟས་སྣ་མང་པོ་ཀུན་བསགས་ནསཿ གང་ལ་གང་བཞེད་དྲངས་ནས་བསྐོར་ཕྱག་བཙལཿ ཨེ་མ་ཧོཿ ཨོ་རྒྱན་སློབ་དཔོན་པདྨ་འབྱུང་གནས་དཔལཿ ཟ་ཧོར་མཁན་པོ་བོ་དྷི་ས་ཏྭ་དང་ཿ ཁ་ཆེའི་པཎ་ཆེན་བི་མ་ལ་མི་ཏྲཿ དབུ་ཡི་མཆོད་གནས་ལོ་པཎ་བརྒྱ་རྩ་བརྒྱདཿ བདག་ནི་ཆོས་སྐྱོང་རྒྱལ་པོར་ཁས་འཆེ་བསཿ རྒྱ་གར་ཡུལ་ན་བཞུགས་པ་དམ་པའི་ཆོསཿ བཀའ་དང་བསྟན་བཅོས་རྒྱུད་ལུང་མན་ངག་རྣམསཿ གཅིག་ཀྱང་མ་ལུས་བོད་དུ་བསྒྱུར་དུ་གསོལཿ གུས་ལྡན་ཞེ་སར་བཅས་པས་བཀའ་ནན་ཞུསཿ དེ་ནས་ལོ་པཎ་ཁྲིམས་ཁང་གླིང་དུ་བྱོནཿ རྒྱལ་པོས་མོན་ལ་ཤོག་བུ་སྡུད་དུ་བཏང་ཿ འབངས་རྣམས་རྒྱ་ནག་ཙནྡན་ཤིང་འདྲེན་བཅུགཿ མངའ་འོག་ཀུན་ལ་
༼༡༨༥ན༽ཟངས་ལྕགས་ཀོ་བ་བསྡུསཿ ཡིག་མཁན་ཤིང་བཟོ་མགར་བ་མཉེད་མཁན་བཀོལཿ ཐམས་ཅད་དུས་གང་གཅིག་ལ་ཟིན་པ་བྱསཿ ལོ་པཎ་དབུ་རྩེ་རིགས་གསུམ་ལྷོ་ནུབ་མཚམསཿ སྒྲ་བསྒྱུར་གླིང་དུ་སྒྲ་རྣམས་ཐམས་ཅད་བསྒྱུརཿ རྒྱ་གར་མཁན་པོ་དཱ་ན་ཤཱི་ལ་དང་ཿ ཛི་ན་མི་ཏྲ་ཤཱི་ལེནྡྲ་བོ་དྷིཿ དྲ་ཝརྟ་དང་དྷརྨཱ་ཤཱི་ལ་དང་ཿ སུ་རེནྡྲ་དང་དྷརྨ་ཤྲཱི་དང་ཿ ཤཱཀྱ་ཤྲཱི་དང་ས་མནྟ་ཤྲཱིཿ ཤྲཱི་བ་ལེ་དྷ་ར་བཅུ་ཡིས་མ་མ་བྱསཿ ལོ་ཙཱ་གང་གི་བནྡེ་ཡེ་ཤེས་སྡེཿ སྐ་བ་དཔལ་བརྩེགས་ཅོག་རོ་ཀླུའི་རྒྱལ་མཚནཿ གཡུ་སྒྲ་སྙིང་པོ་དཀོན་ཅོག་འབྱུང་གནས་དང་ཿ རཀྵི་ཏ་དང་ཤཱཀྱ་པྲ་བྷ་བཿ ལྷ་ལུང་དཔལ་རྡོར་མཻ་ཏྲི་ཤྲཱི་བྷ་དྲཿ ལོ་ཀི་ཆུང་དད་བཅུ་ཡིས་སྤྲུ་གུ་བྱསཿ ལོ་པཎ་ཉི་ཤུས་བཀའ་འཁོར་རིམ་གསུམ་བསྒྱུརཿ དང་པོ་དྲང་དོན་བསྟན་པའི་མདོ་བཅུ་བསྒྱུརཿ བར་པ་ངེས་དོན་ཡུམ་སྲས་བཅུ་བདུན་བསྒྱུརཿ ཕ་རོལ་ཕྱིན་པ་མངོན་པར་རྟོགས་པ་བརྒྱདཿ དོན་ཚན་བདུན་ཅུ་ལམ་ལྔ་ས་བཅུ་དང་ཿ འགྲེས་རྐང་བརྒྱ་རྩ་བརྒྱད་ཀྱིས་གཞུང་རྣམས་བསྡུསཿ འཁོར་ལོ་ཐ་མ་ལངྐར་གཤེགས་པ་དང་ཿ ཕལ་ཆེན་དཀོན་བརྩེགས་དགོངས་པ་ངེས་འགྲེལ་དང་ཿ ལྷ་མོ་དཔལ་འཕྲེང་སེང་གེ་སྒྲ་སོགས་བསྒྱུརཿ མངོན་པ་གོང་འོག་གསུམ་གའི་བཀའ་ཆད་དེཿ རྒྱ་གར་ན་མེད་བོད་དུའང་མ་འགྱུར་རོཿ ཿབསོད་སྐྱབས་
༼༡༨༥བ༽བདུད་རྩི་ལྔ་པ་ཡེ་ཤེས་སྡེཿ རྣམ་གཟིགས་ཆོས་ཀྱི་མེ་ལོང་ཀླུའི་རྒྱལ་མཚནཿ འོད་སྲུང་སྟོད་པ་རབ་འབྱེད་ཡེ་ཤེས་སྡེཿ བཻ་རོ་ཙ་ནས་བོན་ཆོས་འདྲེས་མར་བསྒྱུརཿ བཻ་རོ་ཙ་ནས་རྩིས་སྨན་འདྲེས་མར་བསྒྱུརཿ བཻ་རོ་ཙ་ནས་མདོ་སྔགས་འདྲེས་མར་བསྒྱུརཿ མདོ་བསྒྱུར་ནང་དུ་ཡེ་ཤེས་སྡེ་ཞེས་བྲིསཿ སྔགས་བསྒྱུར་ནང་དུ་བཻ་རོ་ཙ་ན་བྲིསཿ བོན་བསྒྱུར་ནང་དུ་གན་ཇག་ཐང་ཏ་བྲིསཿ རྩིས་བསྒྱུར་ནང་དུ་ཨིནྡྲ་བཻ་རོ་བྲིསཿ སྨན་བསྒྱུར་ནང་དུ་ཆོས་འབར་བྱ་བ་བཅུགཿ མདོ་ཆོས་དགོངས་འགྲེལ་དང་བཅས་ཕལ་ཆེར་བསྒྱུརཿ བོ་དྷི་སཏྭ་སྦ་ལོ་ཁྲིག་ཞེར་དང་ཿ སྦ་ལོ་ཡེ་ཤེས་དབང་པོ་སྦ་རཏྣཿ སྦ་མི་ཡེ་ཤེས་འཇམ་དབྱངས་སྦས་ཐིར་ལེནཿ ལོ་པཎ་མཚན་བུ་རྣམས་ཀྱིས་བསྒྱུར་བ་ལཿ འདུལ་བ་ལུང་གཞི་དང་ནི་ལུང་རྣམ་འབྱེདཿ ལུང་གཞུང་བླ་མ་དང་ནི་ལུང་ཕྲན་ཚོགསཿ དེ་ལྟར་འདུལ་བའི་ལུང་ཆེ་ན་སྡེ་བཞི་བསྒྱུརཿ ལུང་གཞིའི་སྟོད་ཆ་རབ་བྱུང་གནས་མལ་གཞིཿ གཞི་སྨད་གསོ་སྦྱོང་གཞི་སོགས་བཅུ་བདུན་སྟོནཿ རྣམ་འབྱེད་དགེ་སློང་ཕ་མའི་ཁྲིམས་རྣམས་སྟོནཿ བླ་མས་གཞི་དང་རྣམ་འབྱེད་ཞིབ་ཏུ་འཆདཿ ཕྲན་ཚེགས་ཀུན་གྱི་མ་ཚང་ཁ་སྐོང་ཡིནཿ རྩ་བའི་ལུང་ལས་དགེ་སློང་སོ་ཐར་དང་ཿ དགེ་སློང་མ་ཡི་སོ་སོར་ཐར་པ་དང་ཿ གཞན་ཡང་ལས་ཆོག་ཀརྨ་
༼༡༨༦ན༽ཤ་ཏ་མ་དང་ཿ ལག་ལེན་མདོ་རྩ་ཚིག་བཅད་ཀ་རི་ཀཿ དགེ་ཚུལ་བྱ་བའི་ལས་དང་ལོ་དྲི་བཿ དེ་རྣམས་འགྲེལ་བཤད་ལག་ལེན་དང་བཅས་པཿ ལོ་པཎ་དགུ་ཡིས་བསྒྱུར་ཅིང་གཏན་ལ་ཕབཿ སྦ་བྱེད་འདི་རྣམས་གསང་སྔགས་ལ་མི་མོསཿ སློབ་དཔོན་པདྨའི་སྐུ་ལ་སྐྱོན་མང་བརྗོདཿ སྦ་བྱེད་དྲིལ་བའི་ཚིག་ཁྱམས་མང་དུ་བརྩམསཿ འདུལ་བ་མིན་པ་གཞན་ལ་དག་མི་སྟེརཿ ཨུ་རྒྱན་ཆེན་པོ་པདྨ་འབྱུང་གནས་དང་ཿ སྒྲ་རིགས་མི་འདྲ་ཉེར་གཅིག་ཤེས་པ་ཡིཿ ལོ་ཙཱ་མཁས་པ་བཻ་རོ་ཙ་ན་ཡིསཿ གསང་སྔགས་ནང་རྒྱུད་འབྲས་བུའི་མདོ་བདུན་བསྒྱུརཿ དེ་ཡང་སྐུ་ལྔ་མི་འབྱེད་པ་ཡི་མདོཿ གསུང་ལྔ་བྱེ་བྲག་མ་འདྲེས་པ་ཡི་མདོཿ ཐུགས་ལྔ་ཡེ་ཤེས་དག་པ་སྒོ་ལྔའི་མདོཿ ཡོན་ཏན་རྣམ་ལྔ་གོལ་ས་བཅད་པའི་མདོཿ འཕྲིན་ལས་ལྔ་ཡི་རྣམ་གྲངས་ངེས་པའི་མདོཿ ཁྲིམས་གསུམ་རྩ་བ་རབ་ཏུ་བརྟན་པའི་མདོཿ ལས་བྱེད་ལས་ལ་བཀོལ་བའི་མདོ་བདུན་བསྒྱུརཿ གསང་སྔགས་རྒྱལ་པོ་བཀའ་འདུས་སྤྱི་རྒྱུད་བཅུཿ སྒོས་རྒྱུད་ཉེར་གཅིག་གདམས་པར་བཅས་པ་བསྒྱུརཿ བདེ་གཤེགས་འདུས་པ་རྩ་བའི་སྤྱི་རྒྱུད་ལྔཿ སྒོས་རྒྱུད་བཅུ་དང་ལུང་ཆེན་ལྔ་སོགས་བསྒྱུརཿ བླ་མེད་དོན་རྫོགས་རྒྱུད་འགྲེལ་མན་ངག་བསྒྱུརཿ སྙིང་ཐིག་གསང་བའི་རྒྱུད་ཆེན་ཉི་ཤུ་
༼༡༨༦བ༽བསྒྱུརཿ ཁ་ཆེའི་པཎ་ཆེན་བི་མ་མི་ཏྲ་དང་ཿ ལོ་ཙཱ་གཉག་ས་ཆེན་ཛྙཱ་ན་ཀུ་མཱ་རསཿ རྡོ་རྗེ་སེམས་དཔའ་སྒྱུ་འཕྲུལ་དྲ་བ་དང་ཿ ཡང་ཕུར་མ་གཤིན་རྒྱུད་འགྲེལ་བཅས་པ་དང་ཿ སེམས་སྡེ་ཀློང་སེ་མན་ངག་སྙིང་ཐིག་བསྒྱུརཿ སངས་རྒྱས་གསང་བ་བཻ་རོ་ཙ་ན་ཡིསཿ སྒྱུ་འཕྲུལ་སྡེ་བརྒྱད་རྡོར་དབྱིངས་དགོངས་འདུས་དང་ཿ ཨ་ནུའི་མདོ་བཞི་དེམས་ལྔ་ལ་སོགས་བསྒྱུརཿ པཎ་ཆེན་ས་མནྟ་ཤྲཱི་ཤཱཀྱ་ཤྲཱིཿ དྷརྨཱ་ཤྲཱི་དང་ལོ་ཙཱ་སྐ་ཅོག་གཉིསཿ ཡོན་ཏན་སྙིང་པོ་ལེགས་སྦྱིན་ཉི་མ་དང་ཿ ཀླུའི་དབང་ཆོས་ཀྱི་ལྷུན་པོ་ལ་སོགས་པསཿ ལུས་སྤྱོད་གཙོ་བོར་སྟོན་པ་བྱ་བའི་རྒྱུདཿ ངག་སྤྱོད་གཙོ་བོར་སྟོན་པ་སྤྱོད་པའི་རྒྱུདཿ སེམས་སྤྱོད་གཙོ་བོར་སྟོན་པ་རྣལ་འབྱོར་རྒྱུདཿ གསུམ་ག་གཙོ་བོར་སྟོན་པ་བླ་མེད་རྒྱུདཿ ཕ་རྒྱུད་སྡེ་གསུམ་མ་རྒྱུད་སྡེ་ལྔ་བསྒྱུརཿ རྒྱ་ནག་ཧཱ་ཤང་མཧཱ་སཱུ་ཏྲ་དང་ཿ རྒྱ་ནག་མཁས་པ་སཾ་ཤི་ལ་སོགས་དང་ཿ རྨ་བན་རིན་ཆེན་མཆོག་སོགས་ལོ་ཙཱ་ལྔསཿ སྦང་སྐོད་ཕྱག་བརྒྱ་མདོ་སྡེ་རྒྱ་ནག་མཿ འདས་པ་པོད་གཅིག་ཕལ་ཆེན་རྒྱ་ནག་མཿ གསེར་འོད་དམ་པ་བདུད་ལས་རྣམ་རྒྱལ་དང་ཿ སྲི་གཟུངས་སྒྲོལ་མ་ལ་སོགས་མང་དུ་བསྒྱུརཿ དཱ་ན་ཤཱི་ལ་དྷརྨཱ་ཀཱིརྟི་དང་ཿ སྐ་བ་དཔལ་བརྩེགས་ཅོག་རོ་ཀླུའི་རྒྱལ་མཚནཿ ཀླུ་དབང་སྲུང་བ་
༼༡༨༧ན༽ཡེ་ཤེས་སྡེ་སོགས་ཀྱིསཿ འཇམ་དཔལ་རྩ་བའི་རྒྱུད་དང་རྣོན་པོ་དང་ཿ མཚན་ཡང་དག་པར་བརྗོད་པ་གླུར་བླངས་རྒྱུདཿ སྤྱན་རས་གཟིགས་ཀྱི་རྩ་རྒྱུད་པདྨའི་དྲཿ བཤད་རྒྱུད་དོན་ཡོད་ཞགས་པ་ལ་སོགས་དང་ཿ ཕྱག་ན་རྡོ་རྗེ་འཁོར་ཆེན་རྒྱུད་སོགས་དང་ཿ སྒྲོལ་མའི་རྒྱུད་ལ་སོགས་པ་མང་དུ་བསྒྱུརཿ ཁ་ཆེའི་སློབ་དཔོན་ཛི་ན་མི་ཏྲ་དང་ཿ དཱ་ན་ཤཱི་ལ་སུ་རེནྡྲ་བོ་དྷིཿ འབྲུ་ཤའི་བྲམ་ཟེ་ཆེན་པོ་ཨཱ་ནནྟཿ ལོ་ཙཱ་སྐ་ཅོག་ཞང་གསུམ་ལ་སོགས་པསཿ ཐེག་པ་ཆེན་པོའི་མདོ་སྡེ་ཕལ་ཆེར་དང་ཿ མདོ་སྡེ་གདམས་ངག་འབོགས་པའི་རྒྱལ་པོ་དང་ཿ གསང་བ་ཆེན་པོ་བརྟག་སྣལ་སོགས་པཿ ཁ་ཆེའི་འགྱུར་དང་འབྲུ་ཤའི་འགྱུར་མང་བསྒྱུརཿ བལ་པོའི་པཎ་ཆེན་ཤཱི་ལ་མཉྫུ་དང་ཿ བལ་པོ་བ་སུ་དྷ་ར་ལོ་སོགས་དང་ཿ ལོ་ཙཱ་བསྒྲགས་པ་སངས་རྒྱས་ཡེ་ཤེས་ཀྱིསཿ འཇམ་དཔལ་གཤིན་རྗེ་ཟླ་གསང་ནག་པོའི་རྒྱུདཿ ངས་ཆད་ནག་པོ་སྲས་དགུ་ཁ་ཐུན་སོགསཿ མ་གཤིན་ཕྲ་མེན་དྲག་སྔགས་མང་དུ་བསྒྱུརཿ དེ་ཡི་དུས་ན་རྒྱལ་པོ་བསྙུང་གིས་ཟིནཿ ཕན་ཐབས་ཇི་ལྟར་བྱས་ཀྱང་མ་དངས་པརཿ ཀག་བསྐོར་མོ་དང་བྱ་བརྩིས་པྲ་ཕབ་པསཿ སློབ་དཔོན་ནམ་མཁའི་སྙིང་པོ་སྤྱན་དྲངས་ནསཿ བྱིན་རླབས་བྱས་ན་ཕན་པར་འགྱུར་ཅེས་ཟེརཿ ཨཱ་ཙར་ཡེ་ཤེས་
༼༡༨༧བ༽དབྱངས་དང་གསལ་མཆོག་དབྱངསཿ དགེ་སློང་ནམ་མཁའི་སྙིང་པོ་སྤྱན་འདྲེན་བཏང་ཿ ཁྱོད་རང་གཉིས་པོ་སྔོན་ལ་སོང་ཞིག་གསུངསཿ བང་ཆེན་མ་སླེབ་སློབ་དཔོན་བསམ་ཡས་བྱོནཿ སློབ་དཔོན་རྗེ་ལ་བསྙུང་དམ་གསུངས་པ་ཡིསཿ ན་དང་ན་སྟེ་ཤི་ལ་ཐུག་ལ་ཁདཿ དགེ་སློང་ཕན་པའི་ཐབས་འདྲ་བདོག་གམ་གསུངསཿ བདོག་གོ་གསུངས་པས་ཡས་སྟགས་ཅི་འཚལ་ལགསཿ ཅི་ཡང་མི་འཚལ་གསོལ་ཐང་གང་དང་གང་ཿ ང་ལ་ཚོགས་སུ་དྲོངས་ཤིག་གསུངས་པས་དྲངསཿ སློབ་དཔོན་བཟའ་ཚོགས་བཏུང་བའི་རྣལ་འབྱོར་མཛདཿ མགོ་གསོལ་ཙམ་ན་བསྙུན་རྨེད་མཛད་པ་ལསཿ ད་ཅི་བས་ནི་ཅུང་ཟད་བདེའོ་གསུངསཿ སུམ་ཆ་གསོལ་ནས་ཡང་ནི་བསྙུན་རྨེད་པསཿ ཨེན་ཙམ་བདེ་བས་ལུས་པོ་ཡང་འདུག་གསུངསཿ རྒྱལ་པོས་སྐུ་ཡི་དམ་ཚིག་ཉམས་པ་སྐོངསཿ སུམ་གཉིས་གསོལ་ནས་བསྙུན་རྨེད་མཛད་པ་ཡིསཿ སྦྲིད་པ་གསུམ་བསྟུད་ད་ནི་བདེར་སོང་གསུངསཿ རྒྱལ་པོས་གསུང་གི་དམ་ཚིག་ཉམས་པ་སྐོངསཿ དེ་ནས་བཞེས་པ་ཀུན་གསོལ་ཟིན་པ་དང་ཿ བཀའ་འབངས་ཕྱི་མ་ཞིག་གིས་བསྙུན་གསོལ་བསཿ མི་བདེ་མེད་དེ་མིག་གཉིས་ཟུར་ཚ་གསུངསཿ རྒྱལ་པོས་ཐུགས་ཀྱི་དམ་ཚིག་ཉམས་པ་སྐོངསཿ གསོལ་ཐང་ལྷག་མ་མཛོ་ཞོར་རྒུན་འབྲུམ་དང་ཿ
༼༡༨༨ན༽སློབ་དཔོན་ཞལ་ཆབ་བཏབ་ནས་གསོལ་བས་དྲངསཿ རྒྱལ་པོའི་ཞལ་ནས་ལོ་མང་ན་བ་ཡིསཿ སྐྲ་འཁྲུ་མ་བྱུང་སྐྲ་འདི་འཁྲུ་དགོས་གསུངསཿ བློན་པོས་སྐྲ་བཁྲུས་མི་ཟིན་ཉི་ཐལ་ཟེརཿ སློབ་དཔོན་སེང་ལྡིང་ཕུར་པ་བྱིན་གྱིས་བརླབསཿ ཉི་གྲིབ་མཚམས་བཏབ་ཉི་མ་སྟོད་ལ་མནནཿ དབུ་བཀྲུས་ཟིན་ནམ་གསུངས་པས་ཟིན་ལགས་ཞུསཿ སློབ་དཔོན་ཞལ་ནས་བེའུ་ལུགས་ནད་ཆུག་གསུངསཿ ཕུར་པ་བཏོན་པས་ཉི་མ་དམར་ཧྲིལ་སོང་ཿ རྗེ་ཡིས་སྤྱང་དཀར་ཟ་འོག་བེར་ཀུན་ཕུལཿ ནམ་སྙིང་བཀའ་འཁོར་དམ་པའི་རྒྱུད་ལྔ་དང་ཿ ཁྲོ་བོ་སྨེ་བརྩེགས་མེ་ལྟར་འབར་བའི་རྒྱུདཿ འཇམ་དཔལ་གསང་རྒྱུད་གའུ་ནག་པོའི་རྒྱུདཿ རོ་ལངས་གསང་རྒྱུད་ཙིཏྟ་གསང་རྒྱུད་བསྒྱུརཿ མཁས་པ་ཆེན་པོ་སརྦ་ཛྙཱ་དེ་བཿ ལོ་ཙཱ་སྐ་བ་དཔལ་བརྩེགས་རཀྵི་ཏསཿ བྱང་ཆུབ་སེམས་པའི་སྤྱོད་འཇུག་ལ་སོགས་བསྒྱུརཿ པཎ་ཆེན་པདྨ་ཀ་ར་བྷ་དྲ་དང་ཿ ཛྙཱ་ན་གརྦྷ་སརྦ་ཛྙཱ་དེ་བཿ ལོ་ཙཱ་སྐ་ཅོག་ཡེ་ཤེས་སྡེ་སོགས་ཀྱིསཿ དབུ་མ་ཚོགས་གསུམ་དགོངས་འགྲེལ་བཅས་སོགས་བསྒྱུརཿ ཤཱཀྱ་སིངྷ་པྲཛྙཱ་ཝརྨ་དང་ཿ ཛི་ན་མི་ཏྲ་ཤཱི་ལེནྡྲ་པོ་དྷིཿ ལོ་ཙཱ་ཆེན་པོ་བནྡེ་ཡེ་ཤེས་སྡེསཿ བྱམས་པའི་ཆོས་ལྔ་འགྲེལ་བར་བཅས་པ་དང་ཿ ས་སྡེ་ལ་སོགས་བསྟན་བཅོས་མང་དུ་བསྒྱུརཿ ཛི་ན་མི་ཏྲ་ཤཱི་
༼༡༨༨བ༽ལེནྡྲ་བོ་དྷིཿ མཁས་པ་ཆེན་པོ་དཱ་ན་ཤཱི་ལ་དང་ཿ ཞུ་ཆེན་ལོ་ཙཱ་བཻ་རོ་ཙ་ན་ཡིསཿ བསྟན་བཅོས་བྱེ་བྲག་བཤད་མཛོད་ཆེན་མོ་ནིཿ སུམ་བརྒྱ་བསྒྱུར་བའི་དབུ་བཙུགས་བསྒྱུར་འཕྲོ་བཞགཿ རྒྱ་དཔེ་ཉིད་ནི་བསམ་ཡས་དབུ་རྩེར་བཞུགསཿ ལོ་པཎ་ད་ལྟ་བཞུགས་དང་ཕྱི་རབས་འབྱོནཿ བཟང་ངན་འགྲན་ཕྱིར་བཤད་མཛོད་ཆེན་མོ་བཞགཿ དེ་བཞིན་དགྱེས་རྡོར་འབུམ་ལྔ་བདེ་མཆོག་འབུམཿ དུས་འཁོར་རྩ་བརྒྱུད་སྟོང་ཕྲག་བཅུ་གཉིས་པཿ ཕུར་པ་བྱི་དྱོཏྟ་མ་འབུམ་སྡེའི་རྒྱུདཿ འཇིགས་བྱེད་རྟོག་པ་སུམ་བརྒྱ་སོགས་མ་འགྱུརཿ རྒྱས་པ་འབུམ་འཇུག་མ་ཚར་ཀླུ་ཡུལ་ལུསཿ འདས་པ་མེས་ཚིག་འགོ་མེད་འཇུག་མེད་བསྒྱུརཿ མདོ་སྔགས་འགའ་ཞིག་རྒྱ་གར་བཀའ་ཆད་ནསཿ བོད་འགྱུར་མཇུག་མ་ཚང་བ་རེ་ཙམ་ཡོདཿ དེ་བཞིན་རྩིས་སྨན་གྲངས་ལས་འདས་པར་བསྒྱུརཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ སྒྲ་བསྒྱུར་གླིང་དུ་སྒྲ་བསྒྱུར་བའི་ལེའུ་སྟེ་གྱ་བཞི་པའོཿ ཿཐ་ཐ་ཉྲ་རྒྱ་རྒྱཿ ཿ